Ayub 41 - Eipomek

Allah Yahweh arye Ayub biti, dukdongobuka wenebuk yupu

¹ Allah arye Ayub biti, nyabuk. Anda mikip weiknye ulamtumopura, mek pum tam ulul bal ikan youn ning si arye, tapu kirikdongobuka, weik laut mekwen pum bisik dopkweteptumce, weik mou bal, el si Lewiatan, taleptuba dobuka optum do? Winiptumopura, amou bal, el sitang si kan-kanya ara, koulongon tapu ban arye darapdongobuka, tapu kouptum do?

² Aning atouk, el u pum bisik tapu arye, kirikdongobuka, kat dula ning arye, el ban tapu pum bisik lukdongobuka, lipdoptum do?

³ Winiptumopura, amou bal arye, ‘Lopdeipnilyame,’ nyabuka moropkuturye, ‘Awinipmanilam ning ara, bataknutum do?’ nyabuka, namin yupu deice arye nyapkutu do?

⁴ Tonda, aweik mou bal arye anti, ‘Se na nio, lopdeipnutumopura, an piluk pia donamkine,’ nyabuka, nyalin yupu deice arye nyapkutu do?

⁵ Tonda, aweik mou bal weilamak maka anirye, tapu kirikuka deiptumce, ‘Na kilmapu kanye deipnamake’ tenen, weiptum do?

⁶ Tapu keriktumopura, sik bon-bona dekne nang arye, ‘Aning ara, nun dektibye,’ nyabuka, yanuka moropketing do? Akunum dekdopmatingopura, el nong optingce, kalibuka yuk dekne nang ton, bokuka arepting do?

⁷ ‘Winipnamne’ tenen, besi tace winilye ning arye, el bol deice luktumba wektu do? Atonun besi tace arye, el kisok deice donoktumba, botokuka wektu do?

⁸ Kume, aning ara, kum winipmanto ning anya arye, kum winiptume. El bol deice like tonok piptuma babye, aning ara, pia kum lukdongopnalame. Adeiyok ara, el mikip weik arye dolamlya ati, pia anyuk kum talibuka tiktume.

⁹ Yata ninye do nirya, amou bal Lewiatan eibikirye, ilil weik upliba, adiparyuk yok sirim talipliba, tukwak pounyake. Anang arye, ‘Amou bal ara, tomobuka tapu kouptibye,’ tenepting bukni, aning ara, pia kum winiptinge.

¹⁰ El mapmali bukni, bulina ara, yu weik ning anya arye, yata mikip nang, el dam bitingce, bukeipting do? Pia kum anya arye, yata nang anirye malye kiptingce, el dam tikilyanuka, yupu nyabuka malye kipting do?

¹¹ Im amu tam ulul ning nirya ap, tukwak mutuku noutamak ulul ning nirya ara, na ninguk ulula anya arye, yata nang arye, nati, ‘Nun ning tia dopropsulum ning ara, tamubuka arepsilyame,’ nyapniting do? Aning ara, pia kum nyapnitinge. Aning nirya ara, na ning uka. Allah arye nyabuk.

¹² Ati ara, laut mekwen pum weik buaya, el si Lewiatan ara, el nong ap, el taruk ap, el mikip weik ulye ning ap ati, talye laka nyapnusine. El ulye ning laka nyana ati ara, talye tunim altaknauk kum upnune. Aning laka nyapnusine.

¹³ ‘Yatanye birye, mania kanye bopturye, weik buaya bal el si Lewiatan, el nong bol bai tam ara, koplobuk do? Kume, el nong bol deice tam babye, nong noutam babye, bol pia kat weik ulula ati, ninye arye, aning kum koploptinge.

¹⁴ Tonda, yatanye, el mania kanye bopturye, aweik buaya bal, el si bam bol dam binuka, tapu arye koupdongopting do? Kume, el si bambol aklyopura, danoutam ara, weik yu si yupa pia weik ulula ati, ninye arye aning eibikcopura, ilil weik uplyeba, el si bambol koupdongopmanto kum upnamake.

¹⁵ Lewiatan el balye deice tam ara, pia kat bol ton abuke. Yin talin nang arye, ‘Nun nong lelipnamapʼ tenen, kat pala ning, el si perisai talilamak ning urasin atonun, el balye tam nong bol ara, pia kat weik ulule. Tonda, el balye tam nong bol ara, pia kat keil atonun ulule. Yin talin nang arye, sik perisai dobuka, dua baris deibikirye, lelebuka delilamak touk, abal el nong bol deice tace ning ara, akat ning atonun ulule.

¹⁶ Abitinye baris ubuk tace ara, bitinye lebuka tikin ninguk uamuk ning ara, pia mining damuk uamukak, kumanya mikip arye dobuka banmana babye, abitinye baris lebuka tikamikce noutam ara, pia ton kum bitue.

¹⁷ Atace ning, baris bitinye ning ara, atam ning ap, otam ning ap, dana tam ara, pia libuka damuk ubuk. Aning baris bitinye uamuk ning ara, abitinye baris nirya ara, ninye yuk nang arye, yuk-yuk kibuka, kum dobuka deipmanto ulule. Aning ara, pia kum winiptinge.

¹⁸ Aweik buaya bal el si Lewiatan, el u pum bisik arye, isin ara, mikip dobuka yalyopura, el dirina, meldang-dang alule. El asing dibunya yok bol ara, ining bi ulula ati, el asing akunum laplyopura, beren tam keting panalyangan tam arye, im tam ining bi ulamle touk ulule.

¹⁹ Winipmanto ara, el si bambol akunum si binuka aklyopura, uku buk urasin atonun, el dirina yalyeba, elinyabe. Tonda, el si bambol pum arye, uku buk mikip yuk-yuk bokuka beleplirye, dana-dana tam balule.

²⁰ El u pum noutam arye, tulum ton welelule. Winipmanto ara, mek yun makau dobuka, uku deice deibikcopura, ayun makau, el si belanga amu tam ara, tulum ap, uku ap, uku buk ap, weleplyeba elinyab atonun, ulule.

²¹ El sitang pum arye, weik uku buk ton yalyeba eiptibye. El si mikip pubuka nyaplyopura, uku dan yo dam auplyopura, ayo binuka bol piplyopura, adiparyuk, uku arye ayo nirya dilule.

²² Lewiatan el isin ara, mikip weik ulule. Tonda, elce balamle mutuku noutam unyak nang nirya eibikirye, adiparyuk ilil weik unyake.

²³ El nong bol deice karasa ara, pia kat weik ulule. Tonda, lulukna pia kum ulule.

²⁴ El nong noutam ara, pia kat weik ulule. Winipmanto ara, gandum duk teikna ati, pala weik keil pia kat ulamle touk, el talima noutam babye, kat weik ulule. Tonda, talima namin pia kum ulule.

²⁵ Lewiatan ara, mapmalya ani, tuba buklye talak ara, sik mikip weik nang babye, aning eibikirye, ilil weik uplyeba, sik nong nirya ilil ulule. Sikda ilil weik unyaka deice arye, ‘Se yata wiriptibye do?’ tenen, kanye teniltonauk ubikirye, kanye walwal uplya ati, sikda mambul kanye bonyake.

²⁶ Ninye arye, ‘Aning Lewiatan ara, yu tace ning arye opnuyab,’ teneptinga babye, kum winipmanto unyake. Ara, yata yu ning do nirya, parang ya ap, mal ap, parang ap, kat tace yo, el si tombak ap, el nong bol deice pia kat weik ulula ati, aning-aning nirya arye, kum lukuka optinge.

²⁷ Winipmanto ara, ninye arye, besi ning arye tace ning dobuka deibikirye, abuaya oploptinga babye, elce, ‘Kume, pia namin ning talye maning atonun arye opmaniake,’ tenenamle. Tonda, kat ning, el si tembaga arye, tace ning yuk ning ton tabaktingce, elti, optinga babye, elce, ‘Kume, akunum lubuk yo arye opmaniake,’ tenenamle. Kat tace ning nirya ara, el nong bol deice, kum lukuka optue.

²⁸ Tonda, ninye arye, ‘Lewiatan bal opnuyab,’ tenebikirye, yu mal dobikirye, obikce babye, asing yu mal arye, el bol kum lukuka optue. Aning atonun, ninye arye kat keil, si yu weik ning dobuka, el nong deice doptinga babye, elce, ‘Kume, pia namin ning, maning do, talye koululamle yo bok do? Aning arye opmaniak do?’ tenenamle.

²⁹ Kat yo arye, el nong deice lukuka optinga babye, elce, “Kume aning babye, pia namin ning, maning bulubuka, tapu arye kitipmatinga arye, opmaniak do?” nyapnamle. Tonda, ninye yupa arye, cang kat yo, el si tombak doprobikirye, ninye ona ati, tace ning arye lukuka kintinibikirye, aning arye elti, opnamaka babye, elce, ‘Kume aning ara, talye ning ukaʼ tenen, nalibuka akutunamle.

³⁰ El mun bol deice ara, kat ning ulul ning ara, ikan deice tace atonun ulula ati, yu weik ulule. Ati, el mun deice namin tuku arye do, benak arye do, adeice balyeura, atuku nirya lulukulule.

³¹ Lewiatan birye, laut mekwen pum balyeura, amekwen nirya, lonting-lonting alirye, lulukulule. Winipmanto ara, mek yuna ati, makau tin weik akunum uplyopura, amek ara akunum tin oplirye, yaruk-yaruk alamle touk, laut mekwen babye, atonun ulule. Tonda, winipmanto ning ara, ninye arye minyak mek dobuka, kuali deice dikdongobikceba, tin weik akunum uplyopura, yaruk-yaruk alamle touk, laut mekwen pum balyeura, alaut mek babye atonun, yaruk-yaruk alule.

³² Tonda, Lewiatan ara, laut mekwen deice balyeura, elce amek pum tam mek kekuka balamle bisik nirya ara, mek kait kurun ning weleplirye, tukwak welelule. Winipmanto ara, pia wisi akunum dace nang ara, sik kisok deice arye, kul potong pia tikilul ning tiklamle touk, amekwen deice ara, mek kait kurun ninguk weleplyeba, kurun ulule.

³³ Lewiatan elda, pia mikip una ap, mania kanye una ap, ulula ati, yu kam ulye ning, yuk ning nirya ati ara, ilil pia kum ulule. Tukwak mutuku noutam kam ulye ning, yala-yala nirya ara, aunyak bukni, Lewiatan atonun ning ton, pia kum unyake. Mambul weik ning ara, el tonoka ulule.

³⁴ Tonda, tukwak mutuku noutam ara, weik yu kam ulye ning yala-yala nirya ara, pia weik aunyak bukni, sik nirya ara, abuaya el si Lewiatan eibikceura, adiparyuk ilil weik ulule. Diba, yata ning do nirya, yuk yu kam ulye ning aupmatopura, Lewiatan el amu tamuk unyake. Winipmanto ara, elda sik deiyoknye, Raja atonun ulule. Pia mikip weik ning ara, el tonok ulule.