Bilangan 2 - Eipomek

Allah arye, Israel ninye ak, sik aik dona ati, “Winibuka donamlume,” nyabuk yupu

¹ Allah Yahweh arye, Musa ap, Harun ap ati, nyabuk.

² Israel ninye, sik unamica ati, tenda aik dopnuce talak ara, tonok-tonok nang, sik minopce, sik un aik dobuka, un aik ati lak kilin ning, ‘Nunda, aning deiyok nang unyabe,’ tenebikirye, kirikwetamicak dana-dana tam, aik dobuka, antanal dongonamnyake. Anyaik dona ara, sik apu yapu nang arye, anyaik dopnin yangalamik touk winibuka, yala yuk-yuk ulamak touk, winibuka dopnamnyake. Adonamak aik urasin tam ara, na Allah Yahweh ap, ninye ap, eldana ati tenda aik, dopdeipnamake. Anyaik sirya dana-dana tam, antanap dongobuka donamak bukni, anyaik urasin tam ara, na aik kipdeipnamnyake. Wininamak bukni, pia mining dam ara, kum donamak bukni, mitik yuk toak donamake.

³ Tonda, keting yangan tam ara, Yehuda yala nang, sikce deiyok koubuka, sik deiyok kibuka talen nang ati, yupa yuk-yuk nukuka, bikilin ning ikdeibikirye, abikilin ning, ikdeibica dana-dana ara, aik dobuka antanap dongopnamnyake. Yehuda yala ninye, sik deiyok kinanye bira, ninye si Aminadab, elce deibuk mi, el si ara El, tonok unamlule.

⁴ Anye ap, neika aik dobuka unamak ninye ara, ninye si nukuka sekik touk, yupa weik, tujuhpuluh empat ribu, enam ratus (74.600) nang dem, el dam unamnyake.

⁵ Tonda, Nahason dam unamak ninye ara, Isakar yala ninye arye, sik aik dobikirye, asukum unamnyake. Isakar yala ninye, sik deiyok kinanye bira, el si Zuar, elce deibuk mi el si ara, Netanel unamle.

⁶ Anye ap, neika aik dobuka unamak ninye ara, ninye si nukuka sekik touk, yupa pia weik, lima puluh empat ribu, empat ratus (54.400) nang dem, el dam unamnyake.

⁷ Anye Netanel unamla dam ara, Zebulon yala ninye arye, sik aik dobikirye, asukum unamnyake. Zebulon yala ninye, sik deiyok kinanye bira, ninye si Helon, elce deibuk mi el si ara, Eliab unamle.

⁸ Anye si Eliab ap, neika aik dobuka, unamak ninye ara, ninye si nukuka sekik touk, yupa weik, seratus delapan puluh enam ribu, empat ratus (186.400) nang, el damuk unamnyake. Yala si Deiyoknye Ninye yupa nuki Yehuda Aminadab el mi Nahason 74.600 Isakar Zuar el mi Netanel 54.400 Zebulon Helon el mi Eliab 57.400

Yala si Deiyoknye Ninye yupa nuki

⁹ Ati, Yehuda yala ninye, sik aunyak ninye ara, yupa weik, seratus delapan puluh enam ribu, empat ratus (186.400) nang ulamak touk, winibuka, Israel ninye batakuka, yuk mutuku binuka unamak talak ara, sik Yehuda yala ninye arye, minop menekuka banamnyake. Yuk Israel yala ninye ara, sik aminyan tamuk, yanganamnyake.

¹⁰ Ura, Allah ap, ninye ap, eldana ati dolamak tenda aik dopnamak sukum bukni, anyaik arye dipdongobuka, outam selatan tam ara, Ruben birye deibukba, dadeipdanin, yangalamik yala nang arye, deiyok koubikiba, unamak ninye nirya ara, sik deiyok koubukabikirye nukuka, sik asik ara, outam selatan tam donamake. Ruben yala ninye, sik deiyok kinanye bira, ninye si, Zedur birye deibuk mi, el si Elisur unamle.

¹¹ Anye Elisur ap, neika aik dobuka unamak ninye ara, ninye si nukuka sekik touk, yupa weik, empat puluh enam ribu, lima ratus (46.500) nang, el damuk unamnyake.

¹² Anye Elisur unamla dam ara, Simeon yala ninye arye, sik asik koproba dobikirye, asukum unamnyake. Simeon yala ninye, sik deiyok kinanye bira, ninye si Zurisadai, elce deiamuk mi, el si Selumiel unamle.

¹³ Anye Selumiel ap, neika aik dobuka, unamak ninye ara, ninye si nukuka sekik touk, yupa weik, lima puluh tiga ribu, tiga ratus (59.300) nang, el damuk unamnyake.

¹⁴ Anye Selumiel unamla dam ara, Gad yala ninye arye, sik asik koproba dobikirye, asukum unamnyake. Gad yala ninye, sik deiyok kinanye bira, ninye si Rehuel, elce deiamuk mi, el si Eliasaf unamle.

¹⁵ Anye Eliasaf ap, neika aik dobuka unamak ninye ara, sik si ara, akunum nukuka sekik touk, yupa weik, empat puluh lima ribu, enam ratus lima puluh (45.650) nang ara, el damuk unamnyake. Yala si Deiyoknye Ninye yupa nuki Ruben Zedur el mi Elisur 46.500 Simeon Zurisadai el mi Selumiel 59.300 Gad Rehuel el mi Eliasaf 45.650

Yala si Deiyoknye Ninye yupa nuki

¹⁶ Ati, Ruben yala ninye, sik aunyak ninye ara, yupa pia weik, seratus lima puluh satu ribu, empat ratus lima puluh (151.450) nang unamake. Israel ninye batakuka, yuk mutuku binuka unamak talak ara, sik Ruben yala ninye arye, minop menekuka banamak bukni, like bitinye banamak ninye ara, sik Ruben yala ninye dukdongobuka banamnyake. Yuk Israel yala ninye ara, sik aminyan tamuk yanganamnyake.

¹⁷ Israel ninye yala yuk-yuk nang, sik akunum minop menekuka bacopura, anoutam ara, sik Lewi yala nang, sik aminyan dukdongobuka banamnyake. Ara, sik Lewi yala nang arye, Allah ap, ninye ap, eldana ati dolamak tenda aik ara, sik ayala nang aryuk bobanamnyake. Allah arye, “Sik Israel yala ninye aik nirya, dopnamlum noutam ara, sik Lewi yala ninye dem, sik asik koproba dobikirye, na si eren aik dana-dana tam doupnamnyake,” nyapdeiamuk touk, aninguk winilamik. Tonda, sik bisik balamikce talak ara, yuk-yuk aik dolamik touk winilamikce, anyaik-anyaik nirya, atonun dopnin balamik. Sik bisik ban talak ara, sik yupa yuk-yuk ulamik touk, sik bikilin ning ikamik ning ati, elilamikce, abisikuk balamik.

¹⁸ Tonda, keting kumun tam ara, Efraim yala ninye, sik deiyok kibuka talen nang ati, yupa yuk-yuk nukuka bikilin ning ikdeibikirye, abikilin ning deipmacak dana-dana ara, aik dobuka antanap dongopnamnyake. Sik yupa nukuka aulamik touk winibuka, sik deiyok nang yuk-yuk kibuka ulamik. Aulamika atonun, sik asik babye, yuk-yuk dolamik. Sik deiyok kinanye bira, ninye si Amihud, elce deiamuk mi, Elisama unamlule.

¹⁹ Anye Elisama ap neika aik dobuka unamak ninye ara, ninye si nukuka sekik touk, yupa weik, empat puluh ribu, lima ratus (40.500) nang el damuk unamnyake.

²⁰ Tonda, Elisama dam unamak ninye ara, Manasye yala ninye arye, sik asik dobikirye, asukum unamnyake. Manasye yala ninye, sik deiyok kinanye bira, ninye si Pedasur, elce deiamuk mi, el si Gamaliel unamle.

²¹ Anye Gamaliel ap neika asik dobuka unamak ninye ara, ninye si nukuka sekik touk, yupa weik, tiga puluh dua ribu, dua ratus (32.200) nang, el damuk unamnyake.

²² Anye Gamaliel ap unamla dam ara, Benyamin yala ninye arye, sik asik dobikirye, asukum unamnyake. Benyamin yala ninye, sik deiyok kinanye bira, ninye si Gideoni, elce deiamuk mi, el si ara, Abidan unamle.

²³ Anye Abidan ap, neika aik dobuka unamak ninye ara, ninye si nukuka sekik touk, yupa weik, tiga puluh lima ribu, empat ratus (35.400) nang, el damuk unamnyake. Yala si Deiyoknye Yupa weik nukinge Efraim Amihud el mi Elisama 40.500 Manasye Pedasur el mi Gamaliel 32.200 Benyamin Gideon el mi Abidan 35.400

Yala si Deiyoknye Yupa weik nukinge

²⁴ Ati, Efraim yala ninye, sik yupa pia weik, aunyak ninye ara, yupa weik, seratus delapan ribu, seratus (108.100) nang ulamak touk ubuka, Israel ninye kisikdakuka, yuk mutuku binuka unamak talak ara, sik Yehuda yala ninye arye, minop menekuka banamak bukni, Efraim yala ninye ara, like winilye banamnyake. Yuk Israel yala ninye ara, sik donga tamuk, yanganamnyake.

²⁵ Ura, Allah ap, ninye ap, eldana ati, tenda aik dopnamak sukum bukni, anyaik arye dipdongobuka, outam bagian utara ara, Dan yala nang birye deibikba, dadeipdanin, yangalamik nang arye, deiyok koubikiba, unamak ninye nirya ara, sik deiyok kibuka, ubikirye nukuka, sik asik ara, outam bagian utara, dabu tam donamake. Dan yala ninye, sik deiyok kinanye bira, ninye si Amisyadai deiamuk mi, el si ara, Ahieser unamle.

²⁶ Anye Ahieser ap neika asik dobuka unamak ninye ara, ninye si nukuka sekik touk, yupa weik, enam puluh dua ribu, tujuh ratus (62.700) nang, el damuk unamnyake.

²⁷ Anye Ahieser unamle dam ara, Aser yala ninye arye, sik asik koproba dobikirye, asukum unamnyake. Aser yala ninye, sik deiyok kinanye bira, ninye si Okran, elce deiamuk mi, el si ara, Pagiel unamle.

²⁸ Anye Pagiel ap neika asik dobuka unamak ninye ara, ninye si nukuka sekik touk, yupa weik, empat puluh satu ribu, lima ratus (41.500) nang, el damuk unamnyake.

²⁹ Anye Pagiel unamle dam ara, Naftali yala ninye arye, sik asik dobikirye, asukum unamnyake. Naftali yala ninye, sik deiyok kinanye bira, ninye si Enan elce deiamuk mi, el si ara, Ahira unamle.

³⁰ Anye Ahira ap neika asik dobuka unamak ninye ara, ninye si ara, akunum nukuka sekik touk, yupa weik, lima puluh tiga ribu, empat ratus (53.400) nang, el damuk unamnyake. Yala si Deiyoknye Yupa weik nuki Dan Amisyadai el mi Ahieser 62.700 Aser Okran el mi Pagiel 41.500 Naftali Enan el mi Ahira 53.400

Yala si Deiyoknye Yupa weik nuki

³¹ Ati, Dan yala ninye, sik yupa pia weik aunyak ninye ara, yupa weik, seratus lima puluh tujuh ribu, enam ratus (157.600) nang unyake. Israel ninye kisikdakuka, yuk mutuku binuka unamak talak ara, sik Yehuda yala ninye arye, minop menekuka banamak bukni, Dan yala ninye daulamiki bukni, sik yuk yala ninye nirya akunum banmaki bukni, aminyan talak ara, sik dukdongobuka banamnyake.

³² Israel yala ninye, sik yupa yuk-yuk ap, sik apu yapu nang arye, asik dobuka deiamik touk ubuka, asik dobuka ulamik ninye, sik yupa nukikce, sik yupa ara pia weik, enam ratus tiga ribu, lima puluh lima ribu (603.55) ninye ulamik.

³³ Aning ara, Allah Yahweh arye Musa biti, “Winipnamlulume,” nyapdeiamuk touk, winilamik. Ati, sik Lewi yala nang tonok ara, Israel yala ninye, si nukuka seklamik talak ara, sik Lewi yala nang ap tabakuka, kum nukuka sekamik.

³⁴ Sik Israel yala ninye nirya ara, Allah arye Musa biti, nyapdeiamuk atonun winilamik. Ara, sik apu yapu nang si aulamik touk, ayala yuk-yuk, sik yupa kibuka ulamik touk ubuka, sik ulamikak ara, bikilin ning ikamika amu tamuk, asik dobuka ulamik. Allah arye nyapdeiamuk touk, sik asik yuk-yuk dolamik. Winibuka daulamika ani, binuyik talak babye, sikce deiamnaba, dadeipdanin balamik ninye nirya ap, sik yala ninyeuk tabakuka, yupa pia weik kibuka balamik. Min yuma menekuka balamik nang ap, daulamika ani, aminyan talak balamik nang ap, sik nirya ara, Allah arye nyapdeiamuk touk, ubuka balamik.