Bilangan 18 - Eipomek

Imam nang ap, Lewi yala nang ap, sikce pil donamik ning ati, nyabuk yupu

¹ Allah Yahweh arye, Harun biti nyabuk. An ni koproba arye, deiamsuk mapu nirya ap, an ap, an mapu ap, tonda, sik Lewi yala nang nirya ap ara, na si erena ati, doltakne tenda aik noutam bukni, pia teleb aik, ninye arye malye-malye weik winibikcopura, sik amalye winipmakce ning ati dekna ara, sik Lewi yala nang nirya arye, ikin ning weik dolonamlume. Bukni, na si eren aik pum tam, pil don ning ara, yuk ninye arye, malye ning weik winibiceura, amalye winipmakce ning ati dekna ara, an ap, ance deiamlum mapu ap, narye wenepsiniba, anggun dem, ikin ning dolonalume.

² An ap, an mapu ap arye, Allah el si erena ati, tenda arye doltakana ati domica, urasin tam arye, ‘Imam pil dopnuyapʼ tenen, kintinipnamlum talak nirya ara, anggunce, sik yuk Lewi yala nang nirya ati, “Nun pil dopnuyaba ati, melipsulume,” nyabuka, yukupmunyeba, an apu yapu arye, deiamikba, dadeipdanin, yangalamik nang, sik Lewi tam nang arye, an ap, an mapu ap, anggunti pil arepsise ning ati, talibuka donamlume. Anggunce apil donamunye talak ara, sik Lewi yala nang aryuk, melibuka pil donamake.

³ Sik Lewi yala ninye, na si erena ati, kambing bol arye doltakne tenda aik noutam pil donamak nirya ara, an Harun birye sikti, “Apiluk dopnamlume,” nyapdeipminye touk ubuka, pil donamake. Bukni, sik Lewi yala nang ara, na ap, ninye ap, elana ati aik, Pia Teleb Lek Aik noutam kintinip deiplum ning nirya ara, pia kum wekelbanamake. Tonda, aning-aning nirya, dam kum banamnyake. Aning atonun, tonda na si erebuka kina ati, kam ning obuka, nati arenak, el si mesba dam ap, awamlye ning aning-aning nirya ara, pia kum bol pinamake. Abol pibikcopura, sikce kum kekebikirye, talye parapkabuka, winibikcopura, an ap, anyapman ning bol pibikce Lewi yala nang ap ara, anggun nirya wenepsiniba, dipnalume.

⁴ Bukni, na si erena ati, kambing bol arye doltakne tenda aik noutam, pil yuk-yuk arepkise ninguk, an ap, an mapu ap, sik yuk Lewi yala nang ap arye, anyaik pil donamlume. Sik yuk Lewi yala nang arye, melipsikiba, anggun pil neika donamlume. Bukni, narye anti, “Sik ap neika anyaik noutam pil donamlume,” nyabuka, kum nyapdeipse nang ton, anyaik noutam wekelyakirye, pil kum danamake. Ara, “Pia meme,” nyabuka, yupu sekne.

⁵ Ati ara, Harun an ap, an mapu ap, angguncuk, “Na si eren aik, pia noutam koprop, Teleb Lek Aik noutam ap, siltong teleb ning uku dongonak ap, pil dona ati ara, anggun dem aryuk wekuka, pil donamlume. Ara, ‘Talye nang arye, anyaik wekuka, pil dobikcopura, narye sik Israel nang ati, yu upninliba wenepnyakʼ tenen,” nyapne.

⁶ An tam nang Lewi yala nang ara, yuk Israel nang kan-kan arye, an melibuka pil dona ati, narye dipkoprob akunum wipse. Wipsa ara, an melipkikiba, sik ap, neika pil dona ati arepkise. Tonda, sik ayala nang arye, na si erena ati winibikirye, ance pil dopnamlamak ara, ‘Sikce melibuka donamakʼ tenen, akunum kintinibuka deipsise. Ara, ‘Nati, doltakne tenda aik noutam pil donamakʼ tenen, arepse ning, talibuka pil donamaka ati, kintinip deipse.

⁷ Sik Lewi yala nang arye, na si eren aik bai tam, pil dona teleb bukni, anyaik noutam pil dona ara, imam pil dona ati arepse ning ara, ‘Naʼ tenen aik, Pia Teleb Lek Aik wekuka pil dona ap, tonda kam ning obuka, na arena ati, mesba deice uku dongon pil dona ap ara, an ap, an mapu ap aryuk, angguncuk apil donamlume. Ara, sik yuk nang arye, kum pil donamnyake. Apil ara, anggun pil anya arye, angguncuk donamlume. Deiyok ara, anggunce apil dona ati, na kanye aryuk, anggunti, imam nang kipdeipsise. Ati yatanye do nirya, narye apil dona deiyok ning ati, kum arepsinye birye, el kanye aryuk, “Nara, apil dopnunʼ tenen, anyaik noutam weklirye, pil doplinye bira, el wenena ati, sik Israel nang arye, el obikiba dipnamle.

Israel nang arye arepnabuk, sik imam nang arye, talibuka ulamik ning ati, nyabuk yupu

⁸ Allah Yahweh arye Harun biti, “Aning ara, batakna kume. Pia tenenamlyame,” nyapdeibuk. Anyapdeibuk ning ara, ani. “Na Allah, na si erena ati, arena pia teleb ning kintinibuka, arelyanganamniyak ning nirya ara, an Harun ap, an mapu ap arye, dobuka, uku dongopnamlum ning nirya ara, narye an ap, an mapu ap ati, akunum kintinip deipsise. Ati ara, atalak arye dipdongobuka, doyanamle talak nirya babye, aninguk dolonamlume. Ara, an ap, ance deipminba, dadeipdanin banamlum nang nirya ap ara, atouk wininamlulume. Narye akunum arepsina anya arye, aning ara, pia anggun tenen ninguk unamle.

⁹ Tonda, mesba deice arye, uku dongona kum ning, yuk kintinibuka yanganamak ning ara, pia teleb, lek din ning anya arye, adin ning ara, an ninguk unamla ati, aning nirya dolonamlume. Arelyanganamak din ning, aning-aning nirya noutamak ara, pia teleb lek ning ara, ani. Akunum dabuka kintinipmace din ning, gandum atonun ning ap, malye winipmakce ning pununa ati, bobuka arelyanganamak ning ap, tonda, ‘Malye upmakce ati, talye parapkabuka, oplopsutu bukni, amalye upmapu ning ati lyepsutueʼ tenen, bobuka arelyanganamak ning ap nirya ara, pia lek din ning anya arye, an Harun ap, an mapu ap, anggunuk dobuka dinamlume.

¹⁰ ‘Arelyanamak ning ati ara, ‘Aning ara, pia teleb lek ning ulule,’ tenenamlume. Aning ara, anggun dem unamle. Ati, anggun ninyeuk ara, alek din ning ara, dobuka bimunce, malye una kumak, telebak aryuk binuka deibuka, dinamlume. Tonda, ‘Adin ning ara, pia teleb, lek ninguk ululeʼ tenen, dobuka dinamlume.

¹¹ Israel nang arye, na arena ati, yuk ning ton, kintinibuka, na din sukum urasin tamuk yanuka, erebuka boyakirye, peterepnikirye, boyanamak ning nirya ara, narye akunum arepsina anya arye, aning yuk-yuk ning nirya ara, sik imam-iman nang, sik ninguk unamle. Anya arye, aning nirya ara, narye dobuka, an Harun ap, an mapu tonok ap, anggunce deiplumba, dadeipdanin banamak imam nang nirya ati, anggun deiceuk deipsine. Ara, an ap, an mapu nirya ap, tonda, an kilmapu ap ara, adin ning ara, dobuka dinamlume. Aning ara, pia ati, anggunti akunum kintinibuka arepsina anya arye, wini talak arye, dipdongobuka, doyanamle talak nirya ara, pia awininauk unamlume. Adin ning ara, an ap, an mapu silip noutam arye, narye, ‘Aning ara, malye ning anya arye, kum bol pipnamlume. Tonda, pia kum talinamlume,’ nyapdeisise malye ning ton, kum upmalinye bira, talye parapkabuka dinamlule. Bukni, Israel nang arye, arenamak din ning ara, anggun imam nang, an mapu silip bukni, malye ning tuba aupmalinye bira, aning pia kum dinamle.

¹² Israel nang arye, min yuma ning, yuk-yuk ning nirya, ‘Allah Yahweh, el si erena ati arepnuyapʼ tenen, yuk kintinibuka, arelyanganamniyak ning ara, minyak zaitun mek ap, anggur mek teleb ning ap, gandum ap, tonda sik wa lin ning, yuk-yuk ning nirya, pia teleb min yuma ning ara, narye dobuka, an ap, an mapu ap ati, pia ati arepsine. Aning nirya ara, anggun, ‘Naʼ tenen nang atia. Ati ara, wini talak arye, dipdongobuka doyanamle talak ara, aketing tamun, aketing tamun nirya ara, aninguk dobuka dinamlume.

¹³ Na Allah Yahweh, na si erena ati, bobuka arelyanganamiak ning, min yuma teleb ning, yuk-yuk ning nirya ara, an ninguk unamle. Bukni, an mapu silip unamlum noutam arye, narye, ‘Aning ara, malye ning anya arye, pia kum bol pipnamlume. Tonda, kum talinamlume,’ nyapdeiamsise malye un ning ton, pia kum winiplinye bira, anyapman ning ara, dobuka dinamle. Bukni narye, ‘Aning ara, malye ninge,’ nyapdeipsise ning, malye ning winipmalinye bira, pia kum dinamle.

¹⁴ Ati ara, Israel yala nang, sik unamak mutuku noutam arye, nati, ‘Aning ara, Allah el ‘Naʼ tenen ningʼ tenen, wibuka delinamak ning nirya ara, na Allah Yahweh, na si erena ati, yuk akunum wibuka kintinibuka arenamak ning, yuk-yuk ning nirya ara, sik Lewi yala nang arye dolonamnyake. Akintinibuka, arelyanganamak ning nirya ara, an ap, an mapu silip ap, anggun ninguk unamle.

¹⁵ Aning atonun, Israel nang arye, sik min yuma deipnamak mapu ara, na Allah Yahweh, na si erena ati, kintinibuka arelyanganamniyake. Ura, yata yala ning do nirya ara, amutuku nang babye, tonda anang arye weinyak kam ning, yuk-yuk ning nirya babye, ‘Israel nang arye, Allah Yahweh, el si erena ati arenamap,’ tenebikcopura, na Allah ati kintinibuka, arelyanganamniyak ning ara, an ap, an yala nang, Lewi yala nang nirya ap, sik ninguk unamle. Bukni, sikce min yuma deipnamak mapu nirya ap, tonda ninye arye weinyak ning, min yuma deipnamak kam ning bukni, narye, ‘Ayala ning obuka, dina meme,’ nyapdeisise ning ara, pia ati, kum dolonamnyake. Aning aulye touk, el pununa ati, sik Israel nang arye, dekna ning ton kintinibuka deibikirye, anti arenamkiyake. Aning ara, ninye arye deipnamak min yuma mapu ap, tonda kam ulye ning, min yuma ning bukni, narye, ‘Aning ara, dina meme, na si erebuka kina ati, kum arenamnulule,’ nyabuka, deiamsise kam ning nirya ara, el min yuma mi nirya ati, arenamkiyak bukni, tuba tonap tamubuka, aning nirya pununa ati ara, yo bokuk dobuka, arelyanganamniyake. Akunum arepkikcopura, sikcuk aning tamubuka bobinamnyake.

¹⁶ Sik min yuma deipnamak mapu babye, ninye arye weinyak kam ulye ning arye, deipnamak min yuma ning babye, wala tonok akunum uplyopura, sik Israel nang arye, ‘Aning tamubuka dopropmabeʼ tenen, adiparyuk dekna ning arenamake. Ara, teleb ubuka dekna ati, aning pununa ati, dekna teleb ning ton, dobuka arenamniake. Ateleb dekna ning nukna ati, minop talak arye, “Aning pununa ati, dekna ning winibuka nukmunce, aninguk boyanamlume,” nyapdeiamsiba, na si eren aik noutam, timbang kibikirye, arenamaka atonun, ara dekna weik kat ning, perak limapuluh lima (55) gram bobuka, arelyanganamlume. (Tonok perak keil uang, el ikin ara, duapuluh gerah ulule).

¹⁷ Bukni, min yuma deipnamak yim sapi ap, yim domba ap, yim kambing basam ap, nirya ara, mi min yuma deiplye ning ara, Israel nang arye, ‘Nun ningʼ tenen, tuba tamubuka, kum dopropnamake. Ati, ‘Tuba tamubuka dopropnamapʼ tenen, aning pununa ati, dekna ning ton, kum arelyanganamake. Deiyok ara, aning ara, mapu min yuma deibikce ning ara, na Allah ninguk unamle. Narye, ‘Aning ara, pia teleb lek ning, na ninguk ulule,’ tenenuna anya arye, aning min yuma ning ati, tamubuka kum dopropnamake. Ati, aning pununa ati, keil uang perak dobuka, kum arenamniake. Ara, aning ara, pia lek din ning anya arye, anggun imam nang arye, adiparyuk opmunba, banamle ining ara dobuka, mesba deice binuka, purupmunyeba, mesba deice dupnamle. Tonda, aning kwalipmunce, anggun meta nirya ara, dobuka na si erebuka kina ati, uku dongopnamlume. Winipmunyopura, uku arye, ameta diplyopura, adeice arye, siltong teleb ning welepliba, na Yahweh arye kekepnirye, na kanye deipnamne.

¹⁸ Sapi basam do, domba basam do, nirya meta ara, nati arenamnulum bukni, anyapmasin ning tup ara, an Harun ap, an mapu silip ap, sik yuk imam-imam nang ap, anggun ninguk unamla anya arye, angguncuk dinamlume. Ara, minop talak arye unyaka atonun, nati yanuka, arenamniyak domba basam ara, obukabikirye, el yan sirik tam ning ap, el tara yok ap, kintinibuka dobikirye, na dinamnak urasin tamuk yanuka, erebuka boyakirye, peterepnumunce, dobuka bobalamlum atonun unamlume.

¹⁹ Ati ara, sik Israel yala nang arye, ayala-yala ning nirya, yuk kintinibuka, na si erena ati, bobuka arelyanganamniak ning nirya ara, narye an ap, ance deiplum mapu ap, kilmapu ap, anggun deiceuk arepsine. ‘Akintinip deipnirye arepsene,’ nyabuka, nyalina yupu akunum nyapdeiamse ning ara, anggun ap, anggunce deipmunyeba, dadeipdanin banamak imam-imam nang nirya ara, aninguk talibuka unamlume. Aning ara, nyalin yupu deice arye, akunum nyapdeipman ning ara, anggun ap, na ap, tuba tenena ati, nyapdeipne. Winipmanto ara, garam uwa, yu pia aulamle touk, anyalin yupu babye, pia aunamle. Yuk nang arye, min kum, kum kipdeiptinge, pia ati unamle. Ayupu akunum nyapmasina anya arye, aning ara, min kum, kum danamle. Allah Yahweh arye, Harun biti nyabuk.

²⁰ Allah Yahweh arye, Harun biti ayupu akunum nyabukura, ayupu ton ap, dukdongobuka nyabuk. “Anda yuk ning ap, amutuku tuku ap, arepkiniba, kum talibuka unamlume. An ap, sik Lewi yala imam-imam nang nirya ap ati, amutuku tuku ton bokuka, kum arepnamsine. Ara, narye anggunti, ‘Amutuku arepnamsine,’ nyapdeiamsise mutuku bimunye talak ara, narye anti, wa tuku ton arepkiniba, kum talibuka unamlame. Yuk Israel nang, yala-yala nirya aunyak touk, wa tuku dobuka, talipnamak bukni, anggun Lewi yala nang ara, wa tuku kum dopropnamlume. Anggunce dopropnamlum ning ara, na uka. Ara, na Allah aryuk, anggun Lewi yala nang nirya ati, pia kalikinamsine. Anggun patan ning ara, naryuk arepnamsine. Anggun, ‘Naʼ tenen ning ara, nauk unamsine. Anggunce nati, ‘Elcuk nun patan ning ati, pia arenamsileʼ tenen, na tonok, diba tenebuka unamlume. Na tonok pia ati, talibuka unamlume. Ara, an ap, an mapu silip ap, anggun nirya ati nyapmasin ninguk, pia aunamle.” Allah arye, Harun biti nyabuk.

Lewi yala nang arye, pil deiyok talipnamik ning ati, Allah arye, nyabuk yupu

²¹ Allah Yahweh arye, Harun biti nyabuk. “Sik Israel nang arye, na si erebuka kina ati, arenamak ning, yuk-yuk ning nirya ara, anggun Lewi yala nang deice arepnamsine. Ara, sik Israel nang arye, tanlinyak ning nirya, noutam arye bokuka, sepuluh persen (10%) doprobikirye, aning-aning nirya, arelyanganamniyak ning nirya ara, sik Lewi yala nang deice arenamne. Ati aning ara, sik Lewi yala nang, sik ‘Naʼ, tenen ninguk unamle. Narye sikti, arepneba, anggunce aning talibuka unamlume. Winipnamna deiyok ara, sik Lewi yala nang arye, na Allah si erena ati, sapi bol arye doltakne tenda aik domikcak, noutam talibuka, na si eren pil donamluma ati, aning nirya arepnamsine.

²² Atalak arye, dipdongobuka, doyanamle talak nirya ara, anggun Lewi yala nang arye, na si eren aik dam yamunce, na si eren pil donamlume. Bukni, sik Israel nang, yuk-yuk yala nang nirya ara, na si erena ati, tenda aik dam ton, pia kum yanganamnyake. Aning akunum nyapse ati, aminyan talak talye nang arye, anyaik dam yakcopura, adeice arye, malye winibikceba, sik aninye deice wenena ati, ikin ning deipniba, sik nirya dipnamake, nyapne.

²³ Bukni, sik Lewi yala nanguk ara, atalak arye deiyok koubuka, na si eren pil dona ati, sapi bol arye doltakne tenda aik, kintinibuka domikce noutam, pil donamlume. Tonda, anyaik noutam unamle pil nirya ara, anggun Lewi yala nang aryuk, apil deiyok talibuka donamlume. Israel nang arye, anyaik ati, malye updeibikcopura, anggun Lewi yala nang aryuk, tuba tonap teleb ulin piluk donamnyake. Aning ara, wini talak arye, dipdongobuka, dounamle talak noutam nirya ara, anggun ap, anggunce deiplumba, dadeipdanin banamak Lewi nang nirya ara, aninguk talibuka unamnyake. Tonda, sik Israel yala nang, yuk-yuk ning nirya ati, amutuku noutam arye bokuka, wa tuku ton arepneba, dopropnamake. Bukni, sik Lewi yala nang ara, Israel nang unamak mutuku noutam ara, sik wa wina ati, tuku ton, na arepneba, anggunce wa tuku talibuka, kum unamlume.

²⁴ Narye, Lewi yala nang ati, wa tuku ton kum arepnamne deiyok ara, nyapnusise. Ara, “Sik ayala nang talibuka una ati ara, sik Israel nang, yuk-yuk ning nirya arye, talibuka unamak ning ara, noutam arye bokuka, seper sepuluh (10%) dobuka, na Allah Yahweh, na si erebuka kina ati, arelyanganamniyake. Arenamniyak ning ara, anggun Lewi yala nang ati, akunum kintinibuka arepsise. Angguncuk, aning-aning nirya, dobuka talipnamlume.’ Adeiyok ati ara, narye, ‘Israel yala nang nirya, wa tuku ton arepnamsin bukni, sik Lewi yala nang ati ara, yuk wa tuku ton arepneba, talibuka kum unamake,’ nyapdeipsine.” Allah arye, Harun biti nyabuk.

Sik Israel nang yuk-yuk ning nirya arye, sik talipnamak ning bokuka, seper sepuluh (10%) ton dobuka, Allah ati arenamak ning ara, “Sik Lewi yala nang arye, aning nirya dobuka talipnamake,” nyabuk yupu

²⁵ Allah el si Yahweh arye, Musa biti nyabuk.

²⁶ Anyapdeipmakin yupu ara, ance sik Lewi yala nang ati, binuka nyapnulyame. Winipnamlyame. Israel yala nang nirya arye, sik talipnamak ning, yuk-yuk ning nirya bokuka, na si erebuka kina ati, seper sepuluh persen (10%) arelyanganamniak ning ara, anggun imam-imam nang arye, dopropmunce, aning noutam arye, ton bokuka, seper sepuluh bokuka, kintinip deipnamlulume. Aning ara, anggunce na Allah Yahweh, na si erena ap, si erebuka kina ati, arenamnulume. Ara, Israel nang nirya arye, ayanuka arepnamak ning, seper sepuluh arepnamak noutam arye bokuka, anggun imam-imam nang arye, aning ton dobuka, na Allah Yahweh ati, arenamnulume.

²⁷ Anggun Lewi yala nang arye, aning kintinibuka, yuk deilinamnulum ning ara, winipmanto, sik Israel nang arye, sik anggur mek winiryuk ning ap, gandum yala winiryuk ning ap, wa webuka kouamunye ning, min yuma ning ap dobuka, na Allah ati arelamniyak touk, aning babye, anggun imam nang arye, aning dobuka, nati arenamnulume.

²⁸ Wininamluma atonun ning ton, na Allah Yahweh, na si erebuka kina ati ara, yuk teleb ning ton bokuka, arelyanganamlume. Ara, anggun Israel nang, yuk-yuk ning nirya arye, min yuma ning aning-aning nirya noutam arye, seper sepuluh (10%) bokuka, yuk kintinibuka, na Allah Yahweh ati, arelyanganamniyak ning ara, sik Lewi yala nang arye dolonamnyake. Adopmunye ning, yuk-yuk ning nirya noutam ara, anggunce ton bokuka, seper sepuluh ton dopropmunce, kintinibuka, na Allah Yahweh, na si erebuka kina ati ara, ton bokukapmunce, anggun deiyoknye, imam Harun biti, binuka arenamlume.

²⁹ Ara, yata yala ning nirya do, Israel nang arye arebikiba, adopropmunye noutam ara, pia teleb ninguk bokuka, ‘Aning ara, nun ni Allah Yahweh, el ninguk ululeʼ tenen, dolonamlume. Dopropmunce, na si erebuka kina ati, arelyanganamnulume. Aning noutam arye bokuka, pia teleb ning ara, ‘Nun ni koproba Allah Yahweh, el ninguk unamleʼ tenen, na si erebuka kina ati, aning dobuka, Harun biti arelyanganamlume.

³⁰ An Harun birye, sik Lewi yala nang nirya ati, nyanamlyame. Israel nang yala-yala nirya arye, sik min yuma ning, pia teleb ning bokuka, na Allah ati arepnicopura, anggun Lewi yala nang arye, aning akunum dopropmunce, seper sepuluh ton bokuka, na Yahweh ati arepnumunyopura, narye anggunti teninamsine. Winipmanto ara, wa wiamlinye birye, el wa webuka kouamlya deiyoknye birye, anggur mek ap, gandum yala ap, min yuma ning ara libuka, na Allah si erebuka kina ati, arinulul touk, yuk israel nang arye, min yuma ning arelamniak ning ara, ‘Sik lewi yala nang babye, tamubuka arepniake,’ tenenamne. Ara, na kanye ara, ‘Sik Lewi yala nang, sik wa kum upmalibuk winipmanto, aning ara, sik wa tuku noutam arye dobuka, na arena atonun ning unamle,’ tenenamsine.

³¹ Ura, anyapmasin ning atouk, seper sepuluh ning akunum bokuka arepnumunyopura, ton tuba aupnamle ning nirya ara, anggun dem aryuk, dobuka dinamlume. Ara, dan talak do, dan sukum do nirya, aning yuk-yuk ning nirya ara, anggun kanye aryuk, ‘Aning dobuka dipnuyabe,’ tenepmunyopura, anggun ap, anggun mapu silip ap arye, aning talye parapkabuka, dinauk unamlume. Deiyok ara, anggunce na si erena ati, tenda bol arye doltakan aik kintinibuka, deiamikce noutam arye, pil donululuma ati, aning ara, anggun dekna atonun ati, akunum arepsine. Aning ara, anggun ninguk unamle.

³² Anyapmasin ning dobuka, talye dadipnamluma deice arye, malye kum updeipnamlume. Ara, anggun Lewi yala nang nirya arye, Israel yala nang arelyanganamak ning noutam arye bokuka, min yuma winye, pia teleb ning, seper sepuluh ton dobuka, na Allah Yahweh, na si erebuka kina ati, akunum arepnamnuluma ati nyapsine. Israel nang arye, nati arelyanganinyak ning ara, pia teleb ning, ‘Naʼ tenen nang atonun, din ninguk ulul bukni, anggunce min yuma pia teleb ning, seper sepuluh ning bokuka, dopropmunce, na Allah ati, tamubuka arenamnulume. Winipnamnuluma deice arye, malye kum kipdeipnamamlume. Tonda, Israel nang, yuk-yuk ning nirya arye, arelyanganamak ning ton, malye kum kipdeipnamlume. Ati ara, na nyapdeipmasin touk, dipkoprob akunum winipmunyopura, na yupu kum yanipnamnuluma ati, kum wenebuka opsinirye, kum dipnamlume. Telebuk unamlume. Allah Yahweh arye, Harun biti nyabuk.