Bilangan 31 - Eipomek

Allah arye nyabukba, sik Israel nang arye, Midian ninye ati tamubuka olbiyik yupu

¹ Allah Yahweh arye, Musa biti nyabuk.

² “Midian mutuku nang arye anggun Israel nang obuka sirya dakamsik ati, kwang danamap ati anggun Israel nang arye, Midian mutuku nang opnamlulume. Aning nirya ance akunum winipminye ura, an apu yapu diamikce, binamik touk, Musa an babye adiparyuk dipnamlyame,” Allah arye nyabuk.

³ Nyabuk ati, Musa birye Israel ninye nirya ati nyabuk. “Anggun adiparyuk yin talin nang ap, anggun ninye on ning ap kintinibuka deipnululume. Ara anggunce Midian ninye olbinaluma atia. Allah Yahweh arye Midian mutuku unyak nang ati, yu uplirye el mikip ara anggun Israel yala ninye deice deipsilyeura, Midian mutuku nang nirya ati, binuka obuka sirya daknalume.

⁴ Ati mal olana ati ara, anggun Israel yala nang, anggun yala yuk-yuk aumunye touk, yuk-yuk mal olana ati, yin talen nang ara ninye yupa pia weik seribu (1.000) nang wibuka, ayala yuk-yuk ululum touk kintinipnamlume,” nyabuk.

⁵ Nyabukba, sik Israel ninye yala-yala yuk-yuk yupa pia weik beribu-ribu nang ulamik touk, sik yala yuk-yuk bukni, ton yala yuk, ton yala yuk arye, ‘Anang ara mal olbinamak tenen, anoutam arye deiyok yuk-yuk wibuka deibik ning yupa ara, seribu (1.000) yin talin nang babye wipdeibikura, ayin talin nang nirya ansinibuka nukuka deibik ning ara, dua belas ribu (12.000) nang wibuka kintinibik.

⁶ Musa birye sik yala yuk-yuk ulamik touk, ton yala yuk, ton yala yuk bukni, “Sik yala noutam arye, seribu (1.000) nang wibuka kintinipnamlume,” nyabukba, winibik. Ara, “Sik Israel nang yala-yala yuk aululum touk, seribu nang wibuka deipnulyame,” nyabukba kintinibik. Sik Midian nang olbana ati ara, imamnye, Eliazar el mi Pineas ap, neika mal olalbana ati kintinibik. Atalak ara, Pineas arye Allah el pia teleb, kurun aik pum tam deiamik ning ap, tonda, ‘Yuk mutuku mal olan nang olyanuyak nyana ati, bung-bung nyan ning, el si terompet ap talibuk. Atalibuk ning ara, olalban talak bikilina ati ara, talibukce kintinibuk.

⁷ Sik nirya akunum kintinibik ning ara, Allah arye Musa ati, “Winipnamlyame,” nyapdeiamuk touk winibik. Ara, Israel nang arye Midian mutuku noutam ulamik ninye ati, anoutam arye ninye nirya ara, binuka obikce sirya dakik.

⁸ Aonmek talak aryuk, Midian mutuku ninye deiyok kibuka taleamik nang, sik pamubarye weik nang babye obik. Anang sik si ara ani. Hewi Rekem ap, Zur ap, Hur ap, tonda Reba ap obik. Atalak uk Beor el mi Bileam babye, parang ya arye obikba dibuk.

⁹ Aning nirya akunum obuka sirya dakik ura, Israel ninye arye Midian mutuku kilapu nirya ap, sik akilapu arye deiamik mitik mapu nirya ap, tomobuka boya yayik. Tonda, sik Midian mutuku nang arye taleamikce weilamik kam un ning, sapi basam ap, kambing basam nirya ap, tonda, sikce weilamik ayam maka atonun ning nirya ap, sikce talibuka ulamik dekna weik ning nirya ap ara, alubuka doprobik.

¹⁰ Winibikopura, sikce talibuka ulamik mutuku-mutuku nirya ap, ap aik dobuka ulamikak nirya tia ati ulamik tenda aik nirya ap ara, uku arye dabuka sirya dakik.

¹¹ Aning nirya akunum winibikura, sik Israel nang arye Midian mutuku ninye ap aning nirya ara, alubuka dopropmek. Aning yala-yala nirya ap, ton batakmek pil melibuka don nang nirya sik weilamik kam un ning nirya ap, alubuka doprobik. Adoprobik ning, ara ani. Kilapu ap, mapu ap nirya ara, adiparyuk tomobik. Tonda, Midian nang arye weilamik ning, yala-yala nirya babye, binuka doprobik.

¹² Adalubuka doprobik ning nirya ara, Musa ap, imamnye el mi Eleasar ap, tonda Israel ninye sik ninye weik deiyok-deiyok ulamik ninye nirya ap, sik talye daulamik Israel ninye ap, sik nirya bulubuka aunmek damuk, sik doprobik ning nirya bobuka yayik. Atalak ara, Israel ninye, sik doltakna aik dobuka unmek mutuku ara, Moab mutuku lu ak, Yordan mek piridipna bukni, Yeriko mutuku uk dam binuka unmek.

Israel yin talen nang ninye olbinamika ani, tamubuka yayik yupu

¹³ Sik yin talin nang arye, Moab lu mutuku tamubuka yayaik ura, Musa ap, imam Eleasar ap, Israel ninye sik ninye deiyok kibuka taleamik weik nang ap, tonda Israel yala nang, talye daulamik ninye nirya ap, sik tenda aik deibuka daulamikak arye batakuka, sakwetubuka biyikce, sik yin talen nang yangayika ati, “Telebe,” nyabuka dobuka yayik.

¹⁴ Biyikce asukumuk bulubuka unmek talak ara, Musa birye yin talin nang, sik weik deiyok nang ap, tonda weik yupa yuk-yuk ati, deiyok kibuka seribu (1.000) yin nang taleamik deiyok nang ap, sik amu tam deiyok kiyamikce, seratus (100) yin nang taleamik deiyok nang nirya ap ati, Midian mutuku ninye ati olalbinamika tamubuka yangayikak, binuka wabuk.

¹⁵ Wabukce binuka nyabuk yupu ara ani. “Anggunda yata deiyok ati, Midian mutuku unyak kilapu nirya babye tuba batakmalumak kam unmak do? Yata deiyok ati, akilapu babye kum opmalum do?

¹⁶ Akilapu arye malye winilamika deice, Bileam birye, ‘Sikda winibuka-winibuka sikti, nyabukba, atalak ulamlum Israel nang kekeplumce, malye weik winilalumce, anggun ni koproba Allah Yahweh ati, pia malye weik kiplume. Atalak ara, sik Midian mutuku kilapu arye Israel nang ati, sik taleamik ning, el si isa Peor, ‘El siuk erepnuyabe,’ nyabuka yukubik ati, Israel yala nang malye weik ulamik touk, wini talak babye, akilapu arye kum yukupnamsiyak do? Kume, nyabuka yukupsik ura, atalak ara, Allah arye sik malye winilamik ning dekna ati, uku weik areamukbuk, Yahweh arye yanuka, ‘Na tenen nang unamakeʼ tenen, wipdeiamuk ninye bukni, auku sik deice sakukba, ninye weik arye deiamik. Aning ati, aMidian mutuku kilapu ap, anggun ap neika ulamunyopura, sikce yupu nyabuka yakirye yukupdopsikcopura, atalak arye Allah el si eren ning batakmunyeura, ikin ning anggun dam yanamsile.

¹⁷ Aning nirya ara, Midian mutuku kilapu arye, ‘Yukupsikiba malye ubipyakʼ tenen, atalak aryuk, aMidian mutuku kilapu arye deiamik mapu, mitik mapu nirya ap, tonda ninye arye domikba, neika malamik kilapu nirya babye, oplulume,” Musa birye nyabuk.

¹⁸ Nyabukce, ayupu ton dukdongobuka nyabuk. “Bukni, sik Midian mutuku wel kilapu, ninye dona kum ati, sal ap neika kum malamik kilapu nirya ara, anggun Israel nang arye, awel kilapu dopropnamlume.

¹⁹ Tonda, Midian mutuku nang olanamlum talak ara, anggunce akunum opmamunye nang ap, yuk nang arye oplopmakiba dipmace nang ap, sik nong bola pipnamlum nang ap nirya ara, anggun dobuka ulamlum aik dam batakuka, mitik yukak bai tam bimunce, like tekbarye sum mitik lo sukumak daunamlulume. Abinuka unamlum talak ara, like winilye sum ap tonda like tekbarye sum ap ara, anggun babye anggunce, tomobuka boyamunce, dopropmamunye kilapu ap, mek likuka deipnamlume. Ara, ‘Ila tonap, teleb kipdeipdanamabeʼ tenen, mek kekdeipnamlulume. Anggun nirya arye, aning nirya ati, mek likuka pil donamlume.

²⁰ Tonda, atouk, sik baju ap, anggunce kam ning obuka bola arye sekuka wilulum ning yala-yala nirya ap, tonda kambing bola ap, potong ap arye denebuka wilalum baju do, yo deice arye memebuka delilamlum ning do, aning yala-yala nirya ara, pia teleb kibuka mek likinamlulume,” Musa birye nyabuk.

²¹ Tonda, ninye olbinamika ani, tamubuka yayik nang ati, imam Eleasar birye ayupu nyabuk. “Aning nirya ara, Allah Yahweh arye, ‘Wininamnyake nyapdeiamuk mem yupu nirya ara, Musa dam nyapdeibukba, elce laka nyapsile,’ nyabuk.

^22-23 Ara, winipmanto ning, kat ning uku dongobikiba, uku diplirye, kat ati batakalolamle ning, emas do, perak do, tembaga do, besi do, mitik kat ning el si ara tima kurun ning do, mirin ning do, nirya ara, ‘Malye ning ton kum palipmalyeura, tamubuka teleb upnamleʼ tenen, uku deice aryuk deibuka dalenyake. Uku deice arye dabikirye, moubuka delinyak ning nirya ara, mek arye lilikuka, teleb kipdeipmunyeba, malye un ning ton kum palinamlule. Tonda, aning nirya ap, uku deice arye kum mounyak ning babye, atouk mek likuka pil dopmunya deice arye, tonap teleb kilinamlume.

²⁴ Like tekbarye sum akunum kiplyopura, anggun kiniklamlum baju nirya ara, adiparyuk mek liknamlulume. Akunum mek likmunyeura, adeice arye, sik baju ap, sik nong ap ati, tonap teleb kilinamlume. Apil dopmunyopura, atalak aryuk, sik una ati bar asik arye tamubuka, tenda asik wekel yanganamlume,” Musa birye nyabuk.

Alubuka dopropmik ning bokdobik ati, nyabuk yupu

²⁵ Allah el si Yahweh arye, Musa biti nyabuk.

²⁶ An ap, imam Eleasar ap, tonda, Israel yala ninye, sik yala yuk-yuk aulamikce touk, ayala sik ninye deiyok nang, yuk nang nirya ap, sik nirya arye, sik Israel nang arye, Midian mutuku nang malye kibuka, alubuka dopromlumce, boyanamlum ning, teleb ning nirya ara, adeibik ning, ‘Yupa yata barye do?’ tenen, nukdelulume. Ara, alubuka dopromlum ninye ap, tonda sik Midian nang arye weilamik ning ayala-ayala nirya ap, nuknamlume.

²⁷ Adalubuka boyanmace ning nirya, akunum nukmunyeura, adiparyuk anggunce bokmunce, neik toto kibuka meice kukdeipnamlulume. Abokuka deipmamunye ning ara, ton tam ning ara, sik yin talen nang mal olan dam binmace nang ati, arepnulyame. Atonun, ton tam ning ara, Israel ninye talye tuba, sik asik dam daunmace ninye ati, arepnulyame.

²⁸ Tonda, na Allah Yahweh, na si erena ati, na ning biti ton, yuk ning bokuka kintinibuka, arelyanamnulume. Ara, sik yin talen nang ati, kintipmalum ning nirya noutam ara, ton tam bokuka, nati arepnamnulume. Ara, yata yala nang do nirya, lima ratus aulamiceura, aning bukni, anoutam arye tonok dopropmunce, nati arepnamnulume. Ara, dalubuka boyanamlum ninye ap, sapi basam ap, keledai basam ap, domba basam ap, tonda kambing basam ap, tonok-tonok bobuka, yukak kintinip deipmunce, nati arepnamnulume.

²⁹ Sik yin talen nang arye dopropnamaka ning noutam arye, lima ratus auplyeura, tonok ninguk bokuka, yukak dopdeipmamunyebuk, nati arepnamnulume. Aning nirya ara, na Allah Yahweh ati kintinipmamunye ning ara, anggun adiparyuk aning bobuka, imam Eleasar ati arepnulyame. Aning nirya ara, na Allah Yahweh, na si erena ati, arepnamnulume.

³⁰ Tonda, sik Israel nang, sik aik damuk daunmek nang arye, dopropnamaka ning noutam arye, mitik tonun ton bokuka deipmamunye babye, lima puluh (50) auplyeura, anoutam arye tonok ninguk dopropnulyame. Ara, Midian mutuku ninye malye kipmalumce, sik teleb ning dalubuka, boyanamlum ninye ap, sapi basam ap, keledai basam ap, domba basam ap, tonda kambing basam ap kintinibuka deipnulyame. Akintinipmamlum ning nirya ara, adiparyuk dopmunce, sik Lewi yala nang arye, na Allah Yahweh, na si eren ati tenda aik, noutam arye pil dokirye, kalikinyak nang ati, aning bokuka kintinibuka, Lewi yala nang ati arepnulyame. Allah Yahweh arye, Musa ati nyapdeibuk.

³¹ Allah arye Musa dam nyabuk touk, imam Eliazar ap, Musa ap aninguk winipdik.

³² Ura, aning nirya akunum winibikura, Midian mutuku ninye obuka malye kibikce, sik yin talen nang arye alubuka dopropmik ning, sisa tuba aupmuk ning ara, domba basam, yupa pia weik, enam ratus tujuhpuluh lima ribu (675.000) ekor ubuk.

³³ Tonda sapi basam yupa, pia weik tujuhpuluh dua ribu (72.000) ekor ton ubukba doprobik.

³⁴ Atonun ton, keledai basam yupa, pia weik enam puluh satu ribu (61.000) ubuk.

³⁵ Tonda, alubuka doyanmek kilapu, ara ninye dona kum kilapu ati, sal ap kum malamik kilapu weik, tiga puluh dua ribu (32.000) kilapu alubuka doyayik.

³⁶ Aning nirya akunum nukdeyikce, kikliman ubuk ati, dana tam ton tuba aupmok ning arye, bokikce, sik yin talin nang mal olan dam binmek nang ati arebik. Ara, kambing basam ap, domba basam ap yupa ara, pia weik, tiga ratus tiga puluh tujuh ribu, lima ratus kamnyaka basam (337.500) ubuk.

³⁷ Aning noutam arye, Allah Yahweh el si erena ati arin ning ati, aning nirya noutam, yuk ning wibuka kintinipmek ning ara, domba basam yupa ara, enam ratus tujuhpuluh lima (675) Allah ati arebik.

³⁸ Tonda, sapi basamuk nirya nukik ning ara, yupa pia weik, tiga puluh enam ribu (36.000) kibuk. Aning noutam arye, Allah Yahweh el si erena ati arebik ning ara, akintinyamik ning nirya yupa ara, tujuhpuluh dua (72) ekor kibuk.

³⁹ Atonun tonda, keledai basam nirya nukik ning ara, yupa pia weik tiga puluh ribu lima ratus (30.500) ekor kibuk. Anoutam arye, Allah Yahweh el si erena ati kintinibuka deiamik ning nirya ara, enam puluh satu (61) ekor arebik.

⁴⁰ Tonda wel kilapu ap, wel nang ap nirya nukik yupa ara, enam belas ribu (16.000) kibuk. Anoutam arye, Allah Yahweh el si erena ati arebik ning ara, yuk tiga puluh dua (32) nang bokikce, kintinibuka, Allah ati arebik.

⁴¹ Akintinyamika yanuka arebik ning nirya ara, Musa birye dobukakarye, Allah Yahweh el si erena ati, arebuk. Ara Musa birye, imam Eleasar, el deice uk arebuk. Ara Allah arye, “Aning ara, winipnulyame,” nyapdeibuk touk, Musa birye winibuk.

⁴² Ura, aning winibukce tuba aubuk ning ara, danoutam arye bokuka, sik yin talin nang mal olbiyik nang ati arebuk bukni, sik doprobik noutam arye, ton datam ara, sik Israel nang, Midian mutuku ninye mal olana kumce, talye aik dam tuba daulamik ninye ati arebuk.

⁴³ Ati, sik talye aik dam daulamik Israel ninye ati bokuka arebuk ning ara, domba basam yupa ara, pia weik tiga ratus tiga puluh tujuh ribu lima ratus (337.500) ekor kibuk.

⁴⁴ Tonda, sapi basam yupa ara, pia weik tiga puluh enam ribu (36.000) ekor kibuk.

⁴⁵ Atonun, keledai basam yupa ara, pia weik tiga puluh ribu lima ratus (30.500) ekor kibuk.

⁴⁶ Tonda, alubuka dopropmik nang yupa ara, pia weik enam belas ribu (16.000) nang kibuk.

⁴⁷ Ura, mal olana kum bukni, talye aik dam daulamik Israel nang ati ara, Musa birye arepmok ning ara, tonap tamubuka doprobuk. Ara ninye babye, tonda sikce weilamik kam ning, yala-yala nirya babye, aning arye lima puluh (50) aupmok ning nirya noutam arye, tonok ninguk doprobuk. Adoprobuk ning nirya ara, Allah el si erena ati, sapi bol arye doltakna tenda aik domikce, anyaik pum tam pil dona deiyok nang, sik Lewi yala nang ati arebuk. Aning ara, Allah arye Musa biti, “Winipnamlyame,” nyabuk touk arebuk.

⁴⁸ Aning nirya akunum winibuk talak ara, sik Israel yin talin deiyok nang nirya ara, Musa el damuk yayik. Ton deiyok nang ara, sik amu tam yin talen nang yupa weik, seribu nang taleamik. Ayin talin deiyok nang ton yayik. Ton deiyok nang ara, sik amu tam yin talen nang yupa mitik tonun arye, seratus nanguk taleamik. Ayin talin deiyok nang ton, yayik.

⁴⁹ Sik yin talin deiyok-deiyok nang yayikce, sik ulamik ning Musa ati yanuka lak nyabik. “Naio, nunda an amu tam unyapce, an yupu uk kekebuka pil donyab nang ara, nunce nun amu tam unyak yin talin nang nirya ton nukdeipubuk, aunyapa ap tonoknye babye, ton kum opsike. Kam tuba unyake. Ati ara, nun nirya, tuba kamuk unmabe.

⁵⁰ Aning ati ara, nun yin talinyap nang ara, sik Midian mutuku nang obuka sirya dakupurye, sik talilamik teleb ning, dekna teleb ning yala-yala nirya ara, alubuka doprobupu. Ara, nun yuk-yuk bukni, aning eipmaburye, aning awamuk touk alubuka doprobupakarye, an dam boyanuka deipmabu. Ara, dekna weik ning emas ap, tonda taruk deice toupnedama dongonyak ning ap, cincin ap, amul dongolamik ning ap, ngang dam karaklamak ning nirya ara, alubuka doprobupakarye, an dam boyanuka deibupu. Ara, ‘Aning nirya arebibya deice arye, Allah arye nun malye unyap ning kilipsilirye, tuba tonap teleb updeipnamsilʼ tenen, adekna weik ning bobuka Allah ati arebupu,” nyabuka, sik yin talin deiyok nang arye, Musa ati lak nyabik.

⁵¹ Nyabuka lak nyabikura, sik yin talina deiyok nang arye boyanmik ning, urasin teleb kibuka delina ati ara, emas ap, yuk yala teleb aren ning nirya ap, Musa ap imam Eleasar ap arye doproprik.

⁵² Sik yin talina deiyok nang bukni, seribu nang taleamikce, yupu nyalamik deiyok nang ap, seratus yin nang taleamikce, yupu nyalamik deiyok nang ap, ‘Allah Yahweh, el si erena ati arepnuyap tenen, Musa ap, imam Eleasar ap ati arebik, ning nirya ara, emas el ikin ara, enam belas ribu, tujuh ratus lima puluh sekel (16.750) kibuk. Aning ara, seratus sembilan puluh (190) kilo emas kibuk.

⁵³ Aning nirya ara, yala-yala weik, yuk-yuk aubuk ning ara, sik yin talin nang arye, Midian mutuku nang malye ubik talak ara, sik yuk-yuk arye aning alubuka dopropmik. Atalak ara, sikce aning nirya ara, sik babye unamik ati, ton bokuka doprobik bukni, aminyan talak ara, Allah Yahweh el si erena ati, Musa dam boyanuka arebik.

⁵⁴ Aning akunum arebikura, Musa ap, imam Eleasar ap, sik bitinye arye ayin talina deiyok-deiyok nang nirya, seribu nang talilamik deiyok nang ap, seratus nang talilamik deiyok nang ap arye arebik ning ara, doprikakarye Allah ap, ninye ap, ansinina ati, tia domik tenda aik domik ning noutam dobuka deiprik. Ara, aning dobuka binimnyeura, nun ni koproba Allah Yahweh arye, nun Israel yala nang nirya ati, tuba teneplisirye, pia melinamsilʼ tenen, lak kilina ati, aning bobinuka, Allah el si eren aik pum tam deiprik.