Bilangan 11 - Eipomek

Allah el si Yahweh arye, Israel nang wenena ati, uku dopkwetebuk yupu

¹ Bisik balamik talak ara, Israel ninye ikin kibuka, kanye imun kanye bobikce, Allah dam malye-malye nyalamikba, anyalamik ning ara, Allah el si Yahweh kekebukce, yu ubukba, uku buk sik kan-kan dopkwetebukba, sik cang kain bol doltakna aik domik ning sirya, talye diamuk dibukce, anyaik dana-dana sirya tam ara, aubuk ning diamuk dibuk.

² Auku dinmok talak ara, Israel ninye arye ilil ubukba, malye yupu nyabuka, Musa dam anyuk biyikce morobikba, Musa birye, Allah el si Yahweh ati morobuk. Amorobuk ning kekebukce, auku buk tangabuk.

³ Uku dibuka ati ara, sikce amutuku si ati, ‘Tabera’ nyabuka, si dobik. Ara, sik yupu deice arye, ‘Tabera’ nyabika deiyok ara, ‘Uku dinmale’ tenen, nyanyake. Amutuku si dobik ning ara, Allah Yahweh arye, sik noutamak uku buk dopkwetebukba, dibuka ati, amutuku si, ‘Tabera,’ nyabuka si dobik.

Allah arye Israel ninye ati, “Tup ning arepnamsine,” nyabuka, nyalin yupu nyabukaka ati, yalma atonun maka arebuk yupu

⁴ Israel nang ara, Mesir mutuku batakuka mok ap, mek ap, kum uamukba, buppu weik ati, ninye kum ulamik mutuku noutamak balamik talak ara, sik kan-kan bukni, yuk yala nang, ninye asik nang ap, neika balamik. Anang ara, malye kanye bobuka, malye-malye winilamik nanguk ulamik. Anang ara, ‘Tup ninguk diptibye. Aninguk patasulule,’ malye nyabuka ngaluklamik. Sik aninye nyalamikopura, sik yuk Israel ninye babye, ‘Se, tup ning diptibye toura, teleb uptibye. Ati, yatanye birye, tup ning arepsutue do?’ nyabuka, malye nyalamikce, mambul kirikuka engelamik.

⁵ Tonda nyalamik, “Se, Mesir mutuku ulamupu talak ara, mekwen pum bisik ulul ning, mekwen pum ikan weik dobuka dilamupu. Adilamupu ning ara, dekna kum, talye urdemuk dobuka dilamupu. Tonda, sumik ap, tapu duk atonun ning, el si semangka ap, tonda bawang merah ap, bawang putih ap, aning-aning weik dilamupu. Aning ara, pia teleb ati, aning atibuk, pia tuba tenenyabe.

⁶ Bukni, wini talak ara, nun aning-aning babye ton, pia kum ati ara, Allah aresulul ning, el si manna, aninguk libuka dinyaba ati, nun nong mitang usulule. Ati, nun lik weik usululba, aning manauk dinyap ning ara, nun like,” nyalamik.

⁷ Mana kwaning, el nong ara, mitik duk-duka ning, tonda el urasin ara, yo pia babye, mitik tonunuk ubuk.

⁸ Aning ara, lukunyan dekne duk-duka purwu mok celamle atonun, kibuka saklamuk. Winipmanak, Israel ninye beren tam koproba arye binuka, dobuka yanopura, kat ning deice arye, ateikne ning arye, teikinmana ani, mitik kibuka, sice buknopura, makau bisik yulamik. Winipmana ani, akunum opnopura, doropnarye, roti kwaning kipnura, bum teleb uka dilamik. Mana kwaning el to ara, mitik anun, zaitun duk teiknarye, aminyak goreng atonun ap, yubuka dilamak touk, ubukba dilamik.

⁹ Israel ninye ara, ninye kum ulamik mutuku noutamak balamik talak nirya ara, lukunyan im deice arye, kurye dei tukwak saklamuk talak ara, manna kwaning ton, im deice arye saklamuk.

¹⁰ Atalak ara, Israel ninye nirya, sik doltakna cang kain bol aik yuk-yuk bublan dam tiknarye, malye nyabuka engelamikba, Musa kekelamuk. Sikce malye nyalamik ning ati, Allah el si Yahweh arye kekelamukce, yu weik ubukba, malye kanye bobuka tenelamuka ati, Musa birye, ‘Se, sik aninye ara, Allah ati malye weik nyanyaka ara, yata ati, do? Wininmaka ara, yata deiyok ati do?’ tenelamukce, ikin kanye bolamuk.

¹¹ Musa utenebukce, Allah Yahweh ati asipdeyuk. Nara, an amu tamuk unirye, an piluk donuna anya arye, yata ati ance kanye imun ning arepmanilam do? Tonda, narye yata ning malye winipsa ati, ance yu kanye bopmanilam do? Kanye kum deipmanilamce, yu upkila deice arye, Israel ninye nirya, sik kanye imun ning, yata ati na deice deipmanilam do? Allah ance yata ning ati, ‘Israel ninye bobanamle’ tenen, wipdeiamnulum do? Yata ning malye winipsa ati, kanye imun ning, na deice deipmanilam do?

¹² Narye, sik Israel ninye nirya deipseba, na mapu uk unyak do? Kilapu arye, sik deiamikce, mapu iribuka balamak atonun, yata deiyok ati, ance nyapnulumba, aninye bobuka banun do? Ance sik pununa nang ati, ‘Ateleb mutuku nuknamsine,’ nyamlum mutuku bana ati, bisik banyak talak nirya, yata deiyok ati, narye aninye bobuka banun do? Sikti, na ikin weik unulule.

¹³ Sikce tup ning moronyakce, malye yupu nyaninyaka anya arye, narye dan tam arye binuka, bobuka yatinirye, sik Israel ninye nirya ati, tup ning yanuka areptinye do? Ara, sik yupa pia weik unyakce, sikce na dam engelyanganinyakce, ‘Se, tup ning arepsilyame,’ nyabuka, malye nyaninyaka ati nyapkine.

¹⁴ Nara tonoknye anya arye, Israel ninye nirya, sik pataplye ning ati, naryuk kum melibuka areptinye. Aning ara, na ikin weik unulule. Nara, apil kum dopmanto kipnile ati, na mambul kanye bopne.

¹⁵ Aning ati ara na nio, ikin ninguk arepnuniminyopura, dipkoprob ning ara, na adiparyuk ona telebe. Aning nirya ati tenepnirye, na ikin kanye bobuka, teniltona unulule ati ara, aning ara, kum winipmanto upne. Bukni, ance nati, ‘Telebnye,’ tenepniminyopura, melipnutumba, na ikin weik kum upniliba, na kum dipnamne. Musa birye, Allah ati nyabuk.

¹⁶ Musa birye nyabukura, Allah el si Yahweh arye, tamubuka Musa biti nyabuk. “Israel deiyok nang, akunum kel kiamlum nang ara, wisi-wisi nang ap, deiyok nang ap, yupu lipsisikuka bokolina deiyok nang ap, yupa bitinye keba nakub dikin (70) nang bulubuka deipnalyame. Winipminyopura, anang bobuka, na si erena ati, cang kain bol aik, ninye ap, Allah ap, ansinilina aik dam boyaminba, an ap, na dam yanuka tiknulyame,” Allah arye nyabuk.

¹⁷ Nyabukce, ayupu ton nyabuk. “Na si eren aik dam yanuka tikmunyopura, asukum anyuk yanirye, yupu nyapnamakine. Na Dib Kanye ap, mikip ap, akunum arepkise ning ara, bokukapnirye, adeiyok nang babye ton, sik deice ton deipnamne. Winipniba, anyuk na mapu Israel ninye noutamak pil dopminyeba, kanye imun ukilya ati, sik awisi nang ap, neika sik Israel ninye ati, pil donamlyame. Ara, an ikin ukilye ning ara, sik adeiyok nang arye, kwa dibuka melipnamkiyake. Winibikikca deice arye, mitik kanam asa ton upnamkile. Aminyan talak ara, an dem aryuk, Israel ninye kum bobinamlyame.” Allah arye, Musa biti nyabuk.

¹⁸ Nyabukce, ayupu ton dukdongobuka nyabuk. Winipnamna ati ara, ance Israel nang ati nyapnulyame. Ambusum mambul pil dopnamaba ati, anggun malye ning batakuka kintinipmamunya arye, diksukumuk winipmunyopura, ‘Allah el amu tamuk unamabe,’ tenenamlume. Ambusum ara, tup ning dipnamalume. Ara, anggunce, ‘Se, Mesir mutuku noutamak ulamupu talak ara, teleb ulamupu bukni, wini talak ara, tup ning kum dinyabe. Tup ning patapsila ati, tup ning diptibyopura, teleb uptibye,’ nyabuka engelamlume. Malye yupu nyabuka engelamluma ati ara, nara anggun ni Allah arye, akunum kekepsise. Kekepsisa ati, nara Allah, na si Yahweh arye, tup ning arepsinyopura, weika arye dinamlume.

¹⁹ Aning ara, ambusum diamuk, kum dipnamalume. Tonda, like bitinye sum dem kume. Like pamubarye (5) sum dem kume. Like tagu barye (10) sum, noutam kum dinamlume. Tonda, yupa weik 20 sum deice arye, ‘Tup ning dinamne’ tenena kume. Aminyan talak, aning weik arye langdibuka arenamsin talak ara, mitik arye kume, pia weik arye dinamlume. Ara, oyanamle talak, asum-asum nirya pia, weika arye dinamlume.

²⁰ Ara, wala tonok noutamak nirya ara, tup ning dinamlume. Winibuka adilamunya deice arye, anggun mun uk dipsilirye, duknalume. Tup ning dina ati, lik weik upnamsile. Aning winipnamsila deiyok ara, ani. Ara anggunce, ‘Allah ton nun noutamak aulule,’ kum tenemunce, nati bataknulume. Tonda, ‘Mesir mutuku batakuka yaupe ara, yata ati do? Mesir mutuku tuba ulamtibyopura, teleb uptibye,’ nyabuka, malye yupu nyamunce, engemunya ati, na Allah arye wenepnamsine. Tonda, ‘Malye nyalamuburye engelamupa deice arye, ikin upmasile’ tenen, kel biknamlume. “An Musa birye, Israel ninye nyalbinulyame,” nyabuka, Allah arye, Musa biti nyabuk.

²¹ Allah arye nyabukopura, Musa birye, Allah ati tamubuka nyabuk. “Israel nang ara, enam ratus ribu (600.000) nang banyake. Anang, sik kilapu ap, mapu ap, kum nukmanto. Aninye nirya kum nukmanto bukni, na nio ance, ‘Aninye nirya ati, tonok wala noutamak nirya, tup ning arepnamne,’ nyapmalam ning ara, yata ati do? Yata barye, sik aninye nirya, tup ning weika arye areptumba, dipting do?

²² Tonda, sik tup ning dina ati, domba basam ap, sapi basam ap ara, dan mutuku arye, pia weika arye ulamtuba, bobuka yatingce, obuka sik aninye nirya, dina areptingba, dipting do? Pia weika arye optinga babye, kum suktaleptu do? Aning atonun, laut mekwen amu ulamle mekwen pum ikan ara, nirya obuka bulupdeiptingce, areptipya babye, aninye nirya dipting do? Na kanye ara, anirya aupmatua babye, suktalipsutue. Ara, sik aninye yupa ara, pia weik ati ara, din kum arepmanto,” nyabuka, Musa birye, Allah ati, malye yupu nyanmok.

²³ Nyanmokopura, Allah el si Yahweh arye, Musa biti nyabuk. “Na taruk ara, bumang upniliba, apil kum doptinye ati, ayupu nyapmalam do? Na mikip kumce, mitanguk unulul ati, ayupu nyapmalam do? Na mikip ara, kum sukmantonye ununa ati ara, anyapmakin ning ara, atonun upliba eipnamalame. Ati, anda, ‘Dib do, kum do?’ tenen, teniltona kume. Dipkoprop nyapmakina ati, adiparyuk eibuka, kel biknamlame,” Allah arye, Musa biti nyabuk.

Musa birye, ninye deiyok nang yupa bitinye keba nakub dikin (70) nang wipdeibukba, Allah arye, el mikip arebuk yupu

²⁴ Musa ap, Allah ap, yupu talipdikopura, adiparyuk Musa birye, amutuku batakuka, Israel ninye dam tamubuka yayuk. Atalak ara, Allah el si Yahweh arye, nyapmok yupu, Israel ninye ati yanuka nyabuk. Winibuk talak ara, Israel nang, sik yupu talina deiyok nang ap, yupu lipsisikuka bokolina deiyok nang ap, yupa bitinye keba nakub dikin 70 nang, Musa wibukabukce, bulupdeibuk. Sik awipdeibuk nang ara, Allah el si erena ati, cang kain bol doltakna aik dam binuka tikik.

²⁵ Winibik talak ara, Allah el si Yahweh arye, weik dua noutamak arye kouluka yayukba, Musa ap yupu talipdik. Yupu akunum talipdikopura, Allah el mikip, Musa deice deiamuka ning atonun ton dobukabukce, Israel ninye sik deiyok nang, yupa bitinye keba nakub dikin (70) nang ati ton arebuk. Arebukopura, atalak ara, sik adeiyok nang nirya arye, Allah arye sikti, nyabuk yupu kekebikce, atalak aryuk el yupu lakak nyana nang, nabi nang nyalamak atonun, kibuka nyabik. Bukni, yuk talak ton aning ila tuba tonap, ayupu atonun kum nyalamik. Asum dem, ayupu nyabik.

²⁶ Yupa bitinye keba nakub dikin (70) nang, Allah el si eren aik dam, tikuka bulubik bukni, ninye bitinye nang, sik si ara Eldad ap, Medad ap ara, Musa akunum wibukabukce, sik si sekeibuk bukni, sikda Allah el si eren aik dam kum bululyarik. Sikda, Israel ninye sik baju bol doltakna aik dam tuba unmarik. Yukak tuba unmarik bukni, Allah arye el mikip ap, el Dib Kanye ap, sik yuk deiyok nang ati arebukba, abitinye nang babye, sik ton arebukba, Allah el Dib Kanye sik talima pum tam ton wekuk. Allah el Dib Kanye sik anang arebukba, Allah el yupu lakak nyalamik nang, nabi atonun kibuka, Israel ninye sik doltakna aik damuk kekenmekak nyaprik. Ara, sik bitinye nang babye, Allah el yupu lakak nyaprik. Sik babye atalak aryuk nyaprik bukni, yuk talak ton aning atonun kum nyaprik.

²⁷ Sik bitinye arye, Allah yupu lakak nyalamak nang nyalamik touk nyanmarikba, atalak aryuk, kamnye tonok kekebukabukce, bikbik abuka biyukce, Musa biti binuka laka nyabuk. “Eldad ap, Medad ap, Allah nyalye yupu lakak nyanmarake. Allah el yupu laka nyana deiyok nang, nabi nang arye nyalamak atonun kibuka, lakak nyanmarake,” nyabuka laka nyabuk.

²⁸ Lak nyabukba, kekebikce, ninye si Nun, elce deiamuk mi, el si ara Yosua birye, Musa dam binuka nyabuk. “Na nio, ance na deiyoknye ulyame. Sik abitinye nang nyanmal ning ara, ‘Nyana kume, batakrurume,’ nyapminba, yupu tana bataknurake,” binuka laka nyabuk. Ura, Yosua bira, el mitik karin ulamuk atalak arye, deiyok koubuka, atalak noutamak nirya, Musa el melinanye ulamuka ati, ayupu minopce Musa biti, laka nyalbiyuk.

²⁹ Yosua birye, nyabuk yupu ati ara, Musa birye Yosua biti, tamubuka nyabuk. “Yata deiyok ati, ance anang ati, yu upkilaba, talima pum tam tulum upkil do? ‘Sik bitinye arye, mambul yupu nyaprikiba, Musa el kanye malye uplyak’ tenena ati, nyapmanilam do? Kume, na kanye ara, yata ninye do, Allah Yahweh arye, el mikip ap, el Dib Kanye ap, sik deice deiptuba, sik Israel ninye ati, el nyalul yupu laka nyaptingopura, teleb uka. Ara, abitinye nang babye, yuk nang babye, Allah Yahweh, el yupu lakak nyaptingopura, na kanye ara teleb uka,” Musa birye nyabuk.

³⁰ Nyabukopura, Musa ap, Israel ninye, sik deiyok nang yupa bitinye keba nakub dikin (70) wipdeipmok nang ap, sik anirya, Allah el si eren aik dam arye batakuka, Israel ninye, sik cang kain bol doltakna aik dam anyuk, tamubuka biyik.

Allah arye, ‘Tup ning arepnamne,’ nyapdeiamuk touk, yalma maka atonun dobuka, arebuk yupu

³¹ Allah arye weik kumanya arebukba, talye karin arye, weik laut mekwen deiamuk tam arye, kumanya dobuka yayukce, yalama maka urasin atonun maka, bobuka yayukce, Israel ninye, sik doltakna aik dam, yanuka deibuk. Yanuka deibukba, pia yupa weik langdibukba, orbina yana kinmekce, tukwak deice banmek. Anya arye, amutuku nirya ara, amaka aryuk langdibukba, bisik babye eibuka, kum binmanto ubik. Amaka ara, ton tuku deice anyuk banmekce, sik mining nong deiceuk bulanmekba, el cang ara, 1 meter tinggi ubuk. Tonok meter ara, tuku deice arye kiklibuka, eitam ubuk. Ara, mining dam anyuk kum bukni, tonok sum arye, yuk pera mutuku bisik bituma babye, aning atonun, amutuku noutamak nirya ara, amaka nong ara, pia aryuk langdibukba, pia weik ubuk.

³² Amaka pia weik unmekba, Israel kili sal nirya eibikce, asum ap, alukunyan ap, mapmeka berekuk sum ap, osum noutamak nirya ap, Israel ninye arye, amaka tomobuka linmek. Ara, sal babye, kilapu babye ara, tomolonmek ning, pia weik anya arye, sik tonok-tonok nang ati, weik aling dopropmaba atonun, yupa weik, 60 aling ton bobikce, el aling libik. Akunum tomobik talak ara, obuka sik aik koproba dam, yuk-yuk kel-kelana ati, dana-dana nirya, tuku deice mikeibik.

³³ Winibik bukni, aning nirya sirya dakna ati, kum dipmanto ubukba, tuba anyuk dinmek talak ara, Allah el si Yahweh arye utenebuk. ‘Narye tuba-tuba arenamsine, nyamse yupu kum kekepnike,’ tenebukce, sik aninye nirya ati, pia yu ubukba, kanye imun ning, sik nong deice arebukba, uk dibukce, ninye weika arye dibik.

³⁴ Winibik ati ara, amutuku el si ara, Kibrot-Tawa nyabik. Nyabuka amutuku si nyabik ara, sik yupu deice arye nyabik. Ayupu deiyok ara, ‘Weik patana deice arye ninye dibikba, weibikak’ tenen, nyabik. Tonda, ‘Maka tupuk, pia anyuk diptibye,’ tenelamik ati, Allah yu ubukba, uk weik arebuka deice arye, ninye weik dibik. Ati, adibik nang nirya ara, amutuku uk weibika ati, amutuku si ara, ‘Kibrot-Tawa’ nyabuka, si dobik.

³⁵ Atalak ara, Israel nang nirya ara, Kibrot-Tawa mutuku arye batakuka, yuk mutuku si, Haserot mutuku biyikce, sik cang kain bol doltakna aik binuka dobikce, asukumuk unmek.