Bilangan 6 - Eipomek

Yata nang do nirya, ‘Nara Allah Yahweh el tibuk, malye ning nirya bataknirye, Allah ati el pil dopnirye, pia telebuk unamne,’ tenebikce nang nirya ara, “Wininamake,” nyabuk yupu

¹ Allah Yahweh arye Musa biti nyabuk.

² “Aning-aninguk pia talibuka unamnyake,” nyapdeipman yupu ara, Musa ance, sik Israel ninye dam binuka nyapnalyame. Ara, winipmanto, sal do, kilapu do, nyalin yupu deice arye, “Allah el piluk talibuka donamne,” nyaplinye bira, dipkoprob el anye bira, Nazir Nyalamapnye biti, yuk talye ning ap, malye ning nirya ap, bataknirye Allah Yahweh el ninguk wininamake. Allah Yahweh, el pil donanye kintinibuka unamake.

³ Sal do, kilapu do, anirya ara, ‘Allah el ninguk unamabeʼ tenen, talye ning ap, malye ning ap bataknamake. Tonda, anggur mek ap, yuk yu yala mek nirya ap ara, kum dinamake. Tonda, anggur tapu duk arye kintinibikirye yu mek bukni, anggur cuka ap, yuk yala duk arye kintinililamakcuka yu mek ap ara, kum dinamake. Tonda, anggur duk winiryuk dakmace ning babye, min arye dakuka deiamikiba, sisal selamle ning babye, kum dinamake.

⁴ Atonun, anggur yo deice arye dobuka kintininyak mek do, el anggur yo, yala bongolamle ning do, anggur yo duk bola kobikirye, alip bola dilamak ning do, tonda, anggur yo duk arye kintininyak ning yala-yala nirya, pia kum dinamnyake.

⁵ Anyalin yupu nyanamak ninye ara, “Malye ning ap, yuk talye ning ap nirya bataknirye, Allah el ninguk unamabe. Allah el piluk donamabe,” nyalin yupu deice arye nyabuka, kintinip deibikce talak nirya ara, el anye do, akil do, kisok potong babye, sal ara bam potong babye, pia kum konamake. Sik anang ara, talye ning nirya batakikirye, Allah el tibuk unamak talak nirya ara, pia teleb kibuka unamake. Malye ning nirya batakikirye, pia teleb lek nanguk unamake. Tonda, el si erena ati, sik kisok potong babye, bam potong babye batakliba, cang dolonamle. Ara, anye el damnye birye nyalin yupu nyaplye deice arye, yupu sekna atonun unamla ati batakanamlule. Sik nyalin yupu deice arye, ‘Atalak nirya, Allah el ninguk unamne,’ nyalamaka atonun, ara, aninguk unamake. Atalak arye kum bataknamake.

⁶ Anye, el nyalin yupu deice arye, ‘Atalak nirya ara, Allah el ninguk unamne,’ nyalamlya ati, aunamle talak ara, moubuka unamle. Tonda atalak ara, dipmalinye, deipmace dam ton kum dilyanganamlule.

⁷ Tonda, anye el li do, el lin do, tonda el kayapu nang ara, kil do, sal do, dipmacak babye, kum dilyanganamlule. Dipmace ninye sik nong dam yalyopura, el mining nong ati, malye kililalule. Anya arye, el nong deice malye updeipdalyak tenena ati, dipmace ninye dam pia kum yanganamlule. Tonda, sik aNazir nang ara, nyalin yupu deice arye, ‘Nara talye-talye ning nirya bataknirye, Allah el ninguk pia unamne,’ tenenyak nang unyaka ati bikilin ning ati, sik kisok potong deice aulule. Ati, aning ara pia kum konamake.

⁸ “Allah el ninguk unamna ati, pia teleb leknye unamne,” nyabuka, nyalin yupu deice arye nyapdeiamikce talak nirya ara, Allah el kanye deilin nanguk, Nazir nanguk unamake. Tonda, malye ning nirya batakuka, pia lek ubuka unamake.

⁹ Ati, winipmanto, “Allah el ninguk unamne,” nyabuka nyalin yupu nyapdeiamlinye Nazir nang ara, el mangkau arye banmalibuk, el dam talye karin arye yuknye ton dipliba, Nazir nang arye adipmalinye el nong dam bilyopura, adice arye, el akunum malye updeipdaliba, Allah arye, ‘Aning ara malye,’ tenelule. Ati, aNazirnye birye, ‘Allah el ning unamneʼ tenen, el kisok potong pia kum kolamlye babye, akunum malye upmalule. Winiplya arye, malye updeipdalyopura, asum arye nukuka daunmali bukni, like tekbarye sum akunum uplyopura, el kisok potong kopnamle. El kisok potong koplya deice arye, el nong nirya ara, tuba tamubuka teleb unamle. Winiplyeura, Allah arye, ‘Wini talak anye akunum teleb unmale,’ tenenamle.

¹⁰ Winyamlya ani, like pinbarye sum akunum kiplyopura, el anye bira minopce yalma, maka bitinye do, akumopura, Bik maka atonun maka, si ara, Tekukur lon maka bitinye dobukapmunce bobinuka, Allah arelbana ati, Imamnye el unmalyak, Allah ap, ninye ap eldana ati, dolamik tenda aik bublan dam bobanamlule.

¹¹ Imamnye birye, maka tonok doplirye, anye el malye uamlye ning, ‘Allah arye kilipnilirye, kum daneipnamleʼ tenen ati, bobinuka, Allah ati arenamle. Ton maka ara, ‘Allah el si erena ati, amaka obuka, mesba deice uku dongopliba, Allah arye aning eiplyopura, anye el malye upmalye ning ara, kum daneipnamle. Ara, mangkau arye, akunum dipmalinye dam binmalya deice arye, malye kipdeipdanmalye ning ara, kum daneipnamle. Winiplye sum aryuk, anye elda, tuba tamubuka, “Nara Allah el ninguk unamne, pia leknye unamne,” nyabuka nyalin yupu deice arye, akunum nyaplyopura, asum aryuk dipdongobuka do unamle talak nirya ara, el kisok potong ara, pia kum konamlule.

¹² Tonda, el anye bira, asum arye nukuka, dounamle noutam ara, tuba tamubuka, ‘Allah el ninguk unamneʼ tenen, kintinibuka unamlule. Tonda, min arye “Winibuk talak ara, Allah el ninguk unamne,” nyabuka nyalin yupu deice arye nyapdeiamukce, nukuka daulamuk bukni, mangkau arye, dipmoknye dam biyuk talak ara, akunum malye ubuka deice arye, atalak nirya akunum basamuka ati, tuba tamubuka teleb upmalye sum tineiplirye, kum nukunamle. Min arye nyabuk ning ara akunum sirya dakmale. Atalak, malye wamlye ning pununa ati, tuba tamubuka teleb upmalye sum arye deiyok kouplirye, ‘Atalak nirya ara, Allah el ninguk unamne,” nyabuka nyalin yupu deice arye, nyaplyopura, asum arye dipdongobuka nukunamle. Tonda, asum aryuk, sikce keting tamun tonok akunum nenmalye domba basam yim boyanuka, Allah ati arelyanganamlule. Aning arepnamak ning ara, ‘Allah arye na malye wamse ning nirya ara, kum daneipmanilʼ tenen, adomba dobuka, Allah ati arepnamake.

¹³ Ura, sik Nazir nang ara, aning ton nirya winipnamake. Winipmanto ara, el anye birye, “Winiplye talak ara, Allah el ninguk unamne,” nyabuka, nyalin yupu nyapdeipmalye talak akunum sirya uplyopura, Allah ap, ninye ap eldana ati dolamak tenda aik deibik ning dam, anyaik wekelban bisik bublan dam ara, binuka tiknamake. Abublan dam ara, Allah Yahweh, el si erena ati, teleb aren ning ton arepnamake. Sikce Allah ati arepnamak ning ara, ani. Ara, ‘Na min arye nyapse touk, malye ning ap, talye-talye ning ap, dipkoprob arye bataksi, Allah el ninguk ulamse talak ara, akunum sirya dakmaleʼ tenen, ati arepnamake. Elce Allah ati arenamle ning ara, ani.

¹⁴ ANazirnye Allah dam bobikce talak ara, aweilamlye kam ning winilye ara ani. Tonok ning ara, keting tamun tonok deice arye akunum nebuk domba basam yim, el bol pia teleb ninguk boyanuka, arelyanganamle. Aning ara obuka, Allah si erena ati, mesba deice arye, uku dongopnamake. Tonda, el anye malye wamlye ning kilina ati, domba basam kil, nong pia teleb ninguk, keting tamun tonok akunum nebuk domba basam tonok boyanuka, arelyanganamlule. Aning ara atonun, anye el malye wamlye ning kiliplirye, Allah ap, el ap, teleb ubuka eldana ati, adomba basam kil boyanuka, arelyanganamlule.

¹⁵ Tonda, aining ning boyangalye talak aryuk, nena kum roti dabikirye dobuka, tapu arye wibik aling, el si keranjang arye libuka deipmalye ning ap, tonda roti kwaning el si kue, ara tepung pia teleb ning ap, minyak zaitun ap, tabakuka dapmakce ning ap, tonda nong pia mitang ning bukni, kat kue dapmakce ning ara, minyak zaitun dobuka, akue bol deice likuka deipmakce ning ap dobuka, aning-aning nirya boyanganamlule. Tonda, Allah arye, “Anggun malye updalum ning kum kilina ati, gandum atonun ning ap, yuk din ning ap, din mek yala yuk-yuk ning ap, aning nirya ara, na si erena ati, arelyanganamnulume,” nyapdeibuk touk, aning ton boyanganamnyake.

¹⁶ Ura, aNazirnye birye, aning nirya boyanuka areplyopura, imamnye birye aning-aning nirya bobinuka, Allah dam arenamlule. Min yuma bobinuka arenamle ning ara, anye el malye upmalye ning kum danalina ati, arenamle. Aning akunum areplyopura, bitinye arepnamle ning ara, mesba deice arye uku dongopnamlye ning arepnamlule.

¹⁷ Aning arepnamle ara, imamnye birye, ‘Allah ap, anye ap, tuba tamubuka teleb ubuka neika unamdakʼ tenen ati, domba basam yim arepnamlule. Aning arepnamle talak aryuk, keranjang aling arye lipmalye, roti kwaning nena kum ning ap, mitik kue lipmalye ning ap, imamnye birye, Allah ati arelbanamlule. Tonda, Allah arye, “Anggun malye updalum ning kum danalina ati, gandum atonun bukni, yuk yala ning ap, yuk din ning ap, din mek yala yuk-yuk ning ap, aning nirya ara, na si erena ati, arelyanganamnulume,” nyapdeibuk touk, aning ton boyanuka, Allah ati arepnamlule.

¹⁸ Imamnye birye, Allah ati binuka, aning-aning nirya akunum areplyopura, ‘Allah el ninguk uname,’ nyabuka nyalin yupu deice arye akunum nyapdeiamik nang, sik Nazir nang ara, Allah ap, ninye ap eldana ati, dolamik aik bublan dam aryuk, sik potong nirya konamnyake. Akopnamak potong, el malye umlye ning ara, Allah ap neika teleb una ati, kam ning obuka, mesba deice uku dongobicak uk, anang sik kisok potong babye, asukumuk u dongonamnyake.

¹⁹ Aning akunum winibicopura, domba basam yim opmalinye bira, el basam taruk bobinuka weik panci mek buppu akunum yupmakce ning ap, tonda, “Allah el ninguk unamne,” nyabuka nyalin yupu nyapdeipmalye nang arye, nena kum roti kwaning tonok ap, weik kue tonok ap, tonda kue mitik ning tonok ap, libuka deipmalye keranjang aling noutam arye kintinipmacak, Imamnye birye dopropnamlule. Sik Nazir nang, sik kisok potong akunum kopmace nang ara, imamnye birye, aroti kwaning winilye ara, sik taruk tatang deice deipliba, bopnamnyake.

²⁰ Imamnye birye adoplye ning ara, ‘Aning nirya, Allah el ning ati, arepnunʼ tenen, kintinibuka boplirye, Allah el urasin dam binuka, erepdeiplirye peterenamlule. Apil doplirye, aupmalye din ning ara, din lek teleb ninguk ulule ati, adin ning ara, imam nang sik tonok dinamnyake. Tonda, domba basam el tarama ap, yan ap ara, dobuka imam nang sikuk arenamlume,” nyapdeiamuk touk, minopce dobuka, imam nang arenamlume. Aning akunum winipmunyopura, Allah aik pil donamne nyamlinye bira, anggur mekuk dobuka dinamlule.

²¹ Na Allah arye nyapsine. “Aning-aning nirya wininamlume,” nyapdeipmasin ning ara, Nazir nang sikti, nyapne. Sikce anyapse ning nirya ara, minopce talibuka unamnyake. Ara, sikce, “Winibukap noutam nirya ara, malye ning ap, talye-talye ning nirya ara, bataknirye Allah el ninguk unamne. Pia teleb leknye unamne,” nyabuka, nyalin yupu deice arye nyanyak nang ara, aning nirya adiparyuk wininamaka ati nyapsine. Sikce wini talak nyapmasin ning nirya, talibuka unamnyake. Bukni, anyalin yupu nyapdeiamice nang arye, “Allah Yahweh ati, winibuka-winibuka unamake. Tonda el arena ati, winibuka-winibuka boyakirye, arenamne,” nyabicopura, talye kum nyanamnyake. Ayupu nyapmakce touk wininamnyake. Tonda, narye “Aning arepnamninyake,” nyapdeipse, ninguk boyanganamniyake. Sik kanye aryuk, ‘Aning ton tabakuka arepnamne tenebikirye, nyabicopura, aning babye teleb uka. Bukni, aning ara sik kanye arya. Yuk ning ton aupmalyopura, telebe. Aning kum uaplyopura, tabakuka kum arenamnyake.

Allah arye, el si eren aik pum tam, pil dona deiyok nang ati, nyabuk yupu

²² Allah, el si Yahweh arye Musa biti ayupu nyapdeibuk.

²³ “Ance na nyapdeipnukin yupu ara, Harun ap el mapu nirya ap ati, nyaplyame. Na Allah arye, Israel nang kili sal ati, ‘Teleb kipdeipnamne’ tenen, nyanalam yupu ara, nyapnukine. Harun ap el mapu ap sik nirya ara, Israel nang dam bikirye, teleb un yupu uk, binuka nyalinamake. Ayupu ara, nyanamake.” Allah arye, Musa biti nyabuk.

²⁴ “Anggun Israel kili sal ati, Allah el si Yahweh arye nyapdeipmasile. Allah arye pia kum bataknamsile. Anggun dam ulirye, ‘Na mapu ati aning-aning teleb kipdeipnamne’ tenen, teleb kibuka melinamsile. Ara, Allah arye, ‘Na mapu ati ikin uplyak’ tenen, pia kalikuka disilirye, pia melibuka unamsile.

²⁵ Tonda, Allah arye anggun dam ulirye, teleb kibuka melisiliba, anggun winin ning nirya telebuk unamle. Tonda, anggun malye ululum ning ati, adiparyuk wenepsuturye, ikin ning, anggun nong deice deipsutu bukni, el kanye namin arye, tenesilirye, teleb kebuka melinamsile.

²⁶ Tonda, Allah anggun dam ulirye, anggunti pia bico tenebuka melipsilirye, kanye dukulongon ning arepsiliba, anggun winin ning nirya pia telebuk unamlume. Anggun ap, Allah ap, yuk nang ap, teleb ubuka neika unamlume. Tonda, ‘Anggun ilil asa una kumce, kanye deibuka, teleb kebuka unamlumʼ tenen, Allah arye anggunti, melipsiliba, anggun kanye nirya dakeiyam asa telebuk unamlume. Israel kili sal dam ati ayupu nyapnamlyame,” Allah arye Musa biti nyabuk.

²⁷ Ati ara, Harun ap, el mapu ap, na si deice arye, sik Israel ninye ati, ‘Allah arye, teleb kipdeipsilirye telebuk unamlumʼ tenen, teleb yupu nyabikirye, anggun nong deice deipsikcopura, na Allah arye anggun nirya ati, pia teleb updeipsinirye, melisinyeba, teleb kibuka unamlume. Allah arye ayupu nyapdeibukba, Musa birye binuka sik Israel ninye ati, laka nyabuk.