Bilangan 36 - Eipomek

Ninye dobikce kilapu arye, sik ni yapu taleamikce ning dolona ati, nyabuk yupu

¹ Gilead yalanye birye deibukba, dadeipdanin balamik nang, sik ayala nang ati, deiyok kibuka taleamik nang ulamik. Sik anang ara, Israel ninye sik apu koproba el si Yusuf birye deiamuk mi, el si Manasye bukni, elce deiamuk mi, si ara, Makir birye deiamuk yala nang ara, Gilead yala nang nyalamik. Ura anang kan-kan bukni, sik si Gilead yala nang, sik deiyok kibuka ulamik nang nirya ara bulubukabikce, Musa dam binuka yupu nyabik. Tonda, Musa ap neika awekmek nang ara, Israel yala ninye, sik deiyok kibuka taleamik nang nirya ton, asukum tikmekce ayupu kekenmek.

² Sik anang arye, Musa biti nyabik. “Allah el si Yahweh arye, nun deiyoknye Musa anti, Israel yala ninye yuk-yuk unyak touk, sik unamak mutuku tuku yuk-yuk bokuka arenalame. Amutuku tuku bokdeipminyopura, ‘Allah arye nun wininamap ning laka nyapsutueʼ tenen, ‘Yatanye dopnulʼ tenen win ning, el si undi deice arye dobuka, pil dobikirye, aning eibikcopura, atuku bokdeipnalame,’ nyapdeiamkuke. Atonun tonda, Allah arye nun kwit Zelafehat, elce deiamuk kilmapu ara, sik unamak tuku ton, yuk bokuka arenamlyame. Allah Yahweh arye winibuka nyapdeipkuk touk, ‘Winipnusileʼ tenen, moropkiyabe,” nyabuka laka nyabik.

³ Bukni, an moubuka tenipnamlam ning ati, winipmanto, Zelafehat birye deiamuk kilmapu arye, nun Israel nang bukni, yuk yala nang arye deibik nang dobikcopura, dipkoprob sik akilapu sik tuku ara, akilapu dopnamak nanguk atuku dopropnamake. Ati ara, tuku akunum bokuka arepsiminba, akilapu dopnamak nang arye akunum doprobikcopura, nun apu yapu arye taleamik tuku ara, yuk yala nang arye dana tam ton bokuka doprobikca deice arye, nun yala nang arye taleamik tuku ara mitik tonun upnamsile.

⁴ Yuk ikin usilye ning ara ani. Ara, nunce tia talibuka unyap ning nirya tamubuka aren keting tamun el si Yobel tahun, aning akunum uplyopura, nun yala nang arye kum bukni, akilapu dobikce nang, sik yuk yala nang arye, nun tam nang taleamik tuku akunum dopnamake. Ara, nun tam nang taleamik tuku bukni, aketing tamun Yubel akunum uplya ati, Zelafehat birye deiamuk kilmapu arye dopnamak tuku ara, akilapu sik dobikce nang, yuk yala nang aryuk atuku dopnamsiyake. Winipsikca deice arye, nun yala nang tuku ara, mitik tonun kipnin banamsile,” nyabuka, sik Gilead yala deiyok nang arye, Musa biti nyabik.

⁵ Nyabikopura, Musa birye Israel ninye kekenak ayupu nyabuk. “Yusuf birye deibukba, dadeipdanin yanganyak nang arye, ayanuka nyapmak yupu ara, dipkoprob tuku bokona ati, Allah Yahweh arye, “Tuku bokona ati, wininamlume,” nyapdeiamuk touk, sik anang arye dipkoprob yanuka nyapmasiyake.

⁶ Allah Yahweh arye, nyapdeiamuka ati ara, Zelafehat elce deibuk kilmapu nirya ara, sik apu koproba, el tam ninye kan-kan noutam arye bukni, sik akilapu arye, ‘Ayala nang arye deiamik nang ara, talye luba kibuka dopnuyap,’ tenebikce nang ara, talye donamake. Aning ara telebe uka.

⁷ Bukni, mambul weik ning ara, ani. Tuku bokuka dolona ati ara, Israel ninye yala yuk-yuk bokuka, sik apu yapu nang arye taleamikce ning ara, sik ayala nanguk pia talinamake. Tonda, sik taleamikce tuku ara bokuka, yuk yala nang ton dolona ati, arena meme. Israel ninye yala nirya ara, sik apu yapu nang arye taleamik tuku, ayala nang aryuk pia talinamake.

⁸ Ati ara, Israel mutuku noutam unyak ninye arye, deilinamak kilapu nirya ara, adiparyuk sik deipdanin yangalamik tam nanguk donamake. Adeice arye, sik apu yapu taleamik tuku ara, sik damnye talibuka unamake.

⁹ Aning atonun ara, Israel ninye yala nirya ara, sik apu yapu nang arye taleamik ning ara, atuku sik yala nang ati, ton bokuka yuk yala nang ati arena kume. Deiyok ara, Israel yala nang yuk-yuk bokuka taleamik tuku ara, yuk-yuk yala ninye ati, bokolona kume. Sik babye min arye ataleamik touk, yuk-yuk talibuka unamak tuku ara, sik tuku koproba unamle. Ayupu nirya ara, Musa birye nyabuk.

¹⁰ Allah el si Yahweh arye, Musa dam ati, “Aning-aning nirya ara wininamlyame,” nyabuk touk, Musa birye laka nyapdeibukba, ninye si Zelafehat birye deibuk kilmapu, sik pamubarye kilapu nirya ara, anyapdeipmok ning atonun winibik.

¹¹ Ati, Zelafehat birye deiamuk kilapu sik si ara, Mahla ap, Tirza ap, Hokla ap, Milka ap, tonda Noa ap, sik nirya ara, sik apu yapu arye deiamukba dadeipdanin yangalamik yala nang arye deibik nanguk, tamubuka dolamik.

¹² Sik akilapu dobik nang ara, Yusup birye deibuknye bira, Manasye el yala nang arye deiamikba, dadeipdanin balamik nanguk dobik. Ati ara, sik ni koproba Zelafehat taleamuk tuku ara, sik ayala nang aryuk, sikce atuku tuba talelamik.

¹³ Ayupu nirya ara, Allah el si Yahweh arye, Musa keken dam nyapdeibukba, Musa birye sik Israel ninye nirya sik kekena ati, “Aning winibuka-winibuka unamlume. Aning ara pia kum wininamlume,” nyabuka laka nyabuk. Ayupu nyabuk talak, sik Israel ninye nirya ara, luh weik mutuku, el si Moab mutuku noutam bukni, Yordan mek lilkwa, mutuku si Yeriko mutuku weik asik dolamikce, ulamikak binuka, laka nyabuk.