Bilangan 29 - Eipomek

Tek barye wala kiplyeura, tanggal satu sum deice arye arelyangana ati, nyabuk yupu

¹ Ura, wala tekbarye (7) deice, tanggal satu sum akunum uplyopura, anggun nirya bulupmunce, Allah el si erena ati weknamlume. Yuk asum-asum nirya, talye ikin pil dolamlum touk, asum deice arye, apil ton kum donamlume. Dikdik sepmunce, Allah el siuk erepnamlume. Tonda asum ara, weik sum ati, bung-bung an ning, el si terompet deice arye, weik lelim nyanamlume.

² Atalak adiparyuk, Allah Yahweh el si erena ati, kam ning obuka, uku dongon pil dopnumunyopura, uku diplirye, siltong teleb ning ara, tulum weleplyopura, Allah Yahweh kekeplirye, el kanye pia teleb unamle. Allah ati arepnamlum ning ara, ani. Yim sapi basam, keting tamun tonok nenmalye ning ap, yim domba basam ara, wisi tonok ap, tonda yim domba basam mi tekbarye (7), keting tamun tonok kipmalye ning ap, opmunyak arye, Allah ati arepnamlume. Aning nirya ara, nong bol pia teleb ninguk, boyanganamlume. Abobuka arepnamak ning ara, uku dongopmunyaba, siltong teleb ning weleplyopura, Allah Yahweh kekeplirye, el kanye teleb unamle.

³ Anggunce batakna kum adiparyuk, tabakalongona ati kintinibuka, Allah ati arelyanganamlum din ara, ani. Ara, tonok sapi basam ati, gandum tepung nakub barye (6) liter ap, minyak zaitun ap, tabakuka kintinip deipmamunye ninguk, boyanuka arepnalume. Tonda, yim domba basam tonok ati, el tabakana ara, gandum tepung dumbarye liter kintinibikirye, ayim domba basam ap arepnamake.

⁴ Tonda domba basam mi arenamlum talak ara, gandum tepung, el ikin ara, bitinye liter kintinip deipnamlume. Domba basam mi tonok ap, tepung bitinye liter ap, el minyak zaitun ap, tabakuka kintinipmunce, aning boyanuka arepnamlume. Allah ati boyanuka arelyanganamlum din ara, atonunuk boyamunce, tabakuka arenamlume.

⁵ Tonda, yim kambing basam tonok kintinipnamlume. Aning ara, anggun malye un ning kilibuka lyena ati, ayim kambing basam tonok boyanuka, Allah ati arepnalume. Akambing basam opmunyopura, anggun malye un ning ati, punupnamsile. Winipmunya deice arye, anggun malye un ning ara, Allah arye anggunti kum obuka, sirya daknamsile. Biksilirye, teleb kipdeipnamsile.

⁶ Ayanuka arenamlum ning ara, asum-asum nirya, beren tam talak uku dongonamlum ning ara, aning opmakce ning ap, din ning tepung kintinip deipmakce ning ap, tabakuka uku dongonamlume. Ara, wala sirya daklirye, tanggal tonok kiplyopura, aning wininamlume. Atonok sum akunum upliba, yanuka arenamlum ning ara, asum-asum kiplyeura, kam ning obuka, yan arepmunyak arye, din ning tepung intinip deipmamunye ning ap, din ap, tonda anggur mek ap, arelamlum ning ara, tabakna ati arenamlume. Allah arye, “winibuka arenamlume,” nyapdeibuk touk, Allah Yahweh ati arenamlulume. Aning winipmunyopura, siltong teleb ning ara weleplirye, Allah kekeplyeura, kanye teleb upnamle.

“Anggun malye un ning kilibuka lyena ati, weik sum uplyeura, arelyanganamlume,” nyabuk yupu

⁷ Allah arye nyabuk. “Tek barye (7) wala kiplyeura, tanggal sepuluh kiplye sum, ara weik sum ati, anggun nirya adiparyuk bulubuka, Allah el si erepnamlume. Winimunce, yuk sum asum-asum nirya, talye ikin pil dolamlum pil dona kumce, dikdik sensum ara, din dina kumce, din si tebuka unamlume.

⁸ Atalak, Allah Yahweh el si erena ati, uku dongon pil ton dopnamlume. Winipmunyeba, tulum weleplirye, siltong pia teleb ning Allah kekeplirye, kanye delinamle. Allah el si erena ati ara, yim sapi basam winiryuk nenmalye ning tonok ap, yim domba basam tonok wisi ap, tonda yim domba basam mi tekbarye, keting tamun tonok kipmalye ning ap, kintinibuka, Allah Yahweh ati arepnamlume. Akam ning nirya ara, sik bol pia teleb ninguk, boyanganamlume. Aboyakce ning ara, uku dongopmunyaba, siltong ara, Allah kekeplirye, kanye teleb deipnamsile.

⁹ Anggunda, batakna kum diparyuk kintinibuka, Allah Yahweh ati arelyanganamlum din ara, ani. Ara, gandum tepung ap, minyak zaitun mek ap, tabakmakce ning, el ikin ara, nakub barye (6) liter kintinip deipnamlume. Tonda, domba basam wisi arepnamlum talak ara, gandum tepung, el ikin ara, bitinye liter kintinibuka arepnalume.

¹⁰ Tonda, domba basam mi tekbarye (7) bukni, tonok-tonok arepnamlum talak ara, tepung bitinye liter ap, el minyak zaitun ap, tabakuka kintinipmunce, aning boyanuka arepnalume.

¹¹ Tonda, yim kambing basam tonok kintinibuka arepnalume. Aning ara, anggun malye un ning kilibuka lyena ati, ayim kambing basam tonok boyanuka, Allah ati arepnalume. Akambing basam opmunya deice arye, anggun malye un ning ati, punupnamsile. Winipmunya deice, Allah arye anggun malye un ning ati, kum obuka sirya daknamsile. Mangkau kipsilirye, teleb kipdeipnamsile. Ayanuka arenamlum ning ara, asum-asum nirya, arelamlum touk, aning ap tuba arenamlume. Beren tam talak aining ning obikirye, uku dongonamlum ning ara, din ning gandum tepung ap, anggur mek ap, kintinibuka arenamak ning ara, aning nirya tuba tabakuka uku dongonamlume.

Bai tam doltakan aik dobikirye, weik sum kiplyeura, arelyangana ati, nyabuk yupu

¹² Ura, wala tekbarye akunum kiplyopura, awala noutam tanggal lima belas sum akunum uplyopura, anggun nirya bulupmunce, Allah el si erena ati wekanamlulume. Asum ara, yuk asum-asum nirya, talye ikin pil dolamlum touk, asum ara, apil ton kum donamlume. Asum deice arye dikdik sena ap, kwalya kwalina ap, aninguk wininamlume. Ati, asum tanggal 15 deice arye deiyok koubuka, like tekbarye (7) sum noutam nirya ara, Allah Yahweh el si erena ati, kwalya kwalinamlume.

¹³ Allah el si erena ati, deiyok koun sum ara, kam ning opmunyak arye, uku dongonamlume. Winipmunyopura, tulum weleplirye, siltong teleb ning nirya bobuka weleplyopura, Allah Yahweh kekeplirye, el kanye deilinamle. Adeiyok kouna ati arepnamlum ning ara, ani. Winiryuk nepmalye yim sapi basam ara, tiga belas ap, tonda, nebuka wisi akunum danamlye yim domba basam bitinye ap, atouk ton, keting tamun tonok mapmalye domba mi ara, empat belas (14) nirya, boyanuka arepnamlume. Aboyanuka arelyanamlum ning ara, obuka uku dongopmunyaba, siltong weleplyopura, Allah Yahweh kekeplirye, el kanye teleb unamle. Akam ning nirya ara, sik bol pia teleb ninguk, boyanganamlume.

¹⁴ Anggunda batakna kumce, adiparyuk kintinibuka, Allah ati tabakuka arelyanganamlum din ara ani. Ara, sapi basam tiga belas bukni, asapi yuk-yuk arepnamlum talak ara, sik tabakalona ati, gandum tepung ap, minyak zaitun mek ap, tapaknamlum ning, el ikin ara, nakub barye (6) liter kintinip deipnamlume. Tonda, domba basam wisi tonok-tonok arenamlum talak ara, tonok domba basam ati, gandum tepung el ikin ara, bitinye liter kintinip deipnamlume.

¹⁵ Tonda, domba basam mi empat belas bukni, tonok-tonok arepnamlum talak ara, tonok domba basam mi, el tabakalona ati, gandum tepung bitinye liter ap, el minyak zaitun ap, tabakuka kintinipmunce, aning bobinuka arepnamlume.

¹⁶ Tonda, yim kambing basam tonok kintinibuka arepnamlume. Aning ara, anggun malye un ning kilibuka lyena ati, ayim kambing basam tonok boyanuka, Allah ati arepnamlume. Akambing basam opmunya deice arye, anggun malye un ning ati, punupnamsile. Winipmunya deice, Allah arye anggun malye un ning ati, obuka kum sirya daknamsile. Kilibuka lyepsilirye, teleb kipdeipnamsile. Ayanuka arepmakce ning ara, asum-asum nirya, arenamlum touk, aning ap tuba arenamlume. Beren tam talak aining ning obikirye, uku dongonamlum ning ara, din ning gandum tepung ap, anggur mek ap, kintinibuka arebikceba, aning nirya tuba tabakuka, uku dongonamlume.

¹⁷ Ura, tekbarye wala deice arye, weik kwalya kwalibuka yunamlum bukni, aminggu noutam bukni, like bitinye sum kiplyeura, Allah ati boyanuka arelyanganamak ning ara, ani. Ara, yim sapi basam pia winiryuk nepmalye ning ara, dua belas (12) boyanuka arenamnyake. Tonda, yim domba basam wisi bitinye boyanganamnyake. Atouk tonda, keting tamun tonok mapmalye yim domba basam mi ara, nukuka empat belas (14), boyanuka arelyanganamninyake.

¹⁸ Akam ning arelyanganamak talak ara, Allah arye, “Winibuka-winibuka, din ning gandum tepung ap, anggur mek ap, kam ning sapi basam do, kambing basam do, domba basam do, el liter winibuka-winibuka tabakalona ati, kintinibuka arenamlume,” nyapdeibuk touk, aning babye kintinibuka, arelyanganamake.

¹⁹ Tonda, yim kambing basam tonok kintinibuka arepnamlume. Aning ara, anggun malye un ning kiluba lyena ati, ayim kambing basam tonok bobinuka, Allah ati arepnamlume. Akambing basam opmunya deice arye, anggun malye un ning ati, punupnamsile. Winipmunya deice, Allah arye anggun malye un ning ati, obuka kum sirya daknamsile. Mangkau kipsilirye, teleb kipdeipnamsile. Ayanuka arepmakce ning ara, asum-asum nirya, arelamlum touk, aning ap tuba arenamlume. Beren tam talak aining ning opmunce, uku dongonamlum ning ara, din ning gandum tepung ap, anggur mek ap, kintinibuka arebikceba, aning nirya tuba tabakuka, uku dongonamlume.

²⁰ Ura tekbarye (7) wala deice arye, weik kwalya kwalibuka winamlum bukni, aminggu noutam bukni, like winilye sum kiplyeura, Allah ati boyanuka arelyanganamak ning ara ani. Ara, yim sapi basam pia winiryuk nepmalye ning ara, koklombarye (11) boyanuka arenamnyake. Tonda, yim domba basam wisi bitinye boyanganamnyake. Atouk tonda, keting tamun tonok mapmalye yim domba basam mi ara, nukuka empat belas (14) boyanuka, arelyanganamninyake. Akam ning nirya ara, nong bol pia teleb ninguk, wibuka deipnamnyake. Bol malye ning ara, pia kume.

²¹ Akam ning arenamniak talak ara, Allah arye, “Winibuka-winibuka din ning gandum tepung ap, anggur mek ap, kam ning sapi basam do, kambing basam do, domba basam mi do, el liter winibuka-winibuka tabakalona ati, kintinibuka arenamlume,” nyapdeibuk touk, aning babye, asum deice arye, kintinibuka arelyanganamnyake.

²² Tonda, yim kambing basam tonok, kintinibuka arepnamlume. Aning ara, anggun malye un ning kilibuka lyena ati, ayim kambing basam tonok boyanuka, Allah ati arepnamlume. Akambing basam opmunya deice arye, anggun malye un ning ati, punupnamsile. Winipmunya deice, Allah arye, anggun malye un ning ati, obuka kum sirya daknamsile. Lyebuka teleb kipdeipnamsile. Ayanuka arepnamak ning ara, asum-asum nirya, arelamlum touk, aning ap tuba arenamlume. Beren tam talak aining ning obikirye, uku dongonamlum ning ara, din ning gandum tepung ap, anggur mek ap, kintinibuka arebikceba, aning nirya tuba tabakuka, uku dongonamlume.

²³ Ura tekbarye wala deice arye, weik kwalya kwalibuka wininamlum bukni, aminggu noutam bukni, like dumbarye sum kiplyeura, Allah ati boyanuka arelyanganamak ning ara ani. Ara, yim sapi basam, pia winiryuk nepmalye ning ara, takubarye (10) boyanuka arenamnyake. Tonda, yim domba basam wisi bitinye, boyanganamnyake. Atouk tonda, keting tamun tonok mapmalye yim domba basam mi ara, nukuka empat belas (14) boyanuka, arelyanganamnyake. Akam ning nirya ara, nong bol pia teleb ninguk, wibuka boyanganamnyake. Bol malye ning ara, pia meme.

²⁴ Akam ning arelyanganamak talak ara, Allah arye, “Winibuka-winibuka din ning gandum tepung ap, anggur mek ap, kam ning sapi basam do, kambing basam do, domba basam mi do, el liter winibuka-winibuka tabakalona ati, kintinibuka arenamlume,” nyapdeibuk touk, aning babye, asum deice arye, kintinibuka arelyanganamninyake.

²⁵ Tonda, yim kambing basam tonok kintinibuka arepnamlume. Aning ara, anggun malye un ning kilibuka lyena ati, ayim kambing basam tonok boyanuka, Allah ati arepnamlume. Akambing basam opmunya deice arye, anggun malye un ning ati, punupnamsile. Winipmunya deice, Allah arye, anggun malye un ning ati, obuka kum sirya daknamsile. Lyepsilirye, teleb kipdeipnamsile. Ayanuka arepnamak ning ara, asum-asum nirya, arelamlum touk, aning ap tuba arenamlume. Beren tam talak aining ning obikirye, uku dongonamlum ning ara, din ning gandum tepung ap, anggur mek ap, kintinibuka arebikceba, aning nirya tuba tabakuka, uku dongonamlume.

²⁶ Ura, tekbarye (7) wala deice arye, weik kwalya kwalibuka wininamlum bukni, aminggu noutam bukni, like pamubarye (5) sum kiplyeura, Allah ati boyanuka, arelyanganamak ning ara ani. Ara, yim sapi basam pia winiryuk nepmalye ning ara, sembilan (9) boyanuka arenamnyake. Tonda, yim domba basam wisi ning bitinye boyanganamnyake. Atouk tonda, keting tamun tonok mapmalye yim domba basam mi ara, nukuka empat belas (14) boyanuka, arelyanganamyake. Akam ning nirya ara, nong bol pia teleb ninguk, wibuka boyanganamnyake. Bol malye ning ara, pia meme.

²⁷ Akam ning arelyanganamak talak ara, Allah arye, “Winibuka-winibuka din ning gandum tepung ap, anggur mek ap, kam ning sapi basam do, kambing basam do, domba basam mi do, el liter winibuka-winibuka tabakalona ati, kintinibuka arenamlume,” nyapdeibuk touk, aning babye, asum deice arye, kintinibuka arelyanganamyake.

²⁸ Tonda, yim kambing basam tonok kintinibuka arepnamlume. Aning ara, anggun malye un ning kilibuka lyena ati, ayim kambing basam tonok boyanuka, Allah ati arepnamlume. Akambing basam opmunya deice arye, anggun malye un ning ati lyepnamsile. Winipmunya deice, Allah arye anggun malye un ning ati, obuka kum sirya daknamsile. Kilipsilirye, teleb kipdeipnamsile. Ayanuka arenamlum ning ara, asum-asum nirya, arelamlum touk, aning ap tuba arenamlume. Beren tam talak aining obikirye, uku dongonamlum ning ara, din ning gandum tepung ap, anggur mek ap, kintinibuka arebikceba, aning nirya tuba, tabakuka uku dongonamlume.

²⁹ Ura, like tekbarye (7) wala deice arye, weik kwalya kwalibuka wininamlum bukni, aminggu noutam bukni, like nakub barye (6) sum akunum kiplyopura, asum deice arye, weik kwalya kwalibuka wininamlum bukni, aminggu noutam like winilye sum kiplyeura, Allah ati, boyanuka arelyanganamak ning ara ani. Ara, yim sapi basam pia winiryuk nepmalye ning ara, koklombarye (11) boyanuka arenamnyake. Tonda, yim domba basam wisi bitinye, boyanganamnyake. Atouk tonda, keting tamun tonok mapmalye yim domba basam mi ara, nukuka empat belas (14) boyanuka, arelyanganamyake. Akam ning nirya ara, nong bol pia teleb ninguk, wibuka boyanganamnyake. Bol malye ning ara, pia meme.

³⁰ Akam ning arelyanganamak talak ara, Allah arye, “Winibuka-winibuka din ning gandum tepung ap, anggur mek ap, kam ning sapi basam do, kambing basam do, domba basam mi do, el liter winibuka-winibuka tabakalona ati, kintinibuka arenamlume,” nyapdeibuk touk, aning babye, asum deice arye kintinibuka, arelyanganamyake.

³¹ Tonda, yim kambing basam tonok kintinibuka arepnamlume. Aning ara, anggun malye un ning kilibuka lyena ati, ayim kambing basam tonok boyanuka, Allah ati arepnamlume. Akambing basam opmunya deice arye, anggun malye un ning ati, lyepnamsile. Winipmunya deice, Allah arye anggun malye un ning ati, obuka kum sirya daknamsile. Kilipsilirye, teleb kipdeipnamsile. Ayanuka arepnamak ning ara, asum-asum nirya, arelamlum touk, aning ap tuba arenamlume. Beren tam talak, aining ning obikirye, uku dongonamlum ning ara, din ning gandum tepung ap, anggur mek ap, kintinibuka arebikceba, aning nirya tuba tabakuka uku dongonamlume.

³² “Wininamlume,” nyapdeiamuk touk, like tekbarye (7) sum akunum uplyopura, tekbarye sum arye winiryuk yim domba basam nepmuk ning, boyanuka, Allah el si erena ati, kintinibuka deiamice ninguk, yanuka arepnamake. Tonda, domba basam bitinye winiryuk nenmalye ning ap, atouk domba basam mi empat belas (14) ara, keting tamun tonok deice arye nemlye basam mi ap, tonda sik abasam mi nirya ara, yuk-yuk pia sik yok kwalina ap, sik bol malye bona ap, pia kum domba basam mi uk, nirya boyanuka arenamake.

^33-34 Aning nirya boyanuka, Allah si erena ati, yanuka arelamak touk, yuk-yuk ning nirya ap, boyanuka arinyak sukum adobuka arinyak ning nirya ara, sik min talak arye patabukura, boyanuka arelyangalamik ninguk, arenamnyake. Ara, empat belas domba basam mi winiryuk keting tamun tonok noutam arye nenmek ning, boyanuka arebek touk, aning yuk-yuk ning nirya ara, sik neika Allah el si erena ati, siltong teleb ning dabuka deipnarye, arelbalamikakuk bobinuka, aning nirya arenamnyake.

³⁵ Ura, like tekbarye (7) walam deice arye, weik kwalya kwalibuka wininamlum bukni, aminggu noutam bukni, like pinbarye (8) sum akunum kiplyopura, asum deice arye, asum-asum nirya talye ikin pil dolamlum touk, pia kum donamlum bukni, dikdik sepmunyak arye, kwalya kwalibuka unamlume.

³⁶ Asum deice arye, kam ning obuka, uku dongopmunyeba, siltong teleb ning weleplyopura, Allah Yahweh kekeplirye, el kanye teleb unamle. Winipnamluma ati, like pinbarye (8) sum kiplyeura, Allah ati boyanuka, arelyanganamak ning ara, ani. Ara, yim sapi basam pia winiryuk nepmalye ning ara, tonok boyanuka arenamnyake. Tonda, yim domba basam wisi tonok, boyanganamnyake. Atouk tonda, keting tamun tonok mapmalye yim domba basam mi ara, nukuka tekbarye (7) boyanuka, arelyanganamyake. Akam ning nirya ara, nong bol pia teleb ninguk wibuka, boyanganamnyake. Bol malye ning ton, pia boyangana meme.

³⁷ Akam ning arelyanganamak talak ara, Allah arye, “Winibuka-winibuka din ning gandum tepung ap, anggur mek ap, kam ning sapi basam do, kambing basam do, domba basam mi do, el winibuka-winibuka tabakalona ati, kintinibuka arenamlume,” nyapdeibuk touk, aning babye, asum deice arye kintinibuka, arelyanganamyake.

³⁸ Tonda, yim kambing basam tonok kintinibuka arepnamlume. Aning ara, anggun malye un ning kilibuka lyena ati, ayim kambing basam tonok boyanuka, Allah ati arepnamlume. Akambing basam opmunya deice arye, anggun malye un ning ati, punamsile. Winipmunya deice, Allah arye, anggun malye un ning ati, kum obuka, sirya daknamsile. Lyepsilirye, teleb kipdeipnamsile. Ayanuka arepnamak ning ara, asum-asum nirya, arelamlum touk, aning ap tuba arenamlume. Beren tam talak, aining ning obikirye, uku dongonamlum ning ara, din ning gandum tepung ap, anggur mek ap, kintinibuka arebikceba, aning nirya tuba tabakuka, uku dongonamlume.

³⁹ Aning nirya obuka, Allah Yahweh el si erena ati, ‘Weik kwalya kwalina sum ara ani-ani,’ nyapdeipsuk touk, uku dongon pil dona ati ara, anyapmasen touk wininamlume. Ara, kintinip deipmakce din ning ap, anggur mek ap, tonda anggun malye winyamunye ning ara, ‘Allah arye kilbuka lyepnamsilʼ tenen, arelyangan pil dona ati ap, tonda anggun kanye arye, ‘Allah si erena ati, winipnamne nyalin yupu deice arye arenamlum ning ap, tonda, ‘Allah ap, nun ap, teleb kibuka neika unamapʼ tenen, aren ning ap, tonda yuk aren ning dobuka, Allah ati, telebe nyana ap ati, arenamnulum ning ap, aning nirya ara, min arye akunum nyapdeiamsuk touk ubuka, arelyanganamlume. Musa birye, Israel nang ati nyabuk.

⁴⁰ Ati ara, Allah arye Musa dam nyapdeibukura, “Ance, sik Israel nang dam ayupu nirya laka nyapnamlyame,” nyapdeibuk yupu nirya ara, ayupu nyabuk touk, Musa birye sik Israel nang kekenak binuka, laka nyabukba, sikce aning nirya kekebik.