Bilangan 23 - Eipomek

Bileam birye Israel ninye ati, doryanamuk talak winipnamik ning ati nyabuka, nyalin yupu atonun yupu nyapdeibuk yupu

¹ Atalak ara, Bileam birye Balak biti nyabuk. “Wini talak amutuku noutamak ara, Allah el si erena ati, kam ning obuka, uku dongonak ati, pala keil lelebuka yangeipnululume. Ara, aning tekbarye arye, kintinibuka asukum deipnunilyame. Winipminyopura, yim sapi basam tekbarye ap, yim domba basam tekbarye ap, kintinideipnilyame.”

² Bileam birye nyabukopura, Balak birye, Bileam nyapdeipmok touk winibuk. Winibukba, sik bitinye arye, yim sapi tonok ap, yim domba tonok ap, obukapdikce dobuka, tonok-tonok arye, apala keil yangabuka, tekbarye deipmekakuk deice, yanuka deiprikce uku daprik.

³ Winiprikopura, Bileam birye, Balak biti nyabuk. “Anda aning uku dongona dam, anyuk pia tiknamalyame. Nara, tia talak ati, obinune. Ara, talye ati kume. ‘Allah el si Yahweh arye, na dam yalyeura, eipnaman do, kum do?’ tenen, winipnune. Winipmanto Allah ap eipdanimnyopura, elce nyapnamnil yupu nirya kekepnirye, laka nyalyanamkine,” nyabuk. Nyabukce, Bileam adiparyuk, el nyapmok mutuku dup welebanmoka ani, yuk nang ton kum unmekak, amutuku dup welebuk.

⁴ Winibukopura, Allah adiparyuk, el dam yayukba, Bileam ap, sik bitinye epdarik. Epdarikopura, Bileam birye Allah ati nyabuk. “Narye nyapmanba, tekbarye yuk-yuk yangabuka, deipmakce kintinibikba, tekbarye keil pala deice arye, narye yim sapi tonok ap, yim domba tonok ap, aning deice tonok-tonok deipmane bukni, yuk-yuk deipmanue,” nyabuk.

⁵ Nyabukura, Allah el si Yahweh arye, Bileam el talima pum tam tenebuka nyabuk yupu ati, laka nyapdeibuk. Ayupu nyabuk. “Anyarepmakin yupu ara, Balak dam binuka nyapnulyame,” nyabukba, Bileam birye, Allah nyapmok yupu Balak biti, laka nyalbiyuk.

⁶ Bileam tamubuka yayukce, yanuka dinmokbuk, Balak bira Allah el arena ati, kam ning obuka, delinak dam tikmok. Tonda el ap, Moab mutuku ninye deiyok nang ap, aning dam tikmekba, Bileam birye eibuk.

⁷ Atalak ara, Allah arye, Bileam biti arepmok yupu, dotam upre binamuk yupu ati, nyabuk. Elce nyabuk yupu ara, ani. “Keting yangan tam, Aram mutuku timur tam oulamsebuk, Moab mutuku ninye taleamuknye, ninye deiyoknye, Balak birye nyapnukba yase. Yasopura, Balak birye nati nyapnuk. ‘An yamince, Yakub birye deibukba, dadeipdanin yangalamika ani, wini talak unyak Israel ninye nirya ati, malye ulina yupu nyapminba, sik deice supnamalame,’ nyapnuke.

⁸ Nyapnuk bukni, Allah arye, sik aninye ati, ton malye yupu nyabuka, sik deice deibukce kum subuka ati, na talinye birye, yata wiribuka malye yupu nyaptinya deice arye suptinye do? Aning atonun, Allah el si Yahweh arye, ‘Aninye malye ning uka,’ nyabuka, malye yupu nyabuka, kum suplye ninye ati, na talinye binya arye, ‘Yata wiribuka malye yupu nyaptinirye suptinye do? Kume, aning kum winiptinye,’ nyabuk.

⁹ Israel ninye ara, na amutuku dup binuka welebuka weik keil deice tikna arye dinmanabuk, sik Israel ninye ounmakbuk eipne. Narye eipman ning ara, sik Israel ninye ara, sik yuk unyake. Yuk mutuku ninye ap ansinibuka neika kum unyake. Israel ninye sik kanye ara, ‘Nunda pia yuk ninye unyaba anya arye, im sirya, mutuku sirya nirya talye unyak ninye atonun kum unyabe,’ tenenyaka ati, sik yuk unyake. Aning nirya eipmane.

¹⁰ Yakub birye deiamukba dadeipdanin, deipkirik danin yanganyak ninye, sikda kum nukmanto, pia weik unyake. Winipmanto ara, tuku bisik bakibuk, uku sice butbuta welelamla atonun kibuka yanganyake. Ati, yatanye birye, aninye nirya nukturye, laka nyaptu do? Kume, sik ninye yupa ara, pia kum nukmanto atia. Aning atonun, asukum atikmance, sik Israel ninye nirya, kum eiptinye. Sik cang kambing bol doltakna aik deipmekak, noutamak bokuka dumbarye deipmekbuk, amutuku deice arye, tonok ninguk eiptinye. Israel ninye, sik yupa ara, kum nukmanto unyaka ati, sik dipkoprob mambul weik. Allah arye sikti, weika arye meliamuka ati, ‘Sik diksukum unyak touk, na babye uptinye’ tenen, patapnile. Sik diksukum unyak touk, unmanya ani, aminyan talak, ‘Sik dipnamak touk, na babye atonun diptinye’ tenen, se, tenenune. Sikda, pia teleb ninye unyaka ati, na kanye ara, ‘Sik unyak touk, na babye uptinye,’ nyapmana ati, aninye ati ara, yata malye yupu nyaptinya kume.” Bileam birye nyabuk.

¹¹ Nyabukopura, Balak kekebukce, tamubuka Bileam biti nyabuk. “Se, anda yata ikin ning, na nong deice akunum deipmanilam do? Narye winipkise deiyok ara, ani. Ara, ‘Bileam ara, na olan ninye malye ulina yupu nyaptuba, Israel ninye ati supturye, malye kipdeipnamle. Winiplyopopura, ikin weik unamak’ tenen, boyanmakine. Utenena ati, boyanmakin bukni, yata deiyok ati, sik aninye deice, malye yupu nyabuka, kum supmalam do? Aning kum winipmalame. Ance na olan ninye ati, ‘Pia teleb-teleb unamak’ tenen, teleb yupu sikti, nyapmalama anya arye, telebuk unamake. Se, anda yata ati, aning winipmalam do?” nyabuka, Balak birye, Bileam biti wenebuk.

¹² Nyabuka wenebukba, Bileam birye tamubuka nyabuk. “Kume, narye nyapman yupu nirya ara, na ni Allah, el si Yahweh arye, na sitang talipnukce, nyapnuk ninguk nyanmakine. Narye yuk yupu pia kum nyaptinye,” nyabuk.

Bileam birye, like bitinye talak deice, Israel ninye ati aminyan doupnamle talak unamik ning ati, laka nyabuk yupu

¹³ Nyabukura, aminyan talak ara, Balak birye, Bileam biti nyabuk. “Wini talak ara, an ap, na ap yukak binuname. Abinunamak arye, Israel ninye yupa ton, binuka eipnamalame. Sik yupa ara, pia weik ati, sik nirya kum eipnamalam bukni, ton yupa ara, eipnulame. Ati, yukak binuka welepnimnyopura, ance na melibukapnimince, amutuku arye Israel ninye ati, malye ulina yupu nyabuka supdeipnamlame. Winipminyopura, sikda ikin unamake,” Balak birye nyabuk.

¹⁴ Nyabukopura, Balak birye Bileam inibukce, Pisga mutuku deice weleprik. Amutuku ara, ninye si Zopim, el wa win dam birik. Asukum ara, keil pala lelebuka, yuk-yuk yangabuka, tekbarye kintinip deiprik. Winiprika ara, yim sapi basam tonok ap, yim domba basam tonok ap, obukabikce, ayangap deipmekak nirya, yuk-yuk tonok-tonok deibik. Atekbarye keil pala lelebuka, yangeipmek deice, tonok-tonok uku sekdongobre banmeka, deipra banmarikba, aning nirya uku dinmok.

¹⁵ Winiprikopura, Bileam birye, Balak biti nyabuk. “Anda an ning kintinipmalamce, keil pala lelebuka yangeipmalamce, adeice deipmalamak anyuk, tiknamalyame. Nara tia talak, Allah ap epdanamanam ati ara, nara mitik tonun otam binapne,” nyabuk.

¹⁶ Nyabukura, Allah el si Yahweh arye, Bileam tenebuka nyabuk yupu, el kanye talima pum tam laka nyapdeibukce nyabuk. “Anyarepmakin yupu ara, Balak dam nyalbinamlyame,” nyabukba, Bileam birye, Allah nyapmok yupu, Balak biti yanuka nyabuk.

¹⁷ Bileam tamubuka biyukce dinmokba, Balak bira, kam ulamle ning obuka, pala keil lelebuka, yangalin dam tikmok. Tonda el ap, Moab mutuku ninye deiyok nang ap, aning dam anyuk tikmekba, binuka eibuk. Akunum bayukba, epdarikopura, Balak birye, Bileam biti asipdeyuk. “Allah Yahweh arye, yata yupu nyapmakil do?” nyabuka asipdeyuk.

¹⁸ Asipdeyukura, Allah arye, Bileam el dam nyapmok yupu uk, laka nyapdeibuk. El nyabuk yupu ara, ani. “Telebe narye doryanamle talak, winipnamle ning laka nyapnukine ati, Zipor el mi Balak, anda yamince, yanuka kekepnilyame,” nyabuk.

¹⁹ Allah elda, nun ninye unyaba atonun kum ulula ati, tilila yupu tonok ning babye, kum nyalule. Tonda, ninye arye, el kum deibika ati, el minopce tenelye ning nirya ara, aning nirya adiparyuk wininulule. Aning batakuka, ila tuba ton, yuk ning kum tenelule. El teneplirye ‘Winipnamne,’ nyalul touk, aninguk tenebuka winilule. El nyalul yupu, pia kum batakalule. Nun ninye sirika ara, ‘Aning winipnamasine,’ nyabuka, nyalilamepye bukni, batakuka bibirye, yuk ning nyanyabe. Wininyaba atonun, Allah elda pia kum winilule.

²⁰ Allah arye nati, ‘Anda Israel ninye ati, teleb yupu nyapminba, narye Israel nang ati teleb kipdeipnamle,’ nyabuka arepnuka ati, ayupu uk nyapnune. Allah arye Israel ninye ati, ‘Teleb unamak’ tenen, teleb yupu akunum nyalamuk anya arye, na talinye binya arye, el yupu batakuka, yuk ning kum nyaptinye. El nyalul yupu uk, nyapnune. Ayupu ara, ani.

²¹ Yakub birye deibukba, dadeipdanin yanganyak ninye ara, Allah tuba kanye delilula anya arye, sikti malye kipdeipliba, imun kanye bon ning kum dopropnamake. Aning atonun, Israel ninye ara, Allah tuba kanye delilula anya arye, sik nong deice, ikin ning kum deipnamle. Sikda ikin kum unamake. Ati, Allah el si Yahweh ara, Israel ninye sikti, pia ululce melilule. Tonda Allah ara, sik ninye deiyoknye, sik noutamak ulamuk touk, tuba ulirye melilula ati, sik pin-pin asa arye, kanye deibuka, yupu mikip deice arye, el si erenyake.

²² Allah arye Israel ninye bobuka, Mesir mutuku noutamak arye, bobuka yangalamuke. Wini talak ara, bai basam mikip weik ulamle touk, sik mikip pia weik ninye unyake.

²³ Tonda, sik malye ulamik nang ap, asing keten nang nirya ap, weik kel bikamik nang babye, sikce Yakub yala ninye ati, malye yupu nyabuka sulamika babye, Israel ninye ati, kum malye kilamike. Sikda telebuk ulamika atonun, tuba unamake. Aning atonun wini talak babye, malye nang arye, Isa Mutuku Dongonye mikip deice arye, Israel nang ati, malye kum updeiptinge. Wini talak ara, ninye nirya arye, sik Yakub birye deibukba, dadeipdanin yangalamik ninye ati, Israel yala ninye ati ara, nyanamake. ‘Se, anggun nirya ara, dipdelulume, Allah arye, aninye dam melilula anya arye, sikda telebuk unyake. Sikda weik mambule,’ nyabuka nyanamake, nyabuk.

²⁴ Israel ninye ara, bai mutuku ulamle bai kam kil, mikip weik ulamle atonun unamake. Tonda bai tam arye, yim kam ulamle atonun, kintinibuka tikilyanganamake. Tonokak kum ulirye balamle atonun, wininamake. Ara, bai tam yim kam arye, yu ubuka dikdik sena kum diparyuk, el opmalye ning akunum diplirye, sirya daklirye, dikdik selamle. Tonda, bai tam yim kam ulamle arye, el oplopmalye ning, ining nirya dilirye, sirya dakuka dilamle touk, sik Israel ninye babye atonun unamake. Sik mal olan nang ati, obikirye, malye kipnamake. Allah arye Bileam biti nyabuk touk, Bileam birye, Israel ninye deice, teleb yupu nyabuka subuk.

²⁵ Nyabukura, Balak kekebukce, tamubuka Bileam biti nyabuk. “Ayupu ara, nyana bataktume. Akunuma, sik Israel ninye ati ara, malye yupu nyabuka suptume. Bukni, wini talak ara, malye yupu nyana babye, teleb yupu nyana babye bataktumce, yupu tana kumce, urdem unamalyame. Ara, ance asum-asum nirya, sik Israel ninye ati, teleb yupu nyanmalam ati nyapkine,” nyabuk.

²⁶ Nyabuk bukni, Bileam birye tamubuka, Balak biti nyabuk. “Kume, na akunum laka nyapmakine. Allah el si Yahweh arye, nati, ‘Nyapnamlyame,’ nyalinilye touk, aninguk kekebuka, adiparyuk nyanune. Talye yupu uk, kum nyaptinye,” Bileam birye nyabuk.

Dotalak winipnamik ning ati, Bileam birye, like winilye ning nyabuk yupu

²⁷ Aminyan talak ara, Balak birye, Bileam biti nyabuk. “Wini talak ara, yaminyeura, narye yukak bobinukine. An ap, na ap, yukak welepnuname. Asukum binimnyopura, Israel ninye yupa ton eipnamalame. Ati ara, yukak binamanam talak ara, ance sik Israel ninye ati, malye yupu nyabuka supnamlyame. Na walwal bukni, Allah arye nati, kanye deipnuturye, Israel ninye ati, malye ulina yupu, sun yupu nyapnamkil do, kum do? Bukni, ‘Winipnutue’ tenen, ‘Se,’ tenepne ati, yukak welebinimirye dinamaname,” Balak birye nyabuk.

²⁸ Wini talak aniryuk, Balak birye, Bileam bobukabukce, mutuku si Peor mutuku deice bobiyuk. Winibukba, utam uamuk mutuku, ninye kumak, pia mok ap, mek ap, kum arye buppu weik ati, ninye kum ulamik mutuku urasin tam, binuka dinmarik.

²⁹ Atalak ara, Bileam birye, Balak biti nyabuk. “Wini talak amutuku noutamak ara, kam ning obuka, uku dabuka delinak ati, pala keil yuk-yuk yanganmaminya ani, tekbarye keil lelebuka kintinideipnilyame. Winipmunyopura, yim sapi basam tekbarye ap, yim domba basam tekbarye ap, kintinideipnilyame,” nyabuk.

³⁰ Nyabukopura, Balak birye anyapmok touk, winibuk. Ara, Balak birye yim sapi tekbarye ap, yim domba tekbarye ap, obukabukce, aning uku dana ati, pala keil lelebuka yangeipmokak, boyanuka deipmokce, uku dongopra banmok.