Bilangan 25 - Eipomek

Israel nang arye isa si, Bahal-Peor, el si erebik ati, sekik yupu

¹ Israel ninye, sik tia ati Sitim mutuku binuka unmek. Amutuku binuka unmek talak ara, Israel ninye arye, Moab mutuku kilapu, amutuku noutam ulamik kilapu ap, neika epdanuka malamik.

² Akilapu arye Israel ninye ati, “Anggunda, nun talibuka si erenyap isa, el si Bahal erena ati, kam ning obuka kwalibipyak arye, si erenyap touk, anggun babye, nun ap neika winipnuyabe,” nyabuka yukubik. Nyabuka yukubikopura, sik Israel nang babye, amutuku isa si erena ati, kwalina dibikce, Moab mutuku nang si erelamik isa siuk erelamik.

³ Israel nang arye amutuku isa si Bahal-Peor si erelamika deice arye, pia malye weik winibika ati, Allah Yahweh arye Israel nang ati, yu ubukba wabukce, Musa biti nyabuk.

⁴ Allah Yahweh arye Musa biti nyabuk yupu ara ani. “Israel nang bukni, amutuku isa si erelamikce nang nirya ara, bobukapmince, sik yuk Israel nang nirya dinmakce sukum aryuk opnulyame. Keting noutam arye opminyeba, Israel nang nirya arye eibikirye, biknamake. Ara, narye Israel nang nirya ati, talye lukparabuka obuka, sirya daktinye bukni, Bahal isa si erenyak ninye opminya deice arye, na yu upmanil ning ara, bataknamne,” nyabuka, Allah arye Musa ati nyabuk.

⁵ Allah arye Musa biti nyabukba, Musa birye Israel nang, sik malye winipmakce ati yupu lipsisikuka, bokolina deiyok nang ati nyabuk. “Teleb ning ara ani. Anggunce anggun yala nang noutam bukni, amutuku isa si, Bahal-Peor si erelamikce nang nirya ara, tomupnyakarye, adiparyuk obuka sirya daknamlume,” nyabuk.

⁶ Nyabuka ati, atalak ara, Musa ap, sik yuk Israel nang nirya ap, Allah Yahweh el ap, ninye ap eldana ati, tonda el si erena ap ati, tenda arye doltakan aik domik ning, anyaik bublan dam tikilyayikce, engebik. Aengemik talak ara, Israelnye tonok ton, ‘Aning ara mambul kume,’ tenebukce, amutuku kilapu tonok, ara Midian mutuku kilapu talibukce, Musa ap, Israel nang ap, malye kanye bobuka, engenmekakuk boyayuk. Ara, Allah el si erena ati, domik doltakan aik bublan dam boyayuk.

⁷ Atalak ara, imam Harun birye deimuk mi Eleasar, elce deiamuk mi ara, Penehas elce anye ap, aisa si eren kil ap eibuk. Eibukce, el yu weik ubukba, abulubuka wekmeka noutam aryuk batakuka biyuk. Biyukce, cang tace weik uamuk tombak yo binuka doprobuk.

⁸ Winibukopura, akil ap, anye ap, sik wekmarik tenda aik ati, eibuka bikukce, anyaik wekuk. Winibukce, akil ap, anye ap ati, lukuka obuk. Anang bitinye obuka deice arye, Allah arye, ‘Israel nang sik wenena ati, uk pia weik talin ning, sik deice deipnamanʼ tenen, kintinipmokce, Israel nang sik kan-kan deiyok koubuka, talinmok uk ara, adiparyuk pia kum dayuk.

⁹ Asum aryuk pia kanye imun weik uk kum dayuk bukni, atalak aryuk anang deice uk talibukba, ninye weik dibik nang ara, sik yupa ara, pia weik arye dibik. Ara, yupa weik 24,000 nang dibik.

¹⁰ Winibuka ati, Allah Yahweh arye Musa biti nyabuk.

¹¹ Yahweh arye Musa biti nyabukba, Musa birye Pineas biti nyabuk yupu ara ani. “Yahweh arye nyapkile. ‘Imam Harun birye deiamuknye, Eleasar birye deibuk mi, el si ara Pineas, elce na Allah si eren aik pum tam pil donanye bira, teleb winibuka deice arye, narye, ‘Israel nang weik arye oplopnamne,’ tenepse ning ara, wini talak batakne. Kum opnamane. Pineas anang bitinye opmaua deice arye, na yu tenepmanu ning ara, kum danmale. Tonda, adeice arye, ‘Israel nang nirya ati opnirye, kum kipdeipnun,’ tenepmanu ning ara batakmane. Tonda, narye, ‘Israel nang nirya ara, malye un ning pia kumce, na siuk pia erenamniyake,’ tenenye touk, el Pineas babye, aning atouk tenelule.

¹² Ati ara, an Musa arye Pineas biti, nyapnulyame. Narye elti, teleb yupu ton nyapnuna ara, “An ap, na ap, teleb kanye kibuka teleb ubuka neika unamnam ati, narye nyalin yupu deice arye nyapdeipnukine.”

¹³ “Tonda, ‘Pinehas ap, elce deiplyeba, dadeipdanin banamak nang ati ara, sik anang aryuk, imam pil don nang ara, moubuka talibikirye, pia ati pil dopnamake,’ nyapne. Aning deiyok ara, ani. El Pineas birye, na Allah ati, ‘Elda weik mambulnye ati, el siuk pia erenamabʼ tenen, anang bitinye obuka deice arye, teleb pil dobuka, teleb ulamukce, mikip arye pil dolamuka ati nyapne. Tonda, Israel nang ara, malye weik upmangubuk elce, ‘Allah arye, sik malye unyak ning ara, kum kipdeipnusilʼ tenen, pia teleb pil dobuk deice arye, anggunti teleb kipdeipmanue. Ati, el ap, na ap pia teleb kibuka neika unamname,” Allah arye nyabuk.

¹⁴ Ura, Israelnye el si ara, Simri birye, Midian mutuku kil dobukce, neika daulamdika ani, sirya talak ara, akil ap dobuka yangadikba, Israel nang dinmek kan-kan dam boyanmokba, Musa ap, sik Israel nang ap akil eibik. Ati, akil ap, Simri ap ati, Israelnye el si Pineas birye, sik bitinye obuk. Obuknye el si ara Simri. Ara, Salu birye deiamuknye. Salu bira, Simeon yala nang, sik weik deiyoknye kibuka taleamuk.

¹⁵ Tonda, Simri birye domuk kil, Midian mutuku kil ara, el si Kosbi ulamuk. Akil ara, Midian mutuku kil ulamuka ati, Allah el si eren aik dam yayukura, Pineas birye cang tace ning arye akil lukuka obukba, dibuk. Bukni, akil el si ara Kosbi. Kosbi bira, el li koproba, Zur ulamuk. Zur bira, Midian mutuku yala nang, sik ninye deiyoknye ulamuk.

¹⁶ Atalak aryuk, Allah el si Yahweh arye Musa biti, ayupu ton nyapdeibuk.

¹⁷ “Midian mutuku unyak nang nirya ati ara, ‘Sikda nun mal olan nang atouk unyake tenebuka unamlume. Tonda, obuka adiparyuk kum kipdeipnamlume. Midian yala nang nirya ara, obuka sirya daknamlume.

¹⁸ Aning winipnamluma deiyok ara, sik Moab yala nang arye, ‘Israel yala nang ara, nun mal olan nang atouk unyaka ati, sik deice, ikin ning deipnuyabe,’ tenebik. Tonda, ‘Sik Israel nang ati, malye ulina ati wininamabe,’ tenebik. Ara ‘Akil arebipyeba, sik Israel nang arye, Peor Bahal isa, el si ton erepnamake,’ tenebikce, Midian mutuku kil tonok, el si ara Kosbi, arebikopura, Simri birye akil dobuka, Allah el si eren aik dam boyanmoka deice arye, pia malye kipdeipsike. Akil Kosbi bira, Midian mutuku nang ati, sik ninye deiyok kiamuknye, el kilmu ulamuka atia. Tonda, anggun Israel nang arye, isa si Bahal-Peor el si erelamluma deice arye, uk dina weik ning arepsiseba, ninye weik arye diplume. Ati, akil ap, el dobuknye Simri ap opmalumba, dipmarake. Deiyok ara, ‘Adipmal kil isa si erelamuk touk, anggun Israel nang arye, isa si erepmunyakʼ tenen, Pineas birye akil oplobuke.