Bilangan 19 - Eipomek

Sapi basam bol ining bi uk, uku dongona ati, nyabuk yupu

¹ Allah Yahweh arye, Musa ap, Harun ap ati, nyabuk.

² Na Allah Yahweh arye anggunti, “Aninguk wininamlume. Aning ara, pia kum wininamlume,” nyabuka, mikip arye deipsin yupu ara, anggun bitinye arye, Israel nang nirya ati, laka nyapnamrume. Nyapdumunyeba, sikce kil sapi basam ara, el bol ining bi ninguk, teleb ubuka nenmalye ning, tonda, nong bol nirya pia teleb ninguk kintinip deipnamake. Tonda, asapi basam, ‘Nun bona libuka bobinamsilʼ tenen, el pil dona ati, asapi basam, el kum dam ikin ning deibikirye, tapu kirikuka, libuka balamle ning, pia kum winilamlye sapi basamuk wibuka boyanamnyake.

³ Israel nang arye, asapi basam ara, wibuka boyakirye, anggunti arepsikcopura, asapi bobuka, imamnye el si Eleasar biti, yanuka arepnamlume. Asapi basam bobuka, sik Israel nang nirya, tenda bol arye mitikto doltakan aik, tenda domikce noutam unyakak arye bobuka, pia bai tam dabikiba, imam Eleasar el dam binuka opnamlume.

⁴ Yuk imam nang arye, asapi basam akunum obikcopura, imam Eleasar birye, asapi basam, el ining ton mitik anun, taruk duk deice arye likdongobuka, Allah Yahweh, na si erena ati, tenda bol arye doltakne tenda aik, domikce urasin dam bilirye, like tekbarye deice, binuka purupdonoknamle.

⁵ Winiplyopura, yuk imam nang arye, asapi basam el nong ara, uku dongonamnyake. Uku dongonamak ning ara, ani. Ara, asapi basam bola ap, ining ap, tup ap, deisuruk ap, aning nirya ara, uku dongonamake. Winibikcopura, imam Eleasar birye dinmaliba, aning nirya uku dibuka, sirya daknamle.

⁶ Aning nirya, uku dongobikceba, ukubuk arye tuba dinmalye talak ara, imam Eleasar birye, ara yo ton mitik anun ton ap dobuka, tonda mitikto yo tingkul, el si hisop yo tonok ap, tonda aling wilamak touk tapu, cang ining bi tapu, tonok ap dopropnerye, aning nirya ara, dobukaplirye, ining bi sapi basam obuka, uku dongopmakiba, uku dinmalyak noutamuk, yanuka uku dongopnulule.

⁷ Aning-aning nirya, akunum wiplye talak ara, aimam Eleasar bira, el nong ap, el ongolamlye baju ap ara, adiparyuk mek likdopnamlule. Aning nirya, akunum winiplyopura, Israel nang arye, tenda arye mitikto doltakan tenda aik domikce, ulamikcak noutam ara, tuba tonap tamubuka wekelbanamle. Bukni, mek kekena ap, baju mek likina ap, aning winipmalya babye, na kanye ara, ‘Elda malye ning atonun ning ara, talipmoka anya arye, aning tuba aupmalyeura, na dam yanmanto kum unamle. Winibuka daunmalya ani, asum ara, keting kumulbanamle talak ara, tuba tonap, teleb upnamle,’ tenepnamne.

⁸ Aning atonun ton, yuk imam bukni, elce aining bi sapi basam bobuka, uku dongopnamlanye babye, el nong babye, el ongolamuk baju babye nirya ara, mek likdopnamlule. Bukni, mek kekena ap, baju mek likina ap, aning winipmalya babye, na kanye ara, ‘El malye ning atonun ning ara, akunum talipmoka anya arye, aning tuba aupmalibuk, na dam kum yanmanto unamle. Bukni, asum ara, keting kumulbanamle talak ara, tuba tonap, teleb upnamle,’ tenepnamne.

⁹ Na kanye deice arye, tonoknye biti, ‘Anye bira, malye un ning kum, bol pipmaliye binya arye, malye ning kum upmalinye ulula anya arye, na dam yatue,’ tenenunye ton, asapi basam, uku dongopnamakak wekuka yalirye, asapi nong nirya, uku akunum diplirye, atu bukmalye ning nirya, lubukaplirye, atu bobuka, Israel nang unyak doltakan tenda aik domikcak noutam arye, bai tam bilirye, pia telebak kintinip deiamikcakuk, binuka yamubuka deipnamle. Winyamlya ani, aminyan talak ara, sik Israel yala nang, sik malye ulamikce ning nirya ati, ‘Nun malye ning kum kipdeibibirye, tuba ton ap teleb ubibirye, Allah dam binuka unamapʼ tenen, sik mek likina ap, teleb ulina ap ati, mek likina pil ton donamak talak ara, aining bi sapi basam uku diplyopura, atu deiamlye ning dobuka, liknamnyake. Ati, aning ara, telebakuk dokola delinamnyake. Aminyan talak ara, sik malye unyak ning kum danalina ati, teleb mek ap, atu ap tabakuka kintinibikcopura, sik teleb ulina ati, mek likin pil ton donamnyake.

¹⁰ Ura, arup akunum nyapman touk, ‘Asapi basam uku dipmalye, atu bulubuka, deipmalinye babye, el nong ap, el ongolamlye baju ap ara, adiparyuk mek likdopnamle. Bukni, el malye ning atonun ning ara, tuba aupmalibuk, daunmalya ani, asum bukni, keting kumulbalyopura, ‘Anye bira, el malye uamuk ning ara, akunum kum danmale,’ tenepnamne. Ayupu nirya, nyapdeipsin ning ara, tuba-tuba pia ati, winipnin banamlume. Ara, anggun Israel yala nang babye, sik ninye asik nang, anggun mutuku yanuka unamak nang babye, aninguk, pia talibuka wininamlume. Allah arye, Musa ap, Harun ap ati, nyapdeiamuk.

Akunum dipmakce nang bol pina ati, nyabuk yupu

¹¹ Allah Yahweh arye, Musa ap, Harun ap ati, nyabuk. Na Allah arye, na kanye ara, ‘Akunum dipmakce nang, bol piplinye bira, el nong deice malye updeipdanamle. Ati, like tekbarye (7) sum noutam nirya ara, malye ning ara, pia aupmalibuk unamla anya arye, na dam ton kum yaturye, na si kum erepnutue.

¹² Ati ara, like winilye sum, akunum kipliba, amalye updeipdanmalye ning teleb ulina ati, adiparyuk, el nong nirya, mek likin pil donamlule. Tonda atonun, like tekbarye (7) sum akunum kiplyopura, atonun, el teleb kililana ati, el nong nirya mek likin pil donamle. Winipnamla deice arye, teleb ulilanamle. Bukni, winilye sum ap, tekbarye sum ap, teleb ulina ati, mek likin pil kum doplyopura, malye ning ara, el nong deice tuba aupnamlula anya arye, atalak noutam ara, na dam ton, pia kum yaturye. Tonda, na si kum erenamle.

¹³ Aning ati ara, yatanye do nirya, akunum dipmakce nang, sik bol pipmalye bukni, adiparyuk mek likuka, teleb kum kipdeipdalyopura, amalye un ning ara, pia tuba, sik deice aupnamle. Ara, ‘Amalnye ning kum danunilʼ tenen, mek kwebuka dikilan pil, min kum dopmakce ati, na kanye ara, ‘Sik malye ning ara, sik nong deice tuba aupnamla anya arye, na dam ton, pia kum yatinge,’ tenenune. Tonda, sik malye ning, tuba aupmalye deice arye, ‘Na Allah Yahweh, na si erena ati, doltakan tenda aik, pia teleb lek aik, malye ulinyaka anya arye, anyaik dam, pia kum yanganamake,’ tenenune. Ati, aning atonun ululnye bira, yuk Israel nang ansibuka, neika kum unamlule. El anye bira dobuka, pia bai tam yakuka, dopkwetepnamlume. El ap, anggun yuk Israel nang ap, neika una pia kume. Deiyok ara, el nong deice malye upmalye ning, tuba tonap teleb kilina ati, mek likina teleb mek ton, el nong deice kum diklobika anya arye, na kanye ara, ‘El tuba malnye uk ulule,’ tenenune.

¹⁴ Narye anggunti, ‘Aninguk wininamlume,’ nyabuka, tonok ning ton nyapnusine. Ara winipmanto, tonoknye ton, el una ati, doltakan tenda aik dobuka, ulamlye aik noutam arye, diplyopura, yata nang do nirya, anyaik neika unmakce nang babye, anyaik mangkau arye yanuka, weknamak nang babye, dipmalinye dam, akunum winipmanyaka anya arye, sik nong deice akunum pia malye updeipdanamake. Ati, atonun nang ara, like tekbarye (7) sum noutam nirya ara, malye un ning, sik nong deice tuba aupmalibuk unamake. Winibuka unyak talak noutam arye, na kanye ara, ‘Anang, na dam kum yatinge,’ tenenune.

¹⁵ Tonda, kendi mek makau nirya ap, periuk mek makau nirya ap, el bublan tirikilongona kum ning, dipmalinye, el aik noutam upmalye ning nirya ara, akunum malnye uk ulinamle. Aning babye, dipmalinye dam upmalula anya arye, aning dobuka, na dam kum boyatinge.

¹⁶ Aning atonun ton, yata nang do nirya, wa win dam do, yuk bai tam do, talye mangkau arye, yuk nang parang ya arye, opmakiba dipmalinye, el nong bol asukumuk aupmaliba, anggunce anong piplinye bira, akunum malye updeipdanamle. Tonda atonun, wa win dam, talye elcuk dipmalinye biti, el nong bol piplinye ton, akunum malye updeipdanmake. Tonda atonun, ninye weilamakak yanuka, atalye ning ap, atuku ap, yanibuka bol pipmaliye babye, tonda diamik nang, sik yok bol pipmalye nang nirya babye, akunum malye updeipdanmake. Ati, na kanye ara, ‘Sikda pia malnye uk unmake.’ Ati, like tekbarye (7) asum noutam nirya ara, malye ning aupmalibuk, unamaka anya arye, na Allah dam, pia kum yanganamake.

¹⁷ Mangkau arye akunum dipmalinye, el nong do, el yok ning do, pipmalinye bira, winipmalya deice arye, akunum malye updeipdanmalya anya arye, anye bira, ‘Adibaryuk, tuba tonap teleb updeipdatinyeʼ tenen, mek likin pil dopnulyopura, el malye winipmalye ning, kum danalina ati, wininamle. Ara, kil sapi basam bola ining bi ning obuka, uku dongobikiba, uku diplirye, atu bukamlye noutam arye, mitik tonun arye dobuka, pia teleb mek ton, adeice dikilongonamake. Atu deiamikca ani, mitik anun ton, dopropnamle atu ara, periuk mek makau pum tam dongopnamlule. Winiplyopura, teleb mek ton kwebuka, amek makau pum bisikuk dikdongopnamle. Winiplirye, amek ap, atu ap tabaknamle.

¹⁸ Winiplyopura, minop winipnamle ning ara, ani. Yuknye, el malye ning kum bol pipmaliye, tuba telebuk ulamlinye birye, dipmalinye el nong do, el aik do, el yok ning do, akunum bol pipmokba, malye updeipdanmoknye dam binamle. Bilyopura, malye ning kum winipmalinye birye, mitikto yo taruk, el si hisop yo, taruk tonok doproplirye, atu ap, mek ap tabakuka, kintinip deipmok pum tam, dongobuka wipdongoplyopura, akunum malye updeipdanmoknye bira, el nong deice ap, el una ati, doltakan tenda aik ap, atenda aik noutam upmalye ning nirya ap, tonda atenda aik noutam unmakce nang nirya ap ara, sik deice amek dikdonoknin banamlule. Dikdonoknin banmaliba, amalye updeipdanmoknye ap, el aik ap, el aik pum tam upmalye ning ap, el neika unyak nang ap, amek ap, atu ap, tabakmok ning ara, aning nirya deice palipnamlule. Deiyok ara, ani. Ara, yata nang do nirya, akunum dipmalinye, el nong bol pipmalinye ap, el wein dam mangkau arye binmalinye ap, el yok ning mangkau arye bol pipmalinye ap, talye daunmakce nang, sik mangkau arye, akunum dipmoknye, el nong bol pipmalye ning ap, yuk nang arye, bai tam oplopmakinye, el nong mangkau arye, bol pipmalinye ap, sik nirya ara, tuba tonap teleb updeipnamla ati, apil donamlule. Ara, malye ning pia kum upmalinye, elcuk ateleb mek ap, ining bi bol sapi basam uku dibukba, atu batakuk ning ap, tabakuka kintinibuk ning dobuka, hisop yo taruk arye, mitik tonun arye wipdongoplirye, anang sik nong bol deice dikdongopmaliba, sik nong deice, aning obinuka duplyopura, akunuma. Sikda akunum teleb updeipdanmanya anya arye, sikda telebuk unamake.

¹⁹ Ara, malye ning pia kum ululnye, malye ning mangkau arye, akunum bol pipmoknye, tuba tonap teleb kilina ati ara, akunum dipmalinye, el nong bol pipmok sum arye nukuka, like winilye sum, akunum uplyopura, hisop yo taruk arye, atu ap, mek ap, tabakuka kintinip deipmalye ning dobuka, adikilin pil donamle. Aning atonun ton, daunmakca ani, like tekbarye sum ton, akunum uplyopura, tuba ton ap adiparyuk, mek burubuka, dikilin pil ton ap, pil donamle. Amalye updeipdanmakce nang, sik teleb ulina ati, malye kum winipmalinye birye, mek likin pil ara, like winilye sum ap, tonda tekbarye sum ap deice arye, apil dobuka sirya daklyopura, sik malye wamlye ning, sik nong ap, sik ongolamak baju ap, adiparyuk teleb mek arye likdanamake. Winibikirye, daunmakca ani, tekbarye sum akunum kiplyopura, sikda akunum teleb unmake. Atalak arye dipdongobuka, ounamle talak ara, yuk Israel ninye ap, Allah ap, dam ton binuka unamnyake. Apil donamaka deice arye, akunum teleb updeipdanmake.

²⁰ Bukni, malye un ning mangkau arye, bol pipmakce nang nirya ara, arup nyamasin touk, teleb ulina ati, pil kum dobikiba, tuba malnye uk upmalye ning ara, sik ninye ara, tuba pia malye un ninguk wininamake. Na Allah dam, ton pia kum yanganamake. Ati, sik yuk Israel nang unyak noutam ara, malye ning tuba aupmaliba unyak nang ara, neika kum unamake. Sik aninye ara, dobuka, bai tamuk yakuka. dopkwetepnamlume. Deiyok ara, sik malye ning kum kilina ati pil ara, min kum winipmaka anya arye, malye tuba unyake. Narye, anggun malye winin ning kum danalina ati, ‘Winibuka-winibuka mek likinamlume,’ nyapdeipsise ning atonun, ton kum winipmaka atia. Tonda, sik malye winin ning, tuba aupmalya deice arye, na Allah Yahweh, na si eren aik pum tam, Pia Teleb Lek Aik dam kum yanganamake. Ara, malye ning tuba aupmalibuk, anyaik dam yakcopura, anyaik pia malye ulinamaka ati nyapne. Tonda, aning atonun unyak nang ara, na Allah arye, ‘Sikda, na dam pia kum yatinge,’ tenenamne. Deiyok ara, sik nong teleb ulina ati, “Winibuka-winibuka mek likinamlume. Sapi basam uku arye diplyopura, atu bukamlye ning ap, mek ap, tabamunyopura, hisop yo taruk arye, sik nong deice dikdongopmunyeba, sik nong deice obinuka dupnamle,” nyapdeisise ning ara, ton kum winipmanyaka ati, nyapne.

²¹ Anyapdeipmasin yupu ara, wini talak arye dipdongobuka, pia dounamle talak ati, anggun Israel nang arye, aninguk winipnin banamlume. Aning ara, pia kum batanamlume. Ara, malye ning bol pipmakce nang, akunum malye winibikcopura, sik malye winin ning kum kilina ati, narye, ‘Winipnamlume,’ nyapdeipsise touk, mek likin pil donamlume. Anggun tuba tonap, teleb ulina ati, pil dopmalinye, el nong babye, el ongoplye baju babye, adiparyuk mek likilongonauk wininamlule. Tonda, mek likdalirye, bataknamle mek ara, aning ton bol pina kume. Yatanye do nirya, amek ton bol pipnamlanye bira, malye updeipdanamle. Amek bol piplyopura, malye ning bol pipmalula anya arye, atalak arye dipdongobuka, asum noutam nirya ara, malnye uk daunmalya ani, asum akunum iniplyopura, tuba tonap telebuk unamle.

²² Tonda, aning atonun ton, malye un ning tuba aupmalinye birye, bol pipmalye ning, aning-aning nirya ara, aning babye, pia malye ninguk unamle. Tonda, yuknye ton, amalye upmalye ning mangkau arye bol pipmalinye babye, malyeuk unamle. Sik aninye ara, na dam ton kum yanganamake. Bukni, malye unmakce ani, asum akunum inipmalirye keting kumulbilyopura, akunuma. Tuba tonap teleb unamake. Ambusum ato sum ara, telebuk unamake. Allah Yahweh arye, Musa ap, Harun ap ati, laka nyabuk.