Bilangan 21 - Eipomek

Kanaan mutuku tam noutamak, Arad mutuku ulamik ninye nirya ati, Israel nang arye, obuka sirya dakik yupu

¹ Tonok ninye deiyoknye, Arad mutuku ninye talibuka ulamuk. Ara, Kanaan mutuku tam noutamak bukni, Negeb mutuku ulamuk. Ton nang arye, ‘Israel nang ara, Atarim mutuku bisik yanganmake,’ nyabuka laka nyabikba, Arad mutuku deiyoknye kekebukce, Israel nang ati olbiyuk. Ton nang ara, binuka obuka batakuk bukni, ton nang ara, tomobuka wenena aik dobuka dongobuk.

² Winibuk ati, Israel ninye nirya arye, Allah el si Yahweh ati morobikce, nyalin yupu nyapdeibik ning ara, ani. “Naio, ‘Amutuku nang obuka, sirya daktibye,’ tenenyaba ati, ‘Ance mikip arepsiminba, amutuku nang nirya, obuka sirya daktibirye bitibye’ tenen, moropkiyabe. Arad mutuku nang, obuka sirya dakibirye, an si erena ap, an arena ap ati, sik dolamik weik asik nirya dakloptibye. Sik ning nirya kum kipdeipnamabe. Sik aik ap, sik ning nirya ap, obuka atu atonun kiplopnamabe,” nyabuka morobikce, Allah ati nyalin yupu nyabik.

³ Israel nang morobik ning ara, Allah el si Yahweh kekebukce, mikip arebukba, Israel ninye arye, tamubuka Kanaan tam ninye bukni, Arad mutuku nang nirya, obuka sirya dakikce, sik dolamik asik nirya, dakuka batakik. Winibikopura, sik Ibrani yupu deice arye, amutuku si nyabik. Ara, sik yupu deice arye tonok yupu, Horma deiyok ara, ‘Kum danalina’ ati nyalamak ning. Ati ara, Arad mutuku si pununa ati, si dobik ning ara, ‘Amutuku ara, Horma mutuku,’ nyabuka si dobik.

Kat ning deice arye, ninye on kwatima urasin atonun, kibuka memebik yupu

⁴ Israel ninye, Hor mutuku batakuka biyik talak ara, ‘Edom mutuku noutam bisik kum binuyaba ati, amutuku sirya bisikuk bana teleb’ tenen, Ining Bi Laut mekwen, el si ton Teberau mekwen bana ati, balamik bisik biyik. Abisik banmek talak ara, Israel ninye nirya arye, ‘Yata ati, amalye mutuku noutamakuk banyap do? Mok ap, mek ap, kum ati, buppu weik arye, ninye kum ulamik mutuku, pera weik bisik banmap talak ara, ikin pia weik upsile,’ tenebikce, malye kanye bobikce, malye weik nyalamik.

⁵ Winibuka malye kanye bomik talak ara, Allah ap, Musa ap ati, malye nyalamik yupu ara, ani. “Yata ati anggunce, Mesir mutuku arye bobuka, yanamsurum do? Winyamsuruma ara, ‘Ninye ap, mek ap, pia kum mutuku noutamak arye, sik nirya diptinge’ tenen, boyasurum do? Amutuku ara, teleb din ning ara, pia kume. Tonda din mek ara, pia kume. Tonda, Allah arye aresulul din ara, weika arye tuba-tuba dinyaba anya arye, nun like weik usulule,” nyabuka malye nyalamik.

⁶ Nyalamika ati, Allah el si Yahweh arye, yu ubukba, ninye on kwatima weika arye, Israel ninye noutamak arebukba, sik akwatima ninye weik si tobikba, ninye weik dibik.

⁷ Adibika ati ara, Israel ninye ila moubuka tenebikce, Musa dam yayikce, Musa biti nyabik. “Se, nun dipkoprob malye wininyabe. Ara, Musa an ap, nun ni koproba Allah ap, anggun dam malye yupu nyabupa arye, malye kilisinyabe. Ati Musa, ance nunti, Allah ati moropsiminyeba, Allah arye ninye on kwatima arepsuk ning ara, dobuka yukak donoknamle. Aning kum winipsutue,” nyabuka, Musa dam morobik. Winibuka morobik ati, Musa birye sik lyena ati, Allah morobuk.

⁸ Akunum morobukopura, Allah el si Yahweh arye, Musa biti nyabuk. “Kat ning deice arye, ninye on kwatima urasin atonun memepmince, kintinipnulyame. Akunum winipminyopura, cang yo deice ikuka deipminba, akwatima akunum si topliba, uk dilul ninye ara, acang yo deice deipminye kwatima eibikirye, adiparyuk narye kweteipnyopopura, kum dipnamak bukni, adiparyuk kam buknamake.” Allah arye nyabuk.

⁹ Musa birye, Allah nyapmok touk winibuk. Ara, kat ning el si ara, tembaga dobukabukce, ninye on kwatima urasin atonun puturubuka kintinibukce, cang yo deice deibukopura, yata ninye do nirya, kwatima akunum si topmekak bukni, Musa birye tembaga dobuka, puturubuka deibuk kwatima urasin atonun ning, dinmek nang nirya ara, adiparyuk kum dibik, kam ulamik.

¹⁰ Israel nang ara, weik mek kwen el si ara, Laut Teberau dam, amutuku arye batakuka biyik. Biyikopura, sik tia ati, doltakna aik dolamik tenda aik ara, Obot mutuku binuka dobik.

¹¹ Obot mutuku mapmika berekukopura, Obot mutuku arye panabukabikce, Moab mutuku dam bukni, keting panalyangan tam, pata mutuku si ara, Abarim mutuku dam, sik sapi basam bol arye, tenda domik doltakna aik ara, asukum dobuka, asukumuk mabik. Ara, ninye asik ton kum uamukce, yo ap malmalya dem uamukak binuka, tia ati, sik tenda aik abinuka, dobikce mabik.

¹² Dobuka, mapmeka, berekukopura, sapi basam bol arye doltakne tenda aik ara, ulubukabikce, amutuku ara batakuka, bisik banmeka ani, mutuku si ton, Zeret lu mutuku binuka, sik tenda aik ara, tia ati abinuka dobuka unmek.

¹³ Asukum aryuk mapmika berekukopura, sik tenda aik tamubuka ulubuka bobikce, biyik. Ulubuka biyikura, bisik banmeka ani, mek ton balamuk mek si ara, Arnon mek kup-kup binuka, sik tenda aik kintinibuka dobikce mabik. Ura, Arnon mek balamuk mek, otam bukamuk mutuku noutam, sik Amori yala nang ton ulamik. Arnon mek ara, Moab tam nang ap atam, Amori yala nang ap otam, danoutam ara, Arnon mek balule. Amek ara, sik dana-dana tam mutuku bokolanak uamuk.

¹⁴ Ati ara, tonok sekamik buku el si ara, ‘Allah Yahweh arye, wenen yupu nyabuk ning,’ sekuka deibik. Abuku noutam, ayupu ton sekdeibik. “Sopa mutuku lu noutam bukni, mitik mutuku tonok ton, el si ara, Waheb mutuku bukamuk. Amutuku noutam ara, Arnon mek binamukak ara, lu mutuku bukamukce, amek balamuk.

¹⁵ Tonda, amek duman mutuku nirya ap, abukamuk mutuku-mutuku ton, amutuku lilun mutuku arye, otam bisik binamuka ani, mitik mutuku asik si ara, Ar mutuku ton aubuke. Amutuku ara, atam arye dipdongobuka, otam keting panalyangan tam ara, Moab tam nang unyake. Ati, amek ara, sik mutuku wililon tam balamuk.” (Ara, mal olbana ati, lak nyan buku noutam ayupu lak nyabuka sekdeibik.)

¹⁶ Israel nang ara, amutuku tia ati mapmeka ani, amutuku arye tamubukabikce, yukak Beer mutuku biyik. Beer mutuku nyalamik mutuku dam ara, tonok mek kwen ton deiamuk. Amutuku kon mek deiamuk mutuku ati ara, min talak Allah Yahweh arye, Musa biti, yupu nyapdeiamuk ning ara, ani. “Ance sik Israel nang ati, nyapminyeba, bulubuka binuka wekikcopura, narye sikti, mek arepnamne,” nyapdeiamuk.

¹⁷ Amutuku biyik talak ara, Israel nang nirya arye, amot nyanmek. Anyanmek mot ara, ani. “Amutuku kon mek ati, ‘Mek kukuka yalyame,’ nyanmekce mek ara, pia kukuka yanamlarya. Yangalyeba, nunce amek kwebuka, dinamabe,” nyabik.

¹⁸ Tonda, nyanmek, “Amutuku kon lukamik ning ara, amutuku nang, sik deiyok nang ap, minop deiyok kouamik nang ap, sik kama arye, amutuku kon mek lukuka memamik. Tonda, sik deiyok taleamik ning ara, lakakina ati, cang taca yo ton bopmacak arye, amutuku kon mek, tuku palyamik dam binuka, unmake,” nyabuka, mot nyabik. Amot nyabikura, amutuku pata ara, batakuka, bisik binmeka ani, otam pata mutuku ton biyik. Amutuku si ara, Matahan mutuku binuka, tia aunmeka ani, amutuku babye batakuka biyik.

¹⁹ Matahan mutuku arye, batakuka Nahaliel mutuku biyikce, amutuku babye batakuka, bisik banmeka ani, Bamot mutuku ton binuka wekik.

²⁰ Bamot mutuku tia mapmeka ani, amutuku arye batakuka, bisik banmeka ani, Moab nang mutuku lu uamukak biyik. Amutuku ara, weik arye bukamuk mutuku el si ara, Pisga mutuku aryuk welebikce, weik pata mutuku ton eibik. Apata mutuku noutam ara, ninye ton pia kum ulamik. Yo ap malmalya dem ulamuk.

Ninye deiyok nang bitinye, Sihon ap, Hesyebon ap, obik yupu

²¹ Israel nang arye, ninye ton wipdeibikba, Amori nang, sik ninye deiyoknye, el si ara Sihon, el dam binuyik ati, yupu nyapdeibik. Nyapdeibikba, anang arye, yupu lak nyalbiyik. Sikce nyapdeibik yupu ara, ani.

²² Na nio, nun anti moropkiyabe. Nunda, ance taliplum mutuku noutam arye, talye mangkau bitibirye, yuk tam bendoptinye do? An mutuku bisik yabirye, nun binamap talak nirya ara, nun ap, nunce talibuka weinyap ning ap yanamabe. Yanamap bukni, nunce bisibuka yuk tam bisik ara, an wa windam dam do, anggur wa dam do, tonda an lokon mek kwen dam do, amutuku-amutuku dam nirya ara, pia kum binamabe. Nunda, nong bisik dem binamabe, otam mutuku bibyeura, an uminye mutuku ara, bisibuka binamabe,” nyabik.

²³ Nyabuka morobik bukni, amukutu ninye deiyoknye, Raja Sihon birye, Israel nang, sik nyabik yupu, pia kum kekebukce, “Anang ara, na bisik pia kum binamake,” nyabuk. Nyabukce, elce, ‘Israel nang ara, mandipna kanye bobikirye, na mutuku noutam ton yanamake. Ati, ‘Sik opnuyap’ tenen, el yin talin nang nirya bulupdeibukba, pata mutuku bisik biyik. Sik akunum biyikopura, Israel nang ap, Yahas mutuku noutam biyikba, asukumuk olanmek.

²⁴ Olanmek bukni, Israel nang arye, Amori yala nang, sik yin talin nang nirya ara, amal olana deice arye, Amori yala nang nirya obuka, sirya dakik. Amori yin talin nang obikura, anang sik talibuka ulamik mutuku nirya, Arnon mek dam arye dipdongobuka, Yabok mek dam tam nirya ara, sik dem doprobik. Bukni, Amori yala nang arye taleamik mutuku, atam arye dipdongobuka, otam ara, sik Amon yala nang arye taleamik mutuku bukamuk bukni, anoutam, wililongonak uamuk. Amori yala nang, sik taleamik mutuku tam ara, asukume. Sik Amon yala nang ara, otam mutuku taleamik. Tonda, sik Amon yala nang arye, ‘Kume, sik Israel yala nang arye, nun mutuku wekikirye, alapsicak’ tenen, amukutu wilinak ara, sik yin talin nang ara, mikip pia, weika arye taleamik.

²⁵ Amutuku nirya, mikip arye taleamik bukni, sik Israel nang arye, amukutu binuka doproplyopura, sik Israel nang arye, Amori nang taleamik mutuku nirya, binuka alapdobik. Alapdobik mutuku ara, Hesyebon mutuku ap, tonda Hesyebon mutuku dana-dana tam, anoutam, mitik asik dolamik ning nirya ap, binuka doprobikce, Israel nang, sik mutuku kipdobik.

²⁶ Ura, Hesyebon nyalamik mutuku ara, sik Amori ninye deiyoknye, Raja Sihon, elda amukutu noutam ulamuk. Elda amukutu ulamukce, min talak ara, Moab mutuku ninye deiyok kibuka taleamuknye biti, olbalamuk. Olbalamukce, Moab mutuku nang nirya obukabukce, Moab mutuku nirya taleamuk bukni, otam balamuk mek si ara, Arnon mek duman nirya ara, anyapce dipdongobuka, otam mutuku ara, el ton alubuka kum doprobuk. Arnon mek arye otam ara, Raja Sihon elcuk, tuba taleamuk.

²⁷ Moubuka tenebikirye, pia teleb nyabuka sekna nang arye, teneipdebuka ayupu sekik. “Deiyok,ara anggun nirya bulubuka yalulume. Ninye deiyoknye, Raja Sihon birye taleamuk mutuku ara, weik asik dolamikak ara, Hesyebon mutuku yanamlume. Hesyebon mutuku ara, ulubuka bakikce, sirya dakik bukni, yabyeura, amukutu asik nirya, tamubuka tonap lipsisikuka donamabe.

²⁸ Min talak ara, Hesyebon mutuku arye, weik uku dilamuk. Ara, Raja Sihon birye taleamuk mutuku, Hesyebon mutuku noutam arye, weik uku dilamukba, ninye weik diplamik. Uku arye, amukutu nirya dilamuk ning arye welebukce, Moab tam bukni, mutuku si Ar mutuku dolamik asik nirya ara, uku dibuka, sirya dakuk. Tonda, Arnon mek duman uamuk bukni, adeice tam bukamuk mutuku kon nirya babye, weik uku mikip arye dibukce, sirya dakuk.

²⁹ Aning ati ara, ‘Se, anggun Moab mutuku noutam ululum nang nirya ara, anggun bicoe. Moab tam ululum nang arye, Kamos isa siuk erelulum nang ara, Israel nang arye akunum obuka, sirya dakik. Anggun nirya, akunum oplopsike. Min talak ara, isa Kamos birye, sik amukutu ninye taleamuk bukni, anang nirya ara, Raja Sihon birye akunum dobuka, tapu koubukabukce, el tamuk bobinamsik. Aning atonun, isa aryuk amutuku kilapu taleamuk ning nirya ara, Raja Sihon birye, akunum dobuka tapu koubukabukce, el tamuk bobinamsik. Ara, Amori mutuku ulamik nang nirya taleamuk ninye deiyoknye, Raja Sihon birye, amukutu sal ap, kilapu ap, tomobuk.

³⁰ Bukni, wini talak ara, nun Israel yala nang arye, Raja Sihon ap, sik Amori nang arye deipneba, dadeipdanin, banyak nang ap nirya ara, akunum obuka kum kipdeipmabe. Ara, eitam mutuku, Hesibon mutuku bisik banak arye dipdongobuka, outam mutuku, Dibon mutuku babye, amutuku-amutuku unyak nang ara, akunum malye kibuka, obuka sirya daknamabe. Tonda, Nasim mutuku arye dipdongobuka, Nopa mutuku dam ap, Medeba mutuku dam unyak nang nirya ap, obuka sirya dakukce, kum kipdeipmabe,” nyabik.

³¹ Aning nirya akunum winibikopura, Amori yala nang ulamik mutuku nirya ara, sik Israel yala nang arye, talibuka ulamik.

³² Tonda, aulamik talak ara, Musa birye, ninye ton wipdeibukce, Yaser mutuku unyak nang ara, ‘Yata barye unyak do? Yata barye optibye do?’ tenen, “Dilbilulume,” nyapdeibuk. Ara, “Nun Israel nang arye, amukutu nang obuka, sirya dakibirye, sik unyak mutuku nirya dopropnamabe. Adeice arye, sik Amori nang, amukutu noutam unyak nang nirya ati, dilbiyik. Winibuka, akunum binuka dipdebuka yayikura, aminyan talak ara, sik Israel nang arye, Yaser mutuku dam noutam ara, ninye ton bulubukabikce, biyikura, amutuku-amutuku ulamik nang nirya yayikba, sik amukutu noutam, asik dobuka ulamika ara, bindobik.

³³ Aning akunum winibikura, sik Israel nang ara, ila tamubuka yayikce, eitam bukamuk mutuku, ‘Basan mutuku dam binamabe’ tenen, amukutu lu bisik banmek. Banmek bukni, winibik talak ara, Basan mutuku taleamuka deiyoknye, el si Og, el yin talin nang ap, sik nirya arye, Israel nang, Eterai mutuku unmeka ati, ‘Warekuka opnuyab?’ tenen, Basan mutuku tam arye, Eterai mutuku yayikce, Israel nang, sik yin talin nang ati, warikike.

³⁴ Winbik ati ara, Allah Yahweh arye, Musa biti nyabuk. “Anggun ilil una meme. Narye anggun Israel yin talin nang ati, mikip arepsinyeba, Raja Og ap, el yin talin nang ap ati, anggun Israel yala nang arye, el tam nang opnamalume. Winipmunyeura, el taleamuk mutuku nirya dopropnamlume. Tonda, elce taleamuk nang nirya obuka, sirya daknamlume. Ara min talak, anggunce ninye deiyoknye, Raja Sihon, Hesibon mutuku talibuka, ulamukce, Amori yala nang taleamuk buk, omlum atonun, Raja Og babye opnamlume,” nyabuk.

³⁵ Ura, Allah Yahweh arye, Musa biti nyabuk touk, sik Israel nang arye, Raja Og taleamuk mutuku ulamik nang nirya, akunum obuka, malye kibikce ninye deiyoknye, Og ap, elce deiamuk mapu ap, el yin talin nang ap, el mutuku ulamik nang ap nirya ara, obuka sirya dakik.” Tonok ton, pia kum batakik. Israel yala nang arye, aning nirya akunum winibikura, sik Israel nang arye, amukutu babye talibuka daulamik.