Bilangan 5 - Eipomek

Malye suse dilamlye nang ara,” Wininamlule,” nyabuk yupu

¹ Allah Yahweh arye, Musa biti nyabuk.

² Musa ance anyapdeipman yupu nirya ara, sik Israel ninye dam binuka nyapnulyame. Ara, sik Israel ninye malye korot suse, sik bol deice, mambul weik suse dilamlye nang do, malye suse dilamlirye, yabung ap, ining ap, balamle malye suse dilamlye ninye do, tonda ninye dipmalinye, el bol pipmalinye do, sik anang nirya ara, Israel ninye, sik tia ati, dolamak tenda aik dobuka ulamunyak arye kisikdakuka, yuk karin sukum buru tam dopkwetemunyeba, unamlule. Ara, ‘Amalye ning ara, yum nang, sik nong dakdonopbikcakʼ tenen ati, Israel ninye ap, asuse dilamlye ninye ap, ansinibuka kum unamake.

³ Sik atonun suse dilamlye ninye ap, malye ning bol pin ninye ap ara, “Sik nirya, sal babye, kilapu babye, minopce yukak binuka unamlume,” nyapdeipnamlame. Deiyok ara, ani. Adeice arye, na Allah ap, sik ap, neika unmapyak, ‘Malye kipdeipsicakʼ tenen, sik malye ning uamlye ninye ap, akunum dibin ninye, sik bol pipmalye ninye ap ara, minopce yakmunyeba, buru tam binuka unamnyake. Allah arye nyabuk.

⁴ Israel ninye arye, Allah el nyabuk yupu kekebikce, anyabuk atonun ubuka, yuk ninye ati, malye weik suse dilamuknye birye, yuk nang ati, dakdongopmanto ninye ap, dipne nang sik bol pin ninye ap ara, yakuka buru tam yukak dopkwetebik. Ara, Allah elce nyapdeipmok touk, aning uamuk ninye babye, kilapu babye, buru tam dopkwetebikba, yuk sukum binuka ulamik.

Tonye birye, yuknye biti, malye uplyeura, aminyan yupu lipsisiknamik ning ati, nyabuk yupu

⁵ Allah Yahweh arye, Musa biti nyabuk.

⁶ Aning-aning nirya winina ati, Allah Yahweh arye Israel ninye ati, “Wininamlume,” nyapdeibuk. Winipmanto ara, anggun kan-kan noutam arye, tonoknye birye do, tonok kil arye do, na nyapdeipse yupu kum kekeplirye, el kwit dam ati, malye uplyopura, el anye do, akil do, minopce akunum malye upmalule. Anya arye, narye aninye malye winipmakce ning ati, wenepnamnarya.

⁷ Minyuma ara, anye minopce, el malye upmalye ning ati, “Na malye upmane,” nyabuka lake nyaplirye, tonda, ‘Na malye winipman ati, na malye upman ara, punupnuneʼ tenen, el kwit dam bobinuka arelbinulyopura, yate ning do nirya, malye updeipmalye ning ap, tonda tabakuka, dua puluh persen ton (20%) tabakuka bobilirye, el kwit binyak arenamlule.

⁸ Bukni, el dam malye uamlinye akunum dipmaliba, elti tamubuka arepmanto kum uplyopura, elce anye biti, mining dam kum areptue. Tonda, aning atonun, el malye updeipmalinye, elce deiamlye mapu babye, tonda, anye el tam nang babye, kam kum ulamikcopura, amalye uamlinye pununa ati, malye upmalya deiyoknye birye, Allah el dam pununa ati, bobinuka, arelyanganamlule. Aning ara, Imam nang, sik dina ati yanuka arenamlule. Amalye uamlye ning pununa ati, boyalinye biti nyapne. Tonda, anggun malye upmunyeura, ‘Allah arye nun malye unyap ning namin kibuka, lyepsutu’ tenen, domba basam boyanuka, na Allah ati arelyanganululum ning ap, narye nyapse ning tabakuka boyamunce, sik imam nang dam yanuka arelyanganamlume.

⁹ Israel yala ninye arye, Allah Yahweh kibuka, si erena ati arenyak ning, yala-yala nirya dolon nang ara, Allah si eren aik talibuka, pil donyak nang, sik dam bobikiba, sik aimam nang aryuk, aning nirya dolonamnyake. Aren ning nirya ara, sik ninguk ulul atia.

¹⁰ Ara, ninye arye Allah ati, kintinbuka arelyanganyak ning ara, Yata Israel ninye arye do, sikce arenamniyak ning yala-yala nirya ara, Allah el ninguk ulule. Bukni, aning nirya ara, ninye arye Imam nang, Allah aik talibuka pil don nang ati, arelyanganamnyake. Aning nirya ara, sik imam nang aryuk dolonamnyake. Aning ara, sik ning uka.

Ninye domice kil bukni, elce yuknye ap, neika malye updicopura, sik wenena ati, “Wininamlume,” nyabuk yupu

¹¹ Allah Yahweh arye, Musa biti, “Israel ninye dam bimince nyapnulyame,” nyabuk.

¹² “Aning-aning nirya ara, wininamlyame,” nyapdeipne ning ara, ance sik Israel ninye dam binuka nyapnalyame. Ayupu ara, ani. Ninye domlye kil bukni, el akanye biti, dungnubukaplirye, ninye yuknye ap, neika ulamdikirye, malye uplamlyopura, dipkoprob akil el doplinye biti, akunum malye kililamle.

¹³ Ara, akil ap, yuk talinye ap, neika mapdikirye, malye ulongolamlye ning ati nyapne. Akil ara, dipkoprob akunum malye kipdeipdanamlul bukni, elce el doplinye biti, laka kum lelule. Tonda, akil ap, yuknye ap, neika malye ulamdice talak ara, yuk talye ulamice nang ton, kum elinyak bukni, dipkoprob akunum malye kililadurake.

¹⁴ Tonda amalye wamlye kil, el domlinye, el talima pum tam arye, ‘Se, na domse kil ara, yuknye ap malye winiprike tuba tenilamlirye, akil ati malye tuba bolamlya ati, anye birye el domlye kil bobuka, Allah arena ati, imam deiyoknye dan bobinamle. Aning atonun ton, anye bira el domlye kil, malye kum winyamlibuk, tonda bita bikna kum bukni, elce, ‘Se, na kil ara, yuknye ap ururak do? Elda akunum malye kipdinmal do?’ tenen, aninguk malye kanye bobuka, tupa-tupa tenilamlyeura, elce el domlye kil bobuka, Allah arena ati, imam deiyoknye dam bobinamlule.

¹⁵ Anye birye, el kil bobuka, Allah ap, ninye ap, elana ati, tia ati doltakna tenda aik, talibuka pil don nang, sik dam boyanganamlule. Imam deiyoknye dam bobinulye talak ara, apil donamlule. Ara, ‘Allah arye, na kil malye winipmal ning ati, namin kiplirye, kum daneipnamleʼ tenen, Allah arin ning ton boyanamlule. Boyanamle ning ara, ani. Gandum duk tekikirye, sice atonun delinyak ning, el si terigu gandum 2.2 liter, memebuka boyanamlule. Atepung ara, minyak zaitun ap, tonda siltong teleb nyalamle ning, el si aram kemenyan ap, min kum taplak deipmace, diparyuk bobuka arelyanamlule. Deiyok ara, anye birye gandum dobuka, Allah ati arepnamle ning ara, el kil malye winyamlye ninguk, tamubuka teninauk, ‘Malye winiplume,’ nyanamle ning ati winipnamle. Aning deiyok ara, akil arye, pia malye winipnamle ning ara, tamubuka tenen ning ati, winipnamle.

¹⁶ Amalye winipmalye kil, el domlinye birye, aning nirya akunum winiplyopura, Allah Yahweh ap, ninye ap, elan aik pum tam pil dona deiyoknye birye, el kil ati, “Anda Allah dam yanuka tiknulyame. Winibuka yanatikmince, an urasin dobuka, Allah el bulul tam deipnulyame,” nyapnamle.

¹⁷ Allah el si eren aik pil dona deiyoknye birye, mek makau, el si mangkok, tuku arye dobuka, memenyak ning bobuka, amakau pum tam ara, malye ning mitik tonun ton, pia kum uamlye mekuk kwebuka, amakau pum libuka delinamlule. Winiplyopura, Allah si eren aik amsunak arye, butbuta saklamlye tuku, mitik tonun dobuka, amek makau pum tam lilongonamlule.

¹⁸ Winiplyopura, adiparyuk akil el potong deice ara, taruk arye malye kipdeipnulule. Winiplirye, akintinipmalye mek dobuka, akil kisok deice dikilongonamle. Tonda, akil elakanye birye, kisin yupu nyapmalya ati, akil malye winipmalye ning ati, dekna bobuka yanmalye tepung ara, el kil taruk deice deipliba talinamle. Bukni, imamnye bira, pia sik weik mek kwebuka, el taruk deice arye talinamle deice arye, bol pipliba, akil dam ikin ning yanamle. Ara, akil el malye uamlye diparyuk, ‘Na malye kum winyamse,’ nyabuka kwinisa domlya ati, supliba akil dam ikin ning yanamle.

¹⁹ Amek makau akunum dobuka tiklyopura, Imamnye birye, adiparyuk akil ati, nyapnamle. “Na dipkoprob nyapkine. Anda dipkoprob yupu nyapnulam do? Tilila yupu nyapnulam do? Anda ninye yuk nang ap, ton neika epdanuka mapmalum deice arye, pia malye weik kum winipdanmomba, ayu mek dipmalama ara, pia ikin ning an dam kum yanamakile. Ara, dipkoprob yuk nang ap, neika kum maplumce, malye kum winipdanaminyeura, anya arepnukin sik mek ara, dipminye babye, asik mek deice arye kum supnamkila ati, pia ikin weik ning ara, an nong deice kum yanamkile.

²⁰ Bukni, anakanye akunum domkuka ati, elda an deiyoknye ulule. El amu tam atonunuk ulamlum talak bukni, anda kwinisa doplumce, ninye yuk nang ap, neika akunum mamunyopura, an adiparyuk, an nong koproba ati, akunum pia malye kipdalume. Tonda anye birye, an ap neika mamduma ati, el nong koproba babye, malye akunum malye kipdayuke.

^21-22 Atalak ara, imamnye birye, akil ati nyapnamle. “Anda nyapnulyame. ‘Narye dipkoprob malye winyamse bukni, kwinisa domse. Wini talak ara, narye, ‘Kume, lak kum nyapnune,’ tenepnirye, tilila yupu deice aryuk nyapnune,’ tenepnirye, tilila yupu nyapnyopura, Allah arye, amek dipnuna deice arye supniliba, imun kanye bon ning, na nong deice deipnutue. Ara, teleb uka. Ati ara, narye tilila yupu nyapnyopura, Allah arye nati ara, dipkoprob supnutuba, imun kanye weik bon ning, na nong deice deipnutue. Aning ara, an bidamnye arye nyapnulyame.” Imam deiyoknye birye, akil ati nyapnamle. Tonda, Imamnye birye, akil ati nyapnamle. “Anda tilila yupu nyapmince, sik mek dipminyopura, Allah Yahweh arye supkiliba, an tam nang nirya arye anti, ‘Kume, akil ara, pia malye weik winilule. Yata nang do nirya, akil arye, malye weik winilamuk touk, winibipyeura, Allah arye adiparyuk opsutue,’ nyanamake. Tonda awininyaka noutam arye, anda suna deiyok ning dopropnalame. Ara, sik mek dipminyopura, aning arye, supkilyeura, an mun weik diklirye, uk dinamkile. Tonda, an nong noutam mi bominye sukum ara, malye weik upkiliba saklyopura, mapu ton pia deipmanto kum unalame.” Imam deiyoknye birye, akil ati nyapnamle. Nyaplyopura, akil arye adiparyuk nyapnamle. “Yo anyapmanilam touk winipnilyopura, teleb uka. Narye tilila yupu deice arye nyapnyopura, ance wini talak nyapmanilam yupu nirya ara, dipkoprob upnamnile. Allah arye, na wenena ati supniliba, imun kanye weik bon ning, na nong deice yanuka upnilyeura, teleb uka. Amin, Amin. “Akil arye, ayupu adiparyuk nyapnamle.

²³ Nyaplirye, akil arye nyapmalye yupu nirya ara, Imamnye birye kekeplirye, amsuna ati, deiyok yupu nirya ara, potong porolamle sapi bol deice sekuka delinamle. Winiplyopura, Imamnye birye, sik mek arye kwebuka kintinipmalye ning ara, dobuka sapi bol deice sulongon yupu sekmalye mek likliba, amek saklirye, sik mek makau pum tam weknamle.

²⁴ Asulongon yupu, sapi bol deice mek likliba, sik mek makau pum tam akunum weklyopura, imamnye birye, ‘Malye upmal do, kum do?’ tenen, sulongon sik mek ara, dobuka akil ati, “Diplyame,” nyapliba, akil arye amek dobuka diplye talak ara, akil el mun noutam weknamle. Akunum weklyopura, akil dipkoprob malye winipmaliryuk, tilila yupu deice arye, “Na kum winipse,” nyabuka, kwinisa doplyopura, sik mek arye, el nong nirya weklirye, uk weik dinamle. Bukni, akil arye tilila yupu kum nyaplyopura, uk kum dipnamle. Akum bukni, telebuk tuba unamle.

²⁵ Atalak ara, akil el akanye birye, ‘Na kil ap, yuknye ap, neika mapmarak do, kum do?’ tenen, akil ati malye kanye baplirye, yu weik uamlye ning pununa ati, Allah ati arepnunʼ tenen, tepung bobuka, yana arepmalye ning ara, akil el taruk arye talipmalye ning ara, imamnye birye tamubuka doproplirye, ‘Allah arepnunʼ tenen, lak kilin ati, Allah el urasin dam binuka ereipnamle. Aning ara, Allah Yahweh ati, el dam binuka, laka kilina ati ereiplyopura, atepung uku dongona ati, mesba akunum kintinibuka deibika damuk bobanamle.

²⁶ Bobilirye, atepung noutam ara, imamnye birye taruk tonok arye, mitik anun bobuka doplyeura, ‘Allah ati akunum arepmangu ning, tupa tenenamle' tenen, dopropnirye, ‘Allah ati arepnune,ʼ teneplirye, aning dobuka arepliba, deimicak mesba deice uk, bobilirye, uku dongopliba, uku arye atepung nirya dipnamle. Winiplye talak ara, suna ati, sik mek dobuka kintinipmace ning ara, akil arepliba, akil arye, sik mek adiparyuk dipnamle.

²⁷ Imamnye birye, sik mek dobuka, akil ati areplyopura, akil adiparyuk dipnamle. Akunum diplyeura, akunuma. Akil el domlinye birye, akil akunum domlya ati, akil arye kwinisa dobuka, yuk nang neika akunum mamlyopura, el adiparyuk, el mining nong ati, akunum pia malye kipdeipdanamle. Yuknye ap, neika maprika deice arye, el mining nong ati, akunum malye kipdeipdayuke. Ati ara, akil arye, sik mek akunum diplyeura, Allah arye amek dipnulya deice arye, akil ati supliba imun kanye bon ning, el nong deice deipnamle. Ara, el tam nang nirya arye elti, ‘Kume, akil ara, pia malye weik ulule. Yata nang do nirya, akil arye malye weik ulamuk touk winibipyeura, Allah arye oplopsilyake,” nyanamake. Tonda amutuku nang nirya arye akil ati, ‘Kume, akil el si akunum pia malye kibuke,’ tenenauk unamake. Tonda, akil el mun weik diklirye, uk dinamle. Tonda, el nong noutam mi bolamle sukum ara, el mun sisal seplya deice arye, malye weik upliba saklyopura, akil arye, mapu ton pia kum deipmanto upnamle.

²⁸ Bukni winipmanto ara, akil ap, yuknye ap, ton dipkoprob neika kum epdanuka mamdiceura, malye kum upnamle. El winina deice arye, malye kum kipdayuka ati, sik mek dipnamle deice arye sulongon ning ara, akil el dam kum yanamle. Tonda, el daunamle talak nirya ara, mapu ton pia delinamle.

²⁹ Ati, amem yupu nirya nyapmakin ning nirya ara, moubuka teninamlule. Winipmanto ara, yatanye do, el kil ati, ‘Yuknye ap ton epdarikce, neika maprik deice arye, el mining nong ati, malye kipdanmal do?’ tenena deice arye, el kil ati malye kanye bobuka, talima pum tam opdanamlirye, akil ati malye yupu nyamlyopura, anye birye el kil bobuka, Allah dam bobuka deipnamle. Aning atonun, yata ning do? Tonoknye birye, el kil ati, ‘Yuknye binyak moun dilul do? Kum do?’ teneplirye, talima pum tam malye kanye boplirye, ‘Akil ara, na like,’ akunum teneplyopura, el kil bobilirye, Allah el si eren aik dam deipnamle. Akunum winiplyeura, Imam deiyoknye birye, lak nyapmasin touk, winipnamle. Na Allah arye, “Wininamlume,” nyapdeipmasin touk ubuka, akil atibuk, imamnye birye, apil nirya dipkoprob pia donamle. Tonok ning babye, kum bataknamle.

³⁰ Aning atouk, ton yatanye do nirya, yuk nang ap elana kum bukni, yuk deiyok ati, el domlye kil ati, malye kanye boplirye, akil ati talima pum arye, tulum uplyeura, el kil doplirye, Allah Yahweh el dam bobinuka deipnamle. Allah damuk buklyopura, imam deiyoknye birye, na Allah arye, “Wininamlume,” nyapmasin touk, apil donamlume. Tonok ning babye, batakna pia kum unamlume.

³¹ Akil domlinye bira, el kil dipkoprob malye winyamlyopura, akil deice ara, ikin ning weik yanamle. Bukni, akil el domlinye bira, ikin ning el nong deice kum yanganamle. Elda malye winina kum ati, el dam ikin ning ara, pia kum yanganamle. Bukni, el kil ara, malye winipmalye ning ati, elcuk kwinisa doplyeura, ikin ning ara, minopce el dam yaliba dolonamle.