Bilangan 13 - Eipomek

Musa birye obarye (12) nang wipdeibukba, sik wekelbinamik mutuku, Kanaan mutuku ati, makameil biyik yupu

¹ Allah el si Yahweh arye, Musa biti nyabuk.

² “Minop talak arye diprongobuka wini talak babye, Israel ninye yala yuk-yuk unyake. Unyakce, ninye deiyok nang, ayala-yala nirya yuk-yuk talinyak touk, anang kan-kan arye, ninye tonok-tonok bukni, obarye nang (12) wipdeipnulyame. Anang dopreipminba, Kanaan mutuku dilbinamake. Ara, na Allah arye anggun apu yapu ati, ‘Israel ninye winiryuk mutuku, el si Kanaan mutuku arepnamsine,’ nyabuka nyalin yupu nyalamsise mutuku dilbana ati, wipnulyame. Kanaan mutuku dilbinamaka ati, anang wipnulyame.” Allah arye Musa biti nyabuk.

³ Allah Yahweh arye nyabuk ati, anyapmok touk, Musa birye Israel ninye ayala-yala nirya bukni, yuk-yuk noutamak arye, ninye obarye nang (12) wipdeibuk. Wipdeibukce sikti, “Kanaan mutuku makameil bilulume,” nyapdeibukba, Paran mutuku mek kumak tonda ninye babye una kum mutuku dopdeibukba, Kanaan mutuku noutamak makameil biyik.

⁴ Musa birye wibuka dopreibuk nang si ara ani. Ruben yala nang kan-kan ara, Zakar el mi Syamua wipdeibuk.

⁵ Simeon yala nang kan-kan ara, Hori el mi Safat wipdeibuk.

⁶ Yehuda yala nang kan-kan ara, Yepune el mi Kalep wipdeibuk.

⁷ Isakar yala nang kan-kan ara, Yusup el mi Yibal wipdeibuk.

⁸ Efraim yala nang kan-kan ara, Nun el mi Hosea wipdeibuk.

⁹ Benyamin yala nang kan-kan ara, Rapu el mi Palti wipdeibuk.

¹⁰ Zebulon yala nang kan-kan ara, Sodi el mi Gadiel wipdeibuk.

¹¹ Manasye yala nang kan-kan ara, Suhusi el mi Gadi wipdeibuk. Manasye yala nang ara, sik apu koproba Yusup ulamuk.

¹² Dan yala nang kan-kan ara, Gemali el mi Amiel wipdeibuk.

¹³ Asyer yala nang kan-kan ara, Mikael el mi Zetur wipdeibuk.

¹⁴ Naftali yala nang kan-kan ara, Wofi el mi Nahebi wipdeibuk.

¹⁵ Gad yala nang kan-kan ara, Maki el mi Guel wipdeibuk.

¹⁶ Musa birye wipdeibukba, sikce Kanaan mutuku dilbiyik nang ara atia. Winibuk talak ara, Nun el mi Hosea biti, Musa birye winiryuk si, ‘Yosua,’ nyabuka si arebukba, anye asi dobuk.

¹⁷ Awipdeibuk nang ati, Musa birye nyabuk. “Ura, Negeb mutuku noutamak arye bimunyopura, otam mutuku taram welepnululume.

¹⁸ Bimunce, Kanaan mutuku unyak nang ara, mikip asa unyak do, mitang asa unyak do? Tonda, ‘Ninye weik unyak do, mitik tonun do? Tonda sik mutuku ara, yatato mutuku ubuk do?’ tenen, moubuka dipdemunce, moubuka kel biknamlulume.

¹⁹ Ton ning ara, ‘Sik mutuku ara, teleb mutuku do, malye mutuku do?’ tenen, aning atonun, ‘Aunyak mutuku tuku teleb do, malye do?’ tenen, dipdemunce, moubuka kel kipnamlulume. ‘Sik asik domika ara, kunuknak ara, dana-dana tam nirya weik cang poka dobuka antanap dongobik do, kum do?’ tenen, kel biknamlulume. ‘Talye luba kibuka sik asik ara, wektibirye, amutuku nang optibye do, kum do?’ tenen, nirya dipdemunce, bita kel biknamlulume.

²⁰ ‘Ton ning ara, aunyakak ara, kel-kel an tuku do, namin teleb tukwak do, yo weik ulul do, mitik do?’ tenen, moubuka dipdenamlulume. Ton ning ara, sik koulamikce ning, duk moulamle ning ara, eipmunce ton dakuka boyanamlulume,” nyabuka, Musa birye nyabuk. Musa birye anyabuk ning deiyok ara, anggur duk li talak ubuka ati, nyabuk.

²¹ Nyapdeibukba, sikce amutuku noutamak ara, ‘Yata wiribuka unyak mutuku do?’ tenen, dilbiyik. Ara, sik utam mutuku unyak nang ara, mok ap, mek ap kum ati, buppu weik arye ninye kum ulamik mutuku, el si Sin mutuku eitam arye dukdongobuka, Rehob mutuku bisik balamika damak, Hamat mutuku binuka dipra banmek.

²² Sik amutuku noutamak dilbiyik ninye nirya ara, Negeb mutuku uk biyikce, anyapce Hebron mutuku biyik. Winibuka Hebron mutuku binuka wekik. Amutuku noutamak ara, ninye si Anek, elce deiamuk nang, sik si ara, Ahiman ap, Sesai ap, Talmai ap, sik nirya daulamik mutuku binuka wekik. Ara, sik ayala ninye arye, deipdukdanin, yangalamik nyalamik yala ninye ulamik. Tonda, Mesir mutuku noutamak bukni, Zoan mutuku kabul min kum domik talak arye, Hebron mutuku nirya ara, asik domikba, keting tamun kipna tekbarye (7) akunum ubukba, Mesir mutuku noutamak arye, Zoan mutuku domik.

²³ Nyabuka ati, sik amutuku dilbiyik nang arye, makameil binmeka ani, aminyan talak ara, Eskol mutuku lu biyikce, anggur tapu duk pia teleb ning binuka dakikba, ikin weik ubuk ati, bitinye nang arye yo dongobuka caprodik. Atalak ara, yo duk yuk yala bitinye ton dakuka boyayik. Ayo duk si ara, delima ap, ara yo duk ap, dakuka boyayik.

²⁴ Amutuku si ati ara, si dobikce, Eskol mutuku lu nyabik. Asi nyabik ara, sik yupu koproba arye, Eskol nyabik deiyok ara, ‘Asukum ara anggur duk dakmabe’ tenen, nyabuka si dobik. Ara, sik Israel nang arye anggur tapu duk dakmeka ati, asi uk si dobik.

Kanaan mutuku makameil binmek nang arye, yanuka nyabik yupu

²⁵ Allah arye nyabuk touk, Musa birye ninye deiyok nang wipdeibukba, sik wekelbinamik mutuku, Kanaan mutuku ati, makameil binamik talak ara, like weik, 40 sum deice dipra balamikce, ulamika ani, tamubuka sik kwit capu ulamikak uk yayik.

²⁶ Kanaan mutuku binamikce, elilamik ning ap, ulamik ning nirya ap ati, ninye kum mutuku Paran mutuku bukni, Kades mutuku ara, Musa ap, Harun ap, Israel nang ap, ulamikak minopce tamubuka, amutuku uk yayikce, Kanaan mutuku dilbinamik nang arye, Kanaan mutuku moulamuk anggur tapu duk ap, yuk yo duk ap, dakuka boyanamik ning ara, Israel ninye kel kina ati, yanuka laka nyabikba, aninye nirya eibikce, kel bikik.

²⁷ Sikce Musa biti yanuka nyabik. “Ance, ‘Kanaan mutuku makameil binamlulume,’ nyapsulum touk, nunce Kanaan mutuku biburye dipdepu ara, amutuku tuku ara pia teleb ak, tonda yo duk ap, mong mek ap, sapi basam ap, tonda, aning-aning nirya ap, weik aubuk mutukue. Anya arye, an kel kina ati, anggur duk dakuka boyanmap ning ara atia,” nyabuka, yanuka laka nyabik.

²⁸ Ayupu nyabikce, yuk yupu ton nyabik. “Amutuku ara pia teleb mutuku bukni, amutuku unyak ninye ara, cang weik nang ap, nong konoba-konoba nang ap nenyake. Sik nong nena weik ap, mikip weik nang ap unyake. Tonda, sik cang weik asik domika ara, keil poka cang arye dobuka antanap dongobike. Ati, yuk nang arye welebuka wekmanto kum unyake. Ati amutuku ninye sik mikip pia weike. Tonda, minop talak nebuka ulamuk cang weiknye, el si Anek birye deiamukba, dadeipdanin, yangalamik nang, sik mapu ara, cang weik nebuka, mikip weik nang ton aunyake,” nyabik.

²⁹ “Tonda, Amalek yala ninye ara, Negeb tam unyake. Het yala ninye ap, Yebus yala ninye ap, Amori yala ninye ap, mutuku kon deice unyake. Tonda, Kanaan yala nang ara, weik laut mekwen dam arye dipdongobuka, ‘Yordan mek kup-kup unyake,’ nyabuka, yan laka nyabik.

³⁰ Sik Kanaan mutuku makameil binamik nang arye, nyabik bukni, sik kan-kan bukni, yuknye el si ara Kalep birye, yuk Israel ninye nirya ati, ‘Yupu nyana ton kume,’ nyabuka, Musa biti nyabuk. “Kume, Kanaan tam adiparyuk wekelbibirye, amutuku unyak ninye ap oplobibirye, malye kibuka amutuku talibuka unamabe. Aning ara dipkoprob winiptibye, nunda mikip weik atia,” Kalep birye nyabuk.

³¹ Nyabuk bukni, el ap makameil binamik nang noutamak, ton nang nirya arye tamubuka nyabik. “Kumde, nun mikip ara mitik tonun bukni, sik omutuku noutamak unyak nang ara, mikip weik anya arye, nunce obuka malye kum kiptibye,” nyabik.

³² Nyabika deice arye, Kanaan mutuku eibik ning ati, malye yupu weik nyalbinmekak, yuk Israel ninye arye, Kanaan nang ati, ilil ubuk. Sik tilila yupu deice arye nyalanmekce, nyanmek ning ara ani. “Kume, nun makameil binamupu tam ara, pia kanye ikin mutuku ubuke. Yuk ninye arye amutuku wekicopura, oplobikiba nirya dibinyake. Asukum noutamak eipmapu ninye nirya ara, nong konoba cang weik nanguk nenyake.

³³ Ton eibupu nang ara, ninye nong cang ap, konoba-konoba nang ap neikirye unyake. Ara Anek birye, deipkirikdop nang, sik yala si ara, Nepilim yala nang anye arye, sikce nunti dilina ara, talye kwising atonun elisinyake. Nunce sikti, aning atonun tenebupe. Sikce, nunti, ‘Ninye nong mitik nanguk,’ tenepsetinge. Ati nunce anang ati, obuka malye kum kiptibye,” nyabik.