Bilangan 10 - Eipomek

“Cang pong-pong ana ning, el si terompet yupu, kekepmunya deice arye, kintinipmunce, yuk mutuku binamlume,” nyabuk yupu

¹ Allah el si Yahweh arye, Musa biti nyabuk.

² Pong-pong ana bitinye, kat ning, el si perak deice memepnamlyame. Winipmunce, aning deice arye, Israel ninye yukupminba, kekebuka an dam bulubuka, yanganamake. Ton ning ara, sik cang kain doltakna aik dakuka binuce talak, yukupminba, kekebuka an dam yacopura, ‘Amutuku batakuka bilulume,’ nyabuka, laka nyanamlyame. Ati ara, pong-pong ana bitinye, el si terompet memepnulyame nyapkine.

³ Amemepminye ning bitinye deice, weik yupu arye, nyapminye talak ara, sik Israel nang nirya kekebikirye, ‘E, ara, nun nirya bulubuka, Allah el si eren aik, doltakna tnda aik bublan dam yangana ati, yukupmasil ning’ tenen, adiparyuk sik Israel ninye nirya yanganamake.

⁴ Bukni, pong-pong an ning, tonok ninguk nyapminyopura, Israel ninye sik yala yuk-yuk aulye touk kekebikirye, ‘E, nun deiyok nang bulubuka, Musa dam yangana ati, yukupmasile’ tenen, kel kibikirye, adiparyuk sik Israel ninye yala-yala deiyok nang nirya, an dam bulubuka yanganamake.

⁵ Pong-pong ana tonok ning deice arye, yukuna weik arye nyapminyopura, Israel ninye keting yangan tam, cang kain bol aik dobuka unyak nang, sik bana ati winipnamlyame. Yukupminba, kekebikcopura, sik cang kain bol aik dakuka, amutuku batakuka, yukak binamake.

⁶ Atonun ton, atalakuk bukni, like bitinye ning nyapminyopura, eitam cang kain bol aik dobuka, unyak nang, sik bana ati nyapnalame. Aning ara, pong-pong ana weik arye, pong-pong nyapminyopura, itam Israel nang kekebikirye, ‘E ara amutuku batakuka, yuk mutuku bisik bana ati, yukupmasile’ tenen, kel kibikirye, banamake.

⁷ Bukni, cang pong-pong ana arye bobuka, pong-pong nyapnalam bukni, lelim mitik yuktoto nyapminyopura, ara Israel ninye nirya kekebikirye, bulubuka yangana ati, pong-pong anamlyame. Aning nyapminyopura, ara sik Israel ninye nirya bulupnamake.

⁸ Pong-pong ana el si terompet, atalak nirya nyanamak nang ara, talye nang arye kum nyanamak bukni, Harun el mapu dem aryuk, pong-pong anamake. Ara anang ara, Allah aik pum tam pil dona deiyok nang unyaka anya arye, sikcuk nyanamake. Aning nyapmasina ara, wini talak arye, dipdongobuka doryanamle talak noutamak nirya, anggun ap, anggunce deipmunba, dadeipdanin banamak ninye babye, atonun wininamake. Pia kum bataknamake.

⁹ Winipmanto ara, anggun mutuku koproba noutamak bukni, yuk mutuku nang arye, anggun Israel ninye ati, ‘Anang obisibirye, ikin ning sik nong deice delinamabe,’ tenepsicopura, anang olbinumunye talak ara, cang pong-pong ana, el si terompet deice arye, weik arye nyapmunyopura, nara anggun ni koproba Allah Yahweh arye, kekepsinirye, anggun mal olan nang dam arye, melibuka lyenamsine.

¹⁰ Atonun, anggun kanye delin talak nirya babye, terompet deice pong-pong nyanamlulume. Wala tikilongon talak ap, tonda narye, ‘Na si erena ati, anggun weik kwalya sum ani,’ nyalamse touk, aweik sum akunum kiplyopura, na Allah arelbana ap, si erena ap ati, anggunce cang pong-pong ana, el si terompet, pong-pong anamlulume. Nyapmunyopura, nara anggun ni koproba Allah Yahweh arye kekenamsine. Tonda, anggun malye winilamlum ning ati, wenebuka oplopsitinye bukni, anggun namin kina ati, kam ning obuka, nati arepmunce, uku dalbinumunye talak ara, cang pong-pong ana, el si terompet deice arye, pong-pong nyanamlulume. Aning atonun, na ap, anggun ap, neika teleb kina ati ara, kam ning obuka arepnumunye talak babye, cang pong-pong ana, terompet deice arye, pong-pong anamlulume. Nara, anggun ni koproba, Allah Yahweh arye nyapsine. Allah arye nyabuk.

Israel ninye arye, Sinai mutuku dam leibuka, yuk mutuku biyik yupu

¹¹ Israel ninye ara, Mesir mutuku ulamika batakuka, Sinai mutuku dam yayik talak arye nukuka, keting tamun bitinye ning akunum mabikopura, tonda wala bitinye ning, Februari atonun akunum kibukce, asum ara tanggal 20 deice arye, atalakuk Allah el si eren aik, cang kain bol aik deice tam, weik dua bum teikamuk ning, welebukce leibuka biyuk. Winibuka ati, sik Israel ninye babye, deiyok koubuka panabiyik.

¹² Ara, Allah arye arelamuk weik dua lobuka balamuk touk, aning elilamikce, adua balamuk touk, sik Israel ninye babye, melibuka balamik. Winibuka winilamika ati ara, adua balamuk touk, sik min arye ulamik mutuku, Sinai mutuku deiyok dam arye panabuka mok kum ati, ninye kum ulamik mutuku noutamak, talye diamuk balamika ani, aminyan talak mok ap, mek ap, kum ati, ninye kum ulamik mutuku, amutuku si Paran mutuku, adua binuka tikmok. Adua binuka tikmokopura, Israel ninye babye, Paran mutuku uk binuka, sik cang kain bol doltakna aik dobikce, amutuku uk ulamik.

¹³ Amutuku banuyik talak ara, min yuma deiyok koubuka balamik talak ati ara, Allah el si Yahweh arye, Musa biti, ‘Wini talak Sinai mutuku batakuka, yukak binulyame,’ nyabukopura, Musa birye Israel ninye ati, laka nyabukba, kekebikce, panabuka biyik.

¹⁴ Atalak ara, min yuma menekuka biyik nang ara, sik Yehuda yala nang menekuka biyik. Yehuda yala nang, sik bisik bana ati, deiyok kibuknye bira, el si Nahason birye, deiyok kibuk. Nahason el li koproba si ara, Aminadab ulamuk. Winibukba ayupa-ayupa ati, ninye yuk-yuk deiyok kibuka, bendera deice, sik yala si sekuka talibikce, aning talibuka, sik adiparyuk, min yuma menekuka biyik.

¹⁵ Aning winilamik touk, Israel ninye sik yala-yala yuk-yuk aulamik touk, deiyok nang wibuka deibikba, bendera talibuka balamik. Nataniel el mi Zuar birye, Isakar yala nang ati, sik deiyoknye kibukce, menekuka biyukba, Isakar yala nang ap, melibuka biyik.

¹⁶ Aning atonun, Elon el mi Eliab birye, Zebulon yala nang ati, sik deiyoknye kibukce menekuka biyukba, Zebulon yala nang ap, melibuka biyik.

¹⁷ Ayala ninye bitinye akunum menekuka banmekopura, atalak ara, Allah el si eren aik dobuka banamika ati, anyaik baju bol doltakna aik ara, dakukabikce, Gerson yala nang ap, Merar yala nang ap arye, aning nirya bobuka biyik.

¹⁸ Winibikopura, Elisur el mi Syedur birye, Ruben yala nang ati, sik deiyoknye kibukce, menekuka biyukba, Ruben yala nang, sik yala si bendera deice sekuka talibikce, melibuka biyik.

¹⁹ Aning atonun, Zurisadai el mi Zelumiel birye, Simeon yala nang ati, sik deiyoknye kibukce, menekuka bayukba, Simeon yala nang ap melibuka biyik.

²⁰ Aning atonun, Dehuel el mi Eliyasap birye, Gad yala nang ati, sik deiyoknye kibukce, menekuka bayukba, Gad yala nang ap melibuka biyik.

²¹ Gad yala nang akunum deiyok kibuka biyikopura, Kehat yala nang arye, Allah el si eren aik pum tam moubuka deiamik ning, Allah si erena ati, pil dolamik ning, weik mambul teleb ning ara, Kehat yala nang arye, aning dobuka banmek. Sik Gerson yala nang ap, Merar yala nang ap arye, Allah el si eren ati, cang kain bol aik dakuka bobikce, akunum menekuka banmeka anya arye, utenebik. ‘Anyaik uluplomik ning yuk mutuku binuka, minopce aning akunum kintinibuka deipmacopura, Kehat yala nang arye, anyaik pum tam moubuka deiamupu mambul ning dobuka, aminyan talak yakirye, aning anyaik pum tam, ila tuba tonap dongopnamake,’ tenebikce, yuk-yuk biyik.

²² Winibikopura, Amihud el mi Elisama birye, Efraim yala nang ati, sik deiyoknye kibukce, menekuka bayukba, Efraim yala nang, sik yala si bendera deice sekuka talibikce, melibuka biyik.

²³ Aning atonun, Pedazur el mi Gamaliel birye, Manasye yala nang ati, sik deiyoknye kibukce, menekuka bayukba, Manasye yala nang ap, melibuka biyik.

²⁴ Aning atonun, Gideon el mi Abidan birye, Benyamin yala nang ati, sik deiyoknye kibukce, menekuka bayukba, Benyamin yala nang ap, melibuka biyik.

²⁵ Winipra balamika ani, aminyan ara, sik tenelamik touk, Dan yala nang ati ara, Amisyadai el mi Ahizier birye, sik deiyoknye kibukba, sik yala si bendera deice sekuka talibikce, Dan yala nang melibuka biyik.

²⁶ Okran el mi Pagiel birye, Asyer yala nang ati, sik deiyoknye kibukba, Asyer yala nang ap biyik.

²⁷ Enan el mi Ahira birye, Naftali yala nang ati, deiyoknye kibukba, Naftali yala nang ap biyik.

²⁸ Aning ara, sik Israel nang balamik talak nirya, binun talak winilamik ning ara, akunum laka nyababe.

²⁹ Musa birye, el yamal koproba Rehuel, el mi Hobab Midian mutukunye biti nyabuk. “Nunda Allah el si Yahweh arye, ‘Ateleb mutuku nuknamsine,’ nyabuka nyalin yupu deice nyamsuke ati, binamap anya arye, anda nun ap, neika binamabe. An ap neika winibipyopura, nunce anti, teleb kibuka melinamkiyabe. Aning ara, urdem ati kum nyapne. Deiyok ara, nun ni koproba Allah arye, ‘Anggun Israel ninye ati ara, pia teleb ning arepsinirye, telebuk kipdeipnamsine,’ nyabuka, nyalin yupu nyamsuke. Ati, an ap, nun ap, neika bibyopura, nunce anti, melipkipyeba, teleb kibuka, neika unamaba ati nyapkine,” Musa birye, Hobab biti nyabuk.

³⁰ Nyabuk bukni, Hobab birye Musa biti, tamubuka nyabuk. “Kume na nio, narye kum melipnukine. Tamubuka, na kwit capu nang ap, na yala nang ap, sik damuk ara, na mutuku koproba tamubuka binune,” nyabuk.

³¹ Nyabukopura, Musa birye, tamubuka nyabuk, “Se na kwit, ance nun batakuka bana kume. Anda weik kelnye uminya anya arye, mek kumak ati, ninye kum unyak mutuku noutamak banamap talak noutamak ara, ance, ‘Bisik bana telebak ara, asukum ani,’ nyabuka bobanamsilame. Winipsiminyopura, sik cang kain bol aik delinak ati ara, ance, ‘Asukum telebe,’ nyapsutumba, amutuku uk, nun aik dopnamabe.

³² Winipsiminyopura, Allah el si Yahweh arye nunti, teleb un ning arepnamsil ning ara, ila ton bokuka arepnamkiyabe,” Musa birye, Hobab biti nyabuk.

Israel ninye arye, ‘Kanaan mutuku binamap’ tenen, Sinai mutuku batakuka biyik yupu

³³ Allah el si Yahweh, el tia talak ulamukak, Sinai mutuku, Israel ninye akunum batakuka biyikce, bisik balamik talak ara, like winilye mapra balamik. Ara, Allah arye, “Anning wininamlulume. Aning ara, pia kum wininamlulume. Aning ton winipmunyopura, narye melinamsine,” nyabuka, nyalilamuk yupu libuka, tirikamik marikna bobuka balamik. Ara, ton nang arye, amarikna bobuka menekuka banopura, yuk Israel ninye nirya ara, aminyan tam melibuka balamik. Bisik balamika ani, ‘Dan mutuku binuka dikdik sepnamap do?’ tenen, mapra balamik talak ara, Allah yupu liyamik marikna bobuka, menekuka balamikbuk, weik dua binuka tiknopura, amutuku uk, binarye tia ati, cang kain bol doltakna aik dobuka deipnarye, amutuku uk malamik.

³⁴ Israel nang, sik cang kain bol doltakna aik dakukapna arye, keting noutam bisik ban talak ara, Allah el si Yahweh arye, weik dua arepneba, sik balamik bisik deice tam, neika balamukce, sik dam pia melilamuk.

³⁵ Allah arye nyapdeiamuk yupu liamik yo lakase, mambul marikna bobuka bana ati, banuyik talak nirya ara, Musa birye nyalamuk. “Nun ni Allah Yahweh, an mikip arye memepropmince, ‘Anti yu tenenyak nang ap, nunda an ‘Naʼ tenen, ninye ap ati, yu tenesinyak nang ara, ance melipsiminyopura, nun mal olan nang, nun dam arye ilil upliba, kwarabuka bindopnamak’ tenen, moropkiyabe,” Musa birye nyalamuk. Ayupu nyapnaba, Israel ninye bisik balamik.

³⁶ Tonda, Allah arye nyapdeiamuk yupu, libuka bobalamik yo pum binuka deipne talak ara, Musa birye nyalamuk. “Nun ni Allah, Israel ninye ara, pia weik arye nukmanto kum unyabe. ‘Yahweh anuk tamubuka, nun dam yamince, kalikuka melinamsilame’ tenen, moropkiyabe,” nyabuka, Musa birye morolamuk. Nyabuka moropnopura, amutuku uk, tia talak ati, binuka malamik.