Bilangan 17 - Eipomek

Harun el kama kwapu bongobukce, kita pobuk ning ati, nyabuk yupu

¹ Allah el si Yahweh arye, Musa biti nyabuk.

² Ance Israel nang ati nyapminba, sikce kama dua belas nirya arepnamkinyake. Akama ara, Israel ninye kan-kan bukni, sik yala yuk-yuk aunyak touk, tonda sik apu yapu nang, yuk-yuk daunyak touk. ubuka nukmince, 12 kama dopropnulyame. Sik yala yuk-yuk, deiyok kibuka taleamikce nang arye, akama arepnamkinyake. Akama arepkikiba, ance akama bol deice, sik si seknamlyame. Israel ninye yala yuk-yuk, deiyok kibuka talibik nang, sik siuk sekenamlyame.

³ Tonda, Lewi yala nang, sik kama deice ton, ance Harun el si sekenamlyame. Aning atonun, Israel ninye yala yuk-yuk aunyakce, deiyok kibuka talibik nang aunyak touk, sik kama memebuka arepkikcopura, akama deice, sik si yuk-yuk sekdeipmince, kintinipnamlyame.

⁴ Akunum kintinipminyopura, na ap, ninye ap, eldana ati, kambing bol arye dolamak tenda aik boyanuka kintiniplumakuk, boyanamlyame. Tonda, narye, “Aning ara wininamlume, aning ara pia kum wininamlume,” nyapdeipse yupu, keil pala deice sekuka arepsiba, ance libuka deiplum marikna pum tam, amarikna damuk, akama 12 boyanuka delilyanulyame. Amarikna dam ara, atalak-atalak nirya, an ap, na ap, neika epdanuka, yupu sisikinyamak ati nyapkine.

⁵ Akama nirya yanuka deipminyeba, narye, ‘Israel ninye ati, deiyoknye kipliba, ‘Narye nyapdeipniba, yupu nyalbinamleʼ tenen, narye wipdeipnamne nang, el kama ara, kwapu siliknamle. Akama kwapu siliknamla deice arye, anggun nirya biknamlume. Ara, ‘E, anye bira, nun Israel ninye ati, Allah arye akunum wipdeipmasileʼ tenen, biknamalume. Tonda, anggun Israel ninye kan-kan arye, malye un nang arye, sik teninyak ninguk, kanye tininyakce, tupa-tupa an dam malye yupu nyalyangakinyak ning ara, yupu sekelongonamne. Allah arye, Musa biti nyabuk.

⁶ Nyabukopura, ayupu nirya ara, Musa birye, Israel ninye keken dam binuka laka nyabuk. Nyapdeibuk ati, Israel ninye bukni, yala yuk-yuk, deiyok talibuka ulamik nang arye, sik kama yuk-yuk boyanuka, Musa dam arebik. Akama ara obarye, dua belas (12) yanuka arebik. Tonda, Lewi yala nang ati, kama tonok ton deibik bukni, aning ara, Harun el kama kibuka ati, 12 kama adeipmek kan-kanuk, Harun el ning yanuka, tabakuka deibik.

⁷ Winibikopura, Musa birye, akama obarye (12) nirya ara, boyanuka, Allah Yahweh ap, ninye ap eldana ati, domikce, Allah arye, “Aning ara, wininamlume. Aning ara, pia kum wininamlume,” nyapdeiamukce, areamuk ning, Musa birye, keil pala deice sekdeiamuk yupu, boyanuka marikna pum libuka deiamuk ning, amarikna dam yanuka deibuk.

⁸ Aning nirya akunum winibikce, mapmareka berekukopura, atalak ara, Musa adiparyuk, Allah Yahweh ap, ninye ap, eldana ati, kintinip deiamikce domik tenda aik noutam wekelbiyuk. Musa anyaik biyukce, dipdeyukura, Lewi yala nang, sik kama bukni, akama deice Harun si sekamikce, boyanuka deipmek kama ara, akunum kwapu silikmokba eibuk. Akama ara, akunum kwapu silikmokce, bongobuka kita pobukopura, yo duk el si ketapang, moubuk. Ara, ketapang yo duk mouamlya, wisilamle atonun ubuk.

⁹ Winipmokopura, Musa birye, akama nirya dobukabukce, Israel ninye dinmekakuk, yanuka peterebuk. Winibukce moubuka peterebukba, awinimuk ning nirya, sik asing arye eibikce, bikik. Winibikopura, Israel ninye yala yuk-yuk, deiyok kiamik nang arye, sik kama yuk-yuk, awinimuk ning nirya eibikce, ‘Se, yata wiripmasil do?’ tenebuka, sik yuk-yuk deiyok talibuka ulamik touk, akama tamubuka doprobik.

¹⁰ Musa birye, aning nirya yanuka, peterebukba eibikopura, Allah Yahweh arye, Musa biti nyabuk. “Harun el kama kwapu silikmal ning ara, tuba tamubuka boyamince, na Allah arye nyapdeipmase yupu libuka, deiplum marikna damuk yanuka, deipnulyame. Ayanuka deipnamalam kama ara, Israel ninye arye, moubuka bikikirye, ‘E, aning ara, Israel ninye kan-kan bukni, Korah ap, el tam nang ap arye, Musa nyamuk yupu kum kekelamika deice arye, Allah el yupu yaniplobika ati, Allah arye anang nirya ati, wenebuka oplobuk ning ara, eibupu.’ ‘Winyamsuke,’ tenebikirye, Israel yala ninye arye biknamake. Tonda, “Min arye Israel yala ninye malye upmaki bukni, nun atalak unmap ninye ara, tuba malye kum upmabe,’ tenebuka, kanye moubuka unamake,” nyabuk.

¹¹ Allah Yahweh arye, Musa biti, “Aning ara, winipnulyame,” nyabuk touk, Musa birye, aning nirya atonun, akunum winibuk.

¹² Aning nirya Musa birye, akunum winibukopura, sik Israel ninye ara, ilil pia weik ubukba, sikce tamubuka Musa biti nyabik. “Se, Allah arye, ayupu nyapdeipmasila ara, nunda dipkoprob ikin ning dobukabibirye, dipnauk unamabe. Allah arye, nun nirya wenebuka opnamsil do?” nyabik.

¹³ Tonda, sikce, “Winipmanto ara, atalak ara nunce, Allah ap, ninye ap, eldana ati, el si erena ati, tenda aik dam bipyopura, adiparyuk dipnamabe. Ati ara, nun aminyan talak unamaba ati, ‘Kamuk tuba unamabe,’ kum tenenamabe. Nun ilil unmasile,” nyabik.