Ayub 8 - Eipomek

Bildad birye Ayub biti, nyabuk yupu

^1-2 Suah mutukunye, el si ara Bildad, elce, Ayub biti nyabuk. “Yata talak arye, anda ayupu tuba nyapnamlam do? An nyanmalam yupu ara, kum mikip dolamle yupu atonun nyalyame. Anyapmalam yupu ara, talye nyaltakalyama atia.

³ Allah ara, ninye wenena ati, talye-talye ubuka, tilila yupu deice arye bokeipsilirye, wenesulul do? Tonda, aning-aning deice tam erebuka, pia mikip weiknye birye, diksukumuk ululnye ulula ati, el Allah arye, ninye wenesulul talak ara, pia kwalin bisik banmalirye, wenesulul do? Kume, aning ara, kum winipmanto. Deiyok ara, elda malye winin ning ton pia kum ululnye biti, pia diksukumuk ulule.

⁴ Aning atonun, winipmanto, an mapu nirya ara, pia malye winin ninguk talibuka ulamikce, Allah el dam malye ulamting toura, Allah arye sik wenena ati, akunum optue. Nun kanye ara, sikce malye winilamik ning ati, Allah arye sikti, akunum wenebukce obuke.

⁵ Aning atonun, ‘Anti atonun winipkilyak’ tenen, an malye winiplum ning ara, batakmince, diksukum teleb kanye uk bobuka umince, ‘Allah el dam tamubuka unamneʼ tenen, elti, moropminyopura, Allah arye tamubuka, teleb kipdeipnamkile. Tonda, aning-aning nirya deice tam erebuka, pia mikip weik ululnye, Allah biti, ‘Bico tenepnebuka, luba kipnilirye, melibuka lyepnamleʼ tenen, moronalyame. Winipminyopura, Allah arye anti, luba kipkuturye, lyepropkutue.

⁶ Diba, an talima noutam nirya ara, diksukum telebuk umince, tonda malye ning tonok babye kum winipmince, kum tenipminyopura, an ni Allah arye, pia minop aryuk, melibuka lyepropnamkile. Ara, ‘Minop talak teleb ubuka, pia ulamluma ani, aning nirya kum kipdeipkuk bukni, Allah arye tuba tamubuka teleb kipdeipkutuba, telebuk wininamlamʼ tenen, nyapne. An dengna aren ning atonun ara, arepnamkile. Winiplyopura, an neika unamlum nang nirya arye, anti, tuba tamubuka, si erebuka kinamkine tenepne.

⁷ Minop talak ara, anda bona mitik tonun talilamlum bukni, Allah arye melilamkuka ani, aminyan ara, bona weik talinanye ulamlume. Anirye ubuka, aning nirya kum upkuk bukni, aminyan doupnamle talak ara, aning nirya tuba tonap arepkiliba, tonap, anda pia bona talina weiknye unamlame.

⁸ Ance nun apu yapu nang, minop talak ara, kel weik nang winilamik ning ton tenipnalyame. Tonda, nun apu yapu nang, sik punun nang arye winilamik ning ton, nukmince, tenibuka biknalyame.

⁹ Deiyok ara ani. Ara, nun atalak kam unyap nang nirya ara, nun ni yapu arye, winiryuk talak deipsikba, unamabe. Tonda, nunda tukwak mutuku unamap talak ara, kanya like tonok talak arye yanaplya ani, adiparyuk tuba tunim nyalamla atonun unyabe. Ara, nun kam una ara, lo pia weik tonun kum unamabe. Ati ara, aning-aning weik tonun, moubuka kel kum bikinyabe.

¹⁰ Ati ara, moubuka tenipnamlame. Sik minop talak ulamik nang, nun apu yapu arye, kel weik bikamik nang arye nyalamik yupu nirya ara, moubuka tenipmince, wini talak an babye biknalyame. Ara, sik anang arye, akunum bikamika deice arye, anti peterepnamkiaka ati, ayupu deice arye, adiparyuk moubuka biknamlame.

¹¹ Winipmanto ning ton nyapnukine. Ara mekwen noutamuk pabukuka tiklamle ning ara, misa atonun ning ati, an kele. Aning yala nirya ara, mek kup-kup dam, tonda mekwen ap, bentalak ap, anoutamuk palule. Tonda, mekwen deiamlyakuk, talye palulu ning, el si ara kinai ap, tonda pina apuk tikilule. Kume, mek kum upmalayak ara, aning dipkoprob kum bokuka tikilule.

¹² Aning atonun, amekwen do, amek do, abental sukum do, akunum cebuka sisal seplyopura, mekwen dam tikilul ning babye, adiparyuk koulule. Tonda, yukak palul ning ara, mek cepdopliba, mekin dam tikikul ning nirya ara, minop mun-mun danalule. Ninye arye, Aning ara dopropnamneʼ tenen, kum bulakuka batakamikibuk, minop mun-mun dakalule. Mekinak ap, benak ap sisal seplyopura, yuk talye dapalamle ning ara, tuba kam unamle bukni, mekwen dam palamle ning, misa ap, pina ap, kinai ap nirya ara, minop koulule.

¹³ Aning ulula atonun, Allah elti, luba kinyak nang ap, tonda dib kum tenenyak nang ap, Allah el yupu kum dobolbanyak nang ap, sikda aning minop mun-mun daklamle touk unamake. Allah arye, “Aning wininamlume, aning ara, pia kum wininamlume,” nyapdeipsuk yupu, yaniltaknauk unyak nang ara, kam unyopura, ‘Wininamne, aning-aning ton winiptinyeʼ tenen, patalyeba, teninyak ning nirya ara, Allah arye anang wenebuka oplyopura, adiparyuk aning nirya kum danamle. Sik akunum dibikcopura, sik tenen kanye ton, kum bonyake. Akanye nirya ara, akunum wanganyake.

¹⁴ Sik anang ara, ‘Allah elda daupye. El yupu pia kum kekenamabe,’ tenenyak nang nirya ara, minop adiparyuk kum danamake. Sikce, ‘Aning-aning winipnamabe,’ tenelamik ning ap, sikce, ‘Aninguk diba tenenyabe,’ tenebikirye, sik kanye atalye ning deice delinyak ning nirya ap, adiparyuk kum danamlarya. Winipmanto ara, dudukai aik dolamle tapu, pia mitang tapu ap, tonda dudukai arye dolamle aik ara, minop kum danalamle touk, sik anang babye, kume kum danamake. Ara, anang arye, talye-talye ning ati, diba tenebikirye, ‘Ara nun daralan ning aululeʼ tenen, aning deiceuk, barilbanyak bukni, aning ara minopce, kum danin balamle.

¹⁵ Dudukai arye dolul aik ara, pia mitang ninguk ulula ati, yatanye do nirya, anyaik deice barilbalyopura, adiparyuk dakalule. Tonda, dudukai arye dolul tapu talipyopura, adiparyuk daklirye, kum dananlule. Aning atonun, Allah ati, dip kum tenebikirye, yaniltaknauk unyak nang nirya ara, sik talikirye, aninguk kanye barikirye, talye-talye ning nirya ara, pia tuba kum ulule. Anang ap, sikce diba tenebuka barinyak ning nirya ara, kum danamlarya!

¹⁶ Winipmanto yupu ton nyapnukine. Ara, Allah ati diba tenena kumce, pia malye weik winilulnye bira, wa wibuka kwaning koubikiba, keting donokliba, teleb kibuka paplirye, el taruk ara, wa wiamikcak nirya ap, keil deiamik ning nirya ap, aning nirya deice, bilikuka balamle touk ulule.

¹⁷ Akwaning yating ara, keil bukamlya amu tam wekelbalule. Tonda atuku ap, akeil ap deice ara, ayating banmalirye, tuba palule.

¹⁸ Bukni, ninye arye kwaning wa wibuka kouamikca ani, el deiyok nirya, talibuka winiplopminba, kum daliba, aminyan talak ara, ayating pia kum elinyap touk, Allah ati diba tenena kumnye biti, Allah arye, “Anda, na pia walwale,” nyabuka, wenebuka oplirye, pia bataknamle. Anye bira, pia kum daliba, tonap pia kum elinamabe. Winiplyeba, anye bira amutuku noutam ara, tuba kum unamle.

¹⁹ Diba, sik malye ninguk talibuka unyak nang ara, tia talak ati, kanye deibuka unmakca ani, minop kum danin balamake. Aminyan talak ara, yuk nang ton, malye winin nang yakirye, amalye winin nang winilamik touk ubuka, aminyan talak yanamak nang babye, punubuka, malye ninguk wininamake.

²⁰ Ati ara, Ayub anda, moubuka tenipnalyame. Dipkoprob, pia diksukumuk ulamlanye birye, Allah arye anye biti, kum batakalule. Tonda, pia malye ulinye bira, Allah arye, el taruk taliplirye, pia kum melinamle.

²¹ Ura, aminyan talak ara, Allah arye anti, tuba tonap melipkilirye, tamubuka teleb kipdeipkiliba, anda tuba kanye deipmince, el si erenalame. Tonda, Allah arye anti, melipkilyopura, ance teleb kipdeipkilye ning ati, kanye deipmince, an yupu deice arye, teleb yupu nyanamle. Kanye deipmince, weik yupu deice arye, “Naio, anda pia telebuk ulyame,’’ nyabuka, nyanamle.

²² Tonda, atalak ara, anti yu tenekinyak ning ara, aning eibikirye, ‘Seʼ tenen, alye weik dakdanamake. Tonda, Allah arye sik malye weik unyak nang, sik aik dakuka bataknamle. Dakuka bataklyopura, anang ton ap, amutuku noutam ara, pia kum unamake. Ayupu nirya ara, Bildad birye, Ayub biti nyabuk.