Bilangan 33 - Eipomek

Israel nang Mesir mutuku arye, bisik balamika ani, Moab mutuku biyik yupu

¹ Ura, Israel nang Mesir mutuku ulamika ani, batakuka bisik balamik talak ara, sik Israel yala nang yuk-yuk ulamik touk, yuk-yuk mutuku weik balamik talak babye, akong-akong yuk-yuk duknubuka, bisik balamik. Abalamik talak ara, Musa ap, Harun ap, sikce deiyok kibuka balamiprikba, sik Israel nang ara aminyan balamikce, amutuku-amutuku mapdanin balamik.

² Allah Yahweh arye, Musa ati, “Winipnamlyame, anggun banamlum mutuku-mutuku nirya ara, sekuka deipnulyame,” nyabuk touk, sik Israel nang bisik noutam malbalamik mutuku si nirya ara, Musa birye yuk-yuk sekeibuk. Ati, amutuku-amutuku bana ati, sikce min balamik mutuku si ara ani.

³ Sik Israel ninye Mesir mutuku ulamika ani, batakuka yayik talak ara, Kaplina Kwalya kwalibuka mapmika, ton sum ara, wala tonok kibuk deice, tanggal 15 sum ap, Mesir mutuku batakuka biyik. Atalak ara, Allah el mikip weik deice arye kalikuka melibukba, Mesir mutuku nang dinmekak aryuk, Israel nang ara, weik asik si ara, Rameses mutuku ulamik bukni, amutuku batakuka, talye mangkau asa biyik.

⁴ Israel nang Mesir mutuku batakuka kouluksakuka, bisik biyik talak ara, Mesir mutuku yala nang minop deiamik mapu nirya ara, Allah arye sik wenena ati obukba, amapu nirya, tuba weinmik sumuk, Israel ninye biyik. Aning winibik ara, Allah Yahweh arye, ‘Aning winipnyeba, na mikip weik, sik nirya biknamakʼ tenen, winibuk. Adeice arye, sik Mesir mutuku ninye, sik si erelamik ning, talye ning bukni, sikce, ‘Nun ni yapuʼ tenen, allah-allah nirya si erelamik ning nirya ati ara, Allah arye, sik wenena ati, ikin ning weik, sik deice arebuk. Ara, Mesir mutuku nang arye, ‘Se, el Allah Yahweh ara, dipkoprob weiknye ululeʼ tenen, bikna ati winibuk.

⁵ Aning nirya akunum winibukopura, Israel nang Rameses mutuku batakuka biyikce, Sukot mutuku binuka, sik tia mana ati, tenda aik binuka, deibikce mabik.

⁶ Mabikura, sik nirya ara, ance Sukot mutuku batakikce, Etam mutuku binuka, sik doltakan tenda aik tonap dabinuka deibik. Etam mutuku ara, ninye pia kumak, weik pata mutuku dam uamuk.

⁷ Etam mutuku arye batakikce, tamubuka Bahal-Sepon mutuku atam bukni, keting panalyangan tam ton, mutuku si Pi-Hahirot mutuku nyalamik mutuku, tamubuka yayik. Yayikce, Mikdol mutuku dam arye, doltakan tenda aik binuka deibik.

⁸ Pi-Hahirot mutuku anyuk daunmeka ani, amutuku batakikce, Allah melibuka deice arye, weik laut mekwen, el si ara, Teberau Laut mekwen koubukabikce, otam ninye pia kumak, pata mutuku tam, Etam mutuku yanuka wekik. Winibikce, like winilye sum deice arye, bisikuk banmeka ani, Mara mutuku biyikce, sik doltakan tenda aik ara, amutuku noutamuk binuka deibik.

⁹ Mara mutuku binuka unmika ani, amutuku ton batakuka, sik doltakan tenda aik ara, Elim mutuku binuka deibik. Amutuku ara, weik pata mutuku noutam bukni, amutuku ara, mek pu ara 12 awamuka ati, tonda Korma yo tujuhpuluh (70) ton amutuku tekamuk.

¹⁰ Atalak ara, Elim mutuku batakikce, sik aik ara, weik laut mekwen, el si Teberau Laut mekwen, lilunakuk sik dolamik tenda aik ara, binuka deibik.

¹¹ Weik laut mekwen lilkwa binuka, tenda aik deibik bukni, tamubuka sik aik ulubuka, pata mutuku ara, mutuku si Sin mutuku binuka, sik dolamik tenda aik binuka deibik.

¹² Aning atonun, asukum arye batakuka, Dofka mutuku dam binuka, sik dolamik tenda aik binuka deibik.

¹³ Anyubuka Dofka mutuku batakikce, sik tenda aik ara, Alus mutuku binuka, sik doltakan tenda aik binuka deibik.

¹⁴ Sik nirya, Alus mutuku arye batakuka, mutuku si ton Rafidim mutuku binuka, sik dolamik tenda aik binuka deibik. Bukni, Rafidim mutuku noutam ara, ninye dipmanto mek ton pia kum uamuk.

¹⁵ Winiyamuk ati, sik adiparyuk Rafidim mutuku batakikce, sik tenda aik ara, pata mutuku bukni, mutuku si ara, Sinai mutuku binuka, sik doltakan tenda aik binuka deibik.

¹⁶ Aning atouk, sik nirya ara, Sinai mutuku arye batakikce, sik aik ara, Kibrot-Tawa mutuku binuka, sik dolamik tenda aik binuka deibik.

¹⁷ Kibrot-Tawa mutuku arye batakuka biyikce, sik tenda aik ara, Haserot mutuku binuka deibik.

¹⁸ Aserot mutuku batakuka, asukum arye kisidakuka, mutuku si Ritma mutuku binuka, sik doltakan tenda aik binuka deibik.

¹⁹ Sik nirya ara, Ritma mutuku arye batakuka biyikopura, sik tenda aik ara, Rimon-Peros mutuku binuka, sik tenda aik deibik.

²⁰ Atonun, Rimon-Peros mutuku babye, batakuka, mutuku si, Libna mutuku binuka, sik doltakan tenda aik deibik.

²¹ Sik adiparyuk Libna mutuku arye batakikce, Risa mutuku binuka, sik tenda aik deibik.

²² Atonun, Risa mutuku ara batakikce, Kehelata mutuku binuka, sik doltakan tenda aik binuka deibik.

²³ Aning atouk, Kehelata mutuku batakikce, Har-Syafer mutuku binuka, sik doltakan tenda aik deibik.

²⁴ Anyubuka, Har-Syafer mutuku batakuka biyikce, sik tenda aik ara, Harada mutuku binuka deibik.

²⁵ Harada mutuku batakuka biyikce, sik tenda aik ara, Makhelot mutuku dam binuka deibik.

²⁶ Sik nirya ara, Makhelot mutuku batakikce, amutuku arye koubuka, Tahat mutuku binuka sik doltakna tenda aik binuka deibik.

²⁷ Tahat mutuku asukum arye batakuka, Tara mutuku binuka, sik doltakan tenda aik deibik.

²⁸ Tara mutuku batakikce, sik nirya adiparyuk, Mitka mutuku binuka, sik tenda aik deibik.

²⁹ Atonun, Mitka mutuku batakuka, Hasmona mutuku binuka, sik doltakan tenda aik binuka deibik.

³⁰ Hasmona mutuku ara, atouk batakikce, sik tenda aik ara, Moserot mutuku binuka deibik.

³¹ Sik nirya ara, Moserot mutuku batakuka biyik ura, Bene-Yaakan mutuku binuka, sik doltakan tenda aik binuka deibik.

³² Sik nirya Bene-Yaakan mutuku batakikce, sik tenda aik ara, Hor-Gidgad mutuku binuka tenda aik deibik.

³³ Aning atouk anang ara, Hor-Gidgad mutuku batakikce, Yotbata mutuku binuka, sik tenda aik binuka deibik.

³⁴ Yotbata mutuku batakuka biyikce, Adrona mutuku binuka, sik doltakan tenda aik binuka deibik.

³⁵ Adrona mutuku dobuka unmika ani, kanye arye batakuka biyikce, sik tenda aik ara Ezion-Geber mutuku binuka deibik.

³⁶ Sik nirya ara, Ezion-Geber mutuku arye batakikce, ninye pia kumai, Sin mutuku pata ara, Kades mutuku uk binuka, sik tenda baju bola doltakan aik deibik.

³⁷ Sik nirya ara, Kades mutuku uk unmika ani, asukum arye batakuka, Hor mutuku tam biyik. Hor mutuku ara, Edom yala nang ap sik tuku wilinak binuka, sik tenda baju bola doltakan aik deibik.

³⁸ Aunmek talak ara, imam Harun biti, Allah Yahweh arye, “Hor mutuku welepnule,” nyabukura, amutuku welebuk. Welebukce, Harun ara, amutuku deice uk binuka dibuk. Abinuka dibuk talak ara, sik Israel nang ara, Mesir mutuku ulamika ani, batakuka yanmek keting tamun 40 tahun kibukura, yanami touk aketing tamun atouk kibuk ara, pamubarye wala deice, tanggal satu deice arye dibuk. Harun el kam ulamuk keting tamun ara, seratus duapuluh tiga (123) tahun kibukura, adiparyuk Hor mutuku deice uk binuka dibuk.

³⁹ Imam Harun ara, el upnin yangalamuk keting tamun nirya ara, yupa pia weik, seratus dua puluh tiga (123) tahun ubukopura, adiparyuk Hor mutuku anyuk dibuk.

⁴⁰ Kanaan mutuku bukni, iknapye dam ara, selatan tam, Negef mutuku ninye deiyok kibuka taleamuknye, el si Harad birye kekelamukak, “An taliplum mutuku tam ara, sik Israel nang yanganamake,” nyabikura, kekebuk.

⁴¹ Atalak ara, sik Israel nang ara, Hor mutuku arye batakuka, sik tenda aik ara, Salmona mutuku binuka deibikce, asukumuk unmek.

⁴² Sik tenda aik ara, Salmona mutuku arye batakikce, Punon mutuku binuka, sik doltakan tenda aik deibik.

⁴³ Atonun, Punon mutuku arye batakuka, sik tenda aik ara, Obot mutuku uk binuka deibik.

⁴⁴ Obot mutuku aunmika ani, batakuka Abarim mutuku ara, Moab mutuku tam binuka, sik tenda aik deibik.

⁴⁵ Sik nirya amutuku arye batakuka, asik oldem uamuk mutuku, Dibon-Gad mutuku uk binuka, sik doltakan tenda aik deibik.

⁴⁶ Dibon-Gad mutuku binuka, tenda aik deibuka unmika ani, amutuku batakuka Almon-Diblataim mutuku binuka, sik tenda aik deibik.

⁴⁷ Israel nang ara, Almon-Diblataim mutuku arye batakuka, banmeka anin, Nebo mutuku dam bukni, Abarim mutuku dam binuka, sik doltakan tenda aik deibik.

⁴⁸ Abarim mutuku arye batakuka, Moab tam Yordan mek lilun ara, Yeriko mutuku dam binuka, sik doltakan tenda aik deibik.

⁴⁹ Israel nang, sik tenda aik ara, Yordan mek lilunakuk bukni, mutuku si ton Bet-Yesimot mutuku arye dipdongobuka, Abel-Sitim mutuku binuka, sik doltakan tenda, aik deibik. Ara, Moab mutuku lu tam binuka, sik doltakan tenda, aik deibik.

Israel nang Yordan mek koubuka, otam Kanaan mutuku kum biyik talak arye, “Aning-aning wininamlume,” nyapdeibuk yupu

⁵⁰ Moab mutuku tam, Yordan mek lilunuk bukni, Yeriko mutuku dam unmek talak ara, Allah Yahweh arye Musa biti, ayupu nirya nyapdeibuk.

⁵¹ “Anyapdeipkin yupu nirya ara, ance sik Israel ninye kekenak binuka nyapnulyame. Winipmanto ara, sik Yordan mek koubuka, otam Kanaan mutuku bimunye talak ara,

⁵² Anggun Kanaan mutuku bimunyopura, sik amutuku talibuka unyak nang nirya ara, adiparyuk yakdonoknamlulume. Tonda, amutuku ukirye, isa si erenyak nang nirya ara, obuka kum kipdeipnamlume. Sikce si erenyak ning ara, keil ap, kat ning nirya ap deice, ninye arye memebuka deibikirye, ‘Nun ni koproba anye tenen, si erenyak ning ap, tonda mutuku kon deice aik dobuka, isa si erena ati, kam ning obikirye, memebuka uku dongolbanyakak ap, adiparyuk dakuka uluplopmunce, aning nirya ara, winibuka sirya danamlulume.

⁵³ Amutuku tuku nirya ara, narye anggunti akunum arepsise ati, anggun adiparyuk amutuku binuka wekemunyeura, amutuku uk talibuka unamlume. Ara, narye anggunti arepsise mutuku ulule.

⁵⁴ Tonda, anggunce amutuku bimunce, anggun Israel ninye yala yuk-yuk aululuma atonun kibuka, ‘Aning winipnuyap do, aning do?’ tenen, bikna ati deiyok laka kin ning bikilina ati, el si ara undi, pil dopmunyeura, ayala nang sik si lak uplyeura, atuku bokmunce, talibuka pia ati unamake. Ara, ton yala, ninye pia weik ulamikce nang ara, sikti, tuku weik tonun bokuka arepnulyame. Tonda ninye weik kum ulamikce yala ara, tuku mitik tonun aryuk bokuka arepnulyame. Aning dolona ati ara, bikilin ning undi deice aryuk pil dopmunce, ayala ton, ayala ton sik si lak uplyeura, adeice arye bokuka arepmunyeba, amutuku tuku dolonamake. Tonda, anggun ni yapu, anggun yala deiyok-deiyok nang ulamik touk, anggun atalak ululum nang babye, anang sik si deice dopropnamlume.

⁵⁵ Bukni, sik min arye amutuku talibuka ulamik ninye, anggunce mal olbimunce, obuka malye kum kipmunyeura, sik amutuku unyak ninye nirya arye, anggunti tamubuka ikin ning deipsikceba, kanye imun unamsile. Winipmanto ara, mek wininga arye asing tuluksilyeura, uk dipsilyeba kanye imun ulamsil atonun, winilinamsiake. Tonda, tace ning arye yan tatang noutam luksilyeura, uk dilamsil atonun winilinamsiake. Atonun tonda, dotalak ara sik anang arye, tamubuka mal pipnamsiake.

⁵⁶ Anggunce amutuku nang kum yakuka donokmunyeura, narye sik amutuku unyak ninye nirya ati, “Winibuka ikin ning arepnamne,’ tenepse ning ara, tamubuka anggun damuk winipnamsine. Allah arye sik Israel nang nirya ati nyabuk.