Ayub 5 - Eipomek

Elipas birye, Ayub biti nyabuk yupu

¹ Elifas birye Ayub biti nyabuk. “Ayubo, Allah el im deice pil don nang malaikat noutamak, yatanye yukuptumba melipkutu do? yukuptuma babye, kum kekepkute,” nyabuk.

² Nyabukce, ayupu ton nyabuk. Bita moubuka kum teneplirye, walwal uk ululnye bira, kanye talima noutamuk, yuk nang arye elti, malye winibik ning ara, tuba-tuba teneplirye yu uplyopura, adeice arye dibilule. Aning atouk, moubuka kum tenenyak nang ara, yuk nang unyak ning ap, talinyak ning ap ati, ‘Se, aning ara, na uk doproptinye,’ tenen, kanye talima uk dilya deice dibinyake.

³ Na elilamse ning ara, dipkoprob walwalnye deiyok koubuka, el pil dopra balamuka ani, el winilamuk ning ap, taleamuk ning ap, teleb ubuka weik upnin balamukce, talye karin arye el winilamuk ning ap, taleamuk ning ap, el aik ulamik nang ap ara, subukce, malye ubuka deice arye, nirya kum dayuk. Ato nang ara, like tonok talak wininyak bukni, aminyan ning ara, ikin ninguk doprobikirye, dibinyake.

⁴ Aning ati ara, atonye diplyopura, el mapu ara, telebak kum unyake. Winiplya deice yuk nang arye, el mapu ati kum melinyake. Tonda el mapu yupu bokolina aik bobice talak ara, yuk nang arye ton, melibuka yupu kum bokolinyake anya arye, wenena aik noutamuk bunyake. Sikda pia weik ikin ninguk dobuka unyake.

⁵ Walwalnye diplyopura, el wa wiamlya talye bona utotoa talina kum nang arye, nong ning talye libikirye, yanuka dinyake. Tonda, roti memena deiyok ning gandum kuamlya ak babye, talye palamle ning arye, pabuka tunipdongamliba, dina patalye nang arye libuka dinyake. Anye bira, bona weik talinanye ulamukce, taleamuk ning nirya ati, yuk nang arye, ‘Aning nun taleptibye’ tenen, pia pataliba dolonyake.

⁶ Anyapmakin yupu ara, urdem ati kum nyapkine. Kanye imun usilye ning ara, deiyok kum upmalyebuk, kum yangasulule. Winipmanto ning ara, ikin usilye ning ara, tukwak arye panabuka kum yangalule. Tonda, butbuta deice arye kum panabuka yangalule. Deiyok ara, walwal nang malye ulye deice arye, ikin ning el nong deice yangalule.

⁷ Winipmanto ara, weik uku dinmalirye, uku mikip deice arye sing-singa welelamle tonun, ikin ning nirya ara, yukak arye ton kum panabuka yangalule. Kanye imun ning ara, ninye tukwak nang dam ara, kum batakasulule. Nun nin yapu deipsice talak arye, deiya koubuka, kam unyap talak noutamak nirya ara, ikin ning nun damak yangasiliba dolonyabe. Nun babye ninye adiparyuk malye winibibyeba, kanye imun ning ara, nun nong deice uk yangasulule.

⁸ Aning ati ara, Ayub an ikin ning doproplum touk, na Elipas babye, ikin ning dopromtinyopura, dipkoprob Allah el si Yahweh ati, ‘Na yata ning winipseba, na kanye imun ning deipnulum do? Ance melibuka lyepnutum do?’ nyabuka asipdetinye. Na patapnutu ning ara, dipkoprob el damak laka nyaptinye.

⁹ Ara, Allah arye tenebuka pil dolul ning ara, nun ninye arye tenebuka, kum pil doptibye. Tonda, kum moubuka kel biktibye. Allah arye teneplyopura, pil dolul ning ara, pia weik kum nukmanto ulule.

¹⁰ Allah aryuk, ‘Mok ceptu,’ teneplyopura, mok ceplirye, ninye wa pinyapak ap, tukwak ap saklirye, Allah aryuk mek dikilule. Allah arye tenelul touk, bai tam mutuku-mutuku nirya arye, mek panabuka balule.

¹¹ Allah arye winilula anya arye, ninye kanye namin unyak nang, amu tam atonun unyak nang ara, erelilule. Sik ikin ning doprobikirye, kanye imun ulul nang ati, tamubuka kum opmantu ak, telebak uk deiplirye, pin-pin kililule.

¹² Winilul bukni, tenepce arye tilila yupu nyanyak nang arye, ‘Wininamap,’ tenenyak ning ara, yupu seklirye, kum kibuka delilule. Winipliba, ‘Aning winipnamabe,’ tenelamak ning ara, sukliba kanye imun arye batakanyake. Sik tenelamak ning ara, nong kum ulule.

¹³ Tonda, weik kel bikamikce bukni, tilila ati tilila yupu nyanyak nang ara, sikce, ‘Winipnamepe,’ tenebice talak ara, adiparyuk Allah arye, sikce tilila ati tenenyak ning ara, kel bikilirye, dololule. Adeice sik weik kel nang bukni, tilila ati malye tenepmace ning nirya ara, Allah arye kum danalilule.

¹⁴ Allah arye amalye nang ati areliba, keting noutam bukni, kuna arelule. Ara, Allah arye sik wenena ati kuna areliba eipmanto kum unyake. Malye nang ara, wininyaka anya arye, keting duk-duk bukni, kunukliba dengkelalamaka atonun, unyake.

¹⁵ Sik malye unyak nang ati winilul bukni, bona utotoa talina kum ninye ap, weik kanye imun ulibuk, kanye namin asa arye, amu tam daunyak ninye ap ati, kel weik nang arye, yu upliba, sik bona utotoa talina kum nang deice, malye yupu nyalinyak nang ap, mikip nang arye, ‘Sik talye bona utotoa talina kum ninye luba kibuka optinye’ tenen, yu nang arye tomobuka, tapu koubikirye, wenena aik delinyak nang ap nirya ara, Allah arye lyelolule.

¹⁶ Winilya deice arye, sik bona utotoa talina kum ninye ara, sik lo tuba aupliba, ‘Allah aryuk lyepnamsil’ tenen, dipra unamak bukni, tilila yupu nyanyak nang ap, yuk ninye ati malye kilinyak nang ara, yupu ton pia tapmanto kum unamake.

¹⁷ Allah ara, aning-aning nirya deice tam ulirye, Weik Erena Deiyoknye, mikip weiknye ulule. Malye winibibyeba, Allah el si Yahweh arye, ikin ning nun nong deice deibuka wenesilya ara, ‘Aning ara, teleb uka, dipkoprob teleb updeipmanile,’ tenenamabe. Deiyok ara, ‘Na mapu teleb updeipnamne’ tenen, wenesulula ati, elce wenepsilyopura, ‘Teleb ulinmanile,’ tenepnamabe. Wenena deice arye, nun un ning nirya teleb kipnamsila ati, ‘Se yata ati wenepmasil do? Wenena ara, nun like’ tenena kume. Dipkoprop pia, Allah ara aning-aning deice tam ulirye, mikip pia weik ulule. Elda Pia Weik Erenanye ulula anya arye, el tibuk kanye deibibirye dobolbanamabe.

¹⁸ Aning ara, urdem ati kum nyapsine. Deiyok ara ani. Allah arye nun dam ikin ning deilisulul bukni, tamubuka telebuk kilisulule. Ara, ‘Adeice winipniba, sik malye wininyak ning ara, bataknamak’ tenen, wenena ati, ikin ning aresulule. Tonda, el taruk arye bokuka wenesulul bukni, tamubuka bico tenen lyesulule.

¹⁹ Anya arye, tuba-tuba ikin ning nun damuk like nakub barye uplyopura, lyesulule. Atonun, like tekbarye talak usilye ning babye, lyepdopsiliba kam uk unamlume.

²⁰ Tonda, nun din patapsilye talak ara, Allah arye, ‘Na mapu dibicak’ tenen, ebuka melilamsilirye, dina arepsiliba, din dinamabe. Ton ning ara, olanmakce talak ara, ‘Yu nang arye, na mapu ya arye obikcak’ tenen, melibuka lyepdopsiliba, ya arye sekuka kum opsitinge.

²¹ Tonda, malye kum winipmalumbuk, yuk nang arye, ‘El malye winipmale,’ tenebikirye nyanmalibuk, Allah arye anti kalikuka melilamkiliba, malye yupu an nong deice kum unamkile. Malye yupu nyabuka delikinyak ning ap, malye kum winipmaminbuk, yep-yep abuka, lululikinyak ning ap ara, an deice ton kum unamkile. Tonda, yata ning do nirya, kanye imun ning yaliba, kum kipdeipmanto usilye ning ap ati ara, Allah arye kalikuka melikulule. Aning ati ara, ilil kum unamkile. Allah arye bico tenesilye ninye nirya babye, atonun unamsile.

²² Allah arye bico tenesilye nang ara, kalikuka melipsilyopura, kum kipdeipmanto usilye talak ap, dina patan li yasilye talak ap, mambul kanye kum bonamabe. Aning kum bukni, pin-pin kanye bobuka unamabe. Tonda, yua basam ap, ninye on kwatima ap, aning atonun ning ati, ilil kum unamsile. Deiyok ara, Allah arye melinamsile atia. An babye atonun unamlyame.

²³ Ilil kum unamkila deiyok ara ani. Allah arye kalikuka melisilya deice arye, nun wa win dam keil weik wamlya babye, ikin kum upnamsile. Tonda, bai tam ulul yu kam ning nirya arye, nun kum olyanganamsiyake. Ara, winipmanto ara, ton tam nang arye, yuk mutuku nang ati, ‘Teleb asa arye neika unamabe,’ nyabuka, nyalin yupu nyalalamak touk, unamaba ati nyapkine.

²⁴ Allah arye melipkilyopura, an aik dobuka unamlamak ara, telebuk unalame. Atalak ara, an babye eipnamlame. Tonda, an weinamlam domba basam babye, an talinalam ning babye, tonok babye ton, kum wangapnalame. Allah arye bico tenesilye nang nirya babye, atonun unamabe.

²⁵ Tonda, nunce deibibyeba, dadeipdanin binamak mapu nirya ara, nukmamkumce, weik arye upra banamake. Nunce deibibyeba, dadeipdanin, banamak nang ara, dinak duk yamulamle atonun, upnin banamake. Pia weik unamake. Ayub an mapu babye, atonun upnin banamake.

²⁶ Allah arye milikilya deice arye, an babye ulaminya ani, pia wisi deipmince, nong mikip tuba unamlam karin aryuk, dipnamlame. Allah arye bico tenesilye ninye nirya babye, atonun unamabe. Winipmanto ara, wa wiamice bukni, pia wisiplyeura, lilamak tonun upnamabe. Elifas birye Ayub biti, ayupu nirya nyabuk.

²⁷ Nyabukce, ayupu ton nyabuk. “Ati ara, Ayub anyapmakin yupu nirya ara, nun elilamupa deice arye, akunum kel bikamupu. Ayupu ara, dipkoprob nyapmakina anya arye, otalak an babye moubuka kel biknulyame. Aninguk pia moubuka kekepmince, aninguk talibuka unamlyame. Adeiyok yupu moubuka tenipdemince, ‘Na kam un talak noutamak ara, ayupu deice yata ning kel biktinye do?’ tenen, moubuka tenenamlyame.” Elifas birye Ayub ati nyabuk.