Bilangan 26 - Eipomek

‘Israel nang yupa ara, yata barye unyak do?’ tenen, like bitinye talak ati, ninye si sekik yupu

¹ Mambul weik uk, dilamuka ani, sik dam akunum lobukopura, ninye weika arye diamika ati, Allah Yahweh arye Musa ap, imam Harun el mi Eleasar ap ati, ayupu nyabuk.

² Wini talak ara, anggunce Israel nang yala yuk-yuk aunyak touk, ‘Sik yupa ara, yata barye unyak do?’ tenen, nukmunce, sik si seknamlume. Asi seknumunye nang ara, anang sik kilapu ara, kum nuknamlum bukni, saluk sik keting tamun ara, dua puluh (20) tahun eitam nanguk, nukmunce, sik si seknamlume. Aning ara, yin talin nang kina ati, Israel nang sik kan-kan arye wibuka, si seknamlume. Sik yala ap, sik si ap, nirya sekenamlume,” nyabuk.

³ Nyabukura, Musa ap, Eleasar ap, sikce Allah nyamuk touk winiprik. Ara, sik Israel nang nirya, Moab mutuku tam, weik lu uamuk mutuku unmek talak ara, anang nirya nukikce, sik si sekuka deibik. Ara, Yordan mek koubuka, otam Yeriko mutuku bukni, Moab mutuku luak bulubuka unmikak, Musa ap, Eleasar ap, sikce nyaprik.

⁴ “Abulubuka wekmek nang ara, Israel nang Mesir mutuku arye yanmek nang ati, nuknamlume. Allah Yahweh arye nyapdeipsuk touk, sikce umur dua puluh (20) tahun arye eitam nang bukni, sal diamuk nirya bulubikiba, nukmunce, sik si seknamlume,” nyaprikba, anang nirya bulubikba nukik. Ati ara, sik apu koproba, Yakub birye deibukba, dadeipdanin yangalamik nang nirya, Mesir mutuku noutam arye yangalamik nang bukni, kam tuba unmek nang ati nukik.

⁵ Ruben bira, Yakub el mi dunye deiamuk, Ruben birye deibuk nang ara, ani. Ara, Henok elce deibukba, dadeipdanin biyik nang ton, sik Henok yala nang ulamik ati nukik. Tonda, Palu birye deibukba, dadeipdanin balamikce, sik Palu yala nang ton ulamik ati nukik.

⁶ Tonda, Hesron yalanye birye deibukba, dadeipdanin biyik nang ton, el yala nang ulamik touk nukik. Tonda, Karmi birye deibukba, dadeipdanin balamikce, ulamik ati, sik Karmi yala nang ulamik touk nukik.

⁷ Anang arye deibikura, deipdanin balamik nang ara, sik nirya, Ruben yala nanguk ulamik. Anoutam arye, saluk wibuka nukik ning, sik yupa ara, 43.730 kibuk.

⁸ Winibuka nukik bukni, Palu birye deiamuknye, el si Eliab ton ulamuk.

⁹ Eliab el mapu ara, Nemuel ap, Datan ap, Abiram ap, ulamik. Anang ara, Datan ap, Abiram ap ara, Israel nang arye abitinye nang ara, ‘Nun deiyok nang unamsirakʼ tenen, wipdeibik bukni, sik anang ara, aning batakuka, Kora el tam kipdikce, Musa ap, Harun ap, sik nyapdik yupu kum kekepdika deice arye, Allah Yahweh elce nyabuk yupu ati, malye kipdikce, yanipdik.

¹⁰ Winipdika ati, Allah arye yu weik ubuk ati, el mikip ara, tuku deice deibukba, talye karin arye, tuku cobuka likukopura, sik anang bitinye ap, Kora el tam nang ap nirya ara, tuku pum tam wekdobikba, tuku siknipdongobuka deice arye, sik nirya dibik. Ton yuk nang ara, atam aryuk, ninye yupa ara, 250 nang ton, Allah arye, ‘Anang wenebuka opnune,’ tenebukce, uku dopkwetebukba, uku arye anang nirya dibuka, sirya dakuk. Awinibuk ning ara, sik Israel nang ton, ‘Aning ebikca deice arye, aning tuba tenenamakʼ tenen, anang obuka deice arye, Allah el mikip ning lake kibuk.

¹¹ Aning nirya winibuk bukni, Kora elce deiamuk mapu nirya ara, kum dibik.

¹² Simeon yalanye birye deiamuk nang ara, ani. Nemuel birye deibukba, dadeipdanin balamik nang, sik Nemuel yala nang ton ulamik. Tonda, Yamin birye deibukba, deipdanin balamik nang, sik Yamin yala nang ton ulamik. Tonda, Yakin birye deibukba, deipdanin balamik nang, sik Yakin yala nang ton ulamik.

¹³ Tonye bira, Zera yalanye birye deibukba, dadeipdanin balamik nang, sik Zera yala nang ton ulamik. Tonda, Shaul birye deibukba, deipdanin balamik nang, sik Shaul yala nang ton ulamik.

¹⁴ Simeon yala nang arye deibikura, dadeipdanin yangalamik nang, anoutam arye, sal dem wibuka nukikba, sik yupa ara, 22.200 nang kibuk.

¹⁵ Tonda, Gad yalanye birye deibukba, dadeipdanin balamik nang, sik Gad yala nang ton ulamik. Tonda, Sefon birye deibukba, deipdanin balamik nang, sik Sefon yala nang ton ulamik. Tonda, Syuni birye deibukba, dadeipdanin balamik nang ara, sik Syuni yala nang ton ulamik.

¹⁶ Tonda, Areli yalanye birye deibukba, dadeipdanin balamik nang, sik Areli yala nang ton ulamik. Tonda, Arod birye deibukba, deipdanin balamik nang, sik Arod yala nang ton ulamik.

¹⁷ Tonda, Osni yalanye birye deibukba, dadeipdanin balamik nang, sik Osni yala nang ton ulamik. Tonda Arod birye deibukba, deipdanin balamik nang, sik Arod yala nang ton ulamik.

¹⁸ Sik Gad yala nang arye deiamikba, dadeipdanin yangalamik nang, anoutam arye saluk wibuka nukikba, sik yupa ara, 40.500 nang kibuk.

¹⁹ Tonda, Yehuda yalanye birye deibuk nang ara, Her ap, Onan ap ulamik. Bukni, Yehuda, el mapu bitinye nang ara, Her ap, Onan ap ara, Kanaan mutuku noutam aryuk diamdik.

^20-21 Sik Yehuda yala nang arye deiamikba, dadeipdanin yangalamik nang, anoutam arye Syela ap, Peres ap, Zera ap, Hesron ap, Hamul ap ulamik. Sik nirya ara, yuk-yuk bukni, mapu deibikura, dadeipdanin balamikce, sik si ara, sik aulamik touk, sik yala nang babye daulamik. Ara, Syela yala nang ap, Peres yala nang ap, Zera yala nang ap, Hesron yala nang ap, Hamul yala nang ap daulamik.

²² Yehuda yala nang arye deiamikba, dadeipdanin yangalamik nang daulamikba, sal diamuk wibuka nukikba, sik yupa ara, 76.500 nang kibuk.

²³ Isakar yalanye birye deibuk nang ara, ani. Tola birye deibukba, dadeipdanin balamik nang, sik Tola yala nang ton ulamik. Tonda, Pua birye deibukba, dadeipdanin balamik nang, sik Pua yala nang ton ulamik.

²⁴ Tonda, Yasub birye deibukba, dadeipdanin balamik nang, sik Yasub yala nang ton ulamik. Tonda, Simron birye deibukba, dadeipdanin balamik nang, sik Simron yala nang ton ulamik.

²⁵ Sik Isakar yala nang arye deiamikba, dadeipdanin yangalamik nang, anoutam arye sal diamuk wibuka nukikba yupa ara, 64.300 nang kibuk.

²⁶ Tonda, Zebulon yalanye birye deibuk nang ara, ani. Seret birye deibukba, dadeipdanin balamik nang, sik Seret yala nang ton ulamik. Tonda, Elon birye deibukba, dadeipdanin balamik nang, sik Elon yala nang ton ulamik. Tonda, Yaleel birye deibukba, dadeipdanin balamik nang, sik Yaleel yala nang ton ulamik.

²⁷ Sik Zebulon yala nang arye deiamikba, dadeipdanin yangalamik nang, anoutam arye sal diamuk wibuka, nukika yupa ara, 60.500 nang kibuk.

²⁸ Yusuf yalanye birye deiamuk nang bitinye, sik si ara, ani. Manasye ap, Efraim ap deibuk.

²⁹ Sik Manasye yala nang arye deiamikba, dadeipdanin yangalamik nang ara, ani. Manasye yalanye birye deiamuknye bira, Makhir. Makhir birye deibukba, dadeipdanin balamik nang, sik Makhir yala nang ton ulamik. Tonda, Makir birye deiamuknye bira, Gilead. Gilead birye deibukba, dadeipdanin balamik nang, sik Gilead yala nang ton ulamik.

³⁰ Tonda, Gilead birye deibukba, dadeipdanin balamik nang ara ani. Iezer birye, deibukba, dadeipdanin balamik nang ara, sik Iezer yala nang ton ulamik. Atouk Helek birye, deibukba, dadeipdanin balamik nang ara, sik Helek yala nang ton ulamik.

³¹ Tonda, Asriel birye deibukba, dadeipdanin balamik nang, sik Asriel yala nang ton ulamik. Atouk, Sekhem birye deibukba, dadeipdanin balamik ara, sik Sekhem yala nang ton ulamik.

³² Tonda, Semi birye deibukba, dadeipdanin balamik nang ara, sik Semi yala nang ton ulamik. Anye atouk, Efer birye deibukba, dadeipdanin balamik nang ara, sik Efer yala nang ton ulamik.

³³ Efer el mi ara Zelafehad deiamuk. Bukni, Zelafehad elda, mapu ton kum deiamuk. Elda, kilmapu uk deiamuk. Sik si ara ani, Mala ap, Noa ap, Hogla ap, Milka ap, tonda Tirza ap deiamuk.

³⁴ Sik Manasye yala nang arye deiamikba, deipdanin yangalamik nang, anoutam arye saluk wibuka, nukika yupa ara, 52.700 nang kibuk.

³⁵ Efraim yalanye birye deibukba, dadeipdanin yangalamik nang ara ani. Sutelah birye deibukba, dadeipdanin balamik nang ara, sik Sutelah yala nang ton ulamik. Atouk, Bekher birye deibukba, dadeipdanin balamik nang ara, sik Bekher yala nang ton ulamik. Atouk, Tahan birye deibukba, dadeipdanin balamik nang ara, sik Tahan yala nang ton ulamik.

³⁶ Sutelah birye deiamuknye bira, Eran ulamuk. Eran birye deibukba, dadeipdanin balamik nang ara, sik Eran yala nang ton ulamik. Sik apu bira, Sutelah ulamuk.

³⁷ Ati ara, Efraim birye deibukba, dadeipdanin, yangalamik nang, sik si akunum sekamuk. Sik sal diamuk si sekamika yupa ara, 32.500 nang ulamik. Si sekamuk nang nirya ara, sik apu koproba, Yusuf ulamuk.

³⁸ Ura, Benyamin yalanye birye deibukba, dadeipdanin yangalamik nang sik si ara ani. Bela birye deibukba, dadeipdanin balamik nang ara, sik Bela yala nang ton ulamik. Atouk, Ahiram birye deibukba, dadeipdanin balamik nang ara, sik Ahiram yala nang ton ulamik.

³⁹ Tonda, Sefufam birye deibukba, dadeipdanin balamik nang ara, sik Sefufam yala nang ton ulamik. Atonun, Hufam birye deibukba, dadeipdanin balamik nang, sik Hufam yala nang ton ulamik.

⁴⁰ Tonda, Bela birye deibuk mapu bitinye ara, Ared ap, Naaman ap ulamdik. Ati, Ared birye deibukba, dadeipdanin balamik nang ara, sik Ared yala nang ton ulamik. Atouk, Naaman birye deibukba, dadeipdanin balamik nang ara, sik Naaman yala nang ton ulamik.

⁴¹ Ati ara, Benyamin birye deibukba, dadeipdanin, yangalamik nang ara, sik si akunum sekamuk. Sik sal diamuk si sekamika yupa ara, 45.600 nang ulamik. Asukumuk sekamuk nang nirya ara, sik apu bira, Benyamin ulamuk.

⁴² Tonda, Dan birye deiamuknye bira, tonok dem deiamuk. Anye el si ara Suham. Suham birye deibukba, dadeipdanin balamik nang ara, sik Suham yala nang ton ulamik.

⁴³ Ati ara, Dan birye deibukba, dadeipdanin, yangalamik nang ara, sik si akunum sekamuk. Sik saluk si sekamika yupa ara, 64.400 nang ulamik. Asukumuk sekamuk nang nirya ara, sik apu bira, Dan ulamuk.

⁴⁴ Asyer yalanye birye deibuk nang ara ani. Ara, Yimna birye deibukba, dadeipdanin balamik nang ara, sik Yimna yala nang ton ulamik. Atouk, Yiswi birye deibukba, dadeipdanin balamik nang ara, sik Yiswi yala nang ton ulamik. Atouk, Beria birye deibukba, dadeipdanin balamik nang ara, sik Beria yala nang ton ulamik.

⁴⁵ Beria birye deibukba, dadeipdanin yangalamik nang ara ani. Heber birye deibukba, dadeipdanin balamik nang ara, sik Heber yala nang ton ulamik. Atouk, Makiel birye deibukba, dadeipdanin balamik nang ara, sik Makiel yala nang ton ulamik.

⁴⁶ Asyer bira, kilmu ton deiamuk. El si ara, Sera ulamuk.

⁴⁷ Asyer yala nang arye deibikba, dadeipdanin yangalamik nang, anoutam arye saluk wibuka nukikba, yupa ara, 53.400 nang kibuk.

⁴⁸ Naftali yalanye birye deibukba, dadeipdanin yangalamik nang ara ani. Yazeel birye deibukba, dadeipdanin balamik nang ara, sik Yazeel yala nang ton ulamik. Atouk, Guni birye deibukba, dadeipdanin balamik nang ara, sik Guni yala nang ton ulamik.

⁴⁹ Tonda, Yezer birye deibukba, dadeipdanin balamik nang ara, sik Yezer yala nang ton ulamik. Atouk, Syilem birye deibukba, dadeipdanin balamik nang ara, sik Syilem yala nang ton ulamik.

⁵⁰ Naftali yala nang arye deibikba, dadeipdanin yangalamik nang, anoutam arye, sal diamuk wibuka nukikba, yupa ara, 45.400 nang kibuk.

⁵¹ Israel yala nang nirya noutam arye, sal diamuk wibuka nukika ara, sik yupa nirya ara, 601.730 nang kibuk.

⁵² Winibuka ati ara, Allah Yahweh arye, Musa ati nyabuk.

⁵³ “Israel yala nang, sik yala yuk-yuk bukni, aunyaka atouk dipdemince, sik yala si aulamikce touk, amutuku tuku bokuka arepnamlyame.

⁵⁴ Ara, sik yupa weik ulamik yala nang ara, amutuku tuku weika arye bokuka arepnulyame. Tonda, sik yala mitik tonun ulamikce nang ara, amutuku tuku mitik tonun bokuka arepnulyame. Ayala yuk-yuk aulamikce touk, tuku bokuka arepnalyame.

⁵⁵ Aning sik aunyak touk, bokuka arepminyopura, ‘Dan yala nang min wipnuyap do?’ tenen, bikilin ning, el si undi arye dobikirye, el aning arye, ninye si upmalye touk, tukwak sakliba minop lake kiplye yala nang, siuk dopropnamniyake. Sik yala si minop bolpipnamle yala nang si ara, minop tuku dopropnamake. Si aminyan upnamle yala nang ara, aminyan talak arye tuku dopropnamake. Sik apu yapu nang si aulye touk, tuku yuk-yuk bobuka dopropnamake.

⁵⁶ ‘Min yuma tuku dopropnamaka yala nang ara ani, aminyan dopropnamaka yala nang ani,’ tenena ati, bikilin ning, el si undi dopnamlum bukni, ninye weik ulamikce yala nang ara, tuku weik tam bokuka arepnalyame. Bukni, ninye weik kum ulamikirye, ninye mitik anunuk unyak yala nang ara, tuku mitik tamuk bokuka arepnalyame. Sik apu yapu nang si aulye touk, bokuka arepnalame.

⁵⁷ Tonda, Lewi yalanye birye deibukba, dadeipdanin yangalamik nang, sik si ara, ani. Ara, Gerson birye deibukba, dadeipdanin balamik nang ara, sik Gerson yala nang ton ulamik. Atouk, Kehat birye deibukba, dadeipdanin balamik nang ara, sik Kehat yala nang ton ulamik. Atouk, Merari birye deibukba, dadeipdanin balamik nang ara, sik Merari yala nang ton ulamik.

⁵⁸ Sik Lewi yala nang arye deibikba, dadeipdanin balamik nang ara, Libni yala nang ton deiamik. Tonda, Hebron yala nang ton ulamik. Ton nang ara, Mahli yala nang ton deiamik. Tonda, Musi yala nang ton deiamik. Tonda, Korah yala nang ton deiamik. Ura, Kehat bira, Amram el li koproba ulamuk.

⁵⁹ Amram bira, Lewi el kilmu Yokhebed domuk. Yokhebed bira, Mesir mutuku ulamik talak ara, Lewi birye akilmu deibukura, daulamuka ani, Amram birye domuk. Sik bitinye neika ulamdika ani, Yokhebed bira, el mapu Harun ap, Musa ap, tonda sik makal kil tonok, el si ara, Miryam ap deiamdik.

⁶⁰ Aminyan talak ara, Harun birye sal mapu dumbarye deiamuk. Anang sik si ara ani. Adab ap, Abihu ap, Eleasar ap, tonda Itamar ap, deiamuk.

⁶¹ Winyamuk bukni, Harun el mapu bitinye Nadab ap, Abihu ap ara, malye weik updikba, Allah arye anang bitinye oplobuk. Ara, Allah Yahweh arye, “Siltong teleb ning uku dongon pil ara, dipkoprob winibuka donamlume,” nyapdeiamuk ning atouk ubuka, kum dopdikce, sik kanye aryuk tenebuka, uku sekuka, Allah ati arepdika deice arye, Allah Yahweh ara, sikti, yu ubukce, anang obukba, diamdik.

⁶² Ura, sik Lewi yala nang ara, saluk wibuka si sekik nang ara, sik umur wala tonok eitam nanguk si sekik. Asi sekik nang, sik yupa ara, 23.000 nang kibuk. Sik aLewi yala nang ara, amutuku tuku ton kum doprobik. Sik kayapu nang, yuk Israel nang, yala yuk-yuk aulamik touk doprobik bukni, Lewi yala nang ap, neika tabakuka kum si sekik bukni, sik yuk kintinibuka sekik. Deiyok ara, sik Lewi yala nang ara, sik wa tuku talibuka un ning ton kum doprobike.

⁶³ Adeice tam sekamuk nang, sik yala nang si ara, Musa ap, imam Eleasar ap, sik bitinye arye, ninye yala yuk-yuk aulamik touk nukuka, ninye si ap, yala si ap sekamdike. Ara Allah arye, “Winibuka nukunamlulume,” nyabuk touk winipdik. Israel nang arye deibikba, dadeipdanin yangalamik nang, sik si sekdik talak, ara Yordan mek koubuka, otam binmek talak, Yeriko tam bukni, Moab mutuku luak arye sekdik.

⁶⁴ Tonda, min talak arye, Musa ap, Harun ap, sik Sinai mutuku dam buta mutuku arye si sekamrik nang ara, tonoknye babye, tuba kam ton unmekak, kum eipdike. Anang nirya, ara Sinai mutuku dam buta mutuku tuba unmek talak arye sekdik. Anang nirya ara, akunum diamikce, sirya dakamik. Tonok babye ton, kam kum ulamik.

⁶⁵ Aning deiyok ara ani. Ara, Allah Yahweh arye, sik anang nirya ati, akunum nyapdeiamuk. Ara, “Sik malye weik ulamika ati, sik atalak kam unyak nang nirya ara, Sinai mutuku buta mutuku, sukum aryuk dipnamake. Otam Kanaan tam pia kum weknamake,” nyapdeiamuke. Anang nirya ara, akunum dibuka sirya dakik bukni, bitinye nanguk, tuba kam ulamdik. Ara, ninye si Yefune, el mi Kalep ap, tonda ninye si Nun, elce deibuk mi Yosua ap, sik bitinye diamuk ara, kum diamdik talakuk, “Kanaan tam weknamlume,” nyapdeiamuka ati, sik bitinye diamuk ara, Yordan mek koubuka, otam mutuku wekdik.