Ayub 4 - Eipomek

Ayub ap, el kwit Elifas ap, minopce yupu talipdik yupu

¹ Ayub birye, nyabukba, mutuku si Teman mutukunye, Elifas birye tamubuka nyabuk.

² “Ayub anda ayupu nyapmalam ning ati, yatanye birye darapdongobuka ulamtu do? Na babye pia tunim abuka, kum uptinye. Na yupu nyapkinyeura, nimalye arye kekepnutum do? Yu kanye bopnamnilam do?” nyabuk.

³ Ayubo anda minop talak ulamlum ning, luba kina meme. Tuba tonap pil dolyam ning tenipdenulyame. Ninye yuk nang weik kekelamika ak peterelalume. Tonda, mikip kum mitang ulamuk ninye weik, ance mikip kililamlume.

⁴ An nyalalum yupu deice arye, ninye mitang ubikba, kum winipmanto ulamik bukni, ance moubuka pin-pin kipdeipnaba, anang telebuk ulamik. Tonda, mikip pia mitang ubukba, kum binmanto ulamik nang ati, an yupu nyalaluma deice, mikip kililalumba, mikip arye ulamik.

⁵ Bukni wini talak ara, an bidamnye nyalalumnye, kanye talima imun ulin ning, an dam yalaba, kanye wangaplame. Tonda ikin ning an damak yalaba, ‘Yata deiyok ati upnil do? Winira yata winiptinye do?’ tenen, teniltona uk unmalame.

⁶ Aning ati ara, anda Allah ati tuba dib tenenmalam do? Tonda diksukumuk tuba unmalam do? Aning nirya tuba ulamluma anya arye, yata ati teniltona upmakilba, mikip arye dib kum tenepmalam do? Allah arye diksukumuk unyak nang ati, ‘Dipkoprop kalikuka melinamle’ tenen, dib kum tenelyam do? Allah ati dib tenebuka, diksukumuk ulalum ninguk, talibuka ulamtumopura, adeice uk an kanye deibuka ulamtum bukni, aninguk kum unamlam do?

⁷ Adiparyuk an tenepnamlyame. Dan mutuku ton ninye malye un ning, pia kum wininmalinye, wenebuka onyak do? Atonun, dan mutuku noutamak ara, Allah arye diksukumuk ulamice, ninye ton wenebuka olul do?

⁸ Narye dilamsirye, kel bikamsa ara, ninye arye malye yala ning dokikiba, malye ninguk palule. Aning atonun, na kel bikinuna ara, malye ning pil donyak nang ap, malye yupu nyalulnye ap, sik nirya dekna ning ati ara, ikin ning dolonyake.

⁹ Sik malye upmace nang ati ara, Allah el yu uplyopura, si pito pupliba, adiparyuk obuka sirya dakalule. Allah arye amalye nang ati, yu weik uplyopura, kam kum unyake, adiparyuk opliba dibinyake.

¹⁰ Bai kus atonun ning el si singa kus weik yakirye, yu uplye talak ara, weik yupu nyalamle touk, anang ara, weik yupu arye malye nyanyak bukni, Allah arye sikti, yupu sekelongolule. Weik singa kus, el si weik uptu babye, el si kuruktopura, kam ning kum obuka diptue. Aning atouk, malye unyak nang, mikip weik uptinga babye, Allah arye anang ati wenelule.

¹¹ Tonda, bai tam kus atonun ning, el si singa kus ati, Allah arye el din ning kum arepmalyeura, din patapliba, diplyopura, el mapu nirya ara, talye yuk-yuk dabanyake. Elifas birye nyabuk.

¹² Nyabukce, ayupu ton nyabuk. Tonok talak, ninye diplamak nang sik kanye, na damak yayukce, dungnubuka na amul pum bisik nyapnuke. Yupu mur-mur anmokba kekepse. Ayupu dungnubuka, nyapnukba, amul arye kekepse.

¹³ Pia lukunyan noutam, ninye nirya ara, pia malamak talak, na dam yayukce nyapnukba, kekesirye, mambul kanye bobuka, mapmase. Winipmasa deice arye, lukunyan malye lengdar mapsa.

¹⁴ Winipsirye, ilil upnukbuk, kanye wangapsirye, bukmaka binukce, sirim talipnuke. Ilil upnukbuk, na nong nirya, sirim birbir apnuke.

¹⁵ Winipse talak uk, tererem alamle kumanya atonun, adiplamak nang sik kanya yayukce, na asok deice yanuka paknukba, na nong bol nirya ikipnuke.

¹⁶ Atalak na damak ninye atonun ubuka tikmokba, urasin ara dildanmanumu bukni, elda moubuka kum kel kipse. Kum kel kipse bukni, yupu nyanmok ara, mur-mur nyanmokba kekepse.

¹⁷ Aning arye nyapnuk yupu ara, ani. Allah el malye una pia kum aniryuk, pia telebnye ulul touk, tukwak ninye babye, el ulya atonun upting do? Kume, kum winiptinge. Allah arye tukwak ninye kwepdeiamsuka deiyoknye, pia telebnye ulya atonun, tukwak nang atonun upting do? Kume, aning ara kum winipmanto.

¹⁸ Atonun, Allah el pil dona nang, sik im deice unyak nang malaikat babye, mitik anun arye, malye winipmanto unyaka anya arye, Allah arye el malaikat nirya ati, ‘Diksukumuk unamake,’ kum tenelule. Aning atonun, Allah el im deice arye yanuka yupu laka nyapra ban nang, malaikat malye winibicopura, Allah arye sikti, ‘Malye winipmaluma ara, anye,’ nyabuka wenelule. Sik tukwak mutuku unyakce, pil donyak nang babye, mitik ton malye wininyaka anya arye, Allah arye sikti, ‘Diksukumuk unyake,’ kum tenelule.

¹⁹ Im deice unyak malaikat mitika aryuk malye winipmanto unyak bukni, tukwak mutuku unyap ninye ara, wanuke pia malye unyabe. Ara, nun malye unyaba ara, mitika arye kume, weik arye malye unyabe. Winibipyopura, Allah arye nunti wenesulule. Nunda ninye kira tuku arye dobuka, tuku deice asik donyap ninye ara, mikip kum mitanguk unyap nang anya arye, malye weik unyabe. Winipmanto ara, kuruduma taruk arye, akapkwetebikiba, sik kum diplamak atonun, unyaba anya arye, dipkoprob malye unyabe.

²⁰ Ninye tukwak nang ara, mikip kum mitanguk unyaba anya arye, minopce dibinyabe. Ninye ara, beren tam talak uk kam unyak bukni, keting noutam ara, nirya debuka yamunyake. Dibicopura, tuba tamubuka tonap diamikce, nang kum elinyabe. Ton nang ara dibicopura, yuk nang arye anang ati, tuba tenena kumce, luba kildongonyake.

²¹ Winipmanto ara, ninye arye baju bola doltakna aik dobuka tia talak ati, daulamica ani, ‘Panabuka binuyabe,’ tenebice talak arye, cang kain aik birin tapu lopdongobikirye, adiparyuk talye mangkau kibuka banyake. Aning atouk, ninye tukwak nang minopce dibinyake. Ninye ara, weik kel kina ning nong noutam ning min kum kel bikmace talak, moubuka kum tenebice talak aniryuk dibinyake. Elifas birye, Ayub binyak nyabuk.