Ayub 6 - Eipomek

Ayub el kayapu arye nyabik yupu kekebukce, el talima ikin ubuka ati, nyabuk yupu

¹ Ayub birye tamubuka, ayupu deice arye nyabuk.

² “Se, na pia ikin unilye ning ati, ‘Yata wiribuka aupmal do, kel biknamneʼ tenen, kiklin ning el si timbangan deice deiptinyopura, eiptinirye kel biktinye. Atonun, na kanye ikin unulul ning ara, nuktinyeura, el ikin ning ara, biktinirye laka nyaptinye.

³ Na ikin unulul ning dobuka, timbangan deice deiptinyopura, lak uptue. Ara eiptinyopura, laut mekwen kup-kup ubuk mekin keil wininga, el si ara pasir, kum nukmanto ulye touk, atalak na ikin unulul ning ara atonun, kum nukmanto ulule. Pasir ara, mitik tonunuk ulul bukni, na kanye ikin unulul ning ara, kanye ikin weik unulula ati, aning el ikin ara, kum nukmanto ulule. Ati ara, narye, ‘Teleb ning ara, ato yupu ara, kum nyaptinye,’ tenena kumce, talye luparabuka nyanmanu yupu ara, malye ubuka nyapmanue. Ati, anggunda ngalukna meme.

⁴ “Nara ikin weik unulule,” nyabuka, malye nyabuka ngalukunmoka ara, talye ati kume. Deiyok ara, pia deice tam erebuka, aning-aning nirya talibuka, pia mikip weik ulul Allah, winipmanto ara, yu ubukba, el mal ara, na nong deice dopnukba biknuke. Winipnuk mal el yu ara, na nong ap, na talima ap ara, na talima noutam weknuke. Winipmanto ara, ninye on mek, el si racun, arepsikcopura, ‘Se, adiparyuk dadipnyabeʼ tenen, ilil weik usilye touk, Allah arye, kanye ikin weik ning arepsilyopura, dipkoprob ilil weik usulule. Elce na olyanuka ati ara, winipmanto yin talin nang weik yakirye, olyangalamaka atonun ubuka, olyanuka ati, ilil weik upnile.

⁵ Anggun ton tenipdelulume! Keledai basam ara, bita winiryuk nepnin balirye, din uniryuk teleb ning dobuka, arebikiba diplyopura, bouplirye kanye deibuka ulul do? Malye kanye bobuka ulul do? Aning atonun, sapi basam babye, el din ati, mutmuta weik tonun sekikirye, boyanuka arebikceba, diplirye akunum bouplyopura, asapi basam arye, malye nyalul do? Kanye deibuka, tunim abuka ulul do? Aning atonun ton, anggunce teleb yupu nyapnutumce, na talima kwa dipmanutum toura, narye ikin kanye bobuka, ‘Seʼ tenen, malye kum nyaptinye.

⁶ Aning atonun ton, mitang uptu din ning ara, garam kum tabakuka dongobikcopura, yatanye birye adin ning pataptuba, weik tonun dipturye, kanye deiptu do? Tonda aning atonun, yatanye birye, kurun ayam kurun dukuk diptuba, to nyaptu do? Kume, aning ton kum winipmanto. Aning atonun ton, anggunce nyapmanulum yupu kekepmanu bukni, ayupu nirya ara, na talima kum melipnuka ati, na talima kum kwa dipnuluma ati, malye nyabuka, tuba engenmane.

⁷ Winipmanto ara, to nyan ning kum bukni, pia malye din ara, na patana kum ati, pia kum diptinye. Narye adin ning atonun diptinyopura, dukmanto ubtinye. Aning atonun ton, anggunce nyapmanulum yupu ara, kekepnirye, ikin kanye bobuka unune. Ayupu ara, pia kum melinulula ati, tuba kum kekepsitinye.

⁸ Se, narye Allah ati moronun ning ara, arepnutopura, na kanye deiptinye. Yata ati Allah arye, na moronun ning ara, kum kekepnilirye, arepmanto kum unulul do? Tonda narye elti, weik yupu deice arye nyabuka moronun bukni, yata ati pia moubuka kekebukcuk, kum arenulul do? Ati, na kanye ara, narye Allah ati moronun ning ara, adiparyuk arepnutopura, na kanye deiptinye.

⁹ Ara, Allah arye na ikin weik unilye ning nirya, moubuka kel bikamnutu toura, elce adiparyuk obuka sice buklopnutue! Tonda, Allah elce nati, ‘Anye bira, opnun,’ tenyamnuturye, adiparyuk oplopnutopura, ‘Na kanye deiptinye,’ tenenune! Aning ara, pia patanulule.

¹⁰ Allah ara, malye winina pia kumnye ati, elda pia Teleb diamuk Ululnye birye, “Aning-aning nirya ara, talibuka unamlame. Aning ara, pia kum wininamlame,” nyapdeipnuk yupu ara, narye akunum moubuka tuba-tuba elinirye, talibuka unune. Ati, ikin unilye ning nirya ara, narye atalak teninuna ara, ‘Allah arye daopnutueʼ tenen, kanye delinune. Tonda, ‘Allah arye wenebuka opnilyopura, kanye ikin weikuk dipnutua babye, teleb uka tenenune. Deiyok ara, Allah arye nyapdeipnuk yupu nirya kum batakse bukni, tuba moubuka talinun bukni, ikin weik na nong deice delinulula atia.

¹¹ Bukni, nara yata mikip wamnutua deice arye, tuba kam uptinye do? Tonda dotalak ara, yata teleb ning upnamnila ati, ‘Nara ton ap kam tuba unmanya ani, aminyan talak ara, teleb ning na dam yalyopura, telebuk unamne,’ teneptinye do? Kume, na mikip pia mitanguk akunum unmana ati, ‘Nara tuba kam kum uptinye,’ tenenune.

¹² Anggun ton tenipdelulume! Na nong ara, kat weik keil bulamla atonun, nara mikip weik unulul do? Tonda na nong ara, kat ning el si ara tembaga, kat weik ulamle touk, na mikip ara, atonun unulul do? Pia kume.

¹³ Dipkoprob ara, na nong noutam ara, na bidamnye arye kum melipdatinye. Tonda, min talak ara, narye, ‘Aning deice, narye melipdatinye,’ tenyamse ning nirya ara, akunum kum kipnuke. Atonun, ‘Yuk nang arye yanuka melipnitinge,’ tenyamse ning nirya babye, na dam kum yanmanto, kum melibuka lyepropnutue. Wini talak ara, na mikip ara, akunum kum danuke. Na melin ning ara, na dam ton kum ulule.

¹⁴ Anggun ton moubuka teniplulume! Yata nang do nirya, sik kayapu ikin weik unyak talak ara, adiparyuk binuka melilamak bukni, anggunda, ‘Anye bira, nunce meliptibye bukni, dabataknyabe. Anye pia kum melinamabe,’ tenepmalume. Aning atonun tenenyak nang ara, pia malye weik unyake. Anggunce awiniluluma deice arye, Allah ara, pia deice tam erebuka, aning-aning nirya talibuka, mikip pia weik ululnye biti, anggunce ilil kum usulule. Anggunda, el yupu ara, yaninauk ululume.

¹⁵ Bukni, se na kayapuo, winipmanto yupu ara, anggunti nyapsine. Mok weik ceplyeba, weik balamle mek oplirye, talye karin arye, mek oplirye mek kup-kup nirya bobalamle touk, anggun babye atonun ululume. Tonda, mitik mek babye, nun kum bikinyap talak bukni, dou maplirye, cepdopliba, amitik mek ara, kum yangalamle touk ululume. Aning atonun, anggunda narye nyanye yupu ara, anggunce, ‘Aning ara dip nyapmale,’ kum tenemunya ati, kum melinululume. Ikin yupu uk nyalulume.

^16-17 Aning atonun, anggunda, mul duk-duka mok ceplirye, mek deice poulyaliba, mek weik tonun balamle bukni, winyamlya ani, buppu li kiplyopura, adiparyuk mul duk-duka mok ap, es ara, kum daliba, tonap kum elinyake. Winiplirye, mek balamlyak ara, cepliba sisal kiproplyeba, mek ton ap kum balula ati, kum kwebuka diptinge. Anggunda aning atonun, na ikin weik unye talak ara, kum melinululuma ati, anggunda amitik mek, tunim alamla atonun nang ululume.

¹⁸ Keledai basam balye deice bukuka, banyaka deiyok nang, ‘Mek patapsila ati, mek upmalyak binuka, mek kwebuka diptibye,’ tenekirye, mek uamukak binuka dilenyak bukni, akunum sisal ceplyopura, tonap, mek ati enmakirye, bisik wangalanyake. Winibikirye, sikda bisik noutamuk tikda balamikca ani, mek kum mutuku uk binuka, dibinyake.

¹⁹ Aning atonun, sik Syeba mutuku unyak nang ap, Tema mutuku unyak nang ap arye, ‘Dengna weik ning dobuka, otam dekelbinamapʼ tenen, sik keledai basam deice bukuka banmalyeba, ‘Mek dan sukum arye kwebuka diptibye do?’ tenen, enmakirye, ‘Amek ara, ton diptibye,’ tenen, kanye deibuka banyake.

²⁰ Bukni, balamikca ani, sikce, mek akunum cepdomlyak eibikcopura, pia ikin kanye bobuka unyake. Ara, sikce, ‘Dipkoprob, mek balamuka dam bitibye toura, amek ara, kwebuka dinamabe,’ tenelamik bukni, amek cepdopliba, mek ara pia kum kwebuka diptinga ati, talye atibuk enyake. Atalak ara, sikda, ‘Se, yata ati do? Wini talak yata wiriptibye do?’ tenen, ikin kanye bobuka ukirye, kanye teniltonauk unyake.

²¹ Aning atonun, anggunda na kwit capu arye, amek ulamle atouk ara, anggun akunum ululume. Kanye imun weik ning, na dam akunum yanukba, na ikin kanye bobuka, unman ning nirya ara, anggunce eipnulumce, kum melinululum bukni, adiparyuk ilil usilyeba, na dam arye leibuka bindoplulume.

²² Aning nirya ara, yata ati do? Narye anggunti, ‘Se, na ikin unulula ati, anggunce talye aren ning ton melibuka arepnamnulume,’ nyabuka moropmasin do? Tonda, narye, “Anggunda bona talina weik nang ululuma ati, na melina ati, dengna weik ning weik tonun arepnululume” nyabuka, moron ning moropmasin do? Tonda, narye anggunti, “Aminyan talak, tuba tonap teleb winipnyopura, anggun ton tamubuka, weik tonun arepnamsine,” nyabuka, namin kin yo bok ton arepnamnulume,” nyapsisa ati do? Kume, aning nirya ara, ton kum winipse.

²³ Aning atonun ton, narye anggunti, “Ninye ton pia bico tenena kumce, na mal olan nang dam arye lyepropnamnulume,” nyabuka, mororpsise do? Tonda, “Malye un nang, sik taruk deice arye alubuka dopromnika ati, anggunce anang ati, yo bok weik arepmunce, dekmunba, sikce lopdeipnamniake,” nyabuka, narye anggunti mororpsise do? Kume, anggun kele, aning nirya ara, kum winipse.

²⁴ Ati ara, wini talak anggunce nati, laka nyabuka laka nyapnululume. Anggunce, “Ayub ance malye winiplum ning ara, ani-ani,” nyabuka, laka nyapnamnulume!” Malye winipmalam ning ara, ani,” nyabuka laka nyapnumunyopura, na yupu nyana kumce, tunim abukapnirye, anggun nyapnamnulum yupu kekepnamsine.

²⁵ Na kanye ara, anggunce na dam ati, pia dipkoprob yupu nyapnumunyopura, na adiparyuk ayupu kekepnyopura, kanye teleb upnamnile. Diksukum yupu ara, mikip weik ulula atia. Bukni, anggunce talye yupu deice arye, wenenauk nyapnumunyopura, nong ton kum upnamle. Anggunce nyalulum wenen yupu nirya ara, yata winin ning ati, wenelulum do? Yatanye biti, wenelulum do? Kume, talye yupu uk nyapnulume.

²⁶ Anggunce nati tenenululum ning ara ani. ‘Anye birye nyasulul yupu nirya ara, talye yupu uk nyasulula. Elce nyalul yupu ara, talye kum dolamle atonun,’ tenenululume. Nara, ikin upnukba, imun kanye bobuka ununa ati, teleb ubuka, kum nyapmanto ununa ati, narye, ‘Seʼ tenen, nyanun yupu nirya ati, anggunce tamubuka, wenen yupu deice arye nyanululum yupu ara, talye atibuk nyalulume. Aning nirya ara, nong kum upnamle ning atia.

²⁷ Na kanye ara, anggunda, anggun kwaknamne mapu, sik talinyak ning ati, anggunce, ‘Nuncuk aning nirya alubuka dopropnuyapʼ tenen, laka bikilin ning, el si ara undi, doplumce, kwaknamne mapu ning ubula dolon nang atonun ululume. Tonda anggun kwit koproba ati, ikin weik uplyopura, anggunce, Elda bona weik talinanye ulamuka ati, el taleamuk ning nirya ara, nuncuk alubuka doproptibye tenen, yuk nang ap, anggun ap yupu talipdamunce, el ning bobuka arelana atonun ululume.

²⁸ Bukni, wini talak ara, anggunce nati, pia moubuka dipdenululume! Narye anggunti, ton tilila yupu nyasunun do, kum do? Kume, na dam tikmatumbuk, narye anggun urasin eipnirye, tilila yupu kum nyapsitinye!

²⁹ Anggun moubuka tenipmunce, min arye ‘Wininamabe, ayupu ton nyanamap,’ tenyamnulum ning nirya ara, adiparyuk bataklumce, tamubuka nati moubuka tenipdelulume! Diksukum kum ululum ning ara, bataknamlume! Na nong deice ikin ning dobuka delina kume. Nara, malye winin ning, pia kum wininuna ati, aning lak upnamle ning ara, anggun ton eipnamlume. Yuk nang nirya arye, ‘Se, el Ayub bira, malye weik ulamuka ati, Allah arye ikin weik ning, el nong deice deiptuʼ tenen, anggunce nyanamlum ning nirya ara, moubuka teninamlume!

³⁰ Anggun ton moubuka tenipdelulume! Narye anggunti, nyasunun yupu ara, malye yupu ton nyanun do? Tonda, na babye, ‘Aning ara telebe, aning ara, pia malye winin ninguk ulule,’ tenen, moubuka teneptinirye, kum biktinye do?