Bilangan 14 - Eipomek

Israel ninye arye, Musa dam malye-malye nyalamik yupu

¹ Kanaan mutuku makameil binamik nang arye, Kanaan mutuku ati, ikin ubuk ati, yanuka nyabikba, Israel kili sal kekebikce, ilil weik ubuk ati, alukunyan ara, Israel ninye nirya arye engebuka, malye nyalamik.

² Sik nirya arye Musa ap, Harun ap ati, nyanmek. “Se, teleb ning ara, nun Mesir mutuku noutamak ulamupu talak aryuk diamtibye. Akumopura, mok kum ati, ninye una kum mutuku, apata mutuku noutamak teleb ning ara, adiamtibye. Aning babye telebe,” nyabuka ngaluklamikce, Musa dam malye yupu nyalamik.

³ Ayupu ton nyabik. “Yata ati, Allah el si Yahweh arye nun dopropsukce, amutuku bobinamsil do? Winipsiliba yu nang arye, ya dobuka opsikiba dipnamap do? Tonda winipsica deice arye, sikce nun ninye nirya obuka, sirya daksikirye, nun kilapu ap, mapu ap, bona nirya ap, ubula dopropsikirye, kam tuba unamak deice, ikin deipsikiba, sik amu tam ubikirye talye pil donamak do? Winipnamsiak ati ara, Mesir mutuku tamubuka bitibye. Aning ara pia teleb koprobe,” nyabuka, malye yupu nyalamik.

⁴ Sik Israel nang mamun uk nyalalamik. “Nun Mesir mutuku tamubuka bobana ati, tonoknye ton wipdeibibiba, elce nun Mesir mutuku bobinamsile. Winibipyopura, aning ara pia telebe,” nyalamik.

⁵ Nyalamikopura, Musa ap, Harun ap sikce, ‘Se,’ tenen, ikin kanye bolamdikce, sik Israel kili sal nirya weklamika dam arye, tuku deice maprikce, tukwak dipra unmarik.

⁶ Sik Kanaan tam noutam makameil binamik nang, sik nirya aunmek buk, sik bitinye nang ara, Nun el mi Yosua ap, Yepune el mi Kalep ap, Israel kili sal malye yupu nyalamik ning ati, ‘Se, yata ati malye nyanyak do?’ teneprikce, ikin kanye bobuka, sik ongolamdik baju, kwiribuka kwiliklopdik.

⁷ Winiprikopura, Israel kili sal bulupmeka nirya ati nyaprik. “Kume nun makameil binamupu mutuku ara, pia telebe,” nyaprik.

⁸ Nyaprikce, ayupu ton dukdongobuka nyaprik. “Allah el si Yahweh arye, nunti kanye deipsuturye, bico tenyamsilyopura, aning-aning nirya ubuk mutuku teleb sukumuk, elce nun nirya bobisilirye, amutuku arepnamsile.

⁹ Bukni amapo, nunce Allah Yahweh ati, ‘Nun like’ tenen, yaniptabibirye, malye kum kipnamabe. Tonda, Kanaan mutuku unyak ninye ati, ilil una meme. Ara, Allah el si Yahweh arye, nun dam ulirye melipsilyopura, adiparyuk sik amutuku unyak ninye nirya, obuka sirya daknamabe. Yatanye birye Kanaan tam nang ati melipsetua kume. Allah arye sikti, kalikuka melilamuk bukni, wini talak ara kume. Ati, sik talibuka melipmantonye ton pia, kum ulule. Bukni, nunda nun ni koproba Allah el si Yahweh arye melipnamsile. Ati, Kanaan tam unyak nong cang nang ati, ilil una meme,” nyaprik.

¹⁰ Yosua ap, Kalep ap, sik bitinye arye ayupu nyapdikba, Israel kili sal nirya kekebikce, sik yu ubukba, ‘Keil dobuka sik nong deice dobibirye, abitinye nang opnuyabe’ tenen, yupu talinmik. Sik abitinye nang opmanto ubik bukni, dinmikbuk, Israel nang ap, Allah ap epdanuka, yupu talin aik dam ara, Allah el weik dirina yanuka dopkwetepmokba eibik.

¹¹ Atalak ara, Allah el si Yahweh arye, Musa biti nyabuk. “Dan talak arye, sik akilisal arye nati, ‘Elda talye nyaltakasulule,’ nyabuka malye yupu nyaninyak do? Tonda, narye ninye winipmanto kum pil weik, sik dam dolamseba elilamik bukni, yata talak arye, nati dib tenepnamniak do?” Allah arye nyabuka asibuk.

¹² Nyabukce, ayupu ton dukdongobuka nyabuk. “Narye Israel kili sal kum danalina ati, pia weik uk din ning, sik nong deice deipniba, ninye weik dibikirye, sirya daknamake. Bukni Musa anda, narye melibuka talipnamkine. Adeice arye ance deipminba, dadeipdanin banamak nang nirya ara, akilisal ara, pia weik upra banamake. Tonda, yuk Israel ninye mitik mikip unyak bukni, narye melipkinyopura, ance deipminba, dadeipdanin banamak ninye ara, pia mikip weik arye upra banamake. Tonda, aninye babye weik unamak ning ara, nukmanto kum arye unamake,” Allah arye Musa biti nyabuk.

¹³ Nyabukba, Musa birye tamubuka Allah ati nyabuk. Na nio, anyaplam yupu atouk, sik Israel ninye opminyopura, Mesir mutuku ninye kekepsikirye, akutumansiake. Na nio, an mikip deice arye, Mesir noutamak arye Israel ninye bobuka, amutuku noutamak boyanamsuluma atie.

¹⁴ Nun Israel kili sal, Mesir mutuku noutamak arye boyanamsulum bukni, nun opsiminyopura, Mesir mutuku nang kekebikirye, Kanaan mutuku tam unyak klil sal ati, lak nyanamake. Tonda ninye arye nyalamikba, Kanaan tam unyak kili sal akunum kekelamik ning ara, “Allah el si Yahweh ara, Israel ninye dam ulirye meliliba yanganyake. Tonda, Yahweh el winilul ning ara, Israel ninye elinyake. Allah arye meliamukba, Mesir mutuku noutam arye bisik yangalamik talak ara, Allah dua atonun kibukba, sik Israel ninye adua amu tam yanganyake. Tonda, lukunyan talak ara, uku buk paklamle touk, kibuka meliliba adirin deice arye yanganyake. Keting noutam babye, lukunyak talak babye, menekuka banmalebuk, sik eibuka aminyan banyake,” nyabuka nuklamikba, Kanaan mutuku ninye kekenyaka ati nyapkine.

¹⁵ Ati ara, Allah ance nun dam winilamsulum ning nirya ara, Kanaan mutuku ninye akunum kekelamika ati, nun Israel kili sal nirya, tonok karin aniryuk opsiminyopura, sik Kanaan tam nang arye nyapnamsiake.

¹⁶ Ara, “Allah el si Yahweh arye Israel kili sal ati, ‘Dipkoprop teleb mutuku arepnamsine,’ nyabuka, nyalin yupu deice nyalilamuk bukni, el mikip kum upmanto kibuka ati, Israel kili sal dobuka boyanmanto kum ubukba, pata mutuku ninye una kumak arye, aninye nirya talye oplobuke.” ‘Winibuka nyapsicak’ tenen ati, na nio, ance sik Israel ninye ona meme. Musa arye Allah ati, nyabuka morobuk.

¹⁷ Morobukce, aning ton morobuk. “Ati ara, na nio, narye moropkine. Ance minop talak nyapdeiamsulum touk, an mikip weik nun melina ati, nun deice arepsiminba, ‘Kanaan mutuku wekelbinamap’ tenen, moropkine,” Musa arye nyabuk.

¹⁸ Ayupu ton nyabuk. “Nun ni Allah, ance nyapdeiamsulum ning ara ani. ‘Nara anggun ni Allah Yahweh unune. Na minpola yu kum unulule. Narye anggunti, bico tenena ap, melina ap usune. Ati ara malye wininyak ninye ap, nati yanininyak ninye ara, sik malye ning batakicopura, anang nirya ara, namin kinune. Namin kinamne bukni, dipkoprob kekena kumce, malye pia wininyak nang ati wenenune. Tonda, sik ni yapu arye malye weik winibicopura, dodeipranin, banamak mapu generasi ke tiga ap, ke empat ap, ati ikin ning sik nong deice deibuka wenepnamne.’ Winibuka nyapdeiamsulume,” nyabuka, Musa birye morobuk.

¹⁹ Morobukce, ayupu ton dukdongobuka nyabuk. “Ati Israel kili sal Mesir mutuku ulamupu buk, lyebuka boyanamsulum talak arye diprongobuka, noutamak danyapce, ubuka wini talak babye, nun amalye winilamupa ani, wini aupra yanganyap talak babye, wini talak malye winiyap ning babye, anirya ati ara, nun ni Allah, ance melibuka namin kipsulum touk, tuba namin kinamsilame. Ance nun Israel kili sal ati, pia weik arye bico tenesilyamnye ulyama ati moropkine. Bico tenelamsulum deice arye, ‘Wini talak ara namin kipnamsilam’ tenen, moropkine na nio,” Musa arye Allah ati nyabuk.

²⁰ Musa birye nyabuka morobukba, Allah el si Yahweh arye tamubuka nyabuk. Telebe ance moropmanilam touk, sik Israel kili sal wel nang ati, teleb kibuka namin kipnune.

²¹ Winipnaman bukni, sik kan-kan arye, na weik dirina ap, narye pia weik mambul pil dolamse ning ap, elilamik bukni, nati dib kum teneninyak kili sal nirya ati, wenepnamne. Deiyok ara ani. Dipkoprop nara, Kam Una Deiyoknye unune. Tonda mutuku sirya, im sirya nirya dipkoprob na weik mambul pil donun deice arye, na weik dirina ap, mikip ap, lak kiliba ninye arye elinyake. Abitinye ning arye, dipkoprob nyapsine. Min arye Mesir mutuku noutamak ap, mok cena kum ati ninye kum ulamik mutuku noutamak, Israel kili sal balamik sukum, ninye winipmanto kum pil ap, pia mambul pil ap, dolamsibuk, elilamnik ninye ara, anang dipkoprob wenebuka opnamnarya, nyapkine.

²² Ara, ‘Allah arye melipnamsilʼ tenen, kel biknamak’ tenen, Mesir mutuku noutamak ulamik talak ap, mek kum ati ninye kum ulamik mutuku noutamak ap, narye sirya dakne pil ap, ninye winipmanto kum pil dolamse ning ap, na dirina arelamse ning ap, sik asing koproba arye elilamik nang bukni, kum dib tenenyak kili sal nirya ara, wenebuka opnamne. Na mambul ning elilamik bukni, dib kum tenenyak ati ara, anang ara tonok ton kum bataknamne. Sik nirya wenebuka opneba dipnamake. Deiyok ara, sikce nati yanilamnikce, ‘Allah bira dipkoprob mikip weiknye ulul do, dib ulul do, kum do?’ tenen, teniltolamnike. Ila tuba tonap tagu barye (10) kali deice arye yaniplopnikce, winilelamnike ati nyapne.

²³ Ati ara, sik anang ara tonoknye babye, Kanaan mutuku ton, kum eipnamake. Ara, narye sik apu yapu ati, ‘Kanaan mutuku, pia teleb mutuku arepnamsine,’ nyabuka, nyalin yupu deice arye nyapdeiamse mutuku ara, wini talak unyak wisi nang ara, binuka pia kum eipnamake. Ati, yata kili sal do nirya arye, nati, ‘Allah elda, talinye binya’ tenen, nati yaniltalamnik Israel kili sal nirya ara, Kanaan mutuku pia kum eipnamake. Sik asukumuk dipnamaka ati nyapne.

²⁴ Bukni, na amu tam ubuka melinanye Kalep bira, sik yuk Israel nang atonun kum ulule. Ara, el kanye pum tam tenen ning ara telebuk ulirye, na nyanye yupu kekenilirye, teniltona kumce, na nyanye yupu uk, diba tenebuka winilula ati ara, dilbiyuk mutuku ara, wekelbinamle. Ara, narye melipniba, el ap elce deipliba dadeipdanin, banamak kili sal ap, Kanaan mutuku wekelbikirye talipnamake. Allah arye nyabuk.

²⁵ Nyabukce, ayupu ton dukdongobuka nyabuk. “Ura, sik Amalek yala nang ap, Kanaan yala nang ap arye, Kanaan mutuku mek duman nirya talibuka unyake. Ati ara, ambusum ara tamubuka, yalum bisikuk, anggun adiparyuk, Ining Bi Laut Mekwen dam banyak bisik tamubuka bimunce, mek kum ati, ninye una kumak, pata mutuku bisik noutam binamalume,” Allah arye nyabuk.

²⁶ Nyabukce, ayupu ton nyabuk. Allah arye Musa ap, Harun ap ati nyabuk.

²⁷ “Sik Israel kili sal arye nati, ‘Se, Allah arye ikin ning arenmasile. Aning ara nun like,’ nyabuka, nati malye yupu nyanyak nang ara, akunum kekepse. Dan talak ton, sik Israel kili sal malye unyak nang arye, nati malye yupu nyanamniak do? Sikce malye yupu nyaninyak yupu ara, akunum kekenune.

²⁸ Ati ara, ‘Musa ance sik amalye winin ninye kekepnamak’ tenen, nyapnamlyame. Allah arye nyapsile. Amalye nyanyak nang arye nati, ‘Se malye upnamsil do? Ikin weik unamap do? Amalye mutuku noutamak dipnamap do?’ nyabuka, nati asilelamnik ning ara, anyalamnik atonun ati, dekna arepnamsine. Sikce nati nyalamnik touk, aning dobuka, sik nong deice deipnamne. Tonda, ‘Aning dipkoprob winipnamsil do kum do?’ tenena meme. Dipkoprop nyapsine. Nara, Allah Kam Una Deiyoknye ununa ati, ayupu dipkoprob nyapdeipsinye touk, upnamlarya nyapsine.” Allah arye nyabuk. Nyabukce, ayupu ton tabakuka nyabuk.

²⁹ Anggunce na dam malye-malye yupu nyalulum kili sal ara, mok cena kum ati, ninye kum unyak mutuku noutamak dipnamlume. Winipmunyeba, anggun nong amutuku dipmunyeba, lyupnamsile. Ara, sik umur 20 sekdongobuka eitam ulamik nang, anirya dipnamake. Keting tamun umur 20 anyapce, outam kili sal uk ara, tuba kam unamake nyapne.

³⁰ Bukni, Yefune el mi Kalep ap, tonda Nun el mi Yosua ap, sik uk ara, Kanaan mutuku birikirye eipnamdake. Na taruk erepsirye, sik apu yapu ati, ‘Teleb mutuku arepneba, anggun talibuka unamlume,’ nyabuka nyalamse mutuku ara, abitinye nang sik ap, binuka weknamak bukni, sik yuk Israel kili sal nirya ara, Kanaan mutuku kum weknamake. Sik nirya ara, dipnamake.

³¹ Tonda, sikce sik mapu ati, ‘Se, yuk kili sal arye, nun mapu bobukabikirye, ikin pil arukunamak,’ nyapnulum ning ara, kum winipnamake. Narye melipniba, pia teleb mutuku, Kanaan mutuku wekikirye, pin-pin asa unamake. Anggun wisi kili sal arye amutuku bataklum bukni, sik mitik mapu ara, amutuku binuka pia talibuka amutuku unamake. Amutuku ara, sik mutuku koproba kipdeipniba, pia talibuka unamake.

³² Bukni, anggun wisi kili sal nirya ara, apata mek kum mutuku ninye kum unyak sukum dipnamlume.

³³ Anggun wisi nang arye nati, diba kum tenepnulumce, bataknuluma ati, keting tamun yupa tonok keba koklom dikin tahun (40) noutamak nirya ara, pata mutuku mek kum ati ninye kum unyak upra banamlume. Ara, anggunce na yupu kum kekelamnuluma ati, anggun mapu ara, kanye ikin deice amalye mutuku noutamakuk unamake. Winibikirye, domba basam weinamake. Asukumuk ulamica ani aminyan ara, na Allah ati malye nyalamnik wisi nang nirya, sirya dakuka, dibiceura, sik mapu arye, Kanaan mutuku weknamake. Allah arye nyabuk.

³⁴ Nyabukce, ayupu ton nyabuk. “Anggunce, Kanaan mutuku noutamak like 40 sum deice arye, makameil binamlume. Malye winiplum ning ati, 40 sum deice arye, makameil binamlum atonun, keting tamun yupa tonok keba koklom dikin (40) tahun nirya ara, aning dekna ati arepsiniba, imun kanye bonamlume. Tonok sum ati ara, tonok keting tamun atonun kipdeipsinya deice arye, keting tamun ara, yupa tonok keba koklom dikin (40) tahun pata mutuku mek kum sukum mapnamlume. Atalak noutam ara, ‘Allah yu upmalce, ikin ning arepsile’ tenen, bita kel kipnamlume.” Allah arye nyabuk.

³⁵ “Nara, anggun ni Allah Yahweh unun ati ara, na akunum nyapse touk, dipkoprob winipnamle. Anggun malye-malye winilulum ninye ati, anyapmasin ning nirya ara, dipkoprob nyapsin touk winipnamsine. Anggun nirya, anggun tenen kanye ara, atouk bobuka ululumce, na si yanilulume. Aning ati anggunda pata mutuku mek kum ati, ninye kum unyak sukum ulamunya ani, aminyan ara, asukumuk dipnamlume. Na Allah arye nyapsine,” nyabuk.

³⁶ Allah arye nyabuka ati, Musa birye, ‘Kanaan mutuku makameil binamlulume,’ nyabuka wiamukba, dilbinamik nang nirya dibik. Ara, Musa dam tamubuka yayikce, “Amutuku malye mutuku,” nyabuka, tilila yupu yanuka lake nyabikba, sik Israel kili sal nirya ayupu kekebikce, malye kanye bobuka, Musa biti malye yupu nyalamik. Deiyok ara, adilbiyik nang anyak Allah arye anang ati, yu ubukba wenen ning arebukba, nirya dibik.

³⁷ Aning ara, Kanaan mutuku ati, tilila yupu yanuka nyabik nang nirya, sik yupa ara, 68 deiyok nang ara, Allah yu ubukba, sik anang ati dibina deiyok ning, pia weik uk ning arebukba, Allah el si Yahweh dinmokce, sik nong nirya dibuka sirya dakik. Kalep ap, Yosua ap diamuk, kam tuba unmarik.

³⁸ Ati, Kanaan mutuku dilbinamik nang nirya dibik bukni, tuba kam ulamdik nang ara, Nun el mi Yosua ap, Yefune el mi Kalep ap, tuba ulamdik.

³⁹ Allah arye, ‘Sik Israel kili sal ati wenebuka opnirye, ninye weik arye pata mutuku mek kum mutuku noutamak, batakniba dipnamake,’ nyabuk. Ayupu nyabukba Musa kekebukce, Israel kili sal nirya ati, nyabukba kekebikce, pia ikin kanye bobuka engebik.

⁴⁰ Nyapmoka ati, engenmeka ani, mapmeka berekuk talak ara, beren tam koprop arye, sik adiparyuk bukuka, ‘Otam mutuku dup binuyabe’ tenen, kitintenebik talak ara, “Se, nunda dipkoprob malye awininmabye buk, Allah arye, ‘Terberau Laut Mek Kwen bisik pata mutuku noutam bisik binulume,’ nyapnamsil bukni, min arye nyapdeiamsuk mutuku, kon deice bisik talye lukparabuka binuyabe. Allah el si Yahweh arye, ‘Amutuku arepnamsine,’ nyalilamsuk mutuku ara, atam ubuka ati ara, abisik binuyabe,” nyabik.

⁴¹ Nyabuka panabanmek bukni, Musa birye sik akilisal nirya ati nyabuk. “Anggun wini talak ara, yata deiyok ati, Allah arye nyapdeipsuk ning yanipnulum do? Anggunce, ‘Winipnamabe,’ tenepmalum ning ara, teleb kum kipnamsile. Allah arye nyapmasil ning yaniplopmunce, yuk bisik bimunyopura, anggun tenepmalum ning, nong kum upnamsile. Pia malyeuk kipnamsile,” nyabuk.

⁴² “Ati ara, anggun bana meme. Allah ara, anggun dam kum unmasile. Anggun ap neika kum binulume. Dipkoprop angguncuk kekena kumce, mandipna kanye bobuka bimunyopura, anggun mal olan ninye arye onamsiake.

⁴³ Aning ara, urtalya ati, kum nyapsine. Deiyok ara ani. Sik Amalek yala nang ap, Kanaan yala nang ap, anggun banamlum tam uk, aunmaka anya arye, sikce yanuka opnamsiake. Ura, anggunce Allah ati, ‘Dauplye’ tenen, talye tenepmunce batakuka, anggun kanye aryuk tenebuka ululuma ati, anggun ap el ap, neika kum unamlume. Allah arye kum melipnamsile. Ati, anggun mal olan nang arye parang ya arye sekuka opnamsiake,” Musa birye nyabuk.

⁴⁴ Musa birye nyabuka, wenebuk bukni, sik aninye arye kum kekebik. Aning tenena kum diparyuk, anang kekena kumce, ‘Talya lukparabuka otam mutuku kon binuyabe,’ tenebikce wekelbiyik. Kanaan mutuku otam biyik talak ara, Allah arye, ‘Winipnamlulume, aning ara kum winipnamlulume,’ nyapdeiamuk yupu, liamik yo marikna ara, kum bobiyik. Tonda Musa ap ara, sik Israel nang ap neika kum biyik. Amarikna yo ap, Musa ap ara, baju arye doltakna aik min arye deiamik sukum atuba unmok. Asukumuk unmokba, sik anang diamuk binmek.

⁴⁵ Sik yuk binmeka ati, sik amutuku ulamik ninye, Amalek yala nang ap, Kanaan yala nang ap, yayikce opyakik. Opyakika ati, amutuku deice welepmek Israel ninye, bikbik abuka biyikce, kwarabuka Horma mutuku tam biyik bukni, sik mal olan ninye, tuba dobolbinuka opyakik.