Ayub 9 - Eipomek

Ayub birye Bildad biti, tamubuka nyabuk yupu

^1-2 Bukni, Ayub birye Bildad biti, tamubuka nyabuk yupu ara ani. Diba na kele. Ara, ance wini talak nyanmanilam yupu ara, dipkoprob ninguk nyapmanume. Walwal arye kum nyapmanilame. Bukni, nun ni Allah ara, pia diksukumuk ulula ati, pia teleb, lek dem ulule. Ati ara, tukwak mutuku noutam unyak nang kan-kan arye, yata tonye binuka, Allah el dam tikukce, ‘Nara, pia diksukumuk unune,’ teneptu do? Kume, nun tukwak nang nirya ara, malye un ninguk unyaba ati, aning kum nyaptibye.

³ Winipmanto ara, ninye arye, ‘Allah arye nati asipnutu bukni, narye tamubuka laka nyapnyopura, yupu ton kum nyapnutue,’ tenepting do? Pia kume. Allah ara tenepturye, anye biti, yupa pia weik, asilena ara, 1.000 deice arye asiptopura, anye birye tamubuka asing yupu tonok ning atonun, tamubuka laka nyaptu bukni, pia weik taranye ati, pia laka nyapmanto kum nyaptue.

⁴ Allah el kanye talima noutam nirya ara, pia kel weiknye ulule. Tonda, elda pia mikip weiknye ulula ati, ninye arye Allah ati, malye kanye kibikirye, ‘Elce nyalul ning dauplyeʼ tenen, Allah ati, malye kum kiptinge. Ninye arye, Allah ati malye kiptibyeʼ tenen, piriptinga babye, pia kum winiptinge. Ara anye kum winipmanto atia.

⁵ Allah elcuk mutuku dup bukukak ton dobuka, yukak deipmaliba, ninye arye ton pia kum biknamake. Tonda, Allah el yu uplye talak ara, weik mutuku-mutuku nirya dobuka, tamobukapturye, sice bukloptue. Aning babye, ninye tukwak nang arye eibuka, kum bikinyake.

⁶ Tonda, anggun ton tenipdelulume! Yatanye birye, ‘Weik bukamuk mutuku ara, mutuku tobuka pouptue,’ teneplyeba, amutuku nirya ara, lulukulul do? Tonda, tukwak mutuku unyaba amu tam, weik ayukumna yo atonun deibukba, atunim abuka ubuk ning nirya babye, yatanye birye, ‘Aning luluknamle,’ teneplye talak ara, adiparyuk lulukulul do? Aning nirya ara, Allah elcuka! Ninye ara, pia kum winiptinge.

⁷ Tonda, yatanye birye beren tam talak ati, “Keting ara, panabuka yangana kume,” nyaptuba, keting kum yatu do? Tonda yatanye birye, elcuk lukunyan noutam tiklamle kurya nirya ati, “Tikina meme,” nyaptuba, lukunyan noutam babye, pia kum tiktu do?

⁸ Tonda, im tam ap, im noutam ulul ning babye, yatanye birye, el mikip weik taruk deice arye kwepdeibukba, aning nirya aubuk do? Tonda, yata tonye, elcuk tukwak noutam bukni, weik laut mekwen kwepdeibukba, mek kait ara, welebina, koulukuka binapna kiptuba, anye birye, aning nirya yaniptuba, kum uptu do? Aning nirya ara Allah elcuka!

⁹ Yatanye biryuk, ‘Im tam bukni, tiklamle kurya nirya ara, ‘Dapu tam (arah utara) tiknamleʼ tenen, kurya kong el si ara, ‘Bidukʼ ap, tonda im noutam kwepdeibuk kurya el si ara, ‘Belantikʼ ap, kwepdeiptu do? Aning atonun, im noutam bukni, iknapye tam, kurya kong, el si ara, ‘Kartika ap,’ nyabuka, si dobukce kwepdeibuknye bira, yatanye birye do? Aning nirya ara, Allah elcuka!

¹⁰ Aning ton tenipdelulume! Yatanye biryuk ninye kum winipmanto ning, mambul weik pil dolul do? Tonda, pia mikip weik ning, ninye arye winipmanto kum pil doplyeba, ninye nirya lukdanuka unyak ning ara, yatanye birye amambul pil doptu do? Aning nirya ara, nun tukwak ninye arye, kel kum biktibye. Tonda, yatanye birye, ninye kum winipmanto ning kwepdeipliba, nun tukwak nang arye, pia kum nukuka kel biktibye do? Aning nirya ara, Allah elcuka!

¹¹ Allah arye, na Ayub urasin dam yanukba, narye el nong ap, urasin ap ara pia kum eipse. Aning atonun, elda, na dam yalirye, otam banmaliba, narye el ton eibuka kum bikse.

¹² Tonda, nun ninye tukwak nang arye talinyap ning do, talye daupmalye ning do, Allah arye, ‘Na dopropnune,’ teneplyopura, nunce Allah ati, “Aning ara, dolona kume,” nyabuka, yupu sektibye do? Pia yupu kum sektibye. Tonda, nun ninye arye, mania kanye bobuka, Allah ati, “Anda yata deiyok ati, apil donalam do? Ance awininalam ning ara, yata deiyok ati winipmalam do?” nyabuka, kum asiptibye.

¹³ Allah el yu weik uptopura, tunim abuka kum unamle. Elce, ‘Na yu arye winipnamne,’ teneplye touk, aninguk winilule. Tonda, weik arye ilil usulul ning, el si ara Rahab, elti, melin nang nirya babye, Allah el nyaplye yupu, sik nirya arye kekebuka, el amu tamuk unyake.

¹⁴ Aning nirya ara, Allah arye mikip pia weik tonun akunum ulula ati, Allah arye nati, asipdenilyopura, narye yupu ton tamubuka kum nyaptinye. Tonda, narye, ‘Yupu teleb ning pia moubuka tenipnirye, nyapnamne,’ teneptinya babye, dipkoprob Allah ati, narye kum tamubuka nyaptinye.

¹⁵ Aning atonun, narye malye winin ning kum winyamtinya babye, nara kel weik bikina ap, mikip ap, kumnye ununa ati, narye Allah ati, yupu tamubuka kum nyaptinye. Elce nati, “Anda malye kipmalama ati, wenepnukine,” nyapnilyopura, narye tamubuka, “Naio, an kanye aryuk, nati bico tenepnimince, na malye winin ning niryada, kum ubuka kipnutum do?” nyabuka, moronamne. Ara, Allah elda, na yupu bokolina deiyoknye ulula atia.

¹⁶ Winipmanto ara, narye Allah ati, “Ninye yupu bokolina deiyok nang dam yanamlume. Yaminyopura, anggunce na ap, an ap ati, nun yupu kekepsikcopura, yupu bokeipnamsiake,” nyabuka, moroptinye babye, dipkoprob Allah arye, na yupu kum kekepnutue. Nara, talye tukwak mutukunye ununa ati, ato yupu nyaptinye babye, im deice ulya Deiyoknye, Allah arye, na yupu kum kekepnamnile.

¹⁷ Deiyok ara ani. Allah arye na deice ikin ning deibuka, opnamnil ning ara, winipmanto ning nyapnune. Ara, weik kumanya mikip dobuka, yangalamle touk uplirye, kumanya mikip arye opnamnile. Winipnamnil ning ara, nauk ara, kanye imun weik uk dipnamnila ara, ton ap pia weik tonun tabakuka dinamnile. Ara, dipnyop arye, nong ton kum upmaniliba, talyeuk uapnelya deice arye, uk weik dinamnile.

¹⁸ Allah arye ikin ning weik tonun ton arepnilyopura, nati ton lo ara, mitik tonun arye ton kum arepniliba, na isin kum nyanune. Tonda, Allah aryuk, na talima noutam arye tenen ning babye, malye kipdeipnukba, malye kanye bopsirye, talima uk weik dinulule.

¹⁹ Ura, tenipdelulume! Nunce, ‘Yatanye mikip weik ulul do? Allah do, Ayub do?’ tenen, piripnamap do? Kume aning ara, nun akunum kele. Allah ara, mikip pia weiknye ulule. Nara, pia mitang asa uk unune. Tonda, nunce, “Ninye yupu bokolina ati, bulupnuyabe. Ara, ‘Yatanye birye, pia teleb, diksukumuk ulamuk do? Allah arye do? Ninye arye do?’ Aning babye, nun akunum kele. Allah el tonok, pia teleb diksukum winina deiyoknye ulula ati, nunce mandipna kanye bobuka, elti, yukuptibirye, ‘Anda yalyame. Aning-aning ara, yata ati winiplum do?’ nyabuka, pia kum asiptibye! Aning babye, pia kum winiptibye.

²⁰ Na kanye aryuk, nati, ‘Kume, nara malye una kumce, telebuk unune,’ tenelamtinye bukni, na sitang deice arye, nyanamne yupu deice arye, na malye un ning lak upliba, Allah arye nati, “Anda, dipkoprob malye unanye ulyame,’’ nyapnutue. Tonda, aning atonun, na kanye aryuk, ‘Kume, yuk nang arye nati, “El malye ubuk ning ara, ani-ani,” nyabuka, ‘Pia kum nyapnitinge,’ teneptinye bukni, nyaptinya babye, Allah ara, aning-aning eilulnye biti, elcuk, “An malye ulyam ning ara, ani-ani,” nyabuka laka nyaptuba, na malye ulamse ning ara, lak kipnutue.

²¹ Na kanye arye, ‘Nara malye kum wininune,’ teneptene bukni, dipkoprob ara, na talima noutam unilye ning nirya ara, na walwale. Narye akunum winilamse ning babye, tuba kum bikinune. Ati ara, na bidamnye ati, kum bikdatinye. Na kam unye talak ara, na lik ati, ‘Nara kam tuba kum unamne,’ tenenune.

²² Na kanye ara, teleb diksukumuk wininyak nang babye, malye wininyak nang babye, atonun unyake. Ara, sirya talak ara, sik nirya ara, atonun unamake. Ara, Allah arye, ‘Sik teleb unyak nang babye, malye unyak nang nirya babye, wenepniba, dadipnamake,’ akunum tenepsuka ati, sirya talak ara, nun nirya ara, dibinauk upnamabe.

²³ Ninye ton, malye kum winilamlinye bira, el kum teneplye talak bukni, el pia bikina kum, talye karin arye, kanye imun weik un ning, el dam yalye deice arye diplyopura, Allah arye, sik malye winin ning kum winilamik nang babye ati, ‘Dauplye, dadiptingeʼ tenen, luba kiplirye, sik ikin unyak ning ati, elce akutulule.

²⁴ Na kanye teninuna ara, ani. Atukwak mutuku noutam ara, Allah arye aning nirya dobuka, malye winin nang, sik deice akunum deibuk. Winibukopura, sik ninye yupu bokolina deiyok nang nirya ati, “Aning ara, malye winipnin banamalume. Aning ara, pia teleb winipnin banamalume,” nyabuka, yupu bokolin nang nirya, sik deice ara, asing kun ning arebukba, ninye malye winmakce ning ati, “Anggun malye winipmalum ning ara, ani,” nyabuka, teleb kum kilisinyake. Aning nirya ara, Allah arye aning nirya kum winiplyopura, yatanye birye aning nirya winiptu do? Kume, aning nirya ara, Allah elcuka!

²⁵ Na Ayub, na kam tuba unamne talak ara, sik winina kumce, pia minop winipnin balamlya ani, akunum sirya dakalongonauk ulule. Winipmanto ara, minopce bikbik abuka balamnanye atonun ulule. Aning atonun, na kam unun talak nirya ara, teleb ning ton na dam ton kum yanganulule. Na kam unye talak lo ara, akunum minopce sirya daknin balule.

²⁶ Na kam tuba unun talak asum-asum nirya ara, sik kumce, pia minopce sirya dakalolule. Winipmanto ara, pia kanam ning, pina atonun arye, mekwen deice balamle ning, el si ara perau, pina arye kintinibuka mekwen deice deibikiba, aning ara, mek mikip arye minopce bobalamle. Aning atonun ton, na kam tuba unye talak babye, atonun unulule. Minopce bikbik abuka kum danin balule. Tonda Bib maka, el din ning eiplirye, pia minop lakuka yalirye, koulukuka olamle touk, na kam una ara, uku pia kum upnin banamle.

²⁷ Narye nyaptinye ning ara, ani. Ara, ‘Na ikin unilye ning nirya ara, na kum teninamne.’ Tonda, na ikin unilye ning ati, malye kanye bobuka, si lina kumce, urasin malyeuk bonamne ning ara, bataknamne. Winipnyopura, na malye kanye kum bonamne. Kanye pia deipnirye, si libuka, akutunauk unamne. Tonda, kanye imun ning, na dam yanganiliba, akunum dolonun ning nirya babye, luba kibuka unamne.

²⁸ Winibuka nyaptinye bukni, winipnyopura, na ilil weik unulule. Deiyok ara ani. Na kele, Allah ance na Ayub biti, na wininun ning nirya elinilyama ati, ance, “Elda malye winilulnye,” nyabuka, ‘Weik tonun wenebuka opnamnilyamʼ tenen, kanye ikin unulule. Ati, arup nyapmanu yupu, tonap kum nyanamne.

²⁹ Yata ning ati, naryuk, “Nara telebnye unune,” nyabuka, talye nyapdatinye do? Aning nyaptinye babye, na kele, aminyan talak ara, Allah elce nati, “An malye ulyam ning ara, ani-ani,” nyabuka, laka aryuk nyapnuturye, wenebuka opnamnile. Ati ara, yata deiyok ati, pia pi dobuka tuba-tuba ikin pil donun do? Tonda, yata ati, ikin kanye bobuka, tuba ikinuk unun do? Narye pil donuna ara, dipkoprob nong kum upnamla ati nyapne.

^30-31 Tonda, winipmanto ning ton nyapnune. Na malye wininun ning kum danalina ati, pia kurun ning, el si salju dobuka, aning arye, na nong nirya mek diktinya babye, aning deice arye na malye winin ning nirya kume, kum kipdeipnutue. Tonda na taruk mek likina ati, mikip weik sabun arye, mek liktinya babye, aning arye, na malye winin ning ara, min kume, kum danutue. Bukni, Allah elce na dobuka, pia tong nyalamle malye ning weik uamuk tuku pum tam dongopnamnile. Winipnutuba, na baju ara, nininga upniliba, alye upnamnile. Na baju babye nati, ‘Anye ara, na like,’ tenelamnitue. Tonda, nara, ‘Aning nirya winipnilyakʼ tenen, ilil weik unulule.

³² Allah ara, na utonunye kum ulule. Nara, ninye koproba, talye tukwak mutuku noutam ununye atonun pia kum ulule. Elda, talye tukwak mutukunye utopura, na ap, el ap, ninye yupu bokolin nang dam neika bitinimirye, narye tamubuka elti, yupu ton tabakuka nyaptinye. Bukni, el Allah ara, tukwak mutukunye kum ati, aning ara, pia kum nyaptinye.

³³ Tonda, na ap, Allah ap, ‘Yatanye birye malye upmarak do?’ tenen, nun bitinye kan-kan ara, yuknye yupu bokolina deiyoknye, nun dam yalirye, ‘Na amu tamuk ururumeʼ lakilina ati, nun kisok deice, el taruk kum deipnamsile. Ara, “Anye bira, akunum malye winibuk bukni, anye bira kume, telebuk ulule,” nyabuka, yupu bokolina ati, pia kum nyapsutue. Atonye birye, nun bitinye ati, tamubuka teleb kum lipsisikeipsutue. Yupu bokolina weik deiyoknye bira, Allah el uka!

³⁴ Naryuk tenepmana ara ani. Allah elce na wenena ati, opnamnil kama dobuka, yukak deiptumopura, narye elti, pia ilil weik kum upnutue. Tonda, narye elti, ‘Ilil weik upnamnil,’ tenenun ning ara, kum datue.

³⁵ Elce aning winipnutopura, narye Allah elti, ilil tenena kumce, el damuk yanuka, yupu adiparyuk laka nyaptinye. Aning patapmanila deiyok ara, ani. Ara, yuk nang ap, na kayapu arye, nati, ‘Anye bira, pia malye weik winilula ati, Allah ara weik tonun wenelule,’ tenenyake. Anggun ap, sik yuk nang ap arye winibuka tenenilulum bukni, na kele. ‘Aning tenenyak ning ara, na pia kum winipse. Nara, malye weik wininanye kum wininuna ati nyapsine. Ayupu nirya ara Ayub birye, Bildad biti nyabuk.