Ayub 7 - Eipomek

Ayub birye, “Se, tukwak mutuku noutam kam unyap talak ara, ikin weik unyabe,” nyabuka engebuk yupu

¹ Ayub birye nyabuk yupu ara, ani. Sik ninye arye, sik kanye aryuk, ‘Aning ara winiptibyeʼ tenen, pia pi dobuka wininyap ning ara, winipmanto kum upmasilibuk wininyabe. Nun tukwak mutuku noutam, kam una ara, ikin weike. Winipmanto ara, ikin pil dolamak nang arye, ikin piluk dokiba, imun kanye bobuka ulamak touk, nun tukwak nang nirya babye, ikin pil dobikiba, ‘Yo bok dolon sum ara, minop winiptue,’ tenelamak touk unyabe.

² Yo bok deice arye dekuka deiamikiba, ikin piluk talye dolamikce nang arye, mitang ubikiba, ‘Se, beren tam talak yakcopura, apil bataktibirye, tamubuka aikuk bitibyeʼ tenen, weik tonun patalamle touk unyabe. Tonda, ikin pil donyak nang arye, sik deiyok nang ati, ‘Nun pil akunum dopmaba ati, nun yo bok bokuka delilamak nang arye, nun yo bok areptingba, teleb uptibye. ‘Nun pil donmap ning ara, arepnusiakca!’ tenelamak touk unyabe.

³ Aning atonun, na babye unune. Ara, Allah el kanye aryuk, ikin ning arepmanile. Ara, awala-awala nirya, na kam unun talak ara, deiyok ton kumce talyeuk unune. ‘Aning-aning nirya kum winiptinye ati, yata wiripnamne do?’ teninauk unune. Tonda aning atonun, alukunyan-alukunyan nirya, kanye imun uk dinilyeba, nara kanye imun kanye bobuka, ‘Se yata wiriptibye do?’ engenauk unune. Aning nirya ara, Allah arye arepnuka atia.

⁴ Ati, nara lukunyan noutam, ‘Mapnamanʼ tenen, binirye mapmanya babye, ‘Se, alukunyan akunum uplyopura, dan keting yaliba, tuba buktinye do?’ teninauk unune. Bukni, lukunyan noutam ara, mapmana, bukmana kinauk unune. Lukunyan noutamak bukni, keting weik upliba, talye kanye bobuka, pia kum mapmanto ununa ati, ‘Se, minop berektue,’ tenenune.

⁵ Na nong bol deice nirya ara, ben ap, kuluma ap, weik unulule. Tonda na ining nirya ara, cenulul bukni, tuba tonap na bol deice ara, torok suse weik dinilya deice arye, yabung banulule.

⁶ Na kam unye talak ara, ‘Baju win nang arye, baju win ning deibuka, minop wilongolamaka atonun, minop adiparyuk dipnamnarya,’ tenenune. ‘Wininamne, wininamne,’ tenena ap, ‘Se, winiptinyopura, telebuk uptinye,’ tenena ap, pia kumce, ‘Talye unun ning ara, adiparyuk, sirya daktue,’ teninauk unirye, malye kanye bobuka, engenauk unune.

⁷ Aning ton tuba teninauk unune. Na kam unamne lo ara, mitik tonun uka. Winipmanto ara, tonok talak aryuk, isin kum danilyopura, akunuma. Amitikto lo talak noutam ara, teleb uptinirye, kanye bobuka un ning ara, ton kum upnutua ati, kamnye akunum wangapse. Winibuka unmanya ani, dipnyopura, akunum kum danamne.

⁸ Anggunce, atalak ara, natibuk akunum elinamnulum bukni, like mitik tonun ton, akunum upliba, anggunce pia kum elinamnulume. Atalakuk tuba elinmalum talak ara, talye kanye arye dipnamna ati, anggunce nati eipnamnulum bukni, akunum dipnyopura, kum eipnamnulume.

⁹ Winipmanto ara, dua bum weik tonun tobuka banmalya ani, adiparyuk kum danalamle touk, ninye babye minopce dibinyabe. Aning atonun, akunum diplinye bira, tuku palibuka dongobikceba, akunum diamik nang unyaka, amutuku si ara, Sheol mutuku, amutuku dam arye akunum bilyopura, tamubuka kam un nang dam kum yatue.

¹⁰ Adibikiba akunum tuku palibikce nang ara, sik min arye ulamik aik dam, tamubuka kum yanmanto unyake. Tonda, sikce ulamik mutuku ap, pil dolamikak ap, sik dam ulamik nang dam ara, tamubuka pia kum yanamake. Ara, kum winipmanto atia.

¹¹ Ati ara, nara tunim abuka kum unamne! Na uk dinilyeba, ikin weik ununa ati, na tenenun ning ara, kum tunim anamne. Na talima noutam ap, na kanye ap, pia imun kanye bobuka unirye, ikin tenenun ning ara, yupu deice aryuk talye luparabuka laka nyanamne.

¹² Se, na ni Allah, yata deiyok ati, ance kalikuka dinauk unilyam do? Ance nati ara, ‘Elda weik laut mekwen ulule. Akumopura, elda laut mekwen amu noutam ulamle yu weik bal, el si Naga ulule,’ tenenululumce, pia kalikinululum do?

¹³ Ton talak ara, ikin weik upnilyeba, narye, ‘Na dikdik unulul ning ara, mapmanya deice arye kum danamnile. Tonda, na amsuna deice talye tunim abuka maptinyopura, ikin uk dinilyeba, malye nyabuka engenun ning ara, tunim nyapnamle,’ tenenune. ‘Na ikin kanye bonun ning ara, kanam diamuk upnamnilʼ tenen, epra banune.

¹⁴ Bukni, na mapmanirye, lengdar mapmanya deice arye, ance lengdar mana deice nyapdeipnulumba, lukunyan noutam ilil weik unulule. Tonda, ance arepniminba, na lengdar mapnye talak ara, ance malye kanye tenen ninguk dobuka, na deice uk ikin weik delinilyama ati, ilil weik unulule.

¹⁵ Aning nirya ara, nara weik tonun patanulul ning ara, ‘Na kam tuba unirye, ikin ning dolanauk unun ning ara, na like. Adiparyuk dadiptini,’ tenenune. Akumopura, na tenepne ning ara, ‘Na talibuka oplopnutuba adiparyuk dadibpini,’ tenenune. Dipkoprob, na nong kam tuba unmana ara, na like.

¹⁶ Na tuba kam unmana ara, pia na lik unulule. Ati, na tuba kam unmana ara, na like. Ati, ance nati, ‘Anye bira dauplye,’ tenepnutumce, batakniminyopura, adiparyuk nara dadiptibe,’ tenen, pia patanulule. Deiyok ara, ‘Na kam unye talak ara, tonok isin welepliba, adiparyuk kum danin balamle touk unune,’ tenepne. Na kam una ara, nong kum upnamle ninguk ulule.

¹⁷ Tonda, na ni Allah, aning ton asipdekine. Yata deiyok ati, ance nun tukwak mutuku noutam unyap nang ati, ‘Anggunda, weik mambule,’ tenesilyam do? Yata ati nun unyap ning nirya ati, ance tuba-tuba kalikuka dinauk usimince, tenesilyam do?

¹⁸ Tonda, aning atouk, yata deiyok ati, tuba beren tam talak nirya babye, ance nun tukwak nang wininamap ning el lina ati, nun dam yanuka, pia eibuka bikisilyam do? Tonda, ance, ‘Sikda teleb unamak do, malye unamak do?’ tenen, ikin ning aresiminya deice arye pirisilyam do? Atalak-atalak nirya ara, ance nunti, pia winilenamsilam do?

¹⁹ Se na nio, ance like tonok talakuk, namin kum kipnutumba, talyeuk kum winiptinye do? Tonda, nati, pia tuba-tuba kalikiniminye ning ara, ance nati kalikuka kum dinimimba, alo noutam arye, na maka dipkweteptinye do? Pia kaliknauk tuba unamnilam do?

²⁰ Tonda, se anda nati Kalikna Deiyoknye ulyama ati, na dipkoprob malye upnyopura, adeice arye, narye anti malye kibuka delikunun do? An deice malye ning delikunun do? Anda tukwak mutuku noutam unyak nang nirya ara, sik wininyak ning ati, dinauk ulyame. Ninye mutuku sirya, im sirya nirya elilyama ati, yata deiyok ati, ance na tonok ati, ‘Malye winipnamal do, kum do?’ tenen, moubuka elinilyam do? Yata deiyok ati, an mal ara dobuka, na deice delinilyama do? Narye ikin ning dobuka, an deice delikunun ning ara, pia ikin ukulula ati, ‘Anye bira na like,’ tenenilyam do?

²¹ Yata deiyok ati, ance na malye unun ning nirya ara, adiparyuk lyebuka kum lyepnutum do? Na malye wininun ning ara, ance kum kipdeipnutuma ati do? Na ikin weik unmana ati, minopce akunum dipniba, tuku palipnikcopura, ance nati enmaniminya babye, ance pia kum eipnamnilame. Ayupu nirya ara, Ayub birye nyabuk.