Bilangan 15 - Eipomek

Allah Yahweh el si erena ati, “Yanuka arebikce ning ara, atonun wininamlulume,” nyabuk yupu

¹ Allah Yahweh arye, Musa biti nyabuk.

² Anggun ni Allah Yahweh arye, “Aning ara, atonun wininamlulume,” nyapdeipmasil yupu ara ani,” nyabuka, ance, sik Israel ninye kekenak ati, binuka laka nyapnalyame. Ayupu ara ani. ‘Narye anggun Israel ninye arepnamsine,’ nyalin yupu deice arye, nyapdeiamsise mutuku wekelbinamak talak ara, aninguk talibuka binuka unamnyake.

³ Amutuku noutam bikirye unamak talak ara, sik Israel ninye arye, ‘Nun ni koproba Allah Yahweh ati, nun weinyap domba basam do, sapi basam do, maka yala ning do, dobukabibirye, Allah ati arebibyeba, imam nang arye, uku dongonamake,’ tenebikirye, yanuka arepnamak ning do, akumopura, ‘Allah si erena ati, apil ton donamake,’ nyabuka, nyalin yupu deice nyalamak ning do, Allah arye, ‘Na aren ati, winibuka-winibuka arenamnulume,’ nyapdeiamsuk ning ati do, sik kanye aryuk, ‘Allah si erena ati, urdem arepnuyabe,’ tenepnamak do, atalak nirya, el si erena ati, ‘Aning ton obuka arebibyeba, imam nang arye uku dongobikcopura, siltong teleb ning welepliba, Allah kekeplirye, kanye deilinamsileʼ tenen, arenamniyak do, el nyalin yupu deice arye nyapdeiamlinye birye, boyanuka arelyanganamle ning nirya ara, Allah atibuk arelyanganamnyake.

⁴ Aning-aning nirya, arenamniyak talak nirya ara, yatanye birye do, Allah arena ati, kam ning obuka, Allah arelyanulye talak ara, roti kwaning dana deiyok ning ton, tabakuka arelyanamnulule. Ara, roti kwaning dana deiyok ning, el si gandum do, yakong do, keledai do, aning atonun ton tekinmakiba, tepung teleb ning kintinip deipmakce ning, el ikin ara, 2,2 liter kintinip deipnamake. Tonda, zaitun minyak mek ton wibuka, amek nukna ara, tonok liter ton kwebikirye, aning ap, tepung ap, tabakikirye, boyanuka na Allah ati, arelyanamnyake.

⁵ Tonda, kam ning ton obuka, uku dongopnukca ati, domba basam do, sapi basam do boyanuka, na Allah ati yanuka arepnunikce ning babye, atalak nirya ara, anggur mek tonok liter ap, boyanuka, tabakikirye, arelyanamniyake. Ara, domba basam mi arepnamanikce talak nirya ara, anyapdeipman touk, anggur mek tonok liter ap, tabakuka arenamninyake.

⁶ Bukni, domba basam yim, keting tamun weik akunum nebuk ning, boyanuka arelbinukce talak ara, roti kwaning dana deiyok ning, el si tepung, pia teleb ning kintinip deipmakce ning, el ikin ara, 4,4 kilo ap, tonda zaitun minyak mek, tonok liter anyapce, tabakuka aren ati, boyanuka arelyanamnyake.

⁷ Tonda, na Allah arena ati, arenamniyak ning ara, anggur mek 1,3 liter ton tabakuka, arelyanamninyake. Winibikcopura, aning uku dongobikiba, diplyopura, siltong teleb ning ara, welepliba, na Allah kekepnirye, kanye pia delinamne.

⁸ Winipmanto ara, sapi basam dobuka obikiba, imam nang arye, uku dongopnamak talak ara, roti kwaning dana deiyok ning tepung ton, tabakuka arenamnyake. Ara yate deiyok ning do nirya, sik malye unyak ning kilina ati do, na Allah arye, ‘Na si erena ati arepnamnulume,’ nyapdeiamsise ati do, na Allah ap, anggun ninye ap, neika telebuk una ati, arelyangan ning do, aning-aning arelyanamnulum talak nirya ara, wininamlume.

⁹ Ara, asapi basam boyanuka, arelyanganamak talak aryuk, tepung pia teleb ning ton, tabakuka el ikin ara, 3,3 kilogram ap, tonda, zaitun minyak mek, 2 liter ap, tabakuka arenamninyake. Abitinye ning ton, tabakikirye, boyanamninyake.

¹⁰ Tonda, anggur mek 2 liter tonap tabakuka, boyanamninyake. Aboyanuka arelyanamniyak ning nirya ara, arebikiba, imam nang arye, uku dongobikcopura, uku dipliba, siltong teleb ning welepliba, na Allah kekepnirye, kanye teleb unamnile.

¹¹ Aning wininamlum ning nirya ara, sapi basam yim tonok do, domba basam yim weik ning tonok do, tonda aning kumopura, kambing basam yim do, domba basam mi do, kambing basam mi do, aning nirya arenamnulum talak ara, anggur mek 2 liter ton tabakuka, adiparyuk boyanuka, na Allah ati arelyanamnulume.

¹² Tonda, aboyanuka arelbana ati, kam ning ara, ‘Winibuka nuknirye, arepnune,’ tenebikirye, kam ning nukmakce touk, anggur mek 2 liter tabakuka, arelyanamniyake. Tonok babye, kum batakanamake. Kam ning tonok-tonok arelamak touk, anggur mek 2 liter ton tabakuka, arenamake.

¹³ Anyapdeipman ning ara, sik Israel ninye koproba arye, boyanuka arelyanamniyake. Ara, “Winipnamlume, aning arenamlume,” nyapdeiamsise touk, anggunce na si erena ati, kam ning do, tepung do, yate ning do, aning-aning nirya dobuka boyakirye, ‘Imam nang arye aning boyanuka, uku dongonamakʼ tenen, arelyanamak talak ara, anyapdeipmasin touk, winipnamake. Uku dongobikiba, siltong teleb ning weleplyopura, adice arye, na Allah Yahweh, na kanye teleb ubuka, kanye deipnamne.

¹⁴ Aning atonun, yate mutuku ninye do nirya, sik ninye asik nang ap, sik Israel ninye ap, tia neika yanuka unamak nang babye, sik Israel ninye koproba arye, na Allah ati arenamniyak touk, sik ninye asik nang babye, atonun arenamniyake. Na Allah arenamniyaka ati, uku dongobikiba, siltong teleb ning weleplyopura, adice arye, na Allah Yahweh, na kanye teleb ubuka kanye deipnamne. Ati, anyapdeipmasin ning ara, pia aninguk talibuka unamlume.

^15-16 Na Allah arye, “Aning wininamlume. Aning ara, pia kum wininamlume,” nyabuka, nyapdeipsin yupu nirya ara, anggun Israel ninye koproba babye, yuk mutuku arye yanuka, anggun ap neika ululum ninye asik nang babye, anggun nirya anyapdeipmasin yupu uk, talibuka unamlume. ‘Nun yuk, sik ninye asik nang yuk unamak,’ tenena meme. Ara, na Allah arye, anggun nirya ati, ‘Na mapu unamake,’ tenesunune. Ati, na si erena ati arenamnulum ning ara, anggun nirya ara, narye nyapdeipsise yupu atonunuk, talibuka pia ati unamlume.

¹⁷ Allah Yahweh arye, Musa biti nyabuk.

¹⁸ Ance Israel ninye, sik dam bimince, ‘Allah arye anggunti, nyapdeipmasila ara, atonun nyapdeipmasile,’ nyapnulyame. Ara, “Anggun Israel ninye ati, arepnamsine,” nyabuka, nyalin yupu deice arye nyapdeiamsise mutuku bikcopura, narye sikti, “Aning nirya ara, winibuka-winibuka ukirye, talibuka unamnyake,” nyabuka, ‘Nyapdeiamse ninguk talibikirye, binuka unamnyake,’ nyapdeipmasile,” nyabuka, sik dam binuka nyapnulyame.

¹⁹ Tonok ning ara, ani. Sik amutuku binuka ukirye, wa wibuka kounamak ning nirya libikirye, gandum duk dobuka kintinip deibikirye, roti kwaning dabuka dinukce talak ara, min yuma ara, na Allah Yahweh ati, ton ning ara bokikirye, sik adiparyuk aning dobuka, na si erena ap, ‘Telebeʼ nyana ap ati, arelyanganamninyake.

²⁰ Winipmanto ara, sik gandum wa wibuka, kouamikce ning, minop winye yubuka, sekuka lipmamunye ning ara, teikukapmunce roti kwaning ap libuka, tabakuka dapmunce, anggunce na Allah arena ati, tonok roti kwaning nong kintinilinamnulume. Aning ara, gandum duk min yuma lipmunye ning ara, bama kum danalina ati, teikmunce, teleb ubuka kintinipmunyak arye, na Allah ‘Telebe,’ nyana ati, kintinibuka arelamlum touk, roti kwaning winye dapnamlum talak babye, tonok dobuka na Allah ati arenamnulume.

²¹ Aning ara pia, anggunce deipmunyeba, dadeipdanin banamak ninye babye, roti kwaning min yuma dapnamlum ning dobuka, na Allah ati arenamnulum touk, sik aninye babye, awinye ninguk bokuka, arenamniyake. Ara, atalak-atalak nirya, anggun gandum wa wibuka kouamunya, min yuma yubuka lipmunce, roti kwaning dapnamlum ning ara, na Allah arena ati, yanuka arenamnulume. Ara, na Allah ‘Telebe,’ nyana ati, aren ara, min yuma winye ning kintinilinamnulume.

²² Bukni, winipmanto, yate nang do nirya, anggun Israel ninye kan-kan noutam arye, narye sikti, “Aning wininamlume. Aning ara, pia kum wininamlume,” nyabuka, Musa deice nyapdeisiba, anggun dam yanuka laka nyapsuk yupu ara, anggun mangkau arye lubakipmamunce, kum winipmamunyopura, winipnamlum ning laka nyapnusine.

²³ Ara, na Allah Yahweh arye Musa biti, deiyok koupsirye, “Aning wininamlume. Aning ara, pia kum wininamlume,” nyabuka, Musa deice nyapdeipse talak arye dipdongobuka, anoutam talak nirya ara, aunmalum ninye noutam bukni, dukdongobuka dotalak upnin banamak ninye nirya eipdamunce, ton nang arye lubakipmamunce, narye nyapsise touk, kum arepmamunyopura, amalye upmamumnye ning tuba tamubuka teleb kilina ati, awinipnamlum ning ati, laka nyapnusine.

²⁴ Ara, tonok nang arye do, mangkau arye na arena kum arye, malye upmok bukni, sik yuk Israel ninye arye, aning kum bikikirye, kum tenebikcopura, anye bira, el malye ubuk ning pununa ati, winipnulyame. Sik Israel ninye nirya dukdungonbuka neika, sapi basam yim winiryuk nepmalye ning dobuka, imam nang arebikiba, sik imam nang arye, asapi basam dobuka, uku dongopnamle. Winiplyeura, uku arye diplyopura, siltong teleb ning welepliba, Allah kekeplirye, el kanye teleb deipnamle. Tonda, roti kwaning dana deiyok ning, el si gandum atonun ning ara, aning ton tabakuka arenamninyake. Tonda, aning ap, tabakuka anggur mek ton kintinip deibikirye, 2 liter ton tabakuka deibikirye, aning boyanuka arelyanganamniyake. Tonda, ‘Allah arye nun malye ulamupu ning, kum daneipnamsilʼ tenen, kambing yim tonok ton dobuka, arelyanganamniyake. Aning-aning nirya ara, na Allah arye anggunti, “Wininamlume,” nyapdeiamsise touk ubuka, boyanganamlume. Aning boyamunyeba, uku dongobikiba, siltong teleb ning welepliba, na Allah kekepnirye, kanye teleb unamnile.

²⁵ Winipmunyopura, imamnye adiparyuk, ‘Allah arye nun mangkau arye, malye winipmap ning kiliplirye, kum daneipnamsilʼ tenen, elcuk kam ning oplirye, na Allah arena ati, uku dongoplirye, apil nirya akunum dopliba, Israel ninye, anggun malye umunye ning ara, na Allah arye kum daneipsinirye, teleb kilinamsine. Ara, anggun malye winilulum ning, aupmalye ning ati, kam ning obuka boyakiba, imam nang arye, uku dongopnamaka ati, amalye ning kilibuka, teleb kilinamsine.

²⁶ Anggun Israel yala ninye nirya ap, tonda yuk mutuku arye yanuka, tikilyanamikce ninye asik nang bukni, sik Israel nang kan-kan unyak ninye nirya ara, anyapdeipmasin touk winipmunyopura, anggun malye unamlum ning nirya ara, kum daneipsinirye teleb ulinamsine. Deiyok ara, anggun kum arepnumunyopura, mangkau arye malye upmamunye ning ati, apil dopmunyopura, teleb kilinamsine, nyapsine.

²⁷ Tonda winipmanto, ninye tonoknye ton, el mangkau arye malye uplyopura, anye bira, adiparyuk kambing basam kil tonok, keting tamun tonok upmalye ninguk, boyanuka arelyanamnulule. Aning arepnilya deice arye, anye bira el mangkau arye, malye wamlye ning ara, kum daneipnirye, teleb updeipnamne.

²⁸ Akambing boyalyopura, Allah ap, ninye ap, eldana ati, dolamik aik pil donanye, imamnye birye, kam ning dobuka, na Allah dam bobilirye, uku dongoplyopura, aning kum dalye deice arye, anye bira el mangkau arye malye upnamlye ning ara, kum daneipnirye, teleb kipdeipnamne. Ara, el malye uamuk ning ati, adiparyuk optinye bukni, imamnye birye, kam ning arepnamnila deice arye, amalye uamuknye biti, punupnamle.

²⁹ Na Allah arye, “Aning wininamlume. Aning ara, pia kum wininamlume,” nyapdeipsin yupu nirya ara, anggun Israel ninye koproba babye, yuk mutuku arye yanuka, anggun ap neika ululum ninye tikilyanamikce nang babye, anggun nirya anyapdeipmasin yupu uk, moubuka talepmunce unamlume. ‘Nun malye un ning kilina ati, nun yuk, sik ninye asik nang, yuk pil donamake,’ tenena kume. Ati, anggun malye un ning kilina ati, arenamnulum ning ara, anggun nirya ara, narye nyapdeipsise yupu atonun, aninguk talibuka pia, apiluk dopnamlume.

³⁰ Bukni, Israel ninye tonoknye do, yuk mutuku arye yanuka, tikilyanamikce ninye asik nang do nirya ara, mangkau arye kum bukni, malye kipnikirye, tenepce arye, nati aren ning kum arepnikirye, pia malye upmakcopura, na Allah Yahweh ati, ‘Nun like,’ tenebuka malye, upmanyaka anya arye, atonun nang ara, anggun Israel ninye unamlumak arye, buru tam yakdonokmunyeba, el yuk talye dabinuka unamle bukni, narye anye bira, wenebuka opniba dipnamlume.

³¹ Aning ara, talye ati kum nyapne. Deiyok ara, el anye birye, na Allah Yahweh arye nyapdeiamse yupu ati, yanibuka bataklirye, mandipna kanye bopmalya deice arye, malya kibuka, na Allah Yahweh arye, “Aning winina kume,” nyapdeipsise ning winipmalya atia. Anye bira, el bidamnye, amalye winipmalya dekna ati, wenebuka opniba, dipnamle. El malye upmalye ning ara, kum namin kipnamne. Narye arepneba, ikin ning el nong deice unamlule.

“Sabat sum noutam ara, aning-aning nirya kum wininamlume,” nyabuk ning kum winibice nang ati, nyabuk yupu

³² Ura, Israel ninye arye, Mesir mutuku akunum batakuka, bisik noutam dabalimika ani, pata mutuku binuka ulamik talak ara, Sabat sum deice arye ninye tonoknye ton, uku dan yo bobuka, aik deilinmokba, eibik.

³³ Eibikopura, anye apil donmoka ak, asing eibik nang arye, adiparyuk anye boyanuka, Musa ap, Harun ap, Israel ninye nirya, sik damuk, boyayik.

³⁴ Boyayikopura, sik nirya arye, ‘Se, Allah arye Sabat sum ara, yuk talye pil nirya ara, pia kum donamlume,’ nyapsuka ati, anye bira, el Sabat sum arye talye pil donmau deice arye, malye upmok bukni, ‘El wenena ati, yate wiripnamap do? Nun walwale,’ tenebikce, tia ati wenena aik pum tamuk, asukum binuka deipmekba, ulamuk.

³⁵ Wininmek ani, Allah Yahweh arye Musa biti, yanuka nyabuk, “Anye bira, mangkau arye kume. Elda malye kibuka, na nyapdeipsise yupu yanibukce, malye ubuka ati, adiparyuk wenebuka opmunyeba dipnule,” nyabuk. Ara, el anye bira, anggun Israel ninye unmalumak arye bobuka, buru tam bobimunce, na mapu Israel ninye arye, keil cobuka opmunyeba dipnamle,” nyapdeibuk.

³⁶ Nyabukba, Israel ninye arye, anye bira, sik ulamikak arye bobinuka, buru tam bobiyikce, keil dobukabice, el nong deice, cobuka obikba dibuk. Ara, Allah Yahweh arye, “Winipnulyame,” nyabuk touk, ubuka obik.

“Israel ninye, sik baju mouse tam ara, benang tapu arye urasin teleb kilina ati, aning ara, winibuka-winibuka winamlume,” nyapdeibuk yupu

³⁷ Allah Yahweh arye, Musa biti nyabuk.

³⁸ Ance sik Israel ninye ati, bimince nyapnulyame. Anggunce ongonamlum baju wipnumunyopura, akain mouse tam ara, benang tapu arye, urasin teleb ubuka yangabuka, lilipdongopnamnyake. Winibikirye, akain mouse tam ara, im sukun bukni, mirin tapu arye yangabuka, koupdongopnunyake. Aning ara, anggunce deiyok koubuka winipmunba, anggunce deipmunyeba, dadeipdanin banamak ninye nirya ara, aninguk winipnin banamnyake.

³⁹ Benang tapu arye, urasin teleb ubuka yangapdeipnamlum ning ara, ‘Nun ni koproba Allah arye winyamsukʼ tenen, anggun kel bikna ati, lak kelinamlume. Winipmunya deice arye, narye anggunti, “Aning wininamlume. Aning ara, pia kum wininamlume,” nyapdeipsise yupu ara, anggunce bikilina ati, tupa-tupa tenipmunce, wininamlume. Adeice arye, anggunda na nyapdeipsise yupu, lubakipmunyopura, benang tapu wipnamlum ning eipmunce, tamubuka teninamnuluma ati, lak kipdeipnamlume. ‘Anggun bidamnye, kanye tenina deice arye, malye winipmunyak’ tenen ati, narye “Aning wininamlume. Aning ara, pia kum wininamlume,” nyapsise ning kum winipnin bamunce, luba kipmunyak tenen ati nyapsine.

⁴⁰ Abenang tapu arye, urasin teleb ubuka puturubuka deipnamlum ning ara, narye, “Aning wininamlume. Aning ara, pia kum wininamlume,” nyapdeipsise ning, luba kiplum talak ara, lak kibuka deiamlum ninguk eipmunce, ‘E, Allah arye nyapdeipsuk ning ara, aniʼ tenen, kel bikmunce, nimalyap arye, na amu tamuk tamubuka una ati, laka kipdeipnamlume. Adeice arye, anggunda malye ning nirya batakmunce, teleb ninguk talibuka unamlume. Adeice arye, na kanye delin ninye, lek teleb nanguk umunce, dipkoprob na mapu unamlume. Nara, anggun ni koproba Allah unamsine.

⁴¹ Nara, anggun ni koproba Allah Yahweh unune. Anggunda, Mesir mutuku noutam ulamluma ani, narye lyepsisirye, Mesir mutuku noutam arye boyanamsise. Deiyok ara, ‘Nara anggun ni Allah unyeba, anggunda na mapu unamakʼ tenen, boyanamsise. Ati, na anggun ni Allah Yahweh ara, nauk unune. Narye nyapsine.