Bilangan 4 - Eipomek

Lewi yala nang bukni, Kehat birye deibuk yala nang, sik pil dona deiyok ning ati, arebuk yupu

¹ Allah Yahweh arye, Musa ap, Harun ap ati, “Anggunce winipnamrurume,” nyabuk.

² Anggun Lewi yala nang bukni, Kehat yala nang ton, anggun yuk nuknamdurume. Ara, Kehat birye deibukba, dadeipdanin yanganyak ninye, sik mapu yuk-yuk unyak touk, deiyok kibuka talebikba, sik yupa tonok kibuka unyak ninye ara, ‘Sik yupa ara, yata barye unyak do?’ tenen, bikna ati, sik si sekna ati, pil dopnamdurume. Sik yupa ap, sik apu yapu aulamik touk, tenipmunce nuknamdurume.

³ Tonda, sik ayala nang nirya, akunum si sekdum nang ara, mapu uk, sik umur tiga puluh tahun nemice nang arye, dipdongobuka, itam umur lima puluh tahun (50) kiamlye nang ara, sik si yuk ton seknamdurume. Sik anang ara, Allah Yahweh ap, ninye ap, eldana ati tenda aik noutam, pil yuk-yuk bokuka, dopmanto nang ati, sik si yuk bokuka seknamdurume.

⁴ Asi seknamdum nang, sik pil don ning ara, ani. Anyaik noutam ulamle ning, lek pia teleb ning ara, sikce talibuka pil dopnin banamake.

⁵ Tonda, Allah arye, Musa binyak, “Ance Harun ap, el mapu ap, sik nirya ati, binuka aning nirya wininamlume, nyapnalyame,” nyabuk. Ara, na ap, ninye ap eldana ati, dolamik tenda aik, ulubuka dakan talak akunum uplye talak ara, sik minopce, na si eren aik noutam wekelbikirye, atam upmalye Telep Lek Aik ap, otam upmalye Pia Teleb Lek Aik ap, wilina ati, anoutam lap kwetebik cang kain, Pia Teleb Lek Aik wekelbana ati, bublan dam ara, sik anang aryuk, binuka lolkwetenamnyake. Akain dobikirye, na yupu nyapdeipsiba, seklumce libuka deiplum marikna, el si ara Peti Perjanjian el nong deice tam akain arye siknipdongopnamake.

⁶ Kain arye dobuka, amarikna deice akunum siknipdongobikcopura, ton ap amarikna urasin tam siknilongona ati, pia bol mitang ning arye, akain ap, amarikna ap, el nong deice siknilongonamnyake. Winibicopura, kira bol deilin kain, im sukulamle atonun ning arye, tengebuka deice tam deibuka, kitipdongobikcopura, ayo marikna bobana ati, kup-kup dana-dana tam ara, cang yo dongon ati, cicin atonun ning arye, memepdeiamikce, bisik ayo dongobuka, bobanamyake.

⁷ Winibicopura, ‘Allah Yahweh ara, nun dam aululeʼ tenena ati, roti kwaning delinyakak ati, memebuka delinyak meja ara, cang kain el bol ara, im sukulamle atonun ning arye, bibikdeipnamnyake. Winibikiba, teleb uplye talak ara, siltong teleb nyana ati, uku dabuka delina ati piring ap, mek makau ap, cangkir ap, tonda anggur duk arye, purubuka delin mek libuka delina ati, amek makau ton, yuk-yuk kintinbuka, im sukulamle atonun kain deice deipnamnyake. Tonda, Allah el arena ati, din mek arena ati mek makau ap, tonda din ati kintinbuka dalulum roti kwaning ap, kintinbuka, im sukulamle atonun kain deice deipnamnyake. Aning-aning nirya ara, akain deice, kintinbuka deipnamnyake.

⁸ Aning nirya akunum winibicopura, kalulongna ati, anyaik piring ap, mek makau ap, yuk mitik pil don ning ap, roti kwaning nirya ara, ining bi kain bol arye, aning nirya siknilongonamnyake. Atonun, itam arye siknilongona ati, bol namin kain arye, deibuka siknilongonamnyake. Adobuka deibikce ning nirya bobana ati, cang yo dongon ati, cincin ato ning memepdeiamice, bisik ayo dongobuka bobanamyake.

⁹ Winibicopura, sik minopce upna lana delina deiyok ning ap, tonda, upna lalamle ning minyak ap, uku upna tangalongon ning ap, aning nirya ara, kain el bol ara, im sukulamle atonun urasin ning arye, lelilongonamnyake.

¹⁰ Winibikirye upna lana ati, delilamak ning nirya ara, urasin teleb kain, arye siknilongonamnyake. Winilamica ani, adeibikce ning nirya, dobuka boban talak uplyeura, aning bobana ati, cang yo dongon ati, cincin ato ning memepdeiamice bisik, ayo dongobuka bobanamyake.

¹¹ Aning akunum winibicopura, sik minopce winipnamnyake. Ara, ‘Allah arye, nun malye un ning nirya, kum daneipnamsilʼ tenen, el ining dobuka, purupdonokicak ara, aning ati, yanuka aren ning, el ining delinak ati, emas arye memepdeiamicakuk, teleb kain arye siknilongonamnyake. Ara, urasin pia teleb kain bol, im sukulamle ato ning arye, boyanuka delinamnyake. Winilamica ani, adeibikce ning nirya dobuka, boban talak uplyeura, aning bobana ati, cang yo dongon ati, cincin ato ning memepdeiamice bisik, ayo dongobuka bobanamyake. Aning nirya ara, minopce kintinilinamnyake.

¹² Aning atonun ton, Allah el si erena ap, el arena ap ati dolamik asik, Pia Teleb Lek Aik pum tam pil dona ati, urasin teleb ning, ayala-ayala nirya ara, anyaik noutam una ati, mitik pil don ning, alat nirya ara, sik minopce kain el bol ara, im sukun urasin bolamla atonun ninguk, doprobikirye, kitibuka delinamnyake. Winibuka deibikcopura, aning deice siknina ati ara, urasin teleb bol namin kain aryuk, siknilongonamnyake. Aning nirya akunum kitibikirye, adeibikce ning nirya dobuka, boban talak uplyeura, aning bobana ati, cang yo dongon ati, cincin ato ning memepdeiamice bisik, ayo dongobuka bobanamyake. Aning nirya ara, minopce kintinilinamnyake.

¹³ Allah el si erena ak, uku dongona ati, kintinip deibika, el si ara mesba, aning deice, atu arye lubuka dobikirye, amesba deice ara, kain cang ning el urasin ara, im sukuplirye dalalamle ato ning bukni, pia teleb ning, el urasin ara, warna unggu nyalamak ning, tengedeibikirye, kalulongonamnyake.

¹⁴ Tonda, amesba deice ara, unggu urasin kain arye, akunum bibikdeibikcopura, Allah el si erena ati, pil don talak una ati yala nirya ara, adeice uk dobuka, delilyanganamnyake. Ara, uku sekenak ap, libuka lun ning karpu ap, sekdok ap, lukuka dolon ning ap, tonda din ning lukuka delina ning, baskom ap nirya kintinilinamnyake. Aning nirya, akunum kintinip deibikcopura, namin pia teleb kain ara, urasin pia teleb ning aryuk, kitipdongobuka delinamnyake. Tonda, aning nirya akunum kitibikirye, adeibikce ning nirya dobuka, boban talak uplyeura, aning bobana ati, cang yo dongon ati, cincin ato ning memepdeiamice bisik, ayo dongobuka bobanamyake.

¹⁵ Allah Yahweh arye, Musa ap, Harun ap ati nyabuk. Na ap, ninye ap eldana ati, donyak tenda aik ulubuka bobanukce talak ara, arup nyapmasin touk, min yuma ara, Harun ap, el mapu anyapce, na si eren aik buru tam ning ap, anyaik pum tam ulye ning nirya ap, kintinip deibikirye, teleb ning arye siknipdongobikirye, kitipnamnyake. Winibicopura, sik Israel ninye bisik banukce talak ara, Harun ap, el mapu ap, sik minopce anyaik noutam delilamak ning ap, anyaik pum tam una ati, kintinip deiamikce ning nirya ap, minopce kintinip deibikirye, kalulongonamnyake. Akunum kintinip deibicopura, sik Kehat yala nang, sik pil ati, ayala nang yakirye, aning nirya bobanamyake. Bukni, sik Kehat yala nang arye, ‘Aning ara, nun ton eiptibyeʼ tenen, dilina ap, tonda anyaik pum tam delilamak ning dam bana ap, aning bol pina ap ara, kum winipnamnyake. Aning nirya ara, na Allah Yahweh ninguk unamle bukni, aning sik anang ton eibikirye, ‘Nun ton winiptibye,’ tenebicopura, atenebice nang nirya ara, dibinamake.

¹⁶ Imam nang, sik weik deiyoknye Harun, el mi Eleasar biryuk, yupu nyanamlule. Ara, upna lana ati, minyak mek likuka delinamak ning ap, tonda Allah morona ati, siltong teleb ning, uku dalamak ning ap, Allah aren gandum do, yuk yala ning do, Allah ati aren talak arye, pil dolamak ning ap, ninye deiyok kina ati, teleb minyak mek, sik kisok deice dikilongolamak minyak mek ap, apil ton talibuka donamlule. Tonda, Allah ap, ninye ap eldana ati, tenda arye dolamak aik delinyak ning ap, anyaik pum noutam delinyak ning ap, anyaik noutam arye, pil dona ati talinyak ning nirya ap, anyaik noutam unamle ning ap nirya ara, el anye birye, apil nirya talibuka donamlule.

¹⁷ Allah Yahweh arye, ayupu nyabukura, Musa ap, Harun ap ati, ayupu ton ap, dukdongobuka nyabuk.

¹⁸ Lewi yala nang kan-kan bukni, sikce delilamik nang, sik Kehat yala nang ati nyapnune. ‘Sik Kehat yala nang nirya, dipnin banmaca ani, aminyan talak kum dapyakʼ tenena ati, Kehat yala nang ati, moubuka kalekildanamlume.

¹⁹ Sik Kehat yala nang ara, kum dipnamak bukni, aminyan talak pia kam unamakʼ tenen ati, wininamlume. Sik Kehat nang arye, na si erena ati, tenda arye dolamak aik pum tam wekikirye, ‘Allah el kanye deilin ning, pia teleb lek ning, kitibuka deipmakce ning ara, aning nirya dobuka bobinambe,’ tenebikirye, anyaik binuka, alek ning dam bikce talak ara, Harun ap, el mapu ap, minopce anyaik wekelbikirye, sik Kehat yala nang tonok-tonok ati, “Anda aning tonok-tonok dobuka bobinalame. Aning ton dobuka bobinalame,” nyabuka nyalamak atonun, anang yuk-yuk buk, aning dem dobuka bobinamake.

²⁰ Bukni, sik Kehat nang ara, Allah si eren aik wekelbice talak ara, ‘Nun ton apia teleb lek ning eiptibye,’ tenebikirye, mining dam binuka kum eipnamake. Like mitik tonun minopce alek ning eibikcopura, minopce dibicak ati, aning kum elinamnyake. Aning dam, pia dina meme.

Lewi yala nang bukni, Gerson birye deibuk nang arye, talibuka pil dona ati, nyabuk yupu

²¹ Ayupu akunum nyabukopura, Allah Yahweh arye, Musa biti, “Anda winipnamlyame,” nyabuk.

²² Sik Lewi yala nang bukni, Gerson yala nang ton, sik yuk nuknamdurume. Ara, ‘Sik yupa yata barye unyak do?’ tenen, bikna ati, sik si seknalame. Ara, Gerson birye deibukba, dadeipdanin yanganyak ninye, sik mapu yuk-yuk unyak touk, sik yupa tonok kibuka unyak ninye ap, sik apu yapu nang arye deibikba, dadeipdanin yangalamik nang aulamik touk, nukmince, sik si yuk-yuk seknamlyame.

²³ Tonda, sik ayala nang nirya, akunum si sekminyopura, mapu dem, sik umur tiga puluh (30) tahun kiamlye nang arye dipdongobuka, itam umur lima puluh tahun (50) kiamlye nang ara, sik si yuk ton wibuka seknamlyame. Sik anang ara, Allah Yahweh ap, ninye ap, eldana ati, tenda arye dolamik aik noutam, pil mikip arye dopmanto nanguk, wibuka si seknamlyame.

²⁴ Asi sekminye nang, sik pil donamak ning ara, ani. Allah si eren aik, buru tam ulamle ning, Israel ninye yuk mutuku binukce talak ara, sik Gerson yala nang aryuk, aning nirya tongobuka bobanamnyake.

²⁵ Sikce bobanamak ning ara, ani. Allah ap, ninye ap eldana ati, tenda arye dolamik aik, abilinga atonun ning ap, anyaik amnyok atonun ning, im sukun ato ning ap, aning eitam, pia teleb sapi bola arye siknilongona ati, kain ap, tonda anyaik domica, wekelban bisik bublan kalulongona kain ap, aning nirya bobana ati, sik Gerson yala nang, si sekdeipnalame.

²⁶ Tonda, Allah si erena ati, tenda arye dolamik aik bukni, buru tam dana-dana ara, poka ato ning ati, kalulongona cang kain ap, anyaik dam wekelban bisik, lalkwetena ati bublan dam delinyak kain ap, Allah arena ati, uku danyak sukum, mesba antanap dongobuka, lalkwetena ati delinyak kain ap, tonda anyaik buru tam poka atonun cang kain, bikilina ati tapu arye, kirikuka koulongon ning ap, tonda aning nirya, pil dona ati talinyak ning ap, sik Gerson yala nang aryuk bonamake. Israel ninye yuk mutuku binukce talak ara, sik Gerson yala nang aryuk, aning nirya tongobuka bobanamnyake.

²⁷ Musa an ap, Harun ap anggunda, sik Gerson yala nang pil donamakcopura, moubuka dipderumunce, “Aning ara, winibuka dopmunce, banamlume. Anggun pil ara, winibuka donamlume,” nyabuka, sik anang ati, moubuka kalikinamdurume. Ara, Harun ap el mapu ap, anggunce Gerson yala nang ati, pil areprumunyeura, sikce talibuka donamaka ati nyapsine. Tonda, sik anang arye dobuka, bobinmanto bona nirya ara, sikcuk bobanamnyake.

²⁸ Allah ap, ninye ap eldana ati, dolamik tenda aik, buru tam ulamle ning nirya ara, arup nyapmasin touk, ‘Sik Gerson yala nang aryuk, apil donamakʼ tenen, sekolah petereprumunce, wa arenamrume. Apil dona ati, deiyok kinanye bira, Imam nang, sik weik deiyoknye Harun, el mi Itamar bira, deiyoknye unamle.

Lewi yala nang bukni, Merari birye deibuk nang arye, talibuka pil dona ati, nyabuk yupu

²⁹ Allah Yahweh arye, Musa biti nyabuk. Lewi yala nang bukni, Merari birye deibukba, deipdanin yangakirye, unyak yala ninye ara, sik yuk-yuk unyak ati, ‘Sik yupa ara, yata barye unyak do?’ tenen, bikna ati, nukmince, sik si moubuka seknamlame. Ara, Gerson birye deibukba, dadeipdanin yanganyak ninye, sik mapu yuk-yuk unyak touk, sik yupa tonok kibuka unyak ninye ap, sik apu yapu nang arye deibikba, dadeipdanin yangalamik nang ulamik touk, wini unyak nang nukmince, sik si seknamlame.

³⁰ Tonda, sik ayala nang nirya, akunum si sekminyopura, sal diamuk, sik umur tiga puluh (30) tahun kiamlye nang arye dipdongobuka, itam umur lima puluh tahun (50) kiamlye nang ara, sik si yuk-yuk seknamlame. Sik anang ara, Allah Yahweh ap, ninye ap, eldana ati dolamik tenda aik noutam, pil mikip arye dopmanto nanguk, sik si nirya wibuka seknamlame.

³¹ Sik anang wipdeipminba, Allah si eren aik ulubikirye bobanamnyake. Ara, anyaik ayukumna ap, marikilin ap, tonda tikililamak ayukumna yo ap, kwa dilamak yo ap, ayo nirya, amu tam apanya delilamak kat ning ap, aning nirya ara, sik anang arye bobanamnyake.

³² Tonda, sik anang aryuk, Allah si eren aik bukni, buru tam poka atonun ati, cang kain lalkwetena ati, iklamak ayukumna nirya ap, ayukumna barina ati, kwa din yo ap, ayukumna iknamakce ati, lakilina ati kirikin tapu ap, anyaik donmakibuk, ‘Lokona kum, katabum apnamleʼ tenen, winin ayukumna ara, sik anang aryuk bobanamnyake. Ara, sik Merari yala nang arye, aning nirya bulupdeibikirye, ance, “Aning bopnulyame, anye bira aning bopnamle,” nyabikce touk, sikce aninguk bobanamnyake.

³³ Merari yala nang arye, talibuka donamak pil ara, ani. Allah ap, ninye ap eldana ati, dolamik tenda aik buru tam yo, delinyak ning yala-yala nirya ap ara, Merari yala nang aryuk bobanamnyake. Apil dona ati, deiyok kipnamlanye bira, Imam nang, sik deiyoknye Harun, el mi Itamar birye, deiyok kipliba donamake.

Lewi yala nang, sik si sekna ati, nyabuk yupu

³⁴ Allah arye, ayupu nirya nyapdeibuk touk, Musa ap, Harun ap, tonda Israel ninye talibuka ulamik deiyok nang nirya anyapce, Lewi yalanye birye deibuk nang bukni, sik Kehat birye deibukba, deipdanin yangakirye, ulamik yala ninye ara, sik yuk-yuk ulamika ati, ‘Sik yupa ara, yata barye unyak do?’ tenen, bikna ati, nukikce, sik si sekdeibik. Ara, Kehat birye deibukba, dadeipdanin yangalamik ninye, sik mapu yuk-yuk ulamik touk, sik yupa tonok kibuka ulamik ninye ap, sik apu yapu nang arye deibikba, dadeipdanin yangalamik nang ulamik touk, sik yala yuk-yuk daulamik ati, nukikce si sekdeibik.

³⁵ Tonda, sik ayala nang nirya, akunum si sekikopura, sal diamuk, sik umur tiga puluh (30) tahun kiamuk nang arye dipdongobuka, umur itam lima puluh tahun (50) kiamuk nang ara, sik si yuk-yuk sekik. Sik anang ara, Allah Yahweh ap, ninye ap, eldana ati dolamik tenda aik noutam, pil mikip arye dopmanto nanguk, sik si nirya sekdeibik.

³⁶ Sik ayala ninye, sik yupa ara, dua ribu tujuh ratus lima puluh (2.750) nang ulamik.

³⁷ Ayupa ara, Allah ap, ninye ap eldana ati delilamik tenda arye dolamak aik ati, pil talibuka dolamik. Sikda Kehat birye deibukba, dadeipdanin yangalamik yala nang ulamik. Allah Yahweh arye, Musa biti, “Winipnulyame,” nyapdeibuk touk, Musa ap, Harun ap arye, sik Kehat yala nang ati, nukdikce, sik si sekrik.

³⁸ Tonda, Lewi yalanye birye deibuk nang bukni, sik Gerson birye deibukba, dadeipdanin yangakirye, ulamik yala ninye ati, sik si sekdik. Ara, Gerson birye deibukba, dadeipdanin yangalamik ninye, sik mapu yuk-yuk ulamik touk, sik yupa tonok kibuka ulamik ninye ap, sik apu yapu arye deibikba, dadeipdanin yangalamik nang ulamik touk, sik yala yuk-yuk nukikce, si sekdeibik.

³⁹ Tonda, sik Gerson yala nang nirya, akunum si sekikopura, sal diamuk wibuka, sik umur tiga puluh (30) tahun kiamuk nang arye, dipdongobuka, itam lima puluh tahun (50) kiamuk nang ara, sik si yuk-yuk sekik. Sik anang ara, Allah Yahweh ap, ninye ap, eldana ati dolamik tenda aik noutam, pil mikip arye dopmanto nanguk, sik si nirya wibuka sekdeibik.

⁴⁰ Sik Gerson yala ninye, sik yupa ara, dua ribu enam ratus tiga puluh (2.630) nang ulamik.

⁴¹ Gerson yala nang yupa ara, Allah ap, ninye ap eldana ati, kain arye tenda dolamak aik delilamik pil talibuka dolamik. Sikda Gerson birye deibukba, dadeipdanin yangalamik yala nang ulamik. Allah Yahweh arye Musa biti, “Winipnulyame,” nyapdeibuk touk, Musa ap, Harun ap arye, sik Gerson yala nang ati, nukukaprikce, sik si nirya sekrik.

⁴² Tonda, Lewi yalanye birye deibuk nang bukni, sik Merari birye deibukba, dadeipdanin yangakirye, ulamik yala ninye ara, sik si sekdeibik. Ara, Merari birye deibukba, dadeipdanin yangalamik ninye, sik mapu yuk-yuk ulamik touk, sik yupa tonok kibuka ulamik ninye ap, sik apu yapu nang arye deibikba, dadeipdanin yangalamik nang ulamik touk, nukikce, sik si sekdeibik.

⁴³ Tonda, sik Merari yala nang nirya, akunum si sekikopura, sal diamuk. Sik umur tiga puluh (30) tahun kiamuk nang dipdongobuka, itam lima puluh tahun (50) kiamuk nanguk, sik si yuk-yuk sekik. Anang ara, Allah Yahweh ap, ninye ap, eldana ati dolamik tenda aik pum tam, pil mikip arye dopmanto nanguk, sik si sekdeibik.

⁴⁴ Sik Merari yala ninye, sik yupa ara, tiga ribu dua ratus (3.200) nang ulamik.

⁴⁵ Merari yala nang yupa ara, Allah ap, ninye ap eldana ati kain bola arye lelibuka dolamik tenda aik ati, pil talibuka dolamik. Sikda Merari birye deibukba, dadeipdanin yangalamik yala nang ulamik. Allah Yahweh arye, Musa biti, “Winipnulyame,” nyapdeibuk touk, Musa ap, Harun arye, sik Merari yala nang ati, nukukaprikce, sik si nirya sekrik.

⁴⁶ Ura, Allah arye nyabuk touk, sik Musa ap, Harun ap, Israel ninye ati talibuka deiyok kiamik nang ara, Lewi birye deibukba, dadeipdanin, yangalamik nang ati, nukikce, sik si sekik. Sik Lewi yala nang, sik mapu yuk-yuk ulamik touk, sik yupa yuk-yuk kibuka ulamik ninye ap, sik apu yapu nang arye deibikba, dadeipdanin yangalamik nang ton, aulamik touk, sik yala yuk-yuk daulamik touk nukikce, sik si sekdeibik.

⁴⁷ Ara, sik Lewi birye deibukba, dadeipdanin yangalamik yala nang nirya, yuk-yuk bukni, sik yala si akunum sekikopura, sal diamuk, sik umur tiga puluh (30) tahun kiamuk nang arye dipdongobuka, eitam lima puluh tahun (50) kiamuk nang ara, sik si yuk-yuk sekik. Sik anang ara, Allah Yahweh ap, ninye ap, eldana ati dolamik tenda aik ati, noutam pil dona ap, anyaik buru tam delilamik kat ning bobana ap ati, apil mikip arye dopmanto nanguk, sik si nirya sekdeibik.

⁴⁸ Ura, sik aninye nirya tabakuka yupa ara, delapan ribu, lima ratus delapan puluh (8.580) ninye ulamik.

⁴⁹ Allah Yahweh arye, Musa dam nyapdeibukce, “Winipnulyame,” nyabuk touk ubuka, anang nirya, sik si yuk-yuk sekdeibik. Ara, ‘Sik anang arye, talibuka donamak pil ara, aniʼ tenen, kintilina ap, ton ‘Sik anang arye bobanamak ning ara, aniʼ tenen, kintinilina ap ati, kintinipdeibik.