Bilangan 1 - Eipomek

‘Israel ninye, sik yupa yata barye unyak do?’ tenen, bikna ati, minop deiyok koun ning ati, nukik yupu

¹ Ura, Israel ninye Mesir mutuku noutam daulamika ani, amutuku batakuka, ninye pia kum ulamik mutuku, Sinai mutuku noutam arye, keting tamun bitinye deice arye balamika ani, wala bitinye kibukce, tanggal tonok akunum kibukura, Allah si Yahweh arye, Musa dam yanuka nyabuk. Ara, pata mutuku si ara, Sinai mutuku noutam, Allah ap, ninye ap, elana ati, kambing bol arye dolamik tenda aik pum tam, Allah arye, Musa biti yanuka, nyabuk yupu ara, ani.

² Musa an ap, Harun ap, anggunce ‘Israel yala ninye, sik yupa, yata barye unyak do?’ tenen, si sekna ati, pil dopnamdurume. Ara, Israel ninye sik yala nirya, aunyak touk, anang arye deibikba, dadeipdanin yanganyak nang anoutam arye, sik deibik mapu nirya ara, nukrumunce, sik si seknamrurume.

³ Ara, mitik mapu nirya ara, kum bukni, mapu ara, keting tamun dua puluh (20) tahun arye dipdongobuka, eitam nang ara, yin talen nang kipnamting ati, sik si seknamrurume. Ara, yala yuk-yuk yupa aunyak touk, sik si nirya seknamrurume.

⁴ Israel yala ninye bukni, yupa yala yuk-yuk ulalum touk bukni, ayupa talena ati, deiyok nang tonok-tonok, yuk-yuk wipdeipnamrume. Winipdumunyeura, sik anang arye, anggun melina ati, anggun neika Israel yala nang si seknamlume.

⁵ Israel ninye yala yuk-yuk unyak noutam arye, sik deiyok kibuka talena ati, wipdeibik deiyok nang ap, tonda Musa an ap, Harun ap, Israel ninye, sik si sekna ati, wipdeipminba, sik ap apil donamlum nang, sik si lake lapnukine. Ara, Israel yala nang, yala yuk-yuk deiyok kibik nang, sik si ara, ani. Ruben yala nang arye deibiknye, el si Siedeur birye deiamuk mi, el si Elisur deiyok kibuk.

⁶ Simeon yala nang arye deibiknye, el si Surisyadai, el mi Selumiel birye, deiyok kibuk.

⁷ Yehuda yala nang arye deibiknye, el si Aminadab, el mi Nahason birye, deiyoknye kibuk.

⁸ Isakar yala nang arye deibiknye, el si Suar, el mi Netanel birye, deiyoknye kibuk.

⁹ Zebulon yala nang arye deibiknye, el si Helon, el mi Eliab birye, deiyoknye kibuk.

¹⁰ Tonda, Yusuf yala nang arye deibikba, dadeipdanin yangalamik nang noutam bukni, Efraim yala nang arye deibiknye, el si Amihud, el mi Elisama deiyoknye kibuk. Manasye yala nang arye deibiknye, el si Pedasur, el mi Gamaliel deiyoknye kibuk.

¹¹ Benyamin yala nang arye deibiknye, el si Gideoni, el mi Abidan deiyoknye kibuk.

¹² Dan yala nang arye deibiknye, el si Amisyadai, el mi Ahiser deiyoknye kibuk.

¹³ Asyer yala nang arye deibiknye, el si Okran, el mi Pagiel deiyoknye kibuk.

¹⁴ Gad yala nang arye deibiknye, el si Rehuel, el mi Eliasaf deiyoknye kibuk.

¹⁵ Naftali yala nang arye deibiknye, el si Enan, el mi Ahira deiyoknye kibuk.

¹⁶ Israel yala nang noutam bukni, yala dua belas ulamik touk, anang noutam ara, Allah arye, “Ayala deiyok nanguk, yuk-yuk wipdeipnamlume,” nyabuk touk, sik bitinya arye, wiprik.

¹⁷ Israel yala ninye noutam arye, yala obarye (12) ulamik touk, anoutam Allah arye, “Deiyok nang kipnamaka ati, yala yuk-yuk wipdeipnamlume,” nyabuk touk, sik bitinye arye wipdiprik.

¹⁸ Sik anang arye, ninye obarye wipdeiprikura, sik anang ara, Israel ninye deiyok nang unamik ati, anang arye, Musa ap, Harun ap ati, melibuka si sekik. Ara, Israel yala ninye, sik nirya ati nyabik, “Wala bitinye kibuka, tanggal tonok kiplye sum ara, nirya bulupmunce, sik si nirya seknamlulume,” nyabik. “Ara, sik deipdanin yangalamik nang nirya, sik mutuku yuk-yuk ulamik touk, sik si babye, yuk-yuk si seknamlume,” nyaprik. Tonda, sal dem, keting tamun dua puluh (20) tahun arye dipdongobuka, eitam akunum kiamuk nanguk, sik si yuk-yuk sekuka nukik.

¹⁹ Aning winibik ara, Allah si Yahweh arye, Musa ap, Harun ap, pata mutuku noutam, Sinai mutuku deice arye, nyapdeiamuk touk winibuka, Israel ninye, sik ninye si sekna pil doprik.

²⁰ Ura, aning ara, Yakub, el si ton Israel nyabuk. Elce minop deiamuk mi, el si Ruben, elce deiamukba, dadeipdanin yangalamik nang, ayala nang sik mapu aulamik noutam mapu, sik keting tamun akunum dua puluh tahun (20) itam kiamuk nang ara, sik yin talipmanto nang ulamika ati, anang ara sik yala, aulamik touk kiklibuka, sik si yuk-yuk sekik.

²¹ Deiyok kouna ara, Yakub el mi min yuma deibuknye, Ruben yalanye birye, deibukba, dukdongobuka, deiamik nang si ara, yupa pia weik, empat puluh enam ribu, lima ratus (46.500) nang, sik si nukuka sekik.

²² Tonda, Simeon birye deiamukba, dadeipdanin yangalamik nang, ayala nang, sik mapu aulamik noutam mapu, sik deibik keting tamun akunum dua puluh (20) tahun arye dipdongobuka, itam kipne nang ara, yin talipmanto nang kiamuk ati, anang ara, sik yala aulamik touk kiklibuka, si yuk-yuk nirya nukuka sekik.

²³ Simeon yalanye birye deiamukba, dukdongobuka deiamik nang si ara, yupa pia weik, lima puluh sembilan ribu, tiga ratus (59.300) nang, sik si nukuka sekik.

²⁴ Tonda, Gad birye deiamukba, dadeipdanin yangalamik nang, ayala nang, sik mapu aulamik noutam arye mapu, sik keting tamun akunum dua puluh tahun (20) arye dipdongobuka, itam kipne nang ara, sik yin talipmanto nang ulamika ati, sik anang ara, sik yala aulamik touk, sik si yuk-yuk nirya sekik.

²⁵ Gad yalanye birye deibukba, dukdongobuka deiamik nang si ara, yupa pia weik, empat puluh lima ribu, enam ratus lima puluh (45.650) nang, sik si nukuka sekik.

²⁶ Tonda, Yehuda birye deibukba, dadeipdanin yangalamik nang, ayala nang, sik mapu aulamik noutam arye mapu, sik keting tamun akunum dua puluh (20) tahun eitam kipne nang ara, sik yin talipmanto nang ulamika ati, sik anang ara, sik yala aulamik touk, sik si yuk-yuk nirya sekik.

²⁷ Yehuda yalanye birye deibukba, elce dukdongobuka, deiamik nang si ara, yupa pia weik, tujuhpuluh empat ribu, enam ratus (74.600) nang, sik si nukuka sekik.

²⁸ Tonda, Isakar birye deibukba, dadeipdanin yangalamik nang si ara, ayala nang, sik mapu aulamik noutam arye mapu, sik keting tamun akunum dua puluh tahun arye dipdongobuka, eitam kipne nang ara, sik yin talipmanto nang ulamika ati, sik anang ara, sik yala aulamik touk, sik si yuk-yuk nirya sekik.

²⁹ Isakar yalanye birye deibukba, dadeipdanin yangalamik nang si ara, yupa pia weik, lima puluh empat ribu, empat ratus (54.400) nang, sik si nukuka sekik.

³⁰ Tonda, Sebulon birye deibukba, dadeipdanin yangalamik nang, sik yala nang, sik mapu aulamik noutam arye mapu, sik keting tamun akunum dua puluh tahun arye dipdongobuka, itam kipne nang ara, sik yin talipmanto nang ulamika ati, sik anang ara, sik yala aulamik touk, sik si yuk-yuk nirya si sekik.

³¹ Sebulon yalanye birye deibukba, dadeipdanin yangalamik nang si ara, yupa pia weik, lima puluh tujuh ribu, empat ratus (57.400) nang, sik si nukuka sekik.

³² Tonda, Yusup yala nang bukni, el si Efraim birye deibukba, dadeipdanin yangalamik nang, ayala nang, sik mapu aulamik noutam arye mapu, sik keting tamun akunum dua puluh tahun, eitam kipne nang ara, sik yin talipmanto nang ulamika ati, sik anang ara, sik yala aunyak touk, sik si yuk-yuk nirya sekik.

³³ Efraim yalanye birye deibukba, dadeipdanin yangalamik nang si ara, yupa pia weik, empat puluh ribu, lima ratus (40.500) nang, sik si nukuka sekik.

³⁴ Tonda, Manasye birye deibukba, dadeipdanin yangalamik nang, ayala nang, sik mapu aulamik noutam arye mapu, sik keting tamun akunum dua puluh tahun arye dipdongobuka, itam kipne nang ara, sik yin talipmanto nang ulamika ati, sik anang ara, sik yala aulamik touk, sik si yuk-yuk nirya sekik.

³⁵ Manasye yalanye birye deibukba, dadeipdanin yangalamik nang si ara, yupa pia weik, tiga puluh dua ribu, dua ratus (32.200) nang, sik si nukuka sekik.

³⁶ Tonda, Benyamin birye deibukba, dadeipdanin yangalamik nang, ayala nang, sik mapu aulamik noutam arye mapu, sik keting tamun akunum dua puluh tahun itam kipne nang ara, sik yin talipmanto nang ulamika ati, sik anang ara, sik yala aulamik atonun, sik si yuk-yuk nirya sekik.

³⁷ Benyamin yalanye birye deibukba, dadeipdanin yangalamik nang si ara, yupa pia weik, tiga puluh lima ribu, empat ratus (35.400) nang, sik si nukuka sekik.

³⁸ Tonda, Dan birye deibukba, dadeipdanin yangalamik nang, ayala nang, sik mapu aulamika noutam arye, mapu sik keting tamun akunum dua puluh tahun itam kipne nang ara, sik yin talipmanto nang ulamika ati, sik anang ara, sik yala aunyak atonun, sik si yuk-yuk nirya sekik.

³⁹ Dan yalanye birye deibukba, dadeipdanin yangalamik nang si ara, yupa pia weik, enam puluh dua ribu, tujuh ratus (62.700) nang, sik si nukuka sekik.

⁴⁰ Tonda, Aser birye deibukba, dadeipdanin yangalamik nang, ayala nang, sik mapu aulamik noutam arye mapu, sik keting tamun akunum dua puluh tahun itam kipne nang ara, sik yin talipmanto nang ulamika ati, sik anang ara, sik yala aulamik atonun, sik si yuk-yuk nirya sekik.

⁴¹ Aser yalanye birye deibukba, dadeipnin yangalamik nang si ara, yupa pia weik, empat puluh satu ribu, lima ratus (41.500) nang, sik si nukuka sekik.

⁴² Tonda, Naftali birye deibukba, dadeipdanin yangalamik nang, ayala nang sik mapu aulamik noutam arye mapu, sik keting tamun akunum dua puluh tahun itam kipne nang ara, sik yin talipmanto nang ulamika ati, sik anang ara, sik yala aulamik atonun, sik si yuk-yuk nirya sekik.

⁴³ Naftali yalanye birye deibukba, dadeipdanin yangalamik nang si ara, yupa pia weik, empat puluh enam ribu, lima ratus (53.400) nang, sik si nukuka sekik.

⁴⁴ Aning sekmap nang, sik si ap, nomor ap ara, Musa ap, Harun ap, sik Israel yala ninye, sik yala yuk-yuk aulamik touk, sik weik deiyok nang arye, sik dua belas (12) nang deiyok kibik nang ati, Israel yala nang, yin talipmanto nang ara, sik ninye si sekuka deibik.

⁴⁵ Winibuka, ninye si nirya sekuka deibika ati, Israel ninye, sik yala yuk-yuk aulamik touk mapu ara, keting tamun dua puluh (20) tahun arye, eitam ulamik nang, yin talibuka, sik oldan nang ati, mal opdanmanto nang ulamika ati, nukukabikce, sik si sekik.

⁴⁶ Yin talipmanto nang ati, si sekamik nang nirya ara, yupa pia weik, enam ratus tiga ribu, lima ratus lima puluh (603.550) nang ulamik.

⁴⁷ Bukni, sik Lewi yala nang ara, yuk Israel yala nang ap, sik si seken sukum ara, tabakuka kum sekamik.

⁴⁸ Deiyok ara, ani. Allah Yahweh arye, Musa biti, “Winipnamlulume,” nyapdeiamuk touk winilamik.

⁴⁹ Allah arye, Musa biti nyapdeibuk. “Ara, ninye yin talen nang ati, ‘E, anye bira, yin talenanye keptue,’ tenepmunce, si seknamunye talak ara, sik Lewi yala nang ara, sik si kum seknamlulume. Israel yala ninye nirya nukunamlum talak ara, sik Lewi yala nang ara, sik tonok, sik si sekuka kum nukunamlume,” nyapdeibuk.

⁵⁰ Tonda, Allah arye nyapdeibuk. “Sik Lewi yala nang ara, yin talin nang kum unamak bukni, na ap, ninye ap, eldana aik ap, anyaik pum tam unamle ning ap ara, kintinilil bilulume. Anyaik ning nirya ati, kalekinamlume,” nyapnamrurume. Tonda, sik anang pil ara, na si erena ati dolamik aik dona ap, anyaik noutam un ning nirya ap ati, kintinilin nang unamlume. Anggun Israel ninye, ton mutuku batakuka, yuk mutuku binamlum talak ara, sik Lewi yala nang arye, anyaik ap, anyaik pum tam unamle ning ap, kintinipmunce, aning nirya dopmunce, bobinamlume. Tonda, sik Lewi yala nang aryuk, Allah si eren aik dam ara, anggun tenda aik dobuka, antanap dongopnamlume. Allah arye nyapdeipsuke,” nyabuka, laka nyanamrume.

⁵¹ Tonda, winipmanto, ton mutuku daulamunya ani, batakuka yuk mutuku ton binuka unamunye talak ara, Lewi yala nang aryuk, Allah Yahweh ap, ninye ap, eldana ati, tia ati dolamak tenda aik ara, ulunamnyake. Aning ara, ulubuka yukak bobikirye, sikcuk tenda aik binuka dobicakuk, na ap, ninye ap, eldana aik ara, binuka donamake. Ati, na ap, ninye ap, eldana aik ara, sik Lewi yala nang aryuk, uluna ap, tuba tamubuka dobuka, delina ap ara, wininamnyake. Yuk yala ninye pia kume. Lewi yala kum nang ton, anyaik dam banmacopura, opniba, dipnamake.

⁵² Yuk yala Israel ninye nirya ara, sik minopce, Allah Yahweh si erena ati, dolamak tenda aik dam ara, sikcuk aik kum dopnamnyake. Aning ara, kum bukni, talye aik, sik yala yuk-yuk aulamak touk, yupa kibuka, sik tia dolamak tenda aik donamake. Anyaik dona ara, tonok-tonok nang nirya bulubuka, yupa tonok kibuka donamake. Ara, laka kilin ning ati, yo deice deibikirye, dana-dana nirya ara, sik aik dam antanap dongobuka, donamake.

⁵³ Sik Lewi yala nang tonok ara, na ap, ninye ap, eldana ati, tenda bol aik dobice, dana-dana tam, sik aik babye, antanap dongobuka donamake. Winibica deice arye, na ap, ninye ap, eldana aik ara, ‘Malye nang arye, malye ubicakʼ tenen, sik Lewi nang arye kalikinamake. Kalekinamak deice arye, sik yuk ninye ton, kum banamnyake. Winipmanto ara, yuk yala ninye ton, anyaik dam yacopura, na yu upnilirye, anggun Israel ninye nirya, anggun deiceuk, anggun wenena ati, ‘Ikin ning deipsinyakʼ tenen, nyapsine.

⁵⁴ Aning ara, Allah Yahweh arye, Musa biti, nyapdeibuk touk, Israel yala ninye nirya kekebuka bikikce, anyapdeibuk touk, dukdongobuka pil dolamik.