Bilangan 12 - Eipomek

Miryam ap, Harun ap arye, Musa biti malye yupu nyaprikba, wenebuk yupu

¹ Musa domuk kil ara, Israel yala kil kum bukni, yuk mutuku kil, amutuku si Kus mutuku kil dobuka domuk. Winyamuka anya arye, el kil ara, Kus mutuku kil ulamuk ati, Miryam ap, Harun ap arye, akil ati malye kanye boprikce, ‘El malye kipdeipnunam’ tenen, Musa biti ara, malye yupu nyapin balamdik.

² Ara, yuk nang kekenak ati, sikce nyalamdik. “Allah el si Yahweh arye dipkoprob Musa damuk, el yupu nyabuka arelul do? Kume, anggun ton tenipdelulume. Nun deice babye ton, Allah arye el yupu nyasiliba, nun ton kum nyanyam do, kum do?” nyabuka nyalamdik. Ayupu malye nyalamdik ning ati, Allah el si Yahweh kekebukce, yu ubuk.

³ Sik abitinye nang ara, kanye talima erena ap, malye kina ap, ubukba, adeice arye nyalamdik bukni, Musa bira kanye talima namin asa arye tenebuka, ulamuknye binya. Winilmuka anya arye, elda ninye mutuku-mutuku nirya ulamika ara, el atonunye ton kum ulamuk. Tonda, Musa kanye talima namin asa arye ulamuk atonun nang ton, tukwak mutuku-mutuku nirya noutamak kum unyake. Elda kanye talima erenye pia kum atia.

⁴ Sik Miryam ap, Harun ap arye, malye yupu Musa biti nyapdayika ati, atalak aryuk, Allah el si Yahweh arye, sik awinilye nang ati nyabuk. “Harun ap, Miryam ap, Musa ap, anggun winilye nang ara, adiparyuk Israel ninye, sik weken aik baju bol doltakna aik dam arye batakuka, na si eren ati doltakna aik dam buru tam yanululume. Ara, ninye ap, na Allah ap, ansinilin aik dam, bai tam yanululume,” nyabuk. Nyabukura, sik nirya anyaik dam biyik.

⁵ Nyabukura, biyik talak ara, Allah el si Yahweh adiparyuk, dua kan-kan arye kouluka, el ap elan aik bublan dam yanuka tikukce, Miryam ap, Harun ap ati, ‘Asukum yarurume,’ nyabukba, sik bitinye el dam birik.

⁶ Birik talak ara, Allah el si Yahweh adiparyuk sik bitinye ati nyabuk. Kekenurume! Anggun noutamak nara Yahweh, na yupu laka nyalulnye ton aulyopura, el kel kina ati, kum mapmalye talak ara, el kanye talima noutamak laka nyaniba kekelule. Tonda, lengdar maplya deice arye, na wininye ning laka nyaniba, eibuka kel bikilule. Tonda, kum mamlye talak bukni, mambul yupu nyapnyopura, kekenulule. Tonda, yuk talye nang nirya ara, aning nirya kum eibuka kel biksiting bukni, narye arepneba, na pil donye birye mambul ning dilyalirye, narye elti, na yupu laka nyalinune.

⁷ Bukni, na amu tam pil donanye Musa ulul atonun, yuk nang ton kum unyake. Ara, na amu tam ubuka, na pil donilinye Musa ara, na nyanye yupu nirya, teleb-teleb ubuka pil donulule. ‘Winipnulyam,’ nyanye ning nirya, tonok babye ton kum batakalule. Na mapu Israel ninye, sik unyakak noutamak ara, ‘Musa el tonoknye birye, na mapu nirya, sik kalikna deiyoknye unamle’ tenen, akunum wipdeipse. Na tenen ninye pia moubuka talilul deiyoknye ulule.

⁸ Winilula ati ara, Musa ap, na ap nun neika epdanimirye, yupu sisikinyame. El ti ara, narye yupu laka nyalinune. Musa biti, domona yupu ning ton kum nyalinune. Tonda, yuk nang nirya kum bukni, na yupu tanmanye talak ara, Musa el uk ara, na nong urasin kum dilinulul bukni, kanye dem ara, elinulule. Aning nirya ati ara, anggunce Musa elti, malye yupu nyapmarum ning ara, yata ati ilil kum upmasil do? Yata deiyok ati, el deice malye yupu nyarumunya arye yanirurum do? Musa ara, na pil dolulnye ulula atia, nyabuka, Allah el si Yahweh arye, Harun ap, Miryam ap ati wenebuk.

⁹ Ayupu nyabuka, Allah el si Yahweh arye, sik abitinye nang makal dam ati, weika arye derebuka, sik anang batakuka biyuk.

¹⁰ Allah el si erena ati, doltakna aik dam, weik dua atonun kibuka yanmoka ani, akunum yupu nyabukopura, tamubuka welebuk. Welebiyuk talak ara, Miryam el nong deice nirya ara, bol kona suse atonun talibukce, el nong bol deice nirya kurubuk. Kurubukba, el makalnye Harun eibukce, ‘Se’ tenen, mambul kirikuk.

¹¹ Winibukba, Harun birye Musa biti nyabuk. “Se, nun nio, nunda kanye bona kum nang winilamak touk, nun walwal arye nyapmanume ati ara, nun bitinye nang makal arye, an deice malye winipdeipmakinama ati, yu kanye bopsiminyake. Nun malye winipmanumu ning tuba kum tenenamlyame. Tonda, nun wenena kume. Amalye ning, nun nong deice arepmasilam ning ara, ila tuba tamubuka doproplyame,” nyabuka morobuk.

¹² Morobukce, ayupu ton nyabuk. “Naio, na makal kil Miryam biti, kilapu arye lyun mi deipmakibuk, diplirye el nong bol ton tam lyulamle atonun ubuk ning ara, kum daneiptumce, na makal kil kweteptume,” nyabuka morobuk.

¹³ Nyabukura, Musa birye Allah el si Yahweh ati morobuk. “Naio, Miryam el bol deice, bol kona suse deiyok ning dilya ning ara, kum daneiptume. Na makal kil kweteplyame na nio,” nyabuka morobuk.

¹⁴ Atalak ara, Allah el si Yahweh arye Musa biti nyabuk. “Winipmanto ning ara, el li birye el kilmu asok deice, maka tulupdeiptopura, like tekbarye alye kum uptu do? Aning ati ara, Israel ninye anggun doltakna aik dam arye batakuka, el yuk bai bilirye unmalye buk, like tekbarye sum akunum uplyopura, ila tamubuka, anggun asik damuk tamubuka yatue. Ara, el wenena ati nyapne,” Allah arye nyabuk.

¹⁵ Nyabuka ati ara, Miryam bira, sik Israel ninye dobuka ulamik aik dam arye ubuka, el yuk bai tam biyukce, binuka unmok buk, Allah arye anyapmok touk, like tekbarye akunum mabukopura, tamubuka yayuke. Miryam bira, bai tam binuka el yuk ulamuk talak nirya ara, sik yuk Israel ninye asukum arye ubuka, yuk mutuku kum binamik. Tuba asukumuk ulamik.

¹⁶ Like tekbarye sum akunum ubukba, Miryam tamubuka yayuk talak ara, Israel ninye ara, Haserot mutuku arye batakuka, Paran mutuku biyik. Ara, Paran mutuku ara, mek kumak anya arye, ninye ton kum ulamik. Amutuku noutamak biyikce, sik baju bol doltakna aik binuka dobik.