Bilangan 16 - Eipomek

Ninye winilye sik si, Korah ap, Datan ap, Abiram ap, sikce, ‘Musa el yupu ton kum kekepnamapʼ tenen, lik tenebikce malye ubik ning ati, nyabuk yupu

¹ Ura, Lewi yalanye, Kehat birye deiamukba, elce, deibuknye, el si Yizar birye deibuknye, Korah birye, Musa biti, malye kibukce malye yupu nyabuk. Amalye yupu nyanmok talak ara, Ruben yalanye birye deibukba, deiamik nang winilye arye tonap, yupu tabakuka, malye yupu nyabik. Sik awinilye nang si ara, ani. Datan ap, Abiram sikda, Eliab el mapu ulamdik. Tonda, Pelet el mi On ulamuk.

² Tonda, Korah birye Datan ap, Abiram ap, On ap ara, amutuku ulamik Israel ninye arye, sik deiyok kibuka una ati, wipdeiamik deiyok nang ara, 220 nang ton erepdeibikba, Korah birye aulamik nang bobukabukce, sik nirya tabakukabikce, Musa dam binuka, malye yupu nyabik.

³ Sik anang nirya, tabakuka adiparyuk, Musa ap, Harun ap, sik dam biyik. Biyikce, nyabik, “Musao, ance tonap kum winipnulyame. Akunum winipmalame. Yata deiyok ati, Israel ninye ara, ‘Malye ning nirya batakmunce, pia lek teleb nanguk unamlume,’ nyabuka, tupa-tupa nyasilyam do? Nun nirya ara, Allah el kanye delin ninye akunum unyabe. Tonda, nun ni koproba, Allah Yahweh, nun kan-kan aulule. El si eren aik ara, nun unyap noutam ulule. Aning ara, anda yata deiyok ati, an bidamnye binyuk, erepdeipdalam do? Aning ara, “Israel ninye nirya, sik deice tam unune. Sikda, mitik mambul bukni, ‘Nara weik mambulnye ununeʼ tenen, erepdalamce, maknya kintinipdalam do? Yuk nang ara, an atonunye kum unyaka ati do?” nyabuka wenebik.

⁴ Ayupu nyabikba, Musa kekebukopura, ‘Seʼ tenen, Musa kanupdongobuka, tuku deice bukukce, el urasin ara, tuku damuk deibukce, Allah Yahweh ati morobuk.

⁵ Musa birye Allah ati, akunum morobukopura, Musa birye Korah ap, elti melibuka yanmek nang nirya ati, nyabuk. “Mapmapya bereklyopura, beren tam talak aryuk, Allah elce dipkoprop, ‘Nara atia, na unye ning ara, ani. Tonda, na pil donya deiyoknye bira atia,’ nyana ap, ‘Na dam yanmanto nang ara, ani. Sikda na mapu koproba ara, ani,’ nyabuka, laka nyan ning ara, nyapsilyopura, kekepnamabe,” nyabuk. “Nyabuka, wipsilya deice aryuk, ‘Allah el pil dopnarye, el dam bobinmantonye bira, aniʼ tenen, kel bikikuka unamabe,” Musa birye nyabuk.

⁶ “Ati ara, wipnamlume. Mapmapya bereklyopura, beren tam ara, Korah an ap, an melipmakiyak nang ap, anggun nirya ara, adiparyuk, siltong teleb nyan ning ati, libuka deipmunce, boyanuka uku dongon ning ton boyanamlume.

⁷ Winibuka aning boyamunce, Allah Yahweh el dam ara, siltong teleb nyan ning boyanuka, uku dongon ning eitam deipmunce, uku seknamlume. Winipmunyopura, nun neika bibirye, apil dopmunyeba, Allah arye winipnamal deice arye, yatanye, ‘Allah el pil dona deiyoknye wipdeipnamle do?’ tenen, biknamabe. Ambusum aning eipmapya deice aryuk biknamabe. Bukni, na kanye ara, anggunce ayupu nyapmanulum deice arye, anggunda akunum malye upmalume,” Musa birye nyabuk.

⁸ Nyabukopura, Musa birye, ayupu ton dukdongobuka Korah biti, nyabuk. “Lewi yala nango, anggunda na yupu uk, moubuka kekepnululume.

⁹ Anggun Lewi yala nango, tenipdelulume. Israel ninye si erenyak Allah ara, elce anggun Lewi yala nang ati, akunum wipdeipsuke. Ara, ‘Sik Lewi yala nang ara, Israel ninye kan-kan arye wipniba, na si eren aik, na ap, ninye ap, eldana ati ulye aik, pum tam wekikirye, sik Israel ninye ati melipnamake. Anyaik mambul weik pil don nang ati, sik dem donamakeʼ tenen, wipsuka ara, ‘Aning ara, mambul weik,’ kum tenepmalumce, amalye yupu nyanmalum do? Anggunce tenepmalum ara, ‘Apil ara, mitik ning anya,’ tenepmalumce, malye nyanmalum do?

¹⁰ Korah an ap, an melipmakiyak nang, sik Lewi yala nang nirya ap ati, Allah arye, ‘Na pil donamniyakʼ tenen, akunum erepdeipmasuke. Allah el si eren aik pum tam wekelbanamluma ara, pia teleb pil kum tenepmalumce, malye nyanmalum do? Bukni, anggun mandipna kanye bobuka, malye kipmalumce, ‘Kume, Korah an ap, Lewi yala nang ap ara, imam nang ton kipdeipsutue,’ tenepmalumce, malye nyanmalum do?

¹¹ Ati ara, aning patanmasilba, nati malye yupu nyapmanuluma deice arye, an ap, an melipmakiyak nang ap, anggun nirya arye, Allah ati malye yupu binuka nyapmalume. El ti akunum yanipmalume. Tonda, Harun bira, yata tonye unmalba, elti malye yupu ton nyabuka, el nong deice deipmalum do? Anggunce, elti binuka, kum nyanmalum bukni, dipkoprob Allah Yahweh, elti malye nyapmalume,” Musa birye, Korah ap, el melin nang ap ati, nyabuk.

¹² Musa birye, “Eliab el mapu bitinye, Datan ap, Abiram ap ati, binuka nyapmunyeba, yarurake,” nyabuk bukni, sik anang bitinye arye, “Kume, nun kum yanuname,” nyaprik.

¹³ Nun Mesir mutuku ulamupu talak ara, pia teleb ning, aning-aning nirya koupneba, pia teleb ubuka papmanto mutuku ulamupu bukni, ance, nun nirya boyanukapsulumce, ateleb mutuku batakuka, boyasulumba, nun nirya aning-aning kum ulye mutuku, pia pata mutuku aboyasulumba, asukum dipnamap do? Aning winipsuluma ara, pia ikin ning, nun nong deice akunum deipsulum bukni, yate deiyok ati, tonap tabakuka, weik ikin ning ton arepnusilam do? Ara, ance, ‘Nara, aninye nirya talenamne,’ teneplumce, nun deice tam kipdamince, nunti, ‘Winipnamlume, winipnamlume,’ nyabuka, malye kilisilyam do? Winipsulumcuk, tonap ikin ning dipnusilama ati, nyapmabe.

¹⁴ Ance nun boyanuka, amutuku noutam boyangalamsulum ning ara, dipkoprob akunum bikmabe. Amutuku ara, pia tuku teleb mutuku kume. Amutuku noutam ara, aning-aning weik tonun kum ulule. Tonda, wa wina teleb tuku ap, anggur wa wibuka kouamikce wa tuku, telepkak ap bobisiliba, talibuka unamaba ati, amutuku noutam boyasulum do? Nun kanye ara, aning pia kume. Nun kanye ara, ance tilila yupu nyapsimince, nun Korah yala nang ap, nunti melipnamsiyak nang ap ati, nun wenena ati, nun asing tulubuka opnamsilam do? Ati ara, nun kum yanuyabe,” nyabuka, Datan ap, Abiram ap arye, nyaprik.

¹⁵ Nyaprika ati, Musa pia yu weik ubukba, Allah Yahweh ati nyabuk. “Sik anang arye, Allah an si erebuka kina ati, yanuka arepmakiyak ning ara, dolon kume. Aning atonun, narye sik anang weinyak kambing ato ning, sik keledai basam tonok babye, kum dopropse. Tonda, sik anang nong deice, ikin ning tonok babye, kum deipse. Sikti malye kum kipdeipse. Musa birye, Allah ati nyabuk.

¹⁶ Allah ati, laka nyabukopura, Musa birye tamubuka Korah biti, nyabuk, “Ati, mapmaminya berekliba, beren tam talak ara, an ap, an melipnamkiyak nang, 250 nang ap ara, Allah el si eren aik dam yanamalume. Ara Allah ap, ninye ap, eldana ati, donyak tenda aik damuk, anggun neika yamunyeba, epdanamabe nyabuk. Tonda, asukum ara, Harun babye, asukum unamala ati, anggun babye anggun uku dongonak, ara uku sekuka, siltong teleb nyan ning dongopnamalum ning ati, yuk-yuk kintinibuka boyanamlume.

¹⁷ Tonda, anggun Korah yala nang ap, sik melipnamkiyak nang ap nirya ara, siltong teleb ning deipmunce, uku sekuka, dongon ning boyanamlume. Aning atonun, Harun babye, el ning ton boyanamle. Aning nirya ara, yupa weik, 250 ubuka boyanmamunya arye, Allah el dam erebuka deipnamalume.

¹⁸ Nyapdeipmoka ati, anang ara, uku dongon ning babye, sik yuk-yuk boyayik. Aboyayik noutam ara, siltong teleb nyan ning ati, ton uku sekmeka deice tam deipmek. Winibikopura, Musa ap, Harun ap, sik anang nirya ap, sik neika Allah Yahweh ap, ninye ap, eldana ati dolamik tenda aik bublan dam, yanuka tikik.

¹⁹ Winibik talak ara, Korah birye, sik Israel ninye ati, “Nirya bulubuka yanamlume,” nyabukba, sik nirya bulubuka yayik. Sik nirya yayikopura, Musa ap, Harun ap, tonda Korah ap, sik nirya bisik bublan dam Allah ap, ninye ap, eldana ati dolamik tenda aik dam, yanuka wekik. Yanuka wekikopura, talye karin arye, pia mel paralamle touk dirina ara, Allah Yahweh el dirina, sik dam yayukba, sik awekmek ninye nirya eibik.

²⁰ Winibukopura, Allah arye Musa ap, Harun ap ati nyabuk.

²¹ “Sik aninye nirya ara, Korah ap melipmakba, sik dam tikilyanmak ninye ara, adiparyuk, sik anang dam arye batakuka, yukak bindopdurume. Deiyok ara, na yu upmanilba, narye atalak aryuk, Korah ap, el melin nang ap, atikmak Israel ninye nirya ap, opnirye kum kipdeipnune,” nyabuk.

²² Nyabukba, kekebikopura, sik atikmek ninye nirya ap, Harun ap, Korah ap, nirya ara, sik adiparyuk tuku deice kanipdongobuka bukikce, Allah ati nyabuka morobik. “Se, nun ni koproba Allah, nun tuku ninye ap, talye daulye kam un ning, yala-yala nirya ap ati, kam una deiyok ning, nun kanya ara, an diamuk aresilyame. Ninye tonoknye birye, ton, malye upmok ning ati, Allah ance an mapu, nun Israel yala ninye nirya ati, yu kanye bopmalamce, adiparyuk opnamasilam do? ‘Naio, ati nunda kum opnusilamʼ tenen, moropmakiyabe,” nyabik.

²³ Morobikba, Allah Yahweh arye, Musa biti nyabuk. “Ance sik aninye nirya ati, nyapnulyame,” nyabuk.

²⁴ “Sikce nyabuka moropmaniyaka ati, ance sik ayanuka wekmak ninye nirya ati, ‘Anggunda, Korah ap, Datan ap, Abiram ap, sik tenda aik dobuka, unmakak arye kisikdakuka, yukak binamlume,’ nyapminba, adiparyuk binamake,” nyabuk.

²⁵ Nyabukopura, Musa birye deiyok kubukba, Israel ninye dawekmek nang nirya ap, melibikba, sik nirya adiparyuk, Datan ap, Abiram ap, ulamdikak biyik.

²⁶ Biyikopura, sik Israel ninye nirya ati, Musa birye nyabuk, “Malye upmak nang, Korah ap, Datan ap, Abiram ap, sik tenda aik dobikce, unmaka dam ara, binuka kum unamlume. Tonda kum dinamlume. Adiparyuk balye tamubuka, kisikdakuka yukak bindopnulume. Anggun Israel ninye ara, anggun anang ap, tabakuka kum unamlume. Tonda, anggun Israel ninye arye, amalye upmak nang, sik taleamik ning babye, bol pina meme. Anang sik nong ap, sik taleamikce ning ap, bol pipmunyopura, ‘Allah arye, sik anang obuka kum daneipnamal touk, anggun babye, nirya obuka, kum daneipsilyakʼ tenen, nyapsine.

²⁷ Nyabukba, Korah ap, Datan ap, tonda Abiram ap, sik tenda aik dobuka unmadikak arye, sik Israel ninye nirya ara, balye tamubukabikce, kisikdakuka yukak bindobik. Winibik talak ara, Datan ap, Abiram ap, Korah ap ara, sik tenda aik dobuka unmadikak arye, sik ap, sik mapu ap, kilapu ap, sik winiryuk deiamik mapu ap, sik yuk-yuk aulamik touk, sik dolamik aik pum tam arye kutukuka, anyaik bublan damuk yanuka wekik.

²⁸ Winibikopura, Musa birye, nyabuk. “Anggunce nati, ‘Elda Allah Yahweh arye wipdeibukce, deiyok arebukba, apil-apil talibuka dolule. El kanye aryuk, apil talibuka kum dolule,’ Allah arye nati, ‘Wininamlyame,’ nyapnukba, apil donune. Aning teninamnuluma ati, Allah arye aning winipnamala deice arye, eipmunce biknulume. Nara, na kanye aryuk, tenibuka kum pil donune,” nyabuk.

²⁹ Nati, ‘E, Musa bira, dipkoprob Allah arye wipdeipsuke,’ tenepnamnulumʼ tenen, bikilin ning ton eipnulume. Ara, Allah arye, sik amalye upmak nang ati, wenebuka kum oplya ati, kum dibikcopura, biknamalume. Ara, Allah arye anang ati batakliba, sik anang ara, ninye dipkoprob diplamak touk, ubuka dibikcopura, biknamlume. Ara, ‘Kume, Musa bira, Allah elce kum nyapdeibukba, apil talibuka kum dolule,’ tenenamnulume.

³⁰ Bukni, Allah elce wipdeiamnilyeba, apil dolamnyeura, sik anang arye, na dam malye yupu nyapmangu ning ara, nati kum bukni, Allah ati, malye yupu nyapmangua ati, sik anang wenebuka opnamle. Awinipnamal ning ara, min arye ton winilamukba, pia kum elilamik ning winipnamale. Ara, ninye kum winipmanto ning winiplirye, opliba eipnuyabe. Ara, sik tikmak tuku noutamuk likliba, sik ap, sik weinyak kam ning ap, sik talinyak ning yala-yala nirya ap ara, kam kipmanuk, atuku pum tam wekikirye, atuku pum tamuk daulamikca ani, dipnamake. Winiplyeba, anggun nirya eipmunce, biknamalume. Aning eipmunyopura, ‘Aninye ara, Allah Yahweh el yupu yanipmakba, winipmalaʼ tenen, biknamalume.” Musa birye nyabuk.

³¹ Musa birye, ayupu nirya sirya nyayuk talak aryuk, sik tikmek tuku ara, talye karin arye likdebiyuk.

³² Tuku likdebiyukba, sik anang ap, sik mapu nirya ap, atikmek touk adiparyuk, tuku pum bisik wekikba, atuku arye tamubuka sinipdongobuk. Ara, Korah el tam kipmek ninye nirya ap, el mapu nirya ap, el aik neika ulamik ninye nirya ap, tonda sik talilamik ning nirya ara, tuku pum bisik wekikba, kum dayuk.

³³ Sik aninye ara, tuku likdobukba, kam kipman atuku pum bisik wekikce, diplamik nang ulamikak, amutuku si Sheol biyik. Tonda, sik talibuka ulamik ning babye, adiparyuk tuku pum bisik wekikba, kum dayuk. Sik aninye tikmek tuku likukba, sik aninye tuku pum bisik wekikopura, atuku ara tamubuka ansinipdongobukce, dibuka kum dayuk. Atalak aryuk, Israel ninye daulamik mutuku noutam arye kum dayikba, tuba tonap, anang ton pia kum eibik.

³⁴ Awinibuka ara, sik Israel ninye yuk daulamik nang, mining dam atikuka dinmekce, eibika ati, ilil weik ubukba, Israel ninye nirya, asukum arye batakuka, bai sakuka banmekce, nyanmek. “Se, nun nirya babye, awinipmal touk tuku likliba, tuku pum bisik wekibiba, tuku arye siknipdongopnamsile,” nyabuka, ngalukuka malye nyanmek.

³⁵ Tonda atalak uk, Allah Yahweh arye, uku buk dopkwetebukba, Korah tam nang, ninye yupa ara, dua ratus lima puluh (250) nang babye, uku arye dibuka, sirya dakuk. Ara, sik anang ara, siltong teleb nyan ning ati, ‘Dupa uku dongopnamapʼ tenen, kintinipmek nang nirya babye, sik nong nirya, uku arye dibuk.

Uku dibukak ati, nyabuk yupu

³⁶ Allah Yahweh arye, Musa biti nyabuk.

³⁷ “Ance imam Harun el mi Eleasar biti nyapnulyame. Nyapminba, elce uku dipmalarye, seklopmal ning bulupnamlule. ‘Ara, emas arye puturubuka memebik ning, apiring deice uku sekuka, siltong teleb nyan ning ati, uku dongopnamapʼ tenen, boyanmek ning ara, tuba aupmal ning ara, bulupnamlule. Tonda uku dibuka, atu bukmal ning ap, uku kalum ap ara, dobuka yukak bodonoknamlule.

³⁸ Auku dipmalce, seklopmal emas ara, wipnulyame. Ara, uku ap, siltong teleb nyan ning ati deipmek ning ara, wini talak ara, aning pia lekuk ulule ati, aning wipnulyame. Korah tam nang, sik 250 nang arye, aning boyanmangurye, uku dongopmangu siltong teleb ning nirya ara, malye upmangu nang arye, wininmangu ning ati, Allah el uku arye, sik malye nang nirya, akunum dibukba dipmek bukni, emas batakmangu ati, wini talak aning ara, lek ning akunum upmale. Ati, aemas binuka dopmince, memen ning martalok arye teikminyeba, pala mitik tonun uplyopura, kam ning obikirye, uku dongona ati memepdeibik ning, el si mesba deice ara, emas arye kalupdongopnulyame. Ara, sik Israel ninye arye, aning eibikirye, ‘E, aning ara, malye winyamik nang ati, Allah arye, asum wenebuka opmuk ning ara, ani,’ tenebikirye, bikinamaka ati, bikilin ning ati, mesba kalulongona ara, emas arye memedeipnalame.” Allah arye, Musa biti nyabuk.

³⁹ Nyabukba, Musa birye, ayupu binuka, imam Eleasar biti, laka nyabukopura, imam Eleasar birye, uku dipmokce, sirika batamok ning, emas nirya ara, bulupdeibukce, el mapu ati nyabukba, sikce aning deibuka teiknaba, teleb winin ning deice deibuka, teikikura, pala kibukba, aning dobuka, kam ning opnarye, uku dongonak ati, mesba kintinip deibika deice kalupdongobik. Ara, Allah arye, “Winipnamlume,” nyapdeibuk touk, ubik.

⁴⁰ Amoupdeibik ning ara, Israel ninye eibikirye, asum Allah arye, Korah yala nang ati wenebukce, tuku likdobukba, tuku pum bisik biyikce, diplamik nang unyakak sukum biyik ning ap, Allah arye uku dopkwetebukba, Korah tam nang nirya dibuk ning ap, tuba tamubuka tenebikce, bikik. ‘Ara, emas teikuka, mitik pala kibukba, amesba deice deibik ning eibikce, bikinamakʼ tenen, bikilina ati, aning kintinipdeibik. Tonda, Harun tam nanguk, Allah dam yakirye, siltong teleb nyan ning ati, arepnamting bukni, Harun yala kum nang arye, yuk ninye yala-yala nirya ara, apil pia kum dopnamtinge. ‘Aning babye biknamakʼ tenen, aning kintinip deibik. Ura, yuk yala ninye nirya ara, ‘Allah el si erena ati, uku ap, siltong teleb nyan ning ap, el dam yanuka areptibye,ʼ tenebikce nang ara, asum winibuk ning tuba tamubuka tenibikcopura, ‘Ilil weik upnamleʼ tenen, bikilin ning deibik. Yuk yala ninye arye, malye kibikirye arebikcopura, Korah ap, el melin nang ap, obuka kum daneibuk touk, unamake. Ayupu nirya ara, Allah Yahweh arye, Musa el kekenak nyapdeibukba, elce Eleasar biti, binuka ayupu nyabukba, kekebukce, anyapdeipmok touk, ubuka pil dobuk.

Harun birye, Israel ninye ati, lyebuk yupu

⁴¹ Daunmeka ani, mapmeka berekukopura, asum ara, sik talye daunmek Israel yala ninye nirya arye, Musa ap, Harun ap ati, derenmekce nyanmek yupu ara, ani. “Ance Allah Yahweh, el mapu koproba noutam arye, ninye weik ton, anggunce akunum opmarume,” nyanmek.

⁴² Winibuka ayupu nyanmekba, Israel ninye weik, kekebikopura, ninye nirya bulubuka wekmekce, ‘Musa ap, Harun ap, sik yupu ton kum kekenamabe, sikti yu weik upmasile,’ tenebikce bulubuka wekikce, Musa ap, Harun ap ati, malya kibik. Winibikce, malye yupu nyanmek talak ara, Musa ap, Harun ap arye, Allah el si eren aik ati aik deibik ning dam, atamuk tamubuka dinmarikba, adomik aik deice ap, dana-dana tam nirya ap, weik dua bum ton koulukukce, yanuka sinipdongobuk. Winibukce, adua deice arye, Allah Yahweh el dirina lak ubukba, sik aninye nirya eibik.

⁴³ Winibukopura, Musa ap, Harun ap, sik adiparyuk, adolamik aik dam bukni, atenda aik bisik bublan dam binuka tikdik.

⁴⁴ Obinuka tikdikopura, Allah Yahweh arye, Musa biti nyabuk.

⁴⁵ “Anggun bitinye ati derepmasiyak ninye ara, sik Israel yala ninye dam arye, an ap, Harun ap, minop kisikdakuka, yukak binuka unamdurume. Sik aninye nirya ara, bulupmakce wekmakak aryuk, yanuka opnune. Like tonok aryuk, malye ninye nirya opniba, kum unamake,” nyabuk. Nyabukba, Musa ap, Harun ap ayupu kekepdikce, tuku deice sakuka malbirikce, kisok tuku tam kanupdongobuka, Allah ati moropdik.

⁴⁶ Winiprikopura, Musa birye, Harun biti nyabuk. “An uku sekuka, siltong teleb nyan ning dongolyam emas piring dobuka, Allah arena ati, kam ning obuka, uku dongonak, el si mesba dam arye, uku sekmamuak arye, uku dopropnalyame. Uku dopmince, emas piring deice deipminba, uku diplyopura, siltong teleb nyan ning, el si ara, duba uku dongopnulyame. Winipmince, aning uku diplyopura, uku dipmalye ninguk, minop boyanuka, sik Israel ninye unmakak dam bobimince, ‘Allah arye, sik malye unmangu ning kiliplirye, kum kipdeipnamleʼ tenen ati, binuka uku sekmince, sik pununa ati, pil dopnulyame. Aning ara, minop winipnulyame. Ara, talye ati kum nyapkine. Deiyok ara, Allah Yahweh el yu, pia weik upliba, mambul weik uk deiyok ning ton arepsiliba, uk weik dinamsile,” Musa birye, Harun biti nyabuk.

⁴⁷ Ura, Musa birye ayupu nyapdeibukba, Harun kekebukce, adiparyuk, anyapdeipmok touk ubuka, Harun birye, emas piring ap, uku ap, siltong teleb ning ap, bopdakuka bikbik abuka, Israel ninye bulubuka wekmeka dam biyuk. Atalak ara, Allah el yu weik upmok ning ara, akunum deiyok koubukce, sik aninye dam ara, mambul weik uk deiyok, akunum koubuka arepmoka ati, ikin weik ning yangayuk talak aryuk biyuk. Harun birye, emas piring boyanuka, sik aninye kan-kan biyukce, siltong teleb nyan ning ati, el si duba talipdakuka, sik aninye malye upmek ning kilina ap, sik pununa ati, uku dongon pil dobuk.

⁴⁸ Harun birye, Israel ninye, sik punun pil akunum dobukopura, ninye dipne uk dina deiyok koubukce, ninye weik atalak aryuk dibik nang bukni, otam ara, sik kam tuba ulamik ninye tikmek. Otikmek bukni, elda noutam bisikuk tikuk. Asukum tikuka umoka deice arye, weik uk deiyok ning arepmoka, kum dayuk. Ara Harun bira, sik kam tuba ulamik ninye ap, atalak aryuk dibinmek ninye ap, sik kan-kan binuka tikukba, ninye dipna ati, deiyok uk arepmok ning ara, kum dayuk.

⁴⁹ Atalak aryuk, deiyok kipdeibuk ninye yupa ara, pia weik, empat belas ribu, tujuh ratus (14.700) nang dibik. Mambul weik uk dibukba, dibik nang nukika ara, wilibuka nukik. Anoutam ara, Korah ap, el melin nang ap, dipmek nang ara, anang ap tabakuka kum nukik bukni, asukum unmekce, uk deice dibik nang ati, nukik.

⁵⁰ Adipnin yangalamika ani, akunum winibukopura, Harun adiparyuk tamubuka, Musa unmokak biyuk. Ara, Allah ap, ninye ap, eldana ati domik aik bublan dam, Musa tikmokak, tamubuka biyuk.