Bilangan 20 - Eipomek

Mek kum ubuka ati, Israel ninye arye, malye yupu nyabuka, engebik yupu

¹ Keting tamun yupa tonok, keba odikin 40 tahun akunum ubukba, aketing tamun noutamak ara, sik Israel ninye balamika ani, mek kumak, Sin mutuku tam, pata mutuku biyik. Balamika ani, Sin mutuku tam bukni, wala tonok ning kibuk deice, sik Israel ninye, Kades mutuku biyik. Kades mutuku ara, mok kum celamuk mutuku ati ara, ninye ton kum ulamik mutuku bukni, sik Israel ninye amutuku binuka ulamik. Kades mutuku binuka ulamik talak arye, Miryam dibukba weibik.

² Ura, Kades mutuku ara, mok pia kum mutuku anya arye, sik mek pia kum ubukba, Israel ninye nirya arye bulubuka, Musa ap, Harun ap dam yayikce, malye kibuka, ‘Anang bitinye ara, nun deiyok nang, tuba kum unamsirake’ tenen, malye yupu nyabuka derebik.

³ Sik aninye arye, Musa dam yanuka, nyabik yupu ara, ani. “Omutuku, mek ap, mok ap, kum ati, buppu weik arye, ninye kum ulamik mutuku yangalamupu talak aryuk, Allah el si Yahweh arye, nun nirya wenebuka, omsutuba, diamtibyopura, amutuku pia mek kumak kum yangalamtibye. Nun kanye ara, ‘Teleb ning ara, adiparyuk nun kwit capu nang omuk talak ara, nun babye omsutue.’ Wini talak nun aunmab mutuku ara, pia malye mutuku atia,” nyabuka malye kibuka uanmek.

⁴ “Nunda, Allah el si Yahweh, el ‘Naʼ tenen, ninye unyap bukni, yata ati, ance nun bobuka mok ap, mek ap kum ati, buppu weik arye ninye kum ulamik mutuku boyamasulum do? Winipsulumba, nun ap, nun weinyap ning ap nirya ara, ‘Asukumuk dipnamak’ tenen, pia amalye mutuku boyanmasilam do?

⁵ Yata ati, nun Mesir mutuku ulamupu buk, bobuka yangalamsulumce, aning-aning nirya, pia kum mutuku aboyanuka, batakmasilam do? Amutuku ara, pia malye mutuku anya arye, aning-aning nirya, pia kum ubuke. Amutuku ara, duk moulamle ning, aning-aning nirya kum ubuke. Ara gandum ap, anggur tower duk ap, semangka ap, yo duk el si delima ap, tonda dina teleb-teleb ning nirya kum mutukue. Aning atonun, amutuku ara, mek babye pia kum ulule,” nyabuka, malye yupu nyalamik.

⁶ Nyabik ati, Musa ap, Harun ap, adiparyuk Israel ninye unmekak batakuka, Allah el si erena ap, el ap ninye ap, ansililan aik bublan dam birikce, ‘Nun ni Allah ara, weik mambulnye’ tenen, tuku deice maprikce, tuku dipdongobuka, Allah ati moropdik. Winiprikba, talye karin arye, Allah Yahweh, el dirina koproba dopkwetebukba, el dirina lakak aubukba, eipdik.

⁷ Winibuk talak ara, Allah el si Yahweh arye, Musa biti nyabuk.

⁸ “Musa ance minop talak anyaik deiamlum kama ara, an ap, an du Harun ap, anggunce bobuka birumunce, sik Israel ninye nirya bulubuka, keil lak tonokak deipdurume. Otam ara, weik keil aubuka eiptinge. Ati, Musa ance akeil dam tikmince, ‘Mek panaplyame,’ nyapminba, adiparyuk mek kutukuka panalyanamale. Winiplirye amek ara, pia ati kutukuka balamliba, sik Israel ninye ap, sik sapi basam ap, kambing ap, domba ap, sik weinyak ning, aning-aning nirya ap, amek kwebuka dinamake.” Allah arye, Musa biti nyabuk.

⁹ Nyabukopura, Musa kekebukce, Allah arye nyabuka atonun, Allah el si eren aik koproba dipdongobuka, Allah el dam arye, minop talak bolamuk kama, binuka doprobuk.

¹⁰ Biyukce, Musa ap, Harun ap arye, Israel ninye amutuku keil dam bulubuka deiprik talak ara, Musa birye sikti, nyabuk. “Ura, anggun malya kibuka, malye-malye winilulum ninye ara, kekepnululume. Nunce mambul pil dopnimiba, amutuku keil noutamak arye, kutukuka yanul mek ara, anggun dinamlum atia,” nyabuk.

¹¹ Nyabukabukce, Musa el kama dobukabukce, akeil deice like bitinye deplobukba, mek kutukuka sakukba, Israel ninye ap, sik weilamik ning ap, basam ayala-ayala nirya ap, amek kwebuka dibik.

¹² Winibukba, sik nirya dibik bukni, Allah arye Musa ap, Harun ap ati wenebukce nyabuk. “Anggunce nati kum diba tenenururume. Ara, narye, ‘Akeil dam yupu deice aryuk, ‘Mek kutukuka panaplyame,’ nyapminba, yanamalule,’ nyapse. Nyapkise bukni, na nyapmakunu yupu anyuk, Musa ance, ‘Yupu diparyuk mek kum arepsutue’ tenen, an kama dobukapmumce, akeil deice debumba, mek kutukuka yanmoe. Winipmauma deice arye, ance nati, diba tenebuka, kum si erepmanilame. Nara, pia malye una kum ninye atonunye kum bukni, pia diksukumnye unune. Na Allah pia dirinanye unirye, pia diksukumuk unye nyapmasunu yupu ara, atonun kum winipmarumce, na mapu Israel ninye sik dam malye winipdeipmarume. Ara, ance yu upkuba, keil depmamu deice arye, Israel ninye arye na mikip unye ning, moubuka kum kel biknike. Aning ati ara, narye, ‘Amutuku arepnamsine,’ nyabuka tenelamsirye, Israel nang ati, nyalilamsise mutuku ara, ance anang melibuka kum weknamdurume,” Allah arye Musa ap, Harun ap ati wenebuk.

¹³ Aning nirya akunum winibukopura, amek kutukuka yayukak, el si ara, Meriba mutuku nyabik. Sik yupu deice arye, Meriba nyalamik ning deiyok ara, ‘Waldana mutuku,’ nyalamik. Ara, Israel nang ap, Allah ap, mek ati uapdayika ati, amutuku si dobik. Sikce amutuku mek kum ati, sik ap, Allah ap, uapdayik. Uapdayikba, Allah arye, el mikip weik arebukba, sik nirya arye, ‘Se Allah ara, pia yuk ulule. Elda Weik Telebnye, pia diksukumnye ulule,’ tenebuka kel bikik.

Israel nang bisik bana ati, ‘Edom mutuku bisik bitibye do?’ tenen, Edom mutuku deiyoknye biti morobik bukni, “Abisik bana kume,” nyabuk yupu

¹⁴ Kades mutuku unmek talak ara, Musa birye el mapu nyapdeibukba, Edom mutuku deiyoknye nyalbana ati, dopreibukba, el dam nyalbiyikce, ayupu nyabik. “Nun kwit, nun an kwit capu, nun Israel ninye ara, nun ikin-ikin ning weik usulul ning ap, kanye imun kanye bobupu ning ap, an kele.

¹⁵ Minop talak nun apu yapu nang, Mesir mutuku biyikce, keting tamun weik daulamikba, Mesir mutuku ninye arye, nun apu yapu ap, nun ap ati, ikin ning weik nun nong deice delilamsikba, ikin weik ulamsuk.

¹⁶ Winilamupu buk, aminyan talak Allah ati morobupuba, kekebukce, Allah el im deice pil donanye malaikat tonok wipdeibukba, Mesir mutuku noutam arye, bobuka boyanamsuke. Winilamsuka ani, wini talak ara, nunda Kades mutuku akunum yanuka unmabe. Ara, nun kwit, an taleamlum mutuku sirya, wiliba dam ayanuka unmabe,” nyabuka, Musa el mapu arye, Edom mutuku taleamuk deiyoknye dam, binuka laka nyabik.

¹⁷ Nyabikce ayupu ton nyabik. “Ance, ‘Telebe,’ nyapsiminba, an mutuku noutamak bisik binamabe. Bisikuk binamap bukni, an wa wina dam bisikak ap, an anggur tapu duk, wa noutamak ap, kum binamabe. Tonda, lokne mek kum kwebuka dipnamabe. Aning nirya, ton kum winipnamabe. Nunda talye bisik diksukumuk binamabe. Ara, an Raja arye nyaplumba, palyamkik nong bisikuk binamabe. Obisik bena, abisik yana kum kepnamap buk, noutam bisikuk binamabe. Bisik binamap talak ara, sirik tam ap, kwanim tam ap, noutamak bisik batakuka yukak kum binamabe. Bisik amu tam ap, deice ap, ton kum diprenamabe. Nun diksukumuk balamipya nun tenebupe mutuku binamabe. Yuk mutuku kum binamabe. Ati, ‘Aning telebe,’ nyapnusilam do, kum do?” nyabuka binuka morobik. Ara, Musa el mapu arye, Edom mutuku deiyoknye biti morobik.

¹⁸ Nyabuka morobik bukni, Edom mutuku deiyoknye birye, tamubuka nyabuk. “Kume, nun mutuku bisik anggun bana kume. Anggun yuk bisikuk binululume. Narye anggunti, ‘Abisik bana kume,’ nyapmasinye bukni, malye kibuka bamunyopura, nun amutuku unyap ninye nirya arye, ya dobuka yabirye, opnamsiabe,” nyabuk.

¹⁹ Nyabukura, Israel nang arye tamubuka, nyabik. “Kume, anggun tam weik nong bisik babye talak, nun ap, nun basam aning-aning nirya ap arye, anggun mek ton dibipyopura, dipkoprob amek dekna ati, dekna yo bok adiparyuk arepnamsiabe. Ati, ‘Anggun bisik ara, yanibuka bitibye’ tenen, moropkiyabe, yuk ning ton kume,” nyabik.

²⁰ Nyabikura, Edom mutuku deiyoknye ap, el amu tam ninye ap arye, tamubuka nyabik. “Kume nun bisik ara, pia bana kume,” nyabik. Nyabikopura, Edom mutuku nang arye, Israel ninye ona ati, yin talin nang, mikip weik nang weika arye bulubuka, Israel ninye olyayik.

²¹ Winibikba, Israel ninye eibikopura, abisik batakuka, ‘Yuk tam bisik arye leibuka binamap,’ tenebikce biyik. Ara, Edom mutuku ninye arye, ‘Nun bisik bana telebe,’ kum nyabika ati, winibik.

Harun dibuk yupu

²² Atalak ara, Israel ninye nirya arye, Kades mutuku batakuka, bisik banmeka ani, Hor mutuku binuka mabik.

²³ Hor mutuku bukni, Edom mutuku tam wiliba dam biyik talak ara, Musa ap, Harun ap ati, Allah el si Yahweh arye nyabuk.

²⁴ “Harun bira, amutuku dipnamale. Winipliba, el apu yapu dibikba weiamik touk, weipnamlulume. Israel ninye ati, ‘Amutuku arepnamsine,’ nyabuka, nyalilamse mutuku ara, Harun kum binamle. Deiyok ara, narye Musa an ap, Harun ap ati, ‘Aning ara, wininamlulume. Sik Israel ninye bulubuka, tonok keil dam deiprumunce, akeil dam, ‘Mek kutukuka panaplyame,’ nyabuka moroprumunyopura, panabuka yanamalule,’ nyapmasebuk, na nyapsise yupu kekena kumce, yanipnuruma ati, anggunce akeil kama arye deprume. Ara, na nyapmase touk, kum winyamruma ati, Harun bira, asukumuk dipnamle. Meriba mutuku mek kutuknuyuk talak ara, anggunce nati, malye kipdeipnurume.” Allah arye nyabuk.

²⁵ Nyabukopura, ayupu ton Allah arye, Musa biti nyabuk. “Harun ap, el mi Eleasar ap dobuka, Hor mutuku welepnamlulume.

²⁶ Winipminyopura, Harun el nong bol deice tam ongolul baju kwiribukapmince, el mi Eleasar deice deipnalyame. Deiyok ara, Harun akunum dipnamle talak kibuk ati, nyapkine. Harun diplyopura, el mi arye el kisok punupnamle,” Allah arye nyabuk.

²⁷ Allah el si Yahweh arye nyapmok touk, Musa ap, Harun ap, el mi Eleasar ap, Hor mutuku dup welebik. Sik welepmek talak ara, Israel ninye nirya arye, bulubuka dinmek.

²⁸ Akunum welebikopura, Allah nyapmok touk, Musa birye, Harun el deice tam baju kwiribukabukce, el mi Eleasar ongopdeibukopura, Harun Hor mutuku dup adiparyuk dibukba weibik. Winibikce, Musa ap, Eleasar ap, tamubuka koulukrik.

²⁹ Kolukrikce, “Harun akunum dipmale,” nyabuka, yan laka nyaprikba, atalak ara Israel ninye nirya arye, like yupa tonok, keba tagu barye, 30 sum deice arye, bulubuka weklamikce, weika arye engelamik.