Bilangan 3 - Eipomek

Harun el mapu ati, nyabuk yupu

¹ Allah Yahweh arye, Sinai mutuku arye, Musa biti yupu nyabuk talak ara, Harun ap, Musa ap, sik yuk-yuk bukni, sikce deiamdikba, dadeipdanin yangalamik nang sik si ara, ani.

² Minyuma ara, Harun el mapu si nuknuyabe. Harun birye, el mapu dumbarye deiamuk. Sik anang si ara, ani. Min yuma deibuknye bira, Nadab ulamuk. Tonda, Abihu ap, Eleasar ap, Itamar ap, deiamukba, sik daulamik.

³ Sik asukum si nyapmap nang ara, Harun birye, ‘Anang ara, Allah ap, ninye ap, eldana aik pum tam, pil donamaka ati, imam nang unamakʼ tenen, wipdeibuk. Anang wipdeibuk nang ara, ‘Sikda Allah ap, ninye ap, eldana aik pum tam pil dona ati, wipdeipabeʼ tenen, kel bikna ati, bikilin ning ara, minyak mek, sik kisok deice dikdongobuk.

⁴ Bukni, Nadab ap, Abihu ap ara, Sinai mutuku pata aryuk dipdik. Atalak ara, Allah arye, ‘Telebe uku arepnururume,’ kum nyabuk bukni, sik kanye aryuk, ‘Domba ato ning opnimirye, Allah el si erena ati, uku sekuka dapnunameʼ, tenepdikce, uku sekuka kintinipdik. Uku kintinipdikopura, Allah arye, weik wenebuk. Anang, sik wenena ati, Allah arye uku buk arebukba, uku buk arye, sik bitinye dibukba, sik minop dipdik. Sik abitinye nang ara, mi ton kum deiamdikbuk, dipdik. Atalak ara, Harun tuba kam ulamuka ati, el mapu bitinye ton, Eleasar ap, Itamar ap, sik abitinye nang ara, Allah aik pum tam pil melibuka dona ati, wipdeibuk.

Lewi yala nang ara, imam pil melibuka dona ati, wipdeibuk yupu

⁵ Allah Yahweh arye, Musa biti nyabuk.

⁶ Ance, sik Lewi yala nang ati, nyapnalyame. “Sik anang ara, minopce Harun dam yakirye, ‘Nunda Harun ap, an ap melibuka, pil donamap nang ara, ani,’ nyapnamnyake.

⁷ Sik anang ara, na Allah ap, ninye ap, eldana ati kalekin nang kibikirye, na si eren aik, buru tam pil don nang kibikirye, melibuka pil donamake. Tonda, na mapu Israel ninye, na si erena ati, melibuka pil don nang arye, sik melibuka pil donamak talak ara, sik Israel ninye urasin dam donmakibuk, anggun nirya ara, elinamlume. Ati, sik Lewi yala nang wipdeipminba, sikce na ap, ninye ap, eldana aik dam, pil melibuka donamake.

⁸ Sik Lewi yala nang pil dona ara, ani. Na Allah Yahweh ap, ninye ap, eldana aik pum tam unamle ning nirya ara, sik anang aryuk taleamikirye, kintinilinamake. Awininamak ning ara, anggun Israel yala ninye nirya, anggun malye ulamunye ning namin kibuka, kum kilina ati, sikce melibuka pil donamniyake.

⁹ Musa ance Harun biti, sik Lewi yala nang nirya ap, sikce dibikiba, dadeipdanin banamak nang nirya ap dobuka, Harun biti arenamlame. Sik Lewi yala nang arye, Harun atibuk, pil melinamake. Aning ara, sik Israel yala nang unyak bukni, anoutam ara, sik Lewi yala nang aryuk, na si erena pil ati, melibuka pil donamake. Ati, sik anang ara, wipdeipnamlame.” Allah arye nyabuk.

¹⁰ Nyabukura, ayupu ton nyabuk. “Bukni, Harun ap, el mapu nirya ap, sik anang arye dibikiba, dadeipdanin banamak nang ap, sik si sekuka deipnamlume. Deiyok ara, sik anang ara, na Allah ap, ninye ap, eldana aik pum tam, pil dona ati wipdeipne. Sik anang ara, na si eren aik pum tam talibuka, pil don nang unamake. Yuk Israel yala nang nirya ton, pia kume. Ati, sik yuk yala nang arye, ‘Apil ton doptibye,’ tenebikirye, na si eren aik pil dobikcopura, sik apil dobikce nang ara, minop wenebuka opnamlume. Allah arye, Musa biti nyabuk.

¹¹ Nyabukopura, Allah Yahweh arye, Musa biti ayupu ton nyabuk.

¹² Wini talak, anggun Lewi yala nang nirya ara, ‘Naʼ tenen, ninye, na mapu koproba atonun updeipsine. Sik Israel ninye nirya arye, minop deipnamak mapu, sik winiryuk mapu nirya pununa ati, sik Lewi yala nang dobuka deipne. Sikda, na mapu koproba unamnyake.

¹³ Aning ara, talye ati kum nyapkine. Deiyok ara, Israel ninye arye, minop delinamak mapu nirya ara, na mapu unamaka ati nyapne. Ura, Israel ninye, anggun Mesir mutuku ulamlum talak ara, narye Mesir nang, min yuma sik mapu nirya omse. Winyamse talak ara, anggun Israel ninye arye, min yuma deiamlum mapu ap, deilinamlum mapu ap, ura, anggun weinamlum kam un ning nirya arye, minop deilinamak mapu ap ara, ‘Na mapu uk unamakeʼ tenen, wipdeipsise. Atalak ara, anggun uniryuk ning nirya kum omse ati, anggun Israel ninye arye, minop winiryuk deipnamlum mapu ap, domba ato ning arye delinamak mapu ap, delinamak ning ara, na ninguk unamle. Na Allah Yahweh arye, Lewi yala nang ati ara, ‘Na ninguk unamake,’ nyapse ati, sikda, ‘Naʼ tenen, nang unamake. Nara, sik ni koproba, Allah Yahweh unune.

‘Lewi yala nang ara, yupa yata wiribuka unyak do?’ tenen, nukik yupu

¹⁴ Allah Yahweh arye, Musa biti pata mutuku, Sinai arye yanuka nyabuk. “Ance wininamlyame,” nyabuk yupu ara, ani

¹⁵ “Lewi yala nang, sik apu yapu nang arye, deibikba, dadeipdanin yangalamika ani, wini talak babye aunyaka atonun, sik si yuk-yuk seknamlume. Tonda, atalak babye, sik Lewi yala nang arye, deibikba, dadeipdanin banyak ninye nirya ara, sik si sekenamlume. Ara, sik mapu wala tonok akunum uamlye mapu, anyapce ubuka, eitam unyak mapu nirya ara, nukmunce, sik si yuk-yuk seknamlume,” Allah arye, Musa biti nyabuk.

¹⁶ Nyapdeibuk ati, Musa birye, Allah Yahweh arye nyabuk touk ubuka, apil dobuk. Ara, Lewi yala nang arye, deiamik mapu nirya nukukce, sik si sekamuk.

¹⁷ Lewi yala nang deiyok kibuknye, elce deiamuk mapu winilye nang, sik si ara, Gerson ap, Kehat ap, Merari ap, winibuka deiamuk. Sik anang, sik apu yapu nang, sik si tuba bikina ati, tonok si dobik.

¹⁸ Aning atonun, Gerson birye, mapu bitinye deiamuk. Amapu sik si ara, Lipni ap, tonda Simei ap, nyabuka si domuk.

¹⁹ Kehat bira, mapu dumbarye deiamuk. Amapu sik si ara, Amram ap, Yisar ap, Emron ap, tonda Usiel ap, deiamuk.

²⁰ Tonda Merari elda, mapu bitinye deiamuk. Sik si ara, Makli ap, tonye si ara, Musi nyabuka deiamuk. Asi nyapmap nang nirya ara, sik apu yapu pununanye, Lewi ulamuk ati, sik yala si silamik ninguk bikna ati, si silamik.

²¹ Gerson birye deibukba, dadeipdanin balamik nang sik si ara, Lipni ap, tonye si ara, Simei nyabuka si dobuk. Sik si nyalamik touk, sikce deiprikba, dadeipdanin balamik nang babye, Lipni yala nang ap, Simei yala nang ap, ayala siuk si dolamik. Sik apu yapu pununanye, Gerson ulamuk ati, el yala si silamik siuk bikna ati, si silamik.

²² Ara, Gerson birye deibukba, dadeipdanin, balamik nang arye deibik mapu, sik wala tonok, akunum upman mapu nirya ap, wala eitam upman mapu nirya ap, aninye sik nukikce tabakuka, si akunum sekik ning yupa ara, tujuh ribu lima ratus (7.500) ninye ulamik.

^23-24 Ninye si, Lael deibuk mi Elyasap birye, Gerson yala nang si sekikce, ulamik ninye talibuka, sik ninye deiyoknye ulamuk. Israel ninye, sik Allah si erena ap, Allah ap, ninye ap, eldana ati, tia ati dolamik tenda aik balye tam ara, keting kumun tamuk, sik Gerson yala nang arye, asukum sik aik dobuka ulamik.

²⁵ Allah Yahweh, el si eren aik una ati, Gerson yala nang arye, apil talibuka dolamik. Ara, Allah ap, ninye ap, eldana ati, tenda arye anyaik dolamik ning ap, anyaik kalulamik kain ap, anyaik wekelbanak bukni, buru tam antanapdongobuka delilamik cang kain ap ara, ‘Tupa teleb upnamleʼ tenen, apil dolamik.

²⁶ Aning atonun, Allah si eren aik dam bukni, buru tam delilamik cang kain ap, anyaik dam wekelbana ati, bublan dam tirikilongolamik kain ap, tonda Allah arena ati, keil pala yangapdeiamikce, uku dongonak, el si mesba dam antanapdongobuka, delilamik kain ap, anyaik kirikin tapu ap nirya ara, ‘Malye kum kipnamle bukni, tuba teleb unamleʼ tenen, Gerson yala nang arye, apil talibuka dolamik. Winilamikce, ilil kanye bobuka, apil dolamik.

²⁷ Kehat birye deiamukba, dadeipdanin balamik nang, sik si ara, Amram ap, Yisar ap, tonda Usieal ap ulamik. Sik si nyalamik touk, sikce deibikba, dadeipdanin, balamik nang babye, Amram yala nang ap, Yisar yala nang ap, Usieal yala nang ap, ayala siuk nyabuka, si silamik. Sik apu yapu pununanye, Kehat ulamuka ati, el si silamik yala uk teneibuka, si dolamik.

²⁸ Ara, Kehat birye deibukba, dadeipdanin balamik nang arye deibik mapu, sik wala tonok akunum kibukce, eitam kipne mapu nirya ap, aninye sik si tabakuka, akunum sekik ning yupa ara, delapan ribu enam ratus (8.600) ninye ulamik. Sik Kehat yala nang ara, Allah el si erena ap, el ap, ninye ap, eldana ati domik tenda aik pum tam uamuk ning nirya ara, ‘Malye una kumce, pia telebuk unamleʼ tenen, sikce apil talibuka dolamik.

²⁹ Sik Kehat yala ninye nirya, Allah Yahweh, el si eren aik dam bukni, sik anang ara, itam iknapye tam, selatan tam asik dobuka ulamik.

³⁰ Sik anang ara, sik apu yapu pununanye, Kehat ulamuk ati, el siuk tenibuka ulamik. Sik deiyok kibuka, ulamuknye bira, Usiel el mi Elisapan birye taleamuk.

³¹ Sik anang pil don ning ara, ani. Allah arye nyapdeiamukba, Musa birye sekamuk yupu, libuka deiamik marikna yo, el si ara, Peti Perjanjian bobana ap, aning kalekina ap ati, pil talibuka dolamik. Tonda, Allah si eren aik pum tam uamuk yo lakase, meja ap, upna lana ati, delilamak ning ap, Allah el arena ati, anyaik pum tam uamukba, imam nang arye talibuka, pil dolamik ning ap, Allah arena ati, mesba delilamik ning nirya ap, ‘Aning nirya telebuk unamleʼ tenen, kaliklamik. Tonda, cang kain bola arye, ninye nirya talye wekna kum aik, pia teleb aik pum tam wekelbana ati, wililamik ning kintinilin nang ulamik. Sik Kehat yala nang arye, anyaik pum tam uamuk ning nirya ati, ilil kanye bobuka, apil talibuka dolamik.

³² Lewi yala nang kan-kan bukni, ‘Sik deiyok nang unamakʼ tenen, wipdeibik nang, sik deice tam weik deiyoknye bira, Eleasar ulamuk. Eleasar bira, Harun el mi ulamuk ati, Allah si eren aik pum tam, pia lek weik aik ati, pil talibuka dolamik nang ati, ‘Anang ara, pil teleb ubuka donamakʼ tenen, sik kalekina deiyoknye ulamuk.

³³ Merari birye deiamukba, dadeipdanin balamik nang, sik si ara, Mahli ap, Musi ap, sik bitinye nang ulamdik. Sik si nyalamik touk, sikce deiprikba, dadeipdanin balamik nang babye, Mahli yala nang ap, Musi yala nang ap, Merari yala siuk nyabuka, si dolamik. Sik apu yapu pununanye, Merari ulamuk ati, el yala silamik siuk tenibuka, si dolamik.

³⁴ Ara, Merari birye deibukba, dadeipdanin balamik nang arye deibik mapu, sik wala tonok akunum uamuk mapu arye, itam mapu nirya ap, aninye sik si tabakuka, akunum sekik nang yupa ara, enam ribu dua ratus (6.200) ninye ulamik.

³⁵ Sik anang ara, sik apu yapu pununanye, Merari ulamuk ati, el siuk tenibuka winilamik. Sik deiyok kibuka ulamuknye bira, Abahil el mi Zuriel birye taleamuk. Sik Merari yala ninye ara, Allah Yahweh, el si eren aik noutam uamuk bukni, sik anang ara, dabu tam, bagian utara binuka, asik dobuka ulamik.

^36-37 Sik Merari yala nang ap, Abahil birye deiamuk mi, Zuriel birye deibukba, dadeipdanin binamik yala nang ara, apil talibuka dolamik. Ara, Allah el si erena ap, Allah ap, ninye ap, eldana ati dolamik tenda aik tikilina ati, ayukumna ikiklamik yo ap, ayo bukni, outam dukdongamik cang kwadin yo ap, anyaik kolokon yo ap, tonda, anyaik cang kain lalkwetena ati, uapce tikilamik urasin teleb yo ap, iklamik yo ap nirya, amu tam urasin teleb dekna weik ning, emas arye puturubuka, ayo deiyok delilamik ning nirya ap, tonda anyaik dopnukirye, kiklilena ati delina tapu ap, atapu biribuka, tuku pum tam iklamik yo ap ati, pil talibuka dolamik. Ara, awamuk ning nirya ara, ‘Malye kum upnamle, tuba teleb unamleʼ tenen, sik abitinye yala nang arye, aning nirya kintinilin pil talibuka dolamik. Tonda, anyaik talikuka, don talak un ning yala-yala nirya, kintinililamik nang ulamik.

³⁸ Musa ap, Harun ap, sik mapu nirya ara, Allah el si eren aik pum tam dobuka, delilamik bukni, anyaik urasin tam keting panalyangan tamuk binuka, asik dobuka ulamik. Sik anang ara, Israel ninye ati, Allah el si erena ap, el si erena ati arelamik ning, pil don talak kintinina deiyok nang ulamik. Ara, Allah el pia teleb lek aik noutam bikilina ati, pil don nang ulamik. Tonda, sik yuk talye daulamikce nang arye, anyaik wekelbikirye, ‘Sik winilamikce ning eibicakʼ tenen, anyaik noutam binang ara, sik anang arye opnaba, dibilamik.

³⁹ Lewi yala nang arye delilamik mapu nirya, wala tonok akunum kipne, itam nang nirya ara, Allah Yahweh arye Musa biti, “Israel ninye nukunamlume,” nyapdeiamuk atonun, nukukce, sik aulamik ninye yupa ara, dua puluh dua ribu (22.000) ninye dem ulamik.

Israel ninye, sik min yuma delilamik mapu pununa ati, nyabuk yupu

⁴⁰ Allah Yahweh arye, Musa biti nyabuk. “Israel ninye, sik min yuma deiamik mapu nirya ara, nukukapmince, sik si seknamlume. Ati ara, anggun Israel ninye arye, deipnamlum mapu ara, wala tonok akunum kipne, eitam mapu ara, sik si seknauk unamlume.

⁴¹ Deiyok ara, anggun Israel mapu nirya dekna ap, pununa ap ati ara, Lewi yala nang nirya ara, narye sikti, tenipnye ning ara, na mapu koproba atonun kipne. Sikda, ‘Naʼ tenen, ninye unamnyake. Lewi yala nang arye, Israel ninye yala-yala nirya ati deknirye, sik punupnamne. Tonda, Israel ninye, sik weinyak ning yala-yala nirya, dekna ap, pununa ap ati, Lewi yala nang arye, weinyak ning yala-yala nirya ara, sik winiryuk mapu babye, na mapu uk unamnulume. Akam ning winiryuk mapu deice arye, Israel ninye weinyak ning, deknirye punupnamne. Nara, anggun ni koproba, Allah Yahweh unune.

⁴² Allah Yahweh arye, Musa biti, “Ance winipnulyame,” nyapdeiamuk touk, ubuka pil dobuk. Ara, Musa birye, Israel ninye yala-yala nirya, min yuma winiryuk deiamik mapu nirya ara, sik si sekuk.

⁴³ Aning akunum winibukopura, amapu sik wala tonok akunum kibukce, itam mapu nirya nukuka, yupa ara, dua puluh dua ribu, dua ratus tujuhpuluh tiga (22.273) nang kibuk.

⁴⁴ Winibukopura, Allah Yahweh arye, Musa biti nyabuk.

⁴⁵ “Aning akunum winipminyopura, sik Lewi yala nang ara, nati winimince, ‘Sik anang ara, Allah el kanye delin ninye pia unamakeʼ tenen, wipdeipnamlume. Ara, anggun Israel ninye arye, deiplum mapu nirya ara, sik punubuka dekna ati, wipdeipnamlume. Tonda, Lewi yala nang arye weinyak ning, winiryuk delilul ning nirya ara, sik Lewi yala nang arye, weinyak ning punupnamlume. Ati, Lewi yala nang arye weinyak ning, min yuma ning ara, yuk wipdeipnamlume, Aning nirya ara, sik Israel ninye arye weinyak ning, punubuka dekna ati, wipdeipnamlume. Nara, anggun ni koproba, Allah Yahweh unune.

⁴⁶ Ati ara, Israel ninye, sik min yuma arye winiryuk deiamik mapu yupa ara, dua puluh dua ribu, dua ratus tujuhpuluh tiga nang (22.273) unyake. Bukni, Lewi yala nang sik yupa ara, mitik tonun unyake ati, sik yupa ara, dua puluh dua ribu (22.000) nanguk unyake. Ati ara, Israel yala nang ara, weik tonun 273 nang unyake. Ati ara, sik Israel ninye, sik mapu yupa, mitik tonun upne mapu ati, sik punubuka dekna ati, keil uang ton dobuka, dekmuce dopropnamlume.

⁴⁷ Winipmunce, sik Israel nang arye, 273 deiamik mapu, yuk-yuk deknamlum ati, keil uang el si syikal, pamubarye arebikiba, dolonamlume. Akeil uang, el si syikal ara, “Winibuka-winibuka dekenamabe,” nyabuka, na si erena ati, dolamak aik dekelulum touk, aning arenamake. Ara tonok mi ati, keil uang tonok si ara, syikal pamubarye (5) arepnamake. Akeil uang el ikin ara, lima puluh tujuh (57) gram kilule. Aning nukuka arebica deice arye, sik winiryuk mapu 273 ara, yuk-yuk bukni, nirya dekuka, tuba punupnamake.

⁴⁸ Winibuka akeil uang, Israel 273 mapu, sik punubuka dekna ati, akunum arebicopura, ance aning nirya dobuka, Harun ap, el mapu ap, sikak arenalame,” Allah arye, Musa biti nyabuk.

⁴⁹ Aning nirya ara, Allah Yahweh arye, Musa biti, “Ance wininamlyame,” nyapdeiamuk touk, winilamuk. Akeil uang, el si perak ara, Israel ninye, sik winiryuk mapu 273 weik tonun, tabakuka ulamik nang ati, sik punubuka dekna ati, Musa birye doprobukce, sik Lewi yala nang ati arebuk.

⁵⁰ Musa elce, Israel ninye, sik winiryuk mapu 273 ulamik nang ara, sik nirya dekna ati, uang perak, el si syikal ara, yupa weik, seribu tiga ratus enam puluh lima (1.365) doprobukce, sik Lewi yala nang ati arebuk. Akeil uang perak ara, yuk-yuk bukni, aning nirya ikin ara, lima belas setengah (15.5) kilogram uamuk. Ara, Allah si erena ati, tenda aik noutam nukuka arelamik touk, aninguk arebike.

⁵¹ Winibuka dobukopura, Israel ninye, sik winiryuk mapu 273 nang, sik punubuka dekna ati, Musa birye akeil uang perak ara, doprobukce, Harun ap, el mapu ap ati, arebuk.