Bilangan 30 - Eipomek

Israel kilapu arye Allah Yahweh ati, nyalin yupu nyanamaka ati, nyabuk yupu

¹ Allah Yahweh arye nyapdeibuk yupu ara, Musa birye sik Israel yala ninye ati, yuk-yuk deiyok kibuka taleamik nang sikti, “Allah arye, ‘Aning ara winibuka-winibuka unamlume nyapdeipsuk yupu ara ani,” nyapdeibuk.

² Winipmanto, ninye tonoknye ton el nyalin yupu deice arye, “Dipkoprop aning ara malye kum upnamne. Nara, na ni koproba Allah el si erena ati, winibuka-winibuka pil donamne,” nyabuka nyalin yupu deice arye Allah Yahweh el dam nyalinamlule. Tonda winipmanto ara, el damnye birye, eldamang ati, mikip yupu deice arye, “Aning ara, dipkoprob winipnamnarya, anyapman touk kum bataknamne,” nyapdeipnamle yupu ati nyapne. Ara, ayupu nyaplya deice arye, el damnye tapu arye koulongolamak atonun ubuka unamlule. Tonda, anye el nyalin yupu ara, Allah dam arye, “Aning ara, dipkoprob wininamne,” nyapdeipmalye yupu ara, anyapdeipmalye touk adiparyuk wininamlule. Ati, anyapdeiamlye yupu ara, kum yaniplopnamlule. Dipkoprop anyalilamle touk, wininamlule.

³ Ura, kam kilapu ati ara ani. Winipmanto, tonok wel kil ton, el li aikuk tuba ulamlye talak bukni, Allah Yahweh ati, akil el nyalin yupu deice, Allah dam arye, “Aning ara, dipkoprob malye kum unamne, Allah el si erebuka kina ati, aning wininamnarya,” nyalilul yupu ap, el damnye birye, eldamang ati, mikip yupu deice arye, “Aning ara dipkoprob wininamnarya,” nyanmalye yupu ap ara, adiparyuk anyapmalye yupu deice arye akil el damnye, tapu arye koulamak atonun ulilanamle.

⁴ Winiplyeba, akil el li birye, awel kil nyapmalye ning kekeplirye, ikin ton kum upliba, sekelongon yupu ton kum nyaplyopura, akil arye Allah ati, “Wininamne,” nyabuka nyalin yupu deice arye nyamlye yupu ap, mikip yupu deice arye, “Wininamne,” nyanmalye yupu ap ara, adiparyuk anyapmalye yupu uk moubuka talipnamlule. Aning ara, pia kum bataknamle.

⁵ Bukni, awel kil arye, anyapmalye yupu anyak, el li koproba kekeplirye, kanye ikin upliba, sekelongon yupu ton nyaplyopura, el kilmu arye, “Wininamne,” nyabuka, nyapdeipmalya deice arye, tapu koulamak atonun winipmalya babye, anyapmalye yupu ara, talye ati, “Winipnamne,” nyapmalye ning, dipkoprob kum winipnamle. Ati, Allah Yahweh arye aning kekeplirye, el awel kil arye nyapmalye ning ati, luba kipnamle. Ara, akil el li koproba kanye ikin upliba, “Aning ara, kume,” nyapmalye yupu kekeplirye, awel kil ati, namin kibuka kilipnamle.

⁶ Tonda, winipmanto, awel kil ninye dopmalye babye, min kum domlye talak arye, “Aning wininamle,” nyabuka, nyalin yupu deice arye nyapdeiamlye yupu ap, tonda, moubuka tenina kumce, talye luba kibuka, “Aning ara wininamne,” nyabuka, yupu deice aryuk nyalamle yupu ara, tapu arye koulongolamak atonun unamla ati, min kume kumdanamle. Ayupu ara, tuba aupnamle.

⁷ Ara, akil ninye doplyopura, el ning ara, el kil arye nyalin yupu nyamlya kekeplye bukni, ikin kum upliba, tamubuka sekelongon yupu ton kum nyaplyopura, akil arye nyamlye yupu ara, min kume kum danamle. Tuba aunamle. Ara, anyapmalye yupu arye tapu koulongolamak atonun uamlya ati, ayupu ara, akil el dam tuba aunamle. Kum bataknamle, dipkoprob aninguk wininamle.

⁸ Bukni, akil el akanye bira, el kil nyalin yupu deice arye, “Aning wininamne,” nyapmalye yupu kekeplirye, “Aning ara winina kume,” nyabuka, yupu sekdongoplyopura, anyaplya deice arye, akil nyalin yupu nyamlya ap, el bidamnye moubuka tenina kumce, “Wininamne,” nyabuka, talye nyamlya ati ara, adiparyuk kum danalinamle. Ayupu nyapdeiamika deice arye, tapu koulongolamak atonun uamlya babye, adiparyuk kum winipnamle. Tonda, akil arye ayupu nyamlye ning batakmalya babye, Allah Yahweh arye akil ati namin kibuka kilipnamle. Akil ati kum wenepnamle.

⁹ Bukni, kilapu ninye domikca ani, el akanye akunum diplyopura, el yuk urdem unamle. Tonda, yuk kilapu ninye domikca ani, akilapu el akanye bataklyopura, el yuk urdem unamle. Bukni, akilapu sik minopnya nyapdeiamuk nyalin yupu deice arye, “Dipkoprop aning wininamne,” nyapdeiamlye yupu deice arye, tapu koulongolamak atonun ulula ati, akilapu sik damuk ayupu ara, tuba aupnamle. Sikce nyapdeiamice yupu dipkoprob kum bataktinge. Aning nirya wininamake.

¹⁰ Ura, ninye arye domikce kilapu ati, yupu tonap nyapnune. Ara, ani. Winipmanto, tonok kil ton ninye domlirye ulamye talak ara, nyalin yupu deice arye, “Dipkoprop winipnamne,” nyana do, mikip yupu deice arye, “Wininamnarya,” nyana do, aning nyaplyopura, akunum tapu arye koulamaka atonun ulalule.

¹¹ Tonda, akil arye, ayupu nyaplye talak ara, el doplinye kanye ikin kum uplyeura, “Aning ara kume, aning ton kum winipnalame,” nyabuka, sekelongon yupu kum nyaplyopura, akunuma, akil arye anyapmalye atonun wininamlule. Akil el adiparyuk, akunum tapu arye koulamaka atonun ulilalule ati, ayupu nyapdeipmal touk, ubuka wininamlule.

¹² Bukni, akil el akanye birye, ayupu nyapliba kekeplirye, “Kume aning kum winipnulame,” nyabuka, yupu sekdongoplyopura, el kil anyalin yupu nyapmalya babye, nong kum upnamle. Talye yupu uk nyapnamle. Tonda, aning winiplya babye, Allah Yahweh arye namin kibuka kilinamle. Ara, el akil arye, ‘Winipnamne,’ tenemalye bukni, el akanye birye, yupu sekdongopmalula atia.

¹³ El kil arye, “Dipkoprop aning ara winipnamne,” nyabuka nyalin yupu deice arye nyalamle ning ap, tonda mikip yupu deice arye, “Aning wininamnarya,” nyalamle ning nirya ara, el akanye birye, “Aning ara, winina kume,” nyaplyopura, aunmalya babye, nong kum unamle. Aning atonun, akilapu arye, “Allah el si erena ati, tia din kum dinamne,” nyalamle ning nirya ara, el akanye birye, “Aning ara, winina kume,” nyaplyopura, aunmalya babye, nong kum unamle. Adiparyuk kum winipnamle. Bukni, el akanye birye, “Aning ara telebe,” nyaplyopura, adiparyuk teleb unamle. Ati, akil arye anyapmalye atonun wininamlule. Akil el adiparyuk, akunum tapu arye koulamaka atonun ulilalule ati, ayupu nyapdeipmal touk, ubuka wininamlule. Anya arye, aning deiyok nirya ara, el dobuknye aik ulule ati, el akanye birye nyalul yupu kekebuka wininamlule.

¹⁴ Bukni, winipmanto, akil el domlinye birye, el kil nyanmalye yupu nirya kekeplirye, ayupu nyanmalye sum arye kanye ikin kum upliba, “Aning ara kum wininamlyame,” nyabuka, sekelongon yupu ton kum nyaplyopura, el tunim apmalya deice arye, akunum ‘Telebe aunamlyame,’ nyana atonun ulule. Ati ara, akil arye nyalin yupu deice nyaplye yupu nirya ara, akil aryuk moubuka talipbuka wininamlule. Tonda, el akanye birye, el kil nyalin yupu deice arye, “Dipkoprop wininamne,” nyapmalye ning ara, asum aryuk el akanye kanye ikin kum upmaliba, sekelongon yupu ton kum nyapmalula ati, el kil arye tapu koulamaka atonun upnamle. Elce anyapmalye touk kum bataknamle bukni, aninguk wininamlule.

¹⁵ Bukni, akil arye nyalin yupu nyapmaliba, el akanye birye kekeplye bukni, sekelongon yupu nyana kum diparyuk, talye daupnin balamlya ani, aminyan talak ara, akil el akanye birye, el kil nyalin yupu nyapmok ning ati, yupu sekdongopliba, akil arye el nyapdeiamuk ning batakuka kum winiplyopura, Allah arye el akanye wenepliba, el dam ikin ning dolonamle. Deiyok ara, akil nyalin yupu nyaplye ning ati, el akanye birye minopce yupu kum sekdongobuka atia.

¹⁶ Ura, ayupu nirya ara, Allah Yahweh arye, “Aning-aning nirya wininamlyame,” nyabuka, Musa dam nyabuk. Ara nyalin yupu deice arye, kam kil, el li aik tuba ulamlye talak arye, “Aning ara dipkoprob wininamne,” nyanamle yupu ap, tonda ninye domlye kil arye, “Dipkoprop aning ara wininamne,” nyabuka nyalin yupu deice arye nyan ning ap ati, Allah arye Musa deice nyapdeibukba, Musa birye Israel ninye ati, binuka laka nyabuk.