Bilangan 28 - Eipomek

“Allah si eren ati, teleb aren ning ara, pia tuba-tuba arenamlume,” nyabuk yupu

¹ Allah Yahweh arye Musa biti nyabuk.

² “Ance sik Israel nang ati, binuka nyapnulyame. Na Allah Yahweh si erena ap, arena ati, sik adiparyuk din ning nirya ara, yanuka arebikceba, imam nang arye bobuka, uku dongobikceura, uku arye diplirye, siltong teleb ning ara, tulum welepliba, kekepnirye, na kanye delinamne. Aning arepnamniyak ning ara, narye, ‘Aning ara, atalak arenamnulume. Aning ara, atalak ton arenamnulume,’ nyapdeipse touk arepnikirye, pia moubuka kalikikirye, dinmakibuk uku dinamle.

³ Tonda, an Musa birye, sik Israel nang ati, nyapnamlyame. ‘Tonok sum, Allah el si erena ap, elti, arena ap ati, boyanuka arelyanganamlum ning ara, ani. Ara, keting tamun tonok kipmalye yim domba basam bukni, bol pia teleb ninguk, bitinye boyanuka arelyanganamlume. Aning atouk, asum-asum nirya pia arenamlulume.

⁴ Aboyanganamak domba basam ara, bokukabikirye, ton ning ara, beren tam obuka arenamnyake. Tonok ning ara, sintam kiplye talak obuka arenamnyake.

⁵ Adomba boyanuka arepnukce talak ara, gandum tepung el ikin ara, tonok liter ning ap, tonda minyak zaitun mek tonok liter ton kwebuka, aning arye tabakmakce ning, pia teleb ninguk neika boyanuka arelyanganamake.

⁶ Aning arenmaka ara, Sinai mutuku deice, na Allah Yahweh arye, ‘Na arena ati, aning-aning winibuka yanuka, tuba-tuba arepmunyeba, uku dongonamnyake,’ nyabuka, minop talak arye nyapdeiamsise. Winipmunyeba, siltong teleb ning ara, welepliba, na Allah kekepnirye, kanye pia teleb unamnile.” Allah arye, Musa biti laka nyabuk.

⁷ Nyabukopura, ayupu ton dukgobuka nyabuk. “Domba basam mi boyanuka arelyangakce talak ara, anggur mek ton kwebuka arenamake. Ara, tonok liter ton kwebikirye, tonok domba mi ap, tabakuka boyakceura, arenamnyake. Aning ara, beren tam talak, imam nang arye anggur mek kwebuka, na si eren aik pum tam dikuka delinamnyake. Winibikirye, nati arenamniyake.

⁸ Aning atouk, ton domba basam mi ara, anggur mek tonok liter kwebuka, abitinye ning ap, tonda gandum tepung tonok liter ap tabakuka, sintam boyakce ning babye, atouk ubuka pil dobikirye, na Allah ati arenamniake. Winibikca deice arye, uku dongobikceura, uku diplirye, siltong teleb ning welepliba, na Allah kekepnirye, kanye teleb unamnile,” Allah arye, Musa biti lak nyabuk.

Talya pil dona kum sum, Sabat sum kiplyeura, bobuka Allah arelyangana ati, nyabuk yupu

⁹ Allah arye, Musa biti nyabuk. “Israel nang ara, Sabat sum akunum kiplyopura, keting tamun tonok kiamlye domba basam, yim bitinye, bol pia teleb ninguk boyanuka, na si erena ati, arelyanganamninyake. Atalakuk gandum tepung, el ikin ara, bitinye liter deice, minyak zaitun ap, tabakuka kintinibuka, deipmakce ning ap, tonda anggur mek ap, libuka boyanuka arenamninyake.

¹⁰ Na Allah ati yanuka arepnamkiyak ning ara, Sabat asum-asum nirya, uku dongon pil donamake. Aning ara, Sabat sum nirya, aren ning tabakalon sum ati, apil donamake. Asabat asum-asum nirya arepnamkiyak ning, el tabakna ati aren ning ara, anggur mek tonok liter ton kwebuka, tabakuka arenamninyake. Asum-asum nirya arepnamkiyak ning ara, tuba aupnamle bukni, Sabat sum deice arye, anyapmakin ning ara, tabakuka arenamninyake.” Allah arye, Musa biti nyabuk.

Allah ati aren ning ara, wala sirya daklirye, tonok sum kiplyeura, arelyangana ati, nyabuk yupu

¹¹ Allah arye, Musa biti nyabuk. “Ura awala-awala nirya ton wininamlyame. Ara, wala ton oplirye, winiryuk wala tekilyalye talak, tanggal tonok kiplyeura, na Allah ati yanuka arebikceba, uku dongon ati ara, yim sapi basam bitinye, winiryuk nenmalye ning ap, tonda yim domba basam wisi tonok ap, tonda keting tamun tonok winiryuk nenmakce domba basam ara, tekbarye nirya ara, bol pia teleb ning, boyanganamnyake.

¹² Tonda, tonok sapi basam ati, gandum tepung nakub barye (6) liter ap, zaitun ap, tabakuka kintinip deipmakce ninguk, boyanuka arelyanganamlume. Tonda, yim domba basam tonok ati, el tabakana ara, gandum tepung dumbarye liter kintinibikirye, ayim domba basam ap arenamniyake.

¹³ Tonda, domba basam mi arepnamak talak ara, gandum tepung el ikin ara, bitinye liter kintinip deipnamake. Domba basam mi tonok ap, tepung bitinye liter ap, boyanganamlume. Allah ati boyanuka arelyanganamak din ning ara, ato ninguk, boyakirye, tabakuka arenamnyake. Winibikca deice arye, uku dongobikceura, uku diplirye siltong teleb ning welepliba, na Allah kekepnirye, kanye teleb unamnile.

¹⁴ Tonda, aning boyakirye, uku dongopnukce talak ara, anggur mek boyanganamnyake. Anggur mek el ikin ara, bitinye liter kintinip deipnamake. Aning ap, tonda yim sapi tonok ap, tabakuka boyanuka arenamnyake. Winibikca deice arye, anggur mek, el ikin ara, 1.2 liter ton kintinibikirye, domba mi tonok ap, tabakuka arenamnyake. Atouk ton, domba basam mi arena ati ara, anggur mek, el ikin tonok liter ton kintinibikirye, domba mi tonok ap, tabakuka arenamnyake. Aning winibikirye, uku dongonamnyake. Aning nirya ara, pia ati aketing tamun, aketing tamun nirya, awala-awala nirya, ton wala oplirye, winiryuk wala tekilyalye talak ara, tanggal tonok kiplyopura, apil winibuka donamlume.

¹⁵ Apil dopnin yangalamikca ani, tabakalona ati, tonok sum ara, kambing basam yim tonok ap, boyanuka arelyanganamninyake. Aning arenamaka deiyok ara, Israel nang, sik malye ulamik ning bikina ati, sik adiparyuk aning ton arenamnyake. Aning ap, tonda, arup akunum laka nyapmanu aren ning ap, pia arenamnyake. Aning ara, uku sekikirye, uku dongonamnyake.” Aning nirya ara, Allah arye, Musa biti laka nyabuk.

Kaplina ati Kwalya Kwalina sum kipnopura, arelamik ning ati, laka nyabuk yupu

¹⁶ Allah arye, Musa biti lak nyabuk. Allah el si erena ati, Kaplin ati Kwalya Kwalina ati, asum kipnamle sum ara, wala tonok, tanggal empat belas (14) sum kiplyopura, weik kwalya kwalinamlume.

¹⁷ Akwalin kwalya kwalipmamunya, ambusumto sum, tanggal lima belas (15) sum akunum kiplyopura, ‘Weik kwalina talak, akunumaʼ tenen, deiyok koupnamlume. Ara, asum arye dipdongobuka, doyanganamle sum nukmunce, tekbarye sum deice arye, kwalya kwalinamlume. Bukni, akwalin talak noutam ara, nena kum roti kwaninguk dinamlume. Ara, roti bun nena deiyok ning, el si ara ragi, aning ap tabakuka dana kum ninguk, deiyok koubuka dapmunce, tekbarye sum noutam arye, aning dabuka dinamlume. Like tekbarye sum noutam nirya, nena kum roti uk dinamlume.

¹⁸ Nena kum roti kwaning dana ati, deiyok koupnumunye sum ara, anggun nirya adiparyuk bulubuka, Allah el si erepmunce, el yupu kekepnululume. Asum noutam nirya ara, anggunce ikin pil ton pia kum donamlume. Talya pil dona ati ara, asum ara, dikdik sen sumuk upnamle.

¹⁹ Nena Kum Roti Kwalya kwalina sum tonok ning ara, Allah Yahweh el si erena ati, kam ning obuka, uku dongonamlume. Uku dongonamlum ning ara ani. Ara, yim sapi basam winiryuk nenmalye ning bitinye ap, tonda, yim domba basam akunum weik nemlye ning tonok ap, tonda yim domba basam mapu tekbarye, aning ara keting tamun tonok kipmalye ning, boyanganamlume. Akam ning yala nirya ara, bol pia teleb ninguk wibuka, yanuka arenamlume.

²⁰ Tonda, tonok sapi basam ati, gandum tepung nakub barye (6) liter ap, minyak zaitun ap, tabakuka kintinip deipmakce ninguk, boyanuka arelyanganamlume. Tonda, yim domba basam tonok ati ara, el tabakana ara, gandum tepung dumbarye liter kintinibikirye, ayim domba basam ap, arenamnyake.

²¹ Tonda, domba basam mi arepnamniak talak ara, gandum tepung, el ikin ara, bitinye liter kintinip deipnamyake. Domba basam mi tonok ap, tepung bitinye liter ap, el minyak zaitun ap, tabakuka kintinipmunce, aning boyanganamlume. Allah ati boyanuka arelyanganamak din ning ara, atonunuk boyakirye, tabakuka arenamnyake.

²² Tonda, yim kambing basam tonok kintinipnamlume. Aning ara, anggun malye un ning kilibuka lyena ati, ayim kambing basam tonok, boyanuka arelyanganamlume. Akambing basam opmunyopura, anggun malye un ati, punupnamsile. Winipmunya deice arye, anggun malye un ning ati, Allah arye anggun kum obuka sirya daknamsile. Lyepsilirye teleb kipdeipnamsile.

²³ Ura, arup akunum laka nyapmanu aren ning ap, pia arepmunce, uku dongonamnyake. Aning ara, uku sekikirye, uku dongonamnyake. Asum-asum nirya, beren tam talak uku dongonamlum ning ara, akambing basam tabakalona ap ati, uku dongonamlume.

²⁴ Aning nirya winibuka arepnamak ning ara, like tekbarye sum deice, uku dongon pil donamlum ning ara, Allah Yahweh, el tonok arenamlume. Awininamlum ning ara, asum-asum nirya uku dongon pil dopnamlum talak ara, anggur mek ap tabakuka, uku dongonamlume. Ara, tabakna ati, apil donamlume. Aning winimunya deice arye, Allah kekeplirye, kanye teleb unamle.

²⁵ Aning winipnin balamunya sirya sum ara, tekbarye sum ara, ikin pil dona kumce, anggun nirya adiparyuk bulubuka wekelyamunce, Allah el siuk erepnamlume. Anggun yuk sum nirya, talye pil dolamunya nirya ara, asum babye pia atouk, pil kum donamlume. Dikdik sena uk unamlume.” Aning nirya ara, Allah arye nyabuk.

Wa wiamice ani, min yuma ning lin talak, kwalya kwalina ati, nyabuk yupu

²⁶ Allah arye nyabuk. “Kwalya kwalipmamunya ani, minggu tekbarye akunum mapmunce, like sum akunum kiplyopura, min yuma ning ati, kwalya kwalinamlume. Asum ara, anggun yuk sum nirya, ikin pil domunya ara, apil dona kumce, anggun nirya adiparyuk bulubuka wekmunce, Allah el siuk erepnamlume.

²⁷ Allah Yahweh el si erena ati, kam ning obuka, uku dongonamlume. Winipmunyeba, uku arye diplirye, tulum weleplirye, siltong teleb ning, tulum weleplya deice, Allah kekeplirye, el kanye pia teleb unamle. Uku dongonamlum ning ara ani. Ara, yim sapi basam winiryuk nenmalye ning bitinye ap, tonda, yim domba basam akunum weik tonun nebuk ning tonok ap, tonda yim domba basam mi tekbarye, aning ara keting tamun tonok kipmalye ning, boyamunce, arepnamlume.

²⁸ Tonda, tonok sapi basam ap, gandum tepung nakub barye (6) liter ap, minyak zaitun ap, tabakuka kintinip deipmakce ninguk, boyanuka arepnamlume. Tonda, yim domba basam tonok ati, el tabakana ara, gandum tepung dumbarye liter kintinibikirye, ayim domba basam ap arepnamake.

²⁹ Tonda, domba basam mi arelamikce talak ara, gandum tepung, el ikin ara, bitinye liter kintinip deipnamake. Domba basam mi tonok ap, tepung bitinye liter ap, el minyak zaitun ap, tabakuka kintinipmunce, aning boyanuka arepnamlume. Allah ati boyanuka arelyanganamak din ara, atonunuk boyakirye, tabakuka arenamnyake.

³⁰ Tonda, yim kambing basam tonok kintinipnamlume. Aning ara, anggun malye un ning kilibuka lyena ati, ayim kambing basam tonok bobuka, Allah ati arenamlume. Akambing basam opmunyopura, anggun malye un ning ati, punupnamsile. Winipmunya deice arye, anggun malye un ning ati, Allah arye anggunti, kum obuka sirya daknamsile. Namin kibuka lyepsilirye, tamubuka tonap teleb kipdeipnamsile.

³¹ Ura, arup akunum laka nyapmanu aren ning ap, pia arepmunce, Allah arye, ‘Aning ara arenamnulume,’ nyapdeibuk touk, aning batakalongona ati, uku sekikirye, uku dongonamnyake. Tonda, atalak aryuk, gandum tepung pia teleb ning ap, anggur mek teleb ning ap, Allah arye, ‘Aning ara arenamnulume,’ nyapdeibuk touk, aning kintinibuka, Allah ati arepnamlume. Akam ning yuk-yuk ning nirya ara, bol malye bona kum, pia bol teleb ninguk wibuka, boyanuka arepnamlume.” Aning nirya ara, Allah arye nyabuk.