Bilangan 35 - Eipomek

Lewi yala nang talibuka unamik mutuku ati, nyabuk yupu

¹ Moab mutuku lu tam bukni, Yordan mek lilkwa Yeriko mutuku dam unmek talak ara, Allah Yahweh arye Musa biti nyabuk.

² Nyapnun yupu ara ance, sik Israel nang nirya kekenak ati, lak nyapnulyame. Ara, aminyan talak sik Israel nang yala-yala nirya, mutuku tuku dopropbikirye talibuka unamak mutuku noutam arye, tuku ton bokuka sik Lewi yala nang ati arepnamake. Ara, yata wiribuka mutuku do nirya ara, anoutam arye, sikce weik asik dopnamlum ning arepmunyeba, sik Lewi yala nang arye anyaik-anyaik dobuka daunamake. Tonda anyasik dana-dana tam dam bukni, bai tam yo mutmuta pia weik unamle mutuku ap, sik yuk Israel yala nang yala-yala nirya arye, sik Lewi yala nang ati, tuku ton bokuka arepnamlume. Sik Lewi yala nang ara, anggun kan-kanuk unamake.

³ Amutuku noutam arye sik Lewi yala nang ati, asik dolamikce, mutuku nirya noutamak bokuka arepmunyopura, sikda amutuku uk talibuka unamake. Anggunce dopnalum asik ara, sik Lewi yala nang ap arepnalum sukumuk unamake. Tonda, amutuku noutam upnamle maning ara, sik Lewi yala nang arye weinamake ning yala-yala nirya arenamake.

⁴ Lewi yala nang sik basam weina ati atam-atam ubuk mutuku noutam arye, sikti, bokuka arepnamlum tuku ara, weik asik antanap dongobuka dopnamlum cang keil poka arye dipdongobuka, otam mutuku lo weik, ubuk noutam nukmunce, 450 meter kiplyakuk arepnamlume. Ara, asukum noutam ara, maning pia weik wamlyakuk arepmunyeba, sik Lewi yala nang arye weinamak ning ara, asukumuk deipdongobuka weinamake.

⁵ Aning atonun, sik Lewi yala nang arena ati, weik asik dopnalumak bukni, anyasik-anyasik dana-dana tam nirya, antanap dongobuka dopnamlum cang keil poka arye dipdongobuka, otam mutuku lo weik, ubuka nukmunce, 900 meter ton kipnamle. Ara keting yangan tam ap, keting kumulban tam ap, iknapye arah selatan ap, dabu tam arah utara ap nirya ara, atouk ubuka nukmunce, 900 meter uplyeura, atuku ton sik Lewi nang ati bokuka arepnamlume. Tonda winiplyeura, sik Lewi yala nang ara, amutuku dana-dana ubuka noutam nukdebuka deipnamlum tuku ara, sik kam ning, sapi basam do, domba basam do, kambing basam do, aning nirya asukumuk weinamake.

⁶ Sik Israel nang arye, weik aik nakub barye (6) kota ton dobuka kintinimunce, sik Lewi yala nang ati bokuka arepnululume. Anyarepnamlum asik nakub barye ara, ninye kum opmantoak upnamle. Aning deiyok ara ani. Ara, yata Israel nang arye do nirya, sik mangkau arye yuk nang ati opbikceura, ‘Sik opmabye nang, sik tam nang arye yanuka, tamubuka nun ton opsicakʼ tenen, anyasik noutam bikbik abuka yanuka, duknupbiceura, yuk tam nang arye, asukum yanuka kum opnamake. Ara, anyasik nakub barye noutam bica deice arye, telebuk unamake. Yuk tam nang arye, amutuku wekuka kum optinge. Ati, ninye arye yuk nang mangkau arye opmakce ning ara, sik teleb kibuka una ati mutuku kintinibuka dopmunyopura, sik Lewi yala nang ati arepnamlume. Tonda, aninguk kum bukni, sik Lewi yala nang tonok, yuk asik ton, 42 kota ton, kintinibuka dopmunye ning ara, arepnamlume. Sik Lewi yala nang ap, sik mapu silip ap, anyasik-anyasik dolamica noutamuk talibuka unamake.

⁷ Sik Lewi yala nang ati arepnamlum asik domunye ara, empat puluh delapan (48) kota arepnamlume. Tonda, amutuku nirya dam ara, maning wamlye mutuku ton tabakuka arepnamlume. Amutuku ara, sik Lewi yala nang arye talibuka unamake.

⁸ Ura, sik Israel ninye yala-yala nirya, anggunce talibuka unamlum mutuku noutam ara, ton asik domlum ning wilibuka, sik Lewi yala nang ati, bokuka arepnamlume. Winipnamlum talak ara, Israel nang kan-kan bukni, ninye pia weik ululum yala ara, asik domlum ning weik ton bokuka, Lewi yala nang ati arepnamlume. Aning atonun, Israel nang kan-kan bukni, ninye mitik tonunuk ululum yala ara, asik domlum ning mitik tonunuk bokuka, Lewi yala nang ati arepnamlume. Ara, ninye weik do, mitik do, aululuma atonun, tuku ap, asik dolamunya bokuka arepnamlume. Anggun Israel yala nirya, amutuku tuku ap, asik ap, dololamluma atonun kibuka, sik Lewi yala nang ati, bokuka arepnamlume.

Ton nang mangkau arye, ninye obikce nang binuka telebuk unamak mutuku ati, nyabuk yupu

⁹ Allah Yahweh arye, Musa ati nyabuk.

¹⁰ Ance Israel nang ati ayupu nyapnulyame. Ara, anggun nirya Yordan mek koubuka otam keting yangan tam arye, Kanaan mutuku tam binuka unamlum talak ara, wininamlume.

¹¹ Amutuku noutam bimunyopura, Kanaan tam nang arye domik weik asik ton dipdemunce, aning noutam arye ton asik wipdeipnamlume. Deiyok ara, ani. Ton nang arye, adiparyuk mangkau aryuk, yuk nang ton opmakce nang ara, ‘Aopmapnye, el tam nang arye opsicakʼ tenen, sik telebuk unamak mutuku, kintinibuka deiplulume. Winipmunyeba, mangkau arye ninye obikce nang ara, sikce amutuku noutamuk binuka, telebuk unamake. Amutuku noutam ara, yuk tam nang arye, ninye obikce nang, sik wenena ati, kum yanuka optinge. Amutuku noutam ara, ninye kwang dakalana ara, pia meme.

¹² Akintinip deipnamlum mutuku ara, mangkau arye ninye opmakce nang, amutuku binuka, ukceura, obiceba dipmalinye, el tam nang arye, ‘Anye kwang dakuka opnuyabe,’ tenebikce babye, amutuku noutam binuka ulyeura, kum opnamake. Ara meme. Ati, anyasik noutam arye, anye bira telebuk unamle. Aminyan talak ara, aninye obik nang ara, ‘Yata deiyok ati winilayikce obik do?’ tenen, yupu lipsisikina deiyok nang arye, ayupu ton lipsisiknamake. Adeiyok nang arye, Israel ninye nirya sik kekenak arye, ayupu kum lipsisikmace talak ara, aninye obikce nang ara, wenena kume.

¹³ Winibuka teleb kilinamak ati asik wipdeipnalamak ara, anggun Israel nang arye, sik Kanaan tam nang arye asik dolamika ara, dobuka unamlum bukni, anyasik-anyasik kan-kan arye, Lewi yala nang arena ati, nakub barye (6) mutuku wibuka kintinibuka deipnulyame.

¹⁴ Akintinip deipnamlum asik dolamika ara, Yodan mek koubuka keting yangan tam otam winilye kota kintinipnamlume. Tonda aning atouk, Kanaan tam ton atonun, Yordan mek koubuka oketeng kumul ban tam ara, asik winilye kota ton wibuka kintinipnamlyame.

¹⁵ Dipdemunce, anyasik nirya noutam, nakub barye asik dolamika ara, wibuka deipnulyame. Ara, sik Israel ninye, mangkau arye yuk nang obikce nang binuka unamaka mutuku upnamle. Ara, sik babye, Israel nang koproba babye, ninye asik nang, sik kan-kan unamak nang babye, anoutam arye, yatanye mangkau arye ninye oplyeura, adiparyuk amutuku noutamuk wekelbilyeura, yuk tam nang nirya arye, elti, ikin ning kum arenamake. El ti kum opnamake. Tonda, anyasik-anyasik dolamika babye, yuk karin mutuku arye yanganamak ninye asik nang do, tonda, sik Israel yala nang ap, neika unamak nang bukni, yuk yala nang do, mangkau arye ninye obikirye, ilil uplirye, ‘Atam nang arye opsicak,’ tenebikceura, anyasik-anyasik dolamika wibuka deipnalamak uk, anyasik noutamuk binuka wekekiceura, telebuk unamake.

^16-18 Bukni, anggun nirya arye moubuka tenenamlume. Winipmanto ara, tonoknye birye besi ning arye do, kat yo arye do, yin arye do, weik keil arye do, ato ning bobuka, el kwit oplyak diplyopura, el atouk akunum winipmalinye bira, ‘Elda ninye onanye ululule,’ tenenamlume. Deiyok ara, el mangkau arye ona kum bukni, yu ubukba, el tenena deice arye yuknye oplobuka atia. Ati ara, elda dipkoprob weik malye unanye ati, el wenena ati, anggun adiparyuk tamubuka wenebuka opmunyeba dipnamle.

¹⁹ Opmakceba dipmalinye, el tam nang arye tamubuka anye bira wenebuka obikiba, adiparyuk dibina uk unamle. Ara winipmanto, el aninye onanye, el oplopmalnye, el tam nang arye, aninye ona deiyoknye akunum eipmunyeura, adiparyuk obikiba dipnamle.

²⁰ Aning atouk bukni, winipmanto ton ani. Tonoknye arye yuknye ati, ‘Na like,’ teneplirye, tulum uplyeura, anye talibuka kama arye opliba diplyeura, ara ‘Dipkoprop ninye onanye,’ tenenamlume. Aning atouk, tonoknye birye yuknye biti, ‘Elda opnunʼ tenen, duknuplirye, yata yala ning arye do, ikin ning bobuka dopkweteplyeba, anye el nong bol deice oplyeba diplyeura, ‘Aning ara dipkoprob ninye onanye,’ tenenamlume.

²¹ Winipmanto ning ton ani. Tonoknye el taruk arye kintinilirye, yuknye oplyeba diplyeura, el taruk arye ninye opmalnye bira, ‘Elda malye weik winipmal deice, ninye onanye ululule,’ tenenamlume. Aning ati ara, anye bira adiparyuk wenebuka opmunyeba dipnamle. Tonda, oplyeura dipmalinye, el tam nang arye, tamubuka anye eipmunyeura, el winina ati, sikce el wenebuka obikiba dipnamle.

²² Aning atonun kum bukni, tonoknye el yu tenena kumce, mangkau arye yuknye ati kama arye oplyeura, tonda, duknupmalyak arye kume. Tonda, ‘Anye opnun,’ tenena kum buk, ikin ning mangkau arye dopkweteplyeba, tonye el nong bol deice oplyeba diplyeura, ‘Anye bira ninye onanye,’ kum tenenamlume. Deiyok ara, mangkau arye opmala ati nyapsinye.

²³ Aning atouk, tonoknye el mangkau arye ikin keil doplirye, yuk nang el lina kum buk, akeil dobuka, el yu tenena kumnye oplyeba diplyeura, elti, ara, ‘Elda ninye onanye,’ kum tenenamlume. Deiyok ara, anye birye, ‘Anye na like, elda opnune tenen, kum tenemalce mangkau arye el yu tenena kumnye oplyeba dipnamla ati, anye bira, ‘Elda ninye onanye,’ kum tenenamlume.

²⁴ Awininamlum noutam arye, arup nyapmasin ning, atonun ton winimunyeura, anggun aulamlum Israel nang nirya bulubuka wekmunyeura, ‘Ninye opmakce nang ara, yupu lipsisikuka winipnamabeʼ tenen, yupu talinamlume. Ninye oplyeura dipmalinye ap, ninye opmalinye deiyoknye ap, sik tam nang nirya arye, yupu talibuka ‘Yata wiripnamap do?’ nyabuka, yupu moubuka talinamnyake.

²⁵ Anggun nirya bulubuka yanuka wekmunce, yupu talibuka, mangkau arye ninye oplyeura dipmalya ati, dipmalinye tam nang arye, ikin ning el deice kum deilinamake nyabuka lyebikirye, anye telebak uk delinamake. Ara ninye kum opmantoak, teleb asik wibuka deipnalum noutam arye, anye dobuka deipmunyeba, asukumuk unamlule. Anye amutuku bilyeura, amutuku binuka ulamlyebuk, atalak imam weik deiyok kiyamlinye, akunum diplyeura, anye tamubuka el mutuku uk yanuka unamlule.

^26-27 Bukni, el anye bira adiparyuk bobuka ninye kum opmanto deiyoknye deipmunyeba, daulamunya ani, aminyan talak ara, el kanye aryuk, anyasik batakuka yukak bilyeura, el oplyeba deiamlyenye, el tam nang arye, aona deiyoknye eibikirye, anye kwang dakna ati obikceba diplyeura, aobikce nang ati, ‘Sikda weik malye ning winipmaka ati, ninye on nang unyake,’ kum nyanamlume.

²⁸ Deiyok ara, mangkau arye ninye opmakce nang ara, ‘Telebuk unamakeʼ tenen, ‘Ninye kum opmanto asik binuka, pia daunamake. Daulamikce bukni, imam weik deiyoknye akunum diplyeura, aninye obukye bira, el mutuku tamubuka binamleʼ tenen, kintinip deiamikce mutuku dobuka, delilbanamnyake. Ati, imam weik deiyoknye dipkoprob akunum diplyeura, amankau arye ninye obuknye bira, el mutuku tamubuka binuka unamle.

²⁹ Aning nirya ara, pia ati, winibuka-winibuka unamlume. Dan mutuku do nirya, anggun unamlum mutuku noutam nirya ara, sik ap, anggunce deipmunyeba, dadeipdanin banamak nang nirya ap, sik unamak mutuku nirya ap, unmakak nirya ap, ayupu atonun talibuka unamake.

³⁰ Ninye nirya unamaka noutam arye, tonye birye tonye biti olana ati ara, tonoknye birye yu uplyeura, ‘Anye opnun teneplirye, dipkoprob oplyeura, elce ninye oplomuk ning, yuk nang arye eibikirye, sik babye yupu deice arye, ‘Nun ton dinmabe. Anye bira dipkoprob malye weik upmukce, yuknye opmuka ati, elda ninye onanye ulule,’ nyabuka, laka nyabikcopura, sikce, ‘Aning ara dipkoprob winipmuke,’ tenepmunce, ninye opmalenye ati, wenebuka opnamlume. Bukni, aning babye atouk bukni, bitinye nang arye kume. Tonoknye biryuk, ‘Na asing arye eipmanuba, anye birye yuknye opmue,’ nyaptu babye, anggunce, ‘Akunuma, anye birye ninye opmuka ati, dawenebuka opnuyabe,’ pia kum tenenamlume. Tonoknye aryuk, ‘Na ton eipmanune,’ nyaptue babye, anye kum wenebuka opnamlume. Bitinye do, winilye do, ninye weik ton. ‘Nun nirya arye akunum eipmaba ati, akunuma nyaptingura, anggun yupu lipsisikna deiyok nang arye, ‘Dipkoprop anye bira, ninye onanye ululule,’ tenenamlume.

³¹ Yupu moubuka talipmunyakarye, dipkoprob tonoknye birye, ninye tonok ton oploplyeura, aopmalinye ati, adiparyuk wenebuka onamlume. Yuk ton kume. Yuk nang arye, ‘Kume, nun kwit ona kume. El pununa ati, dekna weik ning uang weik arepya deice arye, sikce anye batakikiba, bindoptue,’ nyabuka morobikca babye, aning ara, kekena pia kume. Aning kum bukni, amalye upmalirye, ninye opmalya ati, adiparyuk wenebuka opmunyeba dipnamlule.

³² Aning atonun ton, winipmanto ara, ninye tonoknye ton bilirye, el kwit mangkau arye oplirye, Kanaan mutuku noutam ninye kum opmantoak bilirye, daulamya ani, aminyan talak anye birye, “Namin kin yo bok ton, arepsiniba, na mutuku ton, tamubuka bitinye,” nyabuka moroptua babye, ayupu ara, pia kekena meme! Deiyok ara, anye birye ninye omlye talak ulamye imam deiyoknye min kum dipmalye talak ara, ninye omlinye birye, tamubuka el mutuku kum binamle. Bukni, elce ninye omuk talak, ulamuk imam deiyoknye akunum diplyeura, ninye ona deiyoknye bira Kanaan mutuku batakuka, Israel mutuku tam yanuka una telebe.

³³ Anggunda anyapmasin touk, aninguk winimunyeura, anggun unamlum mutuku tuku noutam ara, malye kum kilinamlume. Tonda, ninye ona deice arye, sik mutuku malye kilinamlume. Ati, anggun mutuku noutam arye, ninye obimunyeba, ining balyeura, anggun mutuku tuku pia malye kilinamlume. Winipmunyeura, amutuku tamubuka teleb kina ati ara, anggunce dipkoprob ninye opmalenye bira, el babye adiparyuk wenebuka onamlulume. Kumopura, anggun mutuku tuku tamubuka teleb kum uptue.

³⁴ Anggun unamlum mutuku noutam nirya ara, malye una deice arye, anggun mutuku tuku malye kum kilinamlume. Deiyok ara, na Allah Yahweh, na babye amutuku noutam unamna ati, anggunce amutuku ton, malye kum kilinamlume. Ara, nara Allah Yahweh unune. Tonda nara anggun Israel nang umunya noutam ara, na ton aunune. Allah Yahweh arye sik Israel nang ati nyabuk.