Ayub 39 - Eipomek

Allah arye Ayub biti, nyabuka wenebuk yupu

¹ Tonda, mutuku deice ulul kambing basam mi deipnamalya ati, mi deiyok donmalye talak ap, rusa basam mi deiyok donmalye talak ap ara, ance akunum eibuka kel kilyam do?

² Kambing mi bomlya ani, ‘Atalak ara, mi deipnamle’ tenen, ance el deipnamlye wala nukdebuka bikilyam do? Tonda, mutuku deice ulul kambing ap, rusa ap, mi deipnamalye sum ara, bikilyam do?

³ Sik aning mi delinmace talak ara, amnya kanumdongobuka, mi delinyake. Akunum deibiceura, mi deiyok kum dilule.

⁴ Mi akunum deiamliba, amutuku aryuk nepnin balamikirye, mikip uplyopura, sik nin dam arye batakuka, yuk mutuku banyake. Winibiceura, sik nin damak ton, tamubuka kum yanganyake.

⁵ Yatanye birye, bai tam keledai basam ara, kwepdeibuka deibukba, bai tam mutuku ulul do? Tonda, ninye arye, sik weinyak ning ati, ‘Talye luba kibuka, bai tam unamak’ tenen, kam ning kirikildongon tapu lopdongobikiba, talyeuk balamak touk, yatanye birye, bai tam ulul keledai basam, kwepdeibuka deiamukba, bai tam talye daunyak do?

⁶ Aning ara, na Allah aryuka. Na aryuk, sik aning unamikak ati, lo weik mutuku ninye kum unyakak, kintinibuka arepsiba, mok ap, mek ap kum ati, buppu weik arye, ninye kum ulamik mutuku noutamuk unyake. Tonda, lyu pata mutuku bukni, garam uwa weik ulul mutuku, sik manamakak ati, kintinipse.

⁷ Abai tam keledai basam ara, ninye lelim lelamak sukum ara, pia kum kekenyake. Tonda, kuda basam arye, libuka bobalye ning deice bukuka, balulnye birye, yupu nyalye ning ara, bai tam unyak keledai basam ara, pia kum kekenyake. Akeledai basam ara, bai tam ulula anya arye, asik noutamak unmace ning nirya ara, kum tenelule.

⁸ Tonda mutuku-mutuku nirya, mutmuta el dina ati, epra banmalya ani, el dina mutmuta imbik ning ulamlyakuk, eiplirye yangalule. El yuk teneplye touk, talye lukparabuka balule. Ayub, anda, aning kwepdeibuka deiamuka deiyoknye, kel bikaminyopura, nyapnamanilyame.

⁹ Tonda, bai tam ulul sapi basam arye, an yupu kekebuka dobolyakuturye, an pil yanuka melibuka dolinamkil do? Tonda, an wein basam din ning, delilyam aik pum tam yanuka, mapkutu do? Winipkutu ura, el dina areptum do?

¹⁰ Ance bai tam sapi basam un dam yo deibuka, tapu kerekdongopminyopura, tuku palin yo deibuka, deiyok deice kirikdongopminye talak ara, sapi balirye, lilolibuk, tuku palipnamkil do? Winipturye, an wa tabang lipsisikuka palipdeipkutu do? Ance asapi basam ati, ‘Na wa win dam ban bisik yabuka, teleb kipdeipnilyame,’ nyaptumba, cakuka teleb kipdeipkutu do?

¹¹ Ati anceura, asapi basam ati, ‘Elda mikip ulul ning anya arye, na ikin pil nirya dopnamnile,’ tenelyam do? Aning dib tenepmince, ‘Elce na mitang unulula anya arye, melibuka na mambul pil dopnamnile,’ tenelyam do?

¹² El asapi basam ati, ance teneminya ara, ‘Na wa win dam bilirye, gandum nong libuka boyanganamnile,’ tenelyam do? Tonda, ‘Gandum sekuka, asapi deice dipminba, boyanuka deipkiliba, sung-sunga wibuka lapnamak’ tenen, ‘Boyanganamnile,’ tenelyam do? Ayub, anda aning kel bikaminyopura, nyapnamanilyame.

¹³ Tonda, dika maka kanye deibuka, merekeiplirye potong erebuka, taram erepdeibuka kwalilule. Bukni, el pol ara, bumang uka. Dika maka, el pol potong cang ning ara, weik teleb ulula anya arye, el amaka ara, lang-lang abuka balule. Dika maka ara, im noutamak kum binmanto ulule.

¹⁴ Unta maka arye, el duk talye mek wininga deice adeiplomlirye, daulamlya ani, mek wininga buppu aryuk, el duk ara, buppu pirilamle.

¹⁵ Bukni, el duk ara, talye adelitakalule. Amaka ara, el kanye bona kum ning anya arye, el duk luba kiplirye, ‘Ninye arye banmakirye, yanibicake,’ kum tenelule. Tonda, ‘Yuk kam ning, talye bai tam unyak ning arye, talye mangkau kibuka banmakirye, yanibicake,’ kum tenelule.

¹⁶ El amaka arye, mi akunum deiplyopura, ‘Ara na mi’ tenen, moubuka kum irilule. El mapu delilul bukni, el mapu ati, ‘Na damak una kume,’ nyabuka, ‘Lakuka bilulume,’ nyalule. Amaka arye, ‘Na mi deipnamasa talak ara, kanye imun deice arye deiamse,’ kum tenelule. El mi diplyopura, ‘Dauplye,’ tenelule.

¹⁷ Winilya deiyok ara, na Allah arye, elti, moubuka tenepnirye, kanye bona deiyok ning kum arepsa ati, kanye bona kumce ulule. Kanye bon ning kum arepsa ati, wal-waluk ulule.

¹⁸ Kanye bona kum anya arye, talye tukwak balul maka ulul bukni, amaka kanye deiplirye, el taram erepdeibuka, kwalinmalirye, tuku bisik laka balyopura, kuda basam balye deice bukuka, banmalinye biti, amaka arye kanye ereplirye, bisibalule. Aning nirya ara, naryuk kwepdeipse, ance kume. Allah arye Ayub biti, nyabuk.

¹⁹ Tonda, Ayub ance kuda basam ara, mikip kililyam do? Tonda, kuda el un dam cang potong, yaling-yaling alamle potong ara, ance memelilyam do?

²⁰ Ance kuda basam ati mikip arepminba, sul kwising im suklamle tonun ulul do? Tonda, ance kuda basam ati, mikip arepminba, el si bam bol pum tam arye, weik yupu nyapliba, ninye nirya ilil ulul do?

²¹ Atonun, akuda basam el mikip ati, weik kanye deiplirye, yanuka tuku deice yanuka walalule. Winiplirye, ilil una kum aryuk, mal oldanmakcak, mikip arye bikbik abuka balule.

²² Tonda, akuda basam ara, pia mal oldanmakca noutamak balya babye, ‘Opnamniyak do?’ tenen, talima uk kum dilule. Winiplye talak ara, mal oldanmakca anya arye, ‘Ya arye dobuka opnicak ati, tamubuka binamne,’ kum tenelule. Mangkau kanye bobalule.

²³ Akuda basam oldanmakcak, banmalye talak ara, el deice bukmalinye, kikipmalye parang ya, lelim lenmalya ap, tonda cang besi dula mili paralamla ap ati ara, ilil kum ulule. Talye lukparabuka balule.

²⁴ Tonda, pia yu teneplirye yu upliba, minopce bikbik abuka balule. Tonda, el oldan nang arye, pong-pong ana, el si terompet lelim nyapnin yanganmace ning ati, kekeplirye, ‘Opnicak’ tenena kumce, el tunim abuka, kum dungnulule. Bikbik abuka, banauk ulule.

²⁵ Kuda basam daulamlye bukni, pong-pong ana, el si terompet nyakiba, lelim kekeplirye, si bam bol pum tam arye, kaksuruk alule. El yupu weik arye nyalule. Tonda, ninye oldanmace nang, sik dam kabul banmalye talak ara, pera mutuku unmatinga babye, sik yin bisik ana nintong, minopce el u pum bisik biliba, kekelule. Tonda, yukak arye, mal oldana deiyok nang arye, opnin yanganmace lelim ara, akuda minopce kekelule.

²⁶ Tonda, ance Bip maka ara, ‘Winibuka lakanamle,’ tenyamlum touk, lakalul do? Winiplirye, iknapye tam lakuka balye ning ara, ance tenyamlum touk ulul do?

²⁷ Tonda ance nyapminba, Rajawali maka lakuka balamlirye, dinmalya ani, ninye kum binmanto mutuku eiplyopura, el aik dobuka, el duk asukumuk delilul do?

²⁸ Amaka duk delinak ara, weik arye bukamlye mutuku amuak, keil deiya deiplirye, asukumuk irilule. Asukum ara, ninye arye binuka kum doproptibye. Kot sukumuk, duk delilule.

²⁹ El aik dobuka, duk deiamlya ani, akunum duk cobuka, mi bukiplyeura, amaka mi el len arena ati, el lin yukak arye kalikenmalirye, dinmaliba, el dina balibuk eiplyopura, adiparyuk yanuka oplirye, el mi arelbalule.

³⁰ Tonda, el mapu nirya ara, ining ninguk dinyake. Anya arye dan tam do, oltakana ning aupmaliba, eiplyopura, asukumuk dolyangalule. Tonda, elce kam ning obuka, sekuka batakmaliba elinyabe.