Bilangan 34 - Eipomek

Kanaan mutuku noutam, atuku nirya bokuk ning ati, nyabuk yupu

¹ Allah Yahweh arye, Musa ati nyabuk.

² Ayupu ara, Israel nang ati nyadeipsina ati, ance sik Israel nang dam bimince nyapnulyame. ‘Kanaan mutuku bimunce, narye anggunti amutuku arepsiniba, anggunce aning dobuka talipnamlum mutuku nirya ara, pia ati aunamlume. Amutuku wililongonak ara ani.

³ Selatan tam ubuk mutuku tuku ara, Sin mutuku pata arye dipdongobuka, Edom mutuku tam ap, anyapce ubuka, keting panalyangan tam, garam pia weik ulye weik laut mekwen el si ara Laut Mati, tonda Laut Garam mekwen nyanyak ning, asukum sekdongobuka, deibuka sirya tam ubuk tuku ara, selatan tam sirya tam upnamle.

⁴ Tonda anyapce ubuka iknapye dam tam, selatan tam ara, mutuku si Akrabim bisik arye dipdongobuka binamuka ani, bisibuka Zin mutuku dam arye, itam bukni, sirya mutuku si ara, Kades-Barnea mutuku arye atam wilinak sekdopnamlume. Tonda, keting kumulban tam ara, Asar-adar mutuku arye dipdongobuka, Asmon tam ubuk mutuku tuku ap,

⁵ anyapce dukdongobuka, keting kumulban tam binuka, Asmon tuku wilinak arye dipdongobuka, Mesir tam weik lu mutuku noutam, mek kumak arye binuka, sirya ara, weik laut mekwen el si Laut Mediterania dam binuka, sirya wililonak upnamle.

⁶ Tonda keting kumulban tam ati ara, anggunce weik laut mekwen kup-kup, el si Laut Mediterania, asukum arye wilipdopmunyakarye, keting panalyangan tam ulye tuku ara, dopropnamlume.

⁷ Arah outam dabu tam tuku wilinak ati ara, anggunda weik laut mekwen, el si Laut Mediterania ara keting kumulban tam bukni, otam noutam arye wilipdopmunyakarye, anyapce keting panalyangan tam, Hor mutuku tam nirya amutuku tuku wililonak ton deipnamlulume. Asukum uamuk tuku ara, dopropnamlume.

⁸ Tonda, Hor mutuku tam arye, dipdongobuka keting panalyangan tam mutuku si Hamat mutuku bisik ban tam, anyapce Zedad tam ap, dipdongobuka wililonak deipnamlulume.

⁹ Tonda anyapce, otam Zifron mutuku dam arye dipdongobuka, sirya tam ara, Hasar-Enan mutuku ara utara dabu tam (arah utara) mutuku tuku wililonak ton asukumuk deipnamlulume. Anoutam uamuk tuku ara, binuka dopropnamlume.

¹⁰ Ura keting panalyangan tam mutuku tuku wililongonak ara, Hasar Enan tam mutuku arye dipdongobuka, iknapye tam (arah selatan) bukni, Zefam mutuku tam arye binuka, wilipdopnamlulume.

¹¹ Selatan tam ara, Zefam mutuku arye dipdongobuka anyapce koulukuka, Ribla mutuku bimunce, Ai mutuku dam bukni, keting kumulban tam anerye dukdongobuka, Galilea mekwen dam bukni, dabu tam ara, keting yangan tam mutuku kon arye binuka, wilibuka dopropnamlume.

¹² Arah selatan tam ati ara, Yordan mek piridipna tam arye dipdongobuka, weik laut mekwen el si ara Laut Mati, adeibuka dam arye mutuku tuku wililonak sirya ning ara, deipnamlume. Winipmunyeura, danoutam uamuk mutuku tuku nirya ara, sik yuk-yuk talibuka unamlum mutuku tuku aupsuk touk, wilibuka talipmunce, unamlume.

¹³ Allah Yahweh arye Israel nang ati nyapdeipmok yupu ara, Musa birye akunum nyapdeibukura, ayupu ton nyabuk. “Amutuku doropnumunyeura, anggunce, ‘Aning wipnuyap do, aning do?’ tenen, bikilina deiyok ning, el si ara undi, aning pil dopmunye deice, si tukwak upmalye touk, amutuku dopropnamlume. Ara, Allah arye nyapmasil touk, Israel yala nang noutam bukni, toupne barye (9) yala nang ap, tonda, Manasye yala nang bukni, sik noutam arye bokuka, Yordan mek koubuka, otam unamak nang ap ati, sik unamak mutuku ton, yuk wilibuka deipnamlulume,” nyapmasile.

¹⁴ Winipnamlum deiyok ara ani. Sik Ruben yala nang ap, Gad yala nang ap, tonda Manasye yala nang bukni, sik noutam arye bokuka, Yordan mek koubuka otam unamak nang ara, sik unamak mutuku ati, anggunce atuku akunum areplumak doprobik. Tonda atuku doprobik ning ara, sik ni yapu arye deibikba, dadeipdanin, yangalamik touk, akunum bokuka arelumak, doprobika ati, amutuku tuku ara, pia talibuka unamake.

¹⁵ Sik anang pia ati talibuka unamak mutuku tuku ara, Yordan mek duman arye dipdongobuka, otam keting kumulban tam balamle bukni, Yordan mek koubuka keting panalyangan tam bukni, Yeriko mutuku dam tuku arebupu ning talibuka unamake.

Kanaan mutuku tuku talibuka bokolinamak nang ara, ‘Sik anang arye, atuku bokuka arepnamsiake,’ nyapdeibuk yupu

¹⁶ Allah Yahweh arye, Musa ati nyabuk.

¹⁷ Amutuku unamlum ninye noutam arye, anggun ulamlumak ati, tuku talibuka bokolinamsil ning ara, ani. Ara imam Eleazer ap, tonda Nun elce deiamuknye, Yosua ap, sikcuk amutuku bokolinamsirake.

¹⁸ Tonda, amutuku dolona ati ara, sik abitinye nang melin ati, sik Israel nang noutam arye, yala yuk-yuk aululuma atonun, tonok yala ati, tonoknye wipdeipnamlyame. Ninye yuk-yuk ton wipdeipmunyeba, sik ap, Eleazer ap, Yosua ap, neika pil donamnyake. Adeice arye Yosua ap, Eleasar ap, sik Israel yala deiyok nang arye, anggun unamlum mutuku tuku ati ara, bokolinamsiake.

¹⁹ Amutuku tuku nirya bokuka arena ati ara, sikce wipdeibik nang, sik si ara, ani. Yudah yala nang noutam arye Yefune arye deiamuknye, Kalep wipdeipnulyame.

²⁰ Simeon birye deiamuk nang, sik yala nang noutam arye, Amihud birye deiamuknye, Samuel wipdeipnulyame.

²¹ Benyamin yala nang noutam arye Kislon arye deiamuknye, Eliad wipdeipnulyame.

²² Dan birye deiamuk nang, sik yala nang noutam arye, Yokli arye deiamuknye, el si Bokki wipdeipnulyame.

²³ Yusuf birye deiamuk nang bukni, Manasye birye deiamuk nang, sik yala nang noutam arye, Efod arye deiamuknye, Haniel wipdeipnulyame.

²⁴ Efraim birye deiamuk nang, sik yala nang noutam arye, Siftan birye deiamuknye, Kemuel wipdeipnulyame.

²⁵ Zebulon arye deiamuk nang, sik yala nang noutam arye Parnah arye deiamuknye, Elisapan wipdeipnulyame.

²⁶ Isakar birye deiamuk nang, sik yala nang noutam arye Asan birye deiamuknye, Paltiel wibuka deipnulyame.

²⁷ Asyer birye deiamuk nang, sik yala nang noutam arye Selomi birye deiamuknye, Ahihut wibuka deipnulyame.

²⁸ Naftali birye deiamuk nang, sik yala nang noutam arye Amihud birye deiamuknye, el si Pedael wipdeipnulyame. Ayala ati deiyok kibik nang Yehuda ara, Yefune el mi Kalep kibuk. Simeon ara Amihud el mi samuel kibuk. Benyamin Kislon el mi Elidad kibuk. Dan Yokli el mi Buki kibuk. Manasye ara, Efod el mi Haniel kibuk. Efraim Siftan el mi kemuel kibuk. Zebulon ara, Parnah el mi Elisapan kibuk. Isakar ara, Asan el mi Paltiel kibuk. Asyer bira, Selomi el mi Ahihut kibuk. Naftali ara, Amihud el mi Pedael kibuk. Yala si Deiyoknye Yehuda Yefune el mi Kalep Simeon Amihud el mi Samuel Benyamin Kislon er mi Elidad Dan Yokli er mi Bukki Manasye (el li Yusup) Efod el mi Haniel Efraim (el li Yusup) Siftan el mi Kemuel Zebulon Parnah el mi Elisafan Isakar Asan el mi Paltiel Asyer Selomi el mi Amihud Naftali Ahimud el mi Pedael

Yala si Deiyoknye

²⁹ Allah arye, “Sik anang nirya ara, sik yala yuk-yuk aululuma atonun, sik deiyok kibuka talipsikirye, anggun unamlum mutuku tuku wilibuka delina deiyok nang ara, Eleasar ap, Yosua ap, sikce tuku wilidikceba melinamak nang ton wipnamlume,” nyapdeibukba, wibik nang sik si ara, asukum deice tam akunum sekmabe. Ara, anggun Kanaan mutuku unamluma ara, anang aryuk tuku bokolinamsiake.