Bilangan 27 - Eipomek

Zelafehat birye deiamuk kilapu ati, nyabuk yupu

¹ Zelafehat el kilmapu nirya ara, pamubarye deiamuk. Akilmapu sik si ara ani. Mahla ap, Noa ap, Hokla ap, Milka ap, tonda Tirza ap deiamuk. Zelafehat el li bira, Hefer. Hefer el li si ara, Gilead ulamuk. Tonda, Gilead el li si ara Makhir. Makhir el li bira, Manasye ulamuk. Tonda, Manasye el li bira, Yusuf ulamuk.

² Zelafehat birye deiamuk kilapu pamubarye nirya ara, Musa ap, imam Eleasar ap, tonda Israel yala nang yuk-yuk ulamik touk, sik deiyok kibuka una ati, wipdeiamik nang ap, sik nirya bulubuka, Allah si erena ati, domik aik bublan dam wekmek sukumuk, akilapu babye asukumuk biyikce, Musa ap, Eleasar ap, sik dam tikikce nyabik.

³ “Nun ni koproba ara, kwaning babye, mek babye pia kum uamuk mutuku, kata sukum arye diamika deice arye, mapu ton kum deiamike. Ara, nun ni bira, Korah birye Allah Yahweh dam bulubukabukce, ‘Allah el yupu kum kekenamabe,’ nyabuka, malye yupu nyanmokba, yuk nang ap melipmeka deice arye, nun ni koproba ton kum melibuk. Adeice arye kum diamuke. Nun ni bira, el yuk malye un ning ulamuka deice arye diamuke. Tonda, nun ni koproba, mapu delina kumce, diamuke.

⁴ Bukni, nun ni bira, Israel yala nang, sik si sekelina ati buku noutam ara, kum si sekeiamsulume. Deiyok ara, mapu ton kum deiamuka ati wamsulum do? Yata ning deiyok ati, nun ni koproba si, kum upnamsil do? Ati, nun ni koproba el yala nang, nun tam nang, sikti, tuku bokoliminye touk, nun babye ton bokeipnusilyame,” nyabuka, binuka morobik.

⁵ Nyabuka binuka morobikopura, anyapmek ning nirya ara, Musa kekebukce, Allah Yahweh ati, “Yata winiptinye do?” nyabuka asipdeyuk.

⁶ Nyabuka asipdeyukopura, Allah Yahweh arye tamubuka Musa biti nyabuk.

⁷ “Zelafehat el kilmapu arye, an dam yanuka nyapmakeak yupu ara, dipkoprob yupu nyapmakeaka anya arye, ance anyapmakeak touk winipnamlume. Ara, sik kayapu nang ton aupmatu touk, anang ati, aweknamamunye mutuku tuku bokuka, arepminye talak aryuk, sik ni koproba Zelafelet taleamuk tuku ara, akilapu sik makal nang pununa ati, atuku ton bokuka, arepnulyame.

⁸ Winipminyopura, sik Israel nang nirya ati, nyapnulyame. Winipmanto ara, sik Israel nang ara, sik mapu ton kum deiamlumce, kilmapu uk deiamunyak arye dipmunyopura, anggun ni yapu arye talilamik ning ara, sik kilmapu ati, el tuku bokuka arenamlume. Allah arye nyapdeipmasile,’ nyabuka, sik kekenak binuka, lak nyapnulyame,” nyabuk.

⁹ “Tonda, mapu babye, kilmapu babye, kum deiamikcak arye diplinye bira, anggun ni taleamuk tuku ara, anye el makal nang ap, el du yapu ap ati, arepnamlyame. Ara, adipmalinye, el li birye deiamuk nang ati arepmunyaba, anang arye dolonamake.

¹⁰ Tonda, el kwit koproba babye, kumnye bira, sik ni yapu arepnamlume. Akumopura, el li yapu kan-kan, tonye biti areprumunyeba, dolonamlule.

¹¹ Tonda aning atouk, winipmanto, mapu babye, kilmapu babye kum deiamlinye diplyopura, el kwit koproba uk atuku ara dolonamlule. Tonda, el kwit koproba babye kumce diplyopura, sik ni koproba kan-kan, tonye binyuk dolonamlule. Ababye kumopura, sik kayapu nang koproba uk dolonamnyake. Ara, ‘Anye bira, dipkoprob nun yalanye, nun damnye ani,’ tenebikinye birye, doproptue. Aning nirya ara, Allah Yahweh arye sik Israel nang ati, Aninguk talibuka upnin banamakʼ tenen, Musa dam nyapdeibukba, sik dam binuka lak nyabuka ati, aning ara, pia kum batakanamlume. Anggun Israel nang arye, aninguk pia talibuka unamlume.” Allah Yahweh arye Musa biti nyabuk.

Allah arye Musa el pununa ati, Yosua wipdeibuk yupu

¹² Allah el si Yahweh arye Musa biti nyabuk. “Anda Abarim mutuku deice welebimince, Israel ninye arepnamne mutuku otam dipdenulyame,” nyabuk.

¹³ “Akunum eipminyopura, an du Harun dibuk touk, an babye dipnamlame. Dipminyopura, an apu yapu dibikba weiamik touk, an babye dipminyeba weipnamkiyake.

¹⁴ Deiyok ara, urdem ati kume. Israel ninye ara, mek pia kum mutuku, Sin mutuku ap, Kades mutuku ap ulamik talak ara, malye kibuka kekena kumce, malye yupu nyalamikba, Musa an ap, Harun ap, anggun bitinye malye kipdongamnurume. Ara, narye, ‘Yupu nyaprumunba, akeil noutamak arye, mek kutukuka banamle,’ nyapsise bukni, anggunce na yupu yaniprumce, Musa an kama dobuka, akeil deice opluma ati nyapkine. Winipruma deice arye, sik Israel ninye eibikce, ‘Allah elda pia mikip weik ulirye, diksukum pia telebnye uk ulule’ tenen, kum biknike. An ap, Harun ap malye winipruma deice arye, Israel ninye dinmeka dam arye, na si kum erepnurume. Na nyapmakin mutuku ara, Meriba mutuku bukni, mek kum mutuku noutamak Sin mutuku ati nyapne.” Allah arye, Musa biti nyabuk.

¹⁵ Allah arye nyabukopura, Musa birye Allah el si Yahweh ati morobuk.

¹⁶ Morobukce ayupu nyabuk. “Na ni Allah, anda Yahweh unmalame. Ancuk, ‘Ninye kam unamak’ tenen, kam una deiyok ning dobuka, ninye dib kanye kam un ning arepsulumba, adeice ninye im sirya, mutuku sirya nirya kam unyake. Anda kam una deiyok ning dobuka ninye nirya arelyamnye, ninye talima noutamak babye, elilyamnye birye, ‘Israel ninye talibuka, sik ninye deiyoknye kiplirye banamlanye wibuka deipnalam’ tenen, moropkine na nio.

¹⁷ Ati ance wibuka deipminba, anye birye minopce menekuka balibuk, sik Israel ninye eibikirye, el bilye bisikuk aminyan binamake. Aning atonun, el tamubuka yangaliba, sik eibikirye el amu tam kibuka tamubuka yanamake. Ara, el balye tam ara, sik nirya melibuka abisikuk dobolbanamake. Winipra banamlanye ‘Wipdeipnusilam’ tenen, moropkine na nio. Atonye kum wibuka deipminba, aninye ara, ance batakminba, domba basam wein nang kum ati, sik domba talye urdemuk unyakce, ‘Dan binuyab do?’ tenen, talye-talye ayanapna, obinapna winilamak touk, Israel ninye babye wininamake.” Musa birye Allah ati, nyabuka morobuk.

¹⁸ Nyabuka morobukba, Allah el si Yahweh arye Musa biti nyabuk. “Ance ninye si, Nun el mi Yosua yukupminyeba yanule. Yosua bira, na Dib Kanye akunum arepsiba, el talima noutam wekuka langdibukak ulule. El ti wibuka wipdeipnulama ati, an taruk el kisok deice deipmince wipnulyame,” Allah arye nyabuk.

¹⁹ “Na Allah el si eren aik noutamak pil dona deiyoknye Eliazar, ance el dam bilyame. Ara, Yosua bobuka, Eliazar dam tikeipnalame. Eliazar ap, Israel ninye ap, nirya wekuka dinmacak arye Yosua binuka bobuka sik dam deipmince, ‘Yosua bira na Musa pununa ati, wipdeipne. Winipniba, elce anggun Israel ninye nirya bobuka binamsila ati, weipdeipsene,’ nyabuka laka nyapnamalyame. Winipmince, an taruk Yosua el kisok deice deipnamlyame. Winipnalam talak ara, sik Israel ninye nirya eipnamake,” nyabuk.

²⁰ “Nyabuka laka nyapminyopura, ‘Israel ninye nirya arye, el nyalul yupu kekebikirye, namin asa arye el amu tam dobolbanamak’ tenen, ance, na arepkise mikip dobuka, el deice deipnalyame.”

²¹ “Wini talak arye deiyok koubuka doryanamle talak nirya ara, Yosua adiparyuk na si eren aik pum tam pil dona deiyoknye, Eliazar dam binuka tikinamle. Wininamla deiyok ara, ani. Ara Imam Eliazar birye, Yosua winipnamle ning laka nyapnamla atia. Eliazar birye, Yosua aminyan winipnamle ning kel kina ati, na arepsise ning el si ara Urim ap, Tumim ap dobuka, na dam yalirye, aning bitinye dipdelirye biklyopura, Yosua biti laka nyanamle. Lak nyaplyeura, Yosua kekeplirye, Israel ninye ati laka nyapliba kekebikirye, dobolbanamake. Ara Yosua birye, ‘Binuyabe,’ nyaplyopura, banamak. Elce, ‘Aunuyabe, tonda tamubuka binamabe,’ nyaplyopura, aninguk kekebuka unamake. Ara, na Allah dam ululba, narye nyapnye ning kekeplirye, Israel ninye ati, ‘Allah arye nyalinilye yupu ani,’ nyapliba kekebikirye, bobuka binuka yanuka kinamle. ‘Winipnamle’ tenen, Yosua wibuka deiplyame,” Allah arye Musa biti nyabuk.

²² Aning ati ara, Musa birye, Allah el si Yahweh arye nyabuk touk, Yosua dobuka imamnye Eliazar ap, Israel ninye ap nirya, dinmekak uk boyayikce, Allah nyabuk touk winibuk.

²³ Ati Allah el si Yahweh arye, “Winipnulyame,” nyabuk touk, Musa birye el taruk erebuka, Yosua el kisok deice talibukce, “Yosua bira, na pununanye ulula ati, anggun Israel ninye bobuka banamsile,” nyabukba, sik nirya kekebuka bikik.