Bilangan 32 - Eipomek

Keting panalyangan tam, Yordan mek koubuka, otam mutuku ton bokuka arebuka ati, sekik yupu

¹ Ura, sik Ruben yala nang ap, Gad yala nang ap, sikce weilamik kam ning ara, pia weike uamuk. Pia weik ubuka ati, sikce Yaezer mutuku ap, Gilead mutuku ap, eibikce utenebik. ‘Se, amutuku bitinye ara, sapi basam weinak ati, amutuku ara, pia teleb mutuku ati, nunce weinyap ning ara, amutuku noutam arye weitibyeura, pia teleb uptue,’ tenebik.

² Utenebik ati, sik abitinye yala nang, sik deiyok nang arye, Musa ap, imam Eleasar ap, tonda Israel nang sik deiyok talibuka yupu nyana deiyok nang, yuk nang nirya ap ati, sik dam binuka nyabik.

^3-4 “Se nun ni yapu, atam dinmap mutuku si ara ani. Ara, Atarot mutuku ap, Dibon mutuku ap, Yaezer mutuku ap, Nimra mutuku ap, Hesyebon mutuku ap, Eleale mutuku ap, Sebam mutuku ap, Nebo mutuku ap, tonda Deon mutuku ap eipmabe. Asi nyapmap mutuku nirya ara, sapi basam weinak ati ara, amutuku pia teleb mutuku ulule. Ati, nun tenepmaba ara ani. Nun ni koproba Allah Yahweh arye meliamubukba, nun Israel yala nang arye, sik Midian mutuku nang nirya, amutuku noutam ulamik nang nirya ara akunum obuka sirya dakupu. Bukni, amutuku nirya ara, nunce weinyap kam ning ara, amutuku bobitibye ura, dipkoprob teleb upsutue. Deiyok ara, nunda anggun amu tam unyap nang ara, nunce weinyap ning ara, amutuku noutam arye weiptibyeura, pia weik upnamsile atia,” nyabik.

⁵ Aning ati ara, nunce anti tonda moropkiyape. Ance, nunda an amu tam unyap nang ati, ‘Anggunda teleb nang,’ tenepsutum toura, amutuku tuku ara, nunti arepsiminyeura, talibuka unamabe. Tonda, ance nunti, ‘Anggunda atam mutuku arye batakuka, Yordan mek koubuka, otam bilulume,’ kum nyapnusilame. ‘Asukumuk unamlume, nyapsutumʼ tenen, moropkiyape,” nyabuka, sik Ruben yala nang ap, Gad yala nang ap arye, winibuka morobik.

⁶ Nyabika ati, Gad birye deibukba dadeipdanin yangalamik yala nang ap, Ruben birye deibukba dadeipdanin yangalamik yala nang ap ati, Musa birye tamubuka nyabuk. “Kume anggunda, ‘Amutuku uk utibirye, pia telebuk unamabe,’ tenepmalumce, nyanmalum do? Bukni, anggun kayapu nang, yuk Israel yala nang nirya arye, otam mutuku binuka, yuk mutuku nang ati mal olbitingura, ‘Nunda kum melibuka olbinamabeʼ tenen, nyapmalum do?

⁷ Tonda, winipmunye deice arye, anggunda yata deiyok ati, anggun kayapu nang, ‘Nun yuk Israel yala ninye ara, Yordan mek koubuka otam kum bitibye,’ tenebikirye, ilil uplye ati, sik kanye talima boktoplirye, walwal uplyakʼ tenena atia. Yata ati utenepmalumce nyaplum do? Tonda, yata ati, Allah Yahweh arye, nun Israel yala nang nirya ati, ‘Otam mutuku tuku nirya anggunti arepnamsine,’ nyalin yupu deice arye, akunum nyamsuk mutuku, ‘Nun kayapu nang kum binamakʼ tenen, nyapmanelum do?

⁸ Tonda nyapsine. Minop talak, narye Kades-Barnea mutuku unmapu talak ara, anggun ni yapu ati, Otam mutuku nirya kamo dilbilulume nyabuka wipdeipsiba, dilbiyik bukni, ilil ubukba, ‘Se, yata wiriptibye do?’ tenen, nyamik touk, anggun wini talak babye, atonun nyanmalume,” Musa birye nyabuk.

⁹ Nyabukce, ayupu ton dukdongobuka nyabuk. “Sik atalak ulamik nang ara, omutuku dilbalamikak, mutuku si Eskol lu mutuku biyikce, amutuku tuku ara, akunum eibik. Eiamik bukni, anang ara, tamubuka yanmek deiyok ara, “Se, Allah arye, ‘Amutuku arepnamsine,’ nyapdeiamsuk mutuku ara, nun Israel nang ara, nun mikip kum ati, nun ilil ati, amutuku kum wektibye,” tenelamikce, nyabika deice arye, sik kayapu nang, yuk Israel yala nang nirya kekebikce, sik talima daksakukba, ilil weik ubuk.

¹⁰ Ilil ubukba, Otam mutuku kum wekelebitibye,’ tenebika ati, atalak ara Allah Yahweh el yu ubukba, elce sikti, mikip deice arye nyabuk.

¹¹ “Pia dipkoprob nyapsine. Anggunda, narye, ‘Arepnamsine,’ nyamsese yupu moubuka kum taliplume. Anggunce, ‘Kum wekelebitibye,’ tenepmalumce, ilil upmasila ati ara, na dipkoprob nyapsine, anggun Mesir mutuku noutam ulamlumba, narye lyepsisirye dobuka boyanamsise nang ara, otam mutuku pia kum dinamlume. Ara, keting tamun dua puluh tahun itam akunum kiyamlye nang nirya ara, narye sik apu yapu Abraham ap, Isak ap, Yakub ap ati, ‘Ateleb mutuku arepnamsine,’ nyabukanyalin yupu nyapdeiamse mutuku ara, anggunda kum wekenamlume. Ara, talye ati kume. Deiyok ara, sik anang nirya ara, narye nyamsese yupu kum kekebikirye, kum dobolbanyake. Nati, yanipmaniace, sik kanye pum tam arye, na nyapsi yupu kekebuka kun unyaka atia. Ati, anang nirya ara, oteleb mutuku kum wekuka unamake.

¹² Sik yuk nang nirya ara, na nyapsine yupu kum kekenyak bukni, Kenas mutukunye el si Yefene, elce deiamuk mi el si Kalep ap, tonda Nun elce deiamuk mi, el si Yosua ap, sik bitinye uk, na Allah arye, Winipnulyamenya, deiamsise yupu ara, moubuka kekepdikirye, urudake. Sik kanye pum tam arye, na yupu kekerurake.” Allah arye nyabuk.

¹³ Ura, sik Israel yala nang weik tonun ulamik nang ara, Allah arye anang ati yu ubukba batakamuk. Winibukura, Israel nang nirya ara, aning-aning nirya kum uamuk mutuku, weik pata mutuku noutamuk, keting tamun empat puluh (40) tahun deice arye, amutuku uk upnin balamik. Winilamik deice arye, Allah dilamukak, elce nyapdeiamuk yupu moubuka kum taleamikce, malye weik ulamik nang ara, atalak aryuk sik nirya dibilamik. Tonoknye babye tuba kam kum ulamik.

¹⁴ Ati dipkoprob nyapsine. Anggun wini talak ululum nang atouk, minop talak babye, anggun ni yapu arye, Allah nyapdeiamuk ning, pia kum kekelamik atouk, anggun Ruben yala nang ap, Kat yala nang ap, anggun babye kum kekelamlume. Adeice arye, malye kiplumce Allah el yupu yaniplumakarye, pia malye weik kiplume. Ati anggun babye, anggun ni yapu malye ulamik atonun anggun babye wininulume. Adeice arye Allah Yahweh, el yu ara mitik tonun aubuk bukni, wini talak ara el yu ara weik tonun tonap upliba, anggun Israel nang deice ikin ning weik tuba-tuba upmasile.

¹⁵ Aning ara, talye ati kum nyapsine. Wini talak anggun babye Allah arye nyamsuk yupu yaniplobuka aminyan kipmunyeura, Allah arye anggunti, ‘Daupmalye, talye dadipnamakarya,’ teneplirye, dipdebuka bataksilyeba, anggun Israel nang nirya, aning-aning kum wamlye mutuku, akata mutuku noutam pia weik tonun talye-talye balamunya ani, asukumuk damapnalume. Tonda, anggunce Allah el yupu moubuka kum talepmunya deice arye, anggun kayapu yuk Israel ninye si beneipmunya deice arye, kum kipdopnamle.” Aning nirya ara Musa birye sik Ruben yala nang ap, Kat yala nang ap ati nyabuk.

¹⁶ Nyabukura, sik Ruben yala nang ap, Gad yala nang ap arye, Musa dam yayikce nyabik. “Telebe anyapsilama ati ara, nun domba basam weinamabak amutuku noutam aryuk poka dopnamabe. Tonda, nun kilapu ap, nun mapu ap, unmakak nirya ara, teleb aik dobibyak arye, asukumuk unamabe.

¹⁷ Winibibye ura, nun adiparyuk kintinipdobibye ura, nun kayapu nang ap, sik yuk yala Israel nang ap, neika mal olbinamabe. Tonda, nunce mal olana ati deiyok nang deiyok koubibye ura, nun kayapu nang nirya ara, dobuka melibibye deice, sikti, areplum mutuku bobinuka unamake. Winipnamap talak ara, nun kilapu ap, mitik mapu ap nirya ara, poka dobik noutamuk ukirye, telebuk unamake. Deiyok ara, ‘Amutuku noutam talibuka ulamik nang arye, kum yanuka opnamak tenen, winipnamaba atia.

¹⁸ Winibuka winibibye ura, nun kayapu yuk Israel nang yala-yala nirya ara, sikce dopropnamaka mutuku tuku tonok-tonok arye dopropnamake. Min kum dopropmakce talak ara, nun adiparyuk tamubuka, nun babye aik koproba kum binamabe. Israel nang yala-yala nirya, sik talibuka unamak mutuku kum dopropmakce talak ara, sikti, melibuka unamabe.

¹⁹ Ati ara, nunce nun kayapu nang ati, Yordan mek koubuka otam keting kumulban tam mutuku tuku ton arepnamalamak ara, atuku mitik tonun babye, ton kum dopropnamabe. Deiyok ara, ance nun talibuka una ati tuku ara, Yordan mek koubuka atam, keting panalyangan tam akunum arepsuluma ati, asukumuk unamabe. Sik Ruben yala nang ap, Kat yala nang ap arye, Musa ati nyabik.

²⁰ Nyabikopura, Musa birye tamubuka sikti, nyabuk. “Dipkoprop anggunce teneplumakarye, akunum kintiplumopura, anggunce, Winipnamabe nyabuka laka nyapmanulum ninguk, dipkoprob winimunyopura, telebuk unamlume. Atam mutuku noutam una telebe uka. Bukni, adiparyuk Allah Yahweh el dinmasilak aryuk, Yordan mek koubuka keting kumulban tam nang mal olalbana ati kintiplulume.

²¹ Tonda, anggun aululum nang nirya arye, Yordan mek koubuka otam ninye mal olbana ati, minop mal olbinamlulume. Atalak ara, Allah arye el menekuka balirye, el mikip weik arye, elti, ‘Nun like,’ tenebikce yala nang ap, tonda, el tenen nang ati olan yala nang nirya ap ati, oplirye, malye kibuka yakdonoknamle. Sik nirya yuk mutuku uk bindopnamake.

²² Winipya deice arye, minop talak amutuku taleamik nang nirya ara, yadonoknamale. Winiplyopura, nun Israel yala nang arye, amutuku nirya dopropnamabe. Aning nirya akunum winibipyeura, atalak aryuk, anggun adiparyuk tamubuka anggun mutuku binuka unamlume. Aning winimunyeura, Allah si deice ap, anggun kayapu nang yuk yala Israel nang si deice ap arye, ‘Aninguk dipkoprob winipnamabe,’ nyabukanyalin yupu deice nyapmalum ning ara, akunum winipnamlume. Tonda, aning akunum winipmunce, sirya dakmunyeura, anggunce nati moropmanulum mutuku tuku ara, aketing panalyangan tam mutuku tuku ara, Allah Yahweh el dinmalya arye anggunce, ‘Amutuku ara, nun mutuku koproba aniʼ tenen, dopropnamlume. Asukumuk amutuku talibuka, pia aunamlume.

²³ Bukni, anggunce, ‘Wininamabe,’ nyabuka nyalin yupu deice arye nyapmalum ning ara, tuba tenenamlume. Anggunce aning nirya ara, kum winipmunyeura, Allah el dam malye unamlume. Aning atonun malye kipmunyeura, dipkoprob nyapsine. Amalye kipnamluma ati, menenga ara, ikin ning weik dopropnamlume. Allah arye wenepnamsilarya, nyapsine.

²⁴ Ati ara, anggunce, ‘Kume aning nirya dipkoprob winipnamabe nyabuka nyalin yupu deice akunum nyapmaluma ati, atalak ara anggun kilapu ap, mitik mapu ap unamakak ati, adiparyuk bimunce, asik donamluma ara, weik aikuk binuka donamlume. Tonda, anggun domba basam weina ati, cang keil poka dobuka wipdongopnamlume. Bukni, anggunce, ‘Dipkoprop winipnamabe,’ nyabuka nyalin yupu deice arye, nyaplum ning ara, pia kum luba kipnamlulume. Musa birye, sik Ruben yala nang ap, Kat yala nang ap ati nyabuk.

²⁵ Nyabukura, sik Kat yala nang ap, Ruben yala nang ap arye, Musa ati nyabik. “Naio, nunda an amu tamuk unyapce, an piluk melibuka donyab nang ati, ance, ‘Winipnulume,’ nyapsiminye touk, aninguk nun ni koproba, an yupu uk kekebuka unamabe. Anda nun deiyoknye ulyama atia.

²⁶ Ati, nun mitik mapu ap, nun kilapu ap, nun weinyap kam un ning, sapi basam ap, domba ap ara, asukumuk deipnamabe. Ara asukumuk Gilead mutuku noutamuk, aik dobuka deibibibnyeba, asukumuk pia unamake.

²⁷ Bukni, ance nyapsutum touk, nun du nang nirya ara, mal olalbana ati, Yin ap, mal ap nirya kintinibibirye, nun ni koproba elce, ‘Winipnululume,’ nyapmasilam touk, Allah Yahweh dinmasilyak arye, Yordan mek koubuka, otam mutuku unyak nang ati, mal olbinamabe. Ara, nun deiyoknye, an Musa birye, ‘Winipnululum,’ nyapmasilam touk wininamabe. An amu tam nang unyapce, ance nyapsiminye touk wininamabe.” Sik Kat yala nang ap, Ruben yala nang ap arye, nyabik.

²⁸ Nyabika ati, anyabik yupu ara, Musa birye imam Eleasar ap, ninye si Nun, elce deiamuknye Yosua ap, tonda Israel nang yala yuk-yuk, sik deiyok kibuka taleamik nang nirya ati, nyabuk.

²⁹ “Ura anggun kekepnululume. Nun kayapu nang, sik Kat yala nang ap, Ruben yala nang ap, sikda, ‘Allah arye nyapdeibuk ning ara, aninguk pia melipnuyabe akunum nyapmake. Ara, sikce, ‘Yo, nun ap melibibyeba, nun Israel yala nang nirya arye, Yordan mek koubuka, otam mutuku unyak ninye ati, mal olal binamabe nyapmake ati, sikce melipsikceba bimunyeura, otam unyak nang obukapmunce, amutuku tuku ara anggun doropnamlume. Anggun kayapu nang Kat yala nang ap, Ruben yala nang arye, dipkoprob akunum melipsikceura, aminyan talak sik anang ati, Gilead tam mutuku tuku ara, bokuka arepnamlume. Winipmunyeba, sikce amutuku nirya talibuka unamake.

³⁰ Bukni, sik Kat yala nang ap, Ruben yala nang arye, kum melipsikceba, sik ap neika Yordan mek koubuka, otam mutuku unyak nang ati, mal kum olbimunyeura, Gilead mutuku kum dopropnamaka bukni, sik ap otam mutuku noutamuk Kanaan tam mutuku tuku ara, anggun dopropmaluma atouk, amutuku uk talibuka unamake.” Musa birye nyabuk.

³¹ Musa birye nyabukura, sik Kat yala nang ap, Ruben yala nang arye, tamubuka nyabik. “Kume na nio, nunda an amu tamuk unyapce, an piluk melibuka donyab nang ati, yata ning do nirya ara, Allah Yahweh elce, Winipnululum nyapdeipsilye touk, aninguk kekebuka wininamabe.

³² Ati, Allah Yahweh arye dinmasilyak arye melipsiliba, Yordan mek koubuka, otam Kanaan mutuku bibirye, otam unyak nang ati mal olbinamabe. Bukni, nun tenepmaba ara, Yordan mek atam keting panalyangan tam mutuku ara, nun mutuku koproba kibibyeura, talibuka asukumuk pia aunamabe,” nyabik.

³³ Nyabika ati, Musa birye amutuku nirya ara, sik Gad yala nang ap, Ruben yala nang ap, tonda Yusup birye deiamuknye Manasye, el yala nang bukni, noutam arye bokuka ulamik nang ap ati, mitik tonun arye amutuku ton bokuka arebuk. Anyarebuk mutuku tuku nirya ara, ani. Ara, Amori yala nang, sik weik deiyoknye, Raja Sihon birye taleamuk mutuku ap, tonda Basan mutuku ninye deiyoknye Raja Og birye, taleamuk mutuku ap, bokuka arebuk. Ara, amutuku nirya ap, amutuku noutam dolamik weik asik dolamikak nirya ap, anyasik dana-dana tam uamuk mutuku tuku ap ara, Musa birye dobuka arebukba, sik Gad yala nang ap, Ruben yala nang ap, Manasye, el yala nang bukni, noutam arye bokuka ulamik nang ap, sikce doprobik.

³⁴ Amutuku tuku nirya akunum arebukura, sik Gad yala nang arye tamubuka dolamik mutuku asik ara, ani. Ara, Dibon mutuku ap, Ataror mutuku ap, Aroer mutuku ap, tonda,

³⁵ Atarot-Sofan mutuku ap, Yaezer mutuku ap, Yokbeha mutuku ap,

³⁶ Bet-Nimra mutuku ap, tonda Bet-Haran mutuku ap ara, sik anang arye binuka, weik asik dolamik. Adobik asik nirya ara, pia ati sik asik koproba kibuka una ati, amutuku bitinye ara, cang keil poka dopdongobikce, antanap dongobuka deibik. Tonda, sik talibuka weilamik ning, sik domba unak ati ara, keil poka ton dopdongobikce, kintinip deibik.

³⁷ Aning atonun ton, Ruben yala nang arye, amutuku noutam weik asik dolamikce ulamik mutuku asik dolamika ara ani. Hesyebon mutuku ap, Eleale mutuku ap, tonda Kiryataim mutuku ap,

³⁸ Nebo mutuku ap, Bahal-Meon mutuku ap, tonda Sebam mutuku ap nirya ara, sik Ruben yala nang arye asik dolamik. Asik dolamik mutuku ara, min arye si nyalamik ning ara, asi batakikce, yuk si ton dobik.

³⁹ Atalak arye, Manasye birye deiamuknye, el si Mahir, sik ayala nang arye, Gilead mutuku biyikce, amutuku ulamik nang ati obik. Binuka obikura, sik Amori yala nang, amutuku ulamik nang nirya yakdongokice, amutuku nirya binuka doprobik.

⁴⁰ Winibika ati, Musa birye Gilead mutuku ara, Manasye elce deiamuknye Mahir ati, amutuku arebuk. Winibuka arebukba, Mahir yala nang, sikce Gilead mutuku nirya ara, talibuka ulamik.

⁴¹ Tonda Manasye yalanye birye deiamuknye ton, el si Yair, elce amutuku noutam ulamik nang arye dolamik mitik asik dobuka ulamik mutuku nang nirya ara, sik dam binuka obuka sirya dakukce, amutuku nirya ara, el binuka doprobuk. Winibukce, “Amutuku si ara, Yair mutuku,” nyabuka, si sibuk.

⁴² Tonda tonoknye el si Noba arye, Kenat mutuku asik bobuka, ulamik mutuku binuka, amutuku ninye obuka sirya dakukce, amutuku nirya ara, doprobuk. Doprobukce, amutuku noutam ati ara, “Amutuku ara, el si Nobah mutuku,” nyabuka, si dobuk. Ara, el si atonun tenebuka, amutuku si dobuk.