Ayub 40 - Eipomek

Allah el si Yahweh arye Ayub biti, tonap asipdeyuk yupu

¹ Allah el si Yahweh arye Ayub biti nyabuk.

² “Ayubo, anyapnukin yupu ara, kekepnilyame. Nara, aning-aning nirya talibuka deice tam unirye, Erena Deiyoknye, mikip weiknye ununa ati, anda ninye sirika bukni, ‘Allah ara, malye winipmal’ tenen, mania kanye bobuka, na dam wenebuka asipdenutum do? Ati ara, anda na dam yaminyeba, narye asipdenamkin ning ara, ance, ‘Nong ara ani,’ nyapnamnilyame,” Allah arye nyabuk.

³ Nyabukba, Ayub birye, Allah Yahweh ati, tamubuka nyabuk.

⁴ “Se, na nio, nara sik walwal nang arye nyalamak yupu atonun nyapmane. Dipkoprob nara malye ununye ati, ‘Arup nyapmakin yupu ara, kum nyapmakitine,’ tenepne. Ati ara, ‘Tonap malye yupu nyapnyak’ tenen, na si bambol amupdogobuka unamne.

⁵ Se tonok yupu nyapmanu bukni, ance asipdenmanilam ning ara, tamubuka kum laka nyapkitinye. Tonda, like bitinye arye nyapmanu bukni, tonap dukdongobuka kum nyapnukine,” Ayub birye nyabuk.

⁶ Nyabukura, Allah Yahweh arye, liman nyapmokce, weik kumanya donmoka karin arye, Ayub biti nyabuk.

⁷ Anda, wisi ninye kel weik arye ulamak touk, an kanye wisi deice arye kintinibuka tikmince, na asipnukin yupu nirya, moubuka kekepmince, tamubuka nyapnamnilame.

⁸ Narye ninye nirya ati, yupu bokolinun yupu ara, ance deiyok ton aupmala ati, yanipniminyak do? Adeice anti, ‘Yuk nang arye nati, elda dipkopropnye, tenepniting,’ tenepmalamce, na nyanye yupu ara, yanipmalam do? Tonda ance, ‘Allah arye malye kipdeipmanil,’ nyapmanum do?

⁹ Ayubo anda, na mikip weik unya atonun ulyam do? Tonda, na yupu nyapnyeba, weik liman nyalamle touk, an yupu ara aning atouk mikip weik arye nyaptum do?

¹⁰ Anda, mikip weiknye ulamtum toura, an nong deice kamo teleb kwerya ap, dirina ap, kipdeipdatume. Tonda, anda mikip weiknye ulamtum toura, pia teleb kipdatumba, ninye nirya arye, an si erepkitinge. Tonda, an winin ning ap, talin ning ap, pia teleb kipdatumba, ninye nirya arye, an si erepkitinge. Bukni, anda ninye sirika ati, aning nirya kum winiptume.

¹¹ Anda Ayubo, na mikip weiknye unya atonun ulamtum toura, an yu ukilye ning ara, ance yu tenelyam nang, sik deice deipnulyame. Ara, kanye talima erelan nang, sik deice deipnalame. Winipminya deice arye, sik tenenyak ning ara, batakuka, amu tamuk unamake.

¹² Aning atonun, sik kanye talima erelan nang nirya eipmince, anang ara, ance amu tam kipdeiptum do? Tonda, ance atikmalamak aryuk, ninye pia malye winin nang unmatingakuk, ance obuka sirya daktum do?

¹³ Winiptumopura, adiparyuk amalye nang nirya obuka, tuku pum dongobuka weiptum do? Winiptuma deice arye, sik anang nirya ninye diamikce nang unyakak, bobinuka deiptum do?

¹⁴ Anyapmakin ning nirya winiptum toura, na Allah arye an Ayub biti, an siuk erepkitinye. Ara, an sirik taruk deice arye lyepdatumba, narye an siuk erepkitinye.

¹⁵ Narye anti kwepdeipkise touk, yuk kam ulye ning, el nong weik yu ning ara, kwepdeipsiba, weik mek dam bukni, bai tam ulule. El nong ara, weik ning bukni, sapi basam arye, talye palamle maning dilamle touk, aninguk diplirye ulule. Aning ara, eipmince, moubuka tenipnamlyame.

¹⁶ Aning ara, mikip weik ning ulule. El nong ap, el mun tam ap, mikip weik ulule. ‘Aning, elce opsilyakʼ tenen, moubuka tenemunce, kalikilamlume.

¹⁷ Pia kat yo, el si ara aras yo, kat weik ulamle touk, akam ulye ning arye, el amu cang ara, mikip arye diksukum ubuka bibikilule. El keil noutam ara, tup ap, milmil ap, mikip weik ulule.

¹⁸ Aning el yanuka noutam ulye yo ap, el yan nirya ap, taruk nirya ap ara, kat weik ning, el si tembaga atonun ulule. Tonda, akat weik ning, el si ara, besi beton atonun ulule.

¹⁹ Na Allah arye, nong weik kam ulye ning yuk-yuk ning ton, yupa pia weik tonun kwepdeiamse bukni, yuk ning nirya ara, mikip mitikto unyak bukni, aning ara, mikip weik ap, yu ap ulule. Ati, na Allah arye, aning nirya kintinip deipse deiyoknye, naryuk pou weik kam ulye ning ara, optinye. Yuk nang nirya arye, aning kum optinge.

²⁰ Talye bai tam kam ulya ning, yuk ning yala-yala nirya ara, mutuku kon binuka bunyakak ara, sik arikal dobuka unyakak ara, maning teleb ubuka palula ati, akel pou kam ning ara, mutuku kon amu tam binuka, maning dilule.

²¹ Tonda, aning ara, kanye deibuka, weik mekwen weklirye tunim abuka malule. Ara, mekwen deice bokolul keita ning, el si ara teratai uamuk noutam arye, wekuka malule. Tonda, balamle mek lilun, talye kwei palulak ton, binuka weklirye, duknulule. Tonda, benak ton weklirye, malule.

²² Akam ulye ning ara, balamle mek dam bukni, yo taruk weik palamle yo amu tam, wekuka malule. Ara, ‘Keting deiplyeba, na nong bol tin weik upnilyakʼ tenen, pala yo taruk tiklamle yo, el si ara gandarusa yo, taruk wamlyak wekuka malule.

²³ Anong pou weik ning ara, mek weklyeba, mek ara weik tonun opturye, el nong dam yatua babye, ilil kum ulule. Winipmanto ara, Yordan mek weik tonun opnin, banmatua ani, aning el pum bisik wektua babye, ilil pia kum tenelule. Elce, ‘Kume amek optua babye, amek noutam ara, talye tiktinye,’ tenelula atia.

²⁴ Anong kalipdoba, weik ulye kam ning ap, mikip pia weik ap kam ulye ning, el si ara Kuda Nil, yatanye birye mania kanye bopturye, aning el kisok talipturye, el si pum bisik ara, tapu dongopturye, atapu libuka aning bobitu do? Kume, aning ara, pia kum winipmanto ning atia.