Ayub 38 - Eipomek

Allah el si Yahweh arye, Ayub biti, nyabuk yupu

¹ Ayub birye, “Se, na kanye ikin upnil ning ara, yata deiyok ati do?” nyabuka asipdeyukce, malye nyabukopura, Allah Yahweh arye, Ayub weik ikin kanye ulamuk ning ati, weik kumanya donmokce, pirinmok noutamak arye nyabuk.

² Ayub, nara Allah moubuka tenepnirye, kel bikna ning nirya weik deiyoknye ununa anya arye, anda yata tonye birye, yata ati asipdenutum do? Narye anti, laka nyalikiniba, ‘Elda walwal arye nyalula,’ nyabuka, mandipna kanye bobuka, nyapnutum do? Anda dipkoprob walwalnye anya arye, kel kum bikamincuk, talye nong una kum, yupu uk nyanilyame.

³ Aning ati ara, mambul yupu nyapnukine ati, kintinipnamlyame. Wini talak ara, anda ninye ulaminyopura, na ap, an ap, yupu nyana deice arye, nun kiklipdandenamaname. Ati ara, narye Ayub anti, asipnamakin yupu ara, adiparyuk nyapnamanilyame.

⁴ Ayub anda, tukwak mutuku, im sirya, mutuku sirya ap, tuku amu tam yangan keil ap nirya, kwelinmase talak ara, an asing koproba arye dinmalum do? Atalak ara, an dan mutuku ulamlum do? Ara, mutuku kwepdeipnuse ati, mutuku yangan keil deiyok koubuka deipsak ara, akunum kel bikaminyopura, laka nyapnamanilyame.

⁵ Yatanye birye, ‘Tukwak mutuku kwepdeipnamne’ tenen, tukwak mutuku weik, lo weik ubuk ning ara, tapu deice arye kiklipdeyukce, kwepdeibuk do? An ton kel kiplum do? Tonda, mutuku-mutuku nirya ara, tapu deice deibuka, kiklipdemuknye bira, an kel bikalum do? Anya arye, ance aning kel bikaminyopura, nyapnilyame.

⁶ Aning atonun, mutuku nirya kwepdeiamuknye birye, ‘Mutuku nirya darapdongobuka, teleb upnamle’ tenen, yatato ning deice arye baripdeiamuk do? Tonda, yatanye birye, mutuku yangan keil kwepdeibukura, mutuku nirya teleb ubuka bukuk do?

⁷ Tonda, aning kwepdebuk talak ara, beren tam berekuk talak ara, kurya nirya elilyam ning ara, minop talak mot sebikba, im deice tam unyak nang, malaikat nirya kanye deibikce, weik yupu nyanmeka ara, an ton alelim kekeplumce, eiyalum do? Anya arye ance aning kel bikaminyopura, nyapnilyame.

⁸ Weik laut mekwen duk-duk noutamak arye, mek panabuka balamukba, ‘Dana-dana tam bilyak’ tenen, yatanye birye mekwen duk-duk noutamak ipdongamukce, ‘Mekwen deipnalam ning ara, asukumuk a, yukak ton kum banamlyame,’ nyapdeiamuk deiyoknye bira, yatanye birye nyabuk do? Amek mekwen tuku amu tam arye, panabuka balamuk talak ara, ance anye bira, eibuka kel bikaminyopura, nyapnilyame.

⁹ Aning ara, na Allah arye amekwen el singnina ati ara, dua arye kitipdongopse. Tonda, el amekwen lelildongona ati ara, kuna arye singnipdongopse.

¹⁰ Aning atonun, narye, ‘Laut mekwen mutuku nirya kum deipnamle’ tenen, kintinibuka deipsirye, tuku pilipdongopse ning ara, an eiyamlum do? Winipmanto ara, aik dona deiyok nang arye, anyaik bublan ap, kat ayukumna ap, abilinga ap nirya ati, ‘Winibuka dopnamabe,’ tenelamak touk, narye laut mekwen nirya ati, narye, ‘Winibuka deipnamne,’ tenelamse touk, kwepdeipse.

¹¹ Tonda, narye alaut mekwen ati, ‘Anda narye kintinibuka deipkise sukumuk deipnalame. Bisibuka yuk-yuk mutuku nirya bamince, kum singnildongonamlyame. Anda na yupu ton kum bisipnamnilyame. Tonda, mek kamula bulamle ning babye, mikip arye talye kum welenamlyame. Tonok sukumuk unalame,’ nyapdeiamse talak ara, an ton kekalum do? Akumopura, atalak ara, dan sukum ulamlum do? Anya arye, ance aning kel bikaminyopura, nyapnilyame.

¹² Tonda, an nin deipkuk talak arye diprongobuka, ayangalamuk talak noutamak nirya ara, ance, “Winipnulyame,” nyapdeialumba, berekamuk do? Berekna ati, ance, ‘Bereklyame,’ nyaplumba, berekelul do? Tonda bereknulya ati, tulik bisik yana ara, ance, “Anyak yanamlume,” nyalaluma deice arye, yanuka ulamukce, tuba yalul do?

¹³ Ance, ‘Malye winin nang arye, malye-malye wininyak ning nirya bataknuyak’ tenen, ance nyalamlumba, adiparyuk bereklamukba, tukwak mutuku nirya dirina weik ulamukce, malye winin ning nirya kum danamuk do? Tonda, ninye arye amsuna deice, ‘Butbuta ap, malye ning ap, palepmalye ning kum danul’ tenen, dobuka bolboloklamak atonun, ance nyapdeialumba, tukwak mutuku dana-dana nirya, malye ning kum dayuk do?

¹⁴ Winipmanto ara, ninye arye kira tuku dobuka, ‘Sik tenepmace touk, winipnamle’ tenen, telelilamak ning, yuk nang eibikirye, ‘E, sik memepmak ning atia,’ tenebuka nimalye arye dinmakirye, kel bikinyake. Aning atouk, berekna talak keting dirina ara, bereklye talak arye, tulik bisik yalyeura, tukwak mutuku, im sirya, mutuku sirya nirya, urasin lakak ulule. Tonda, ninye arye, baju delinak deibikiba, abutum el urasin nirya lak upliba elilamak touk, tukwak mutuku ara, nimalye arye bereknin banmaleba, tukwak mutuku urasin lak elinyake. Ati, ance, ‘Bereklyame,’ nyaplumba, bereklirye, tukwak mutuku urasin lak kilul do?

¹⁵ Sik malye unyak nang ara, ‘Nun malye wininyap ning ara, kuna ak uk ulamepebuk, yuk nang ton kum elinamsiyake’ tenen, lukunyan talakuk, malye-malye weik unyake. Bukni, bereklyopura, keting deiplirye dirina upliba, sik unyakak ap, sik mikip arye taruk erebuka ninye opnuce ning ap, sik malye unyak ning nirya ap, lakak upliba, ‘Yuk nang arye eipsicak’ tenen, sik malye winin ning batakanyake. Ati, ance nyapluma deice arye berekeliba, malye winin nang arye, sik wininmace ning batakanyak do, kum do? Ati, ance aning bikaminyopura, nyapnilyame.

¹⁶ Ara, anda laut mekwen deibuka noutam duk-duk ton koulukuka balalumce, eiyalum do? Tonda weik laut mekwen adeibukak noutamak ton, koulukuka balalumce, eiyalum do?

¹⁷ Tonda ninye dibikirye, wekelbace bublan bisik ara, eiplum do? Aning atonun, sik aninye debuka, kunukne bisik bublan wekelbanyak sukum ara, ance eibuka bikamlum do?

¹⁸ Mutuku-mutuku nirya lo ara, yata barye ubuk do? Ance tukwak mutuku nirya tapu arye, kiklipdebuka, bikamlum do? Ayub an bikaminyopura, nyapnilyame.

¹⁹ Tonda, keting dirina ara, dan tam arye yangalul do? Ance aning eibuka, kel bikamlum do? Aning atonun, kuna deiyok ulyak ara, dan mutuku ulul do?

²⁰ Ati dirina ap, kunukna ap, ulamdakak ara, akunum bikaminyopura, sik bitinye dobuka, sik deiyok ulamdicak, tamubuka delilbitum do? Sik abitinye ning ulamdicak ban bisik ara, an akunum kel bikamlum do?

²¹ Ance dipkoprob aning nirya ara, kel kiamlum do? Aning-aning nirya kintinibuka delinmase talak ara, an ton akunum deiamkik do? Tukwak mutuku ap, aning-aning nirya ap, kwelinmase sum arye, dipdongobuka wini talak nirya, aupnin yangalyamnye ulyam do? Winibuka, Kam Una Deiyoknye ulyam do? Ayub anda, aning nirya akunum kel bikaminyopura, nyapnilyame.

²² Mourye li talak noutamak, weik mok ceplirye, tererem alamle, el si salju nyalamak ning ara, aning el delinak ara, an akunum bikamlum do? Tonda, ‘Mok dumduma sakanamle’ tenen, kintinibuka deilinunak ara, an eiyalumce, bikamlum do?

²³ Aning bitinye ara, naryuk weik oldan talak ara, ‘Naʼ tenena ninye, sik olyace nang, ‘Aning sik nong deice ikin ning deipniba, kanye imun upnamle’ tenen, kintinibuka delinune. Tonda, ninye malye upmace talak babye, sik wenena ati, abitinye ning dolkweteniba sakalule. Aning bitinye deilinunak ara, an ton kel bikaminyopura, nyapnilyame.

²⁴ Atonun, ‘Bebeya lakna ning lakanamle’ tenen, kintinipsak ara, an akunum eibuka bikamlum do? Tonda keting yangan tam arye panabuka, yangalye kumanya ara, dan mutuku arye yangalul do? Aning babye, an ton bikaminyopura, nyapnilyame.

²⁵ Aning atonun, yatanye birye, ‘Mok ceplirye mok saknamle’ tenen, el yangan bisik kintinibuka delilul do? Yatanye birye, ‘Liman ap, bebeya lakuka mek oplirye banamle’ tenen, bisik yalilul do?

²⁶ Tonda, yatanye birye ilim tukwak ap, pata mutuku ap, ninye una kumak nirya ati, mok dopkweteplibuk celul do?

²⁷ Yatanye birye, tukwak mutuku miklamle tuku deice mok areplibuk ceplirye, tuku nirya teleb upliba, tukwak mutuku betekuka palamle ning nirya palul do? Aning ton an kel bikaminyopura, nyapnilyame.

²⁸ Tonda, mok el li koproba aulul do? Atonun, mok purye saklirye, ben palilye ning ara, el li koproba ara, yatanye do?

²⁹ Es mek el lin aulul do? Es mek ara, dan mun pum bisik arye panabuka yangalul do? Yatanye birye deibukba, ikip mek ara, teleb uka kat ulul do?

³⁰ Yatanye birye nyaliba, weik laut mekwen deice tam, moul weik uplirye, kat keil atonun ubuka deipliba, keil atonun danalul do? Awinilye ning nirya ara, Ayub an kel bikaminyopura, nyapnilyame.

³¹ Tonda, kurya el si Kartika nyalamak ning ara, ance tapu dobuka koupdongoplumba, tonok sukum ikilul do? Atonun kurya si Belantik nyalamak ning ara, tonok sukum ikilul bukni, ance el tapu loptumba, yukak bitu do?

³² Atonun, kurya ikilya nirya, weik kurya babye, mitik kurya babye nirya ara, aketing tamun, aketing tamun noutamak nirya ara, atonun balamake. Ati, sik ban talak akunum uplyopura, ance dobuka deiptum do? Tonda, weik kurya sik si, Biduk Besar ap, Biduk Kecil ton nyalamak ning ara, sik tikilyangalamak ban bisik yapdeiptum do?

³³ Tonda, ance im deice tam ulul ning nirya ati, ‘Aning wininamlulume, aning ara kum wininamlume,’ nyapdeiamse ning ara, anda akunum bikamlum do? Atonun, tukwak mutuku-mutuku nirya ap, ninye tukwak ninye nirya ap, talibuka unamna ati, ‘Aninguk wininamlume,’ nyabuka nyapdeiamse ning ap, aminyan talak nyapdeipnamne ning ap ara, ance akunum kel bikamlum do? Ayub an kel bikaminyopura, nyapnilyame.

³⁴ Aning atonun, dua im deice tam ubuk ning ati, ance, “Mok arepnilyame,” nyaptumba kekepkuturye, mok arepkutuba, weik arye ceptu do?

³⁵ Atonun, ance liman lepnulye talak ara, bebeya laklamle ati, “Bebeya laklyame,” nyaptumba, bebeya laktu do? Tonda, bebeya laklamle ning arye anti, “Nun deiyoknye, nun aunmabe. Ance tenesilyam touk wininamabe,” nyapkiting do?

³⁶ Ninye kanye noutamak arye, ‘Diksukum una ati,’ tenebikirye, kel kina ap, una ap deiyok ning ara, yatanye birye arelul do? Atonun, ninye kanye noutamak arye, ‘Deiyok ani’ tenena deiyok ning ara, yatanye birye arelul do?

³⁷ Aning atonun, yata weik kelnye birye, dua nirya nuktu do? Tonda, yata kelnye birye, mek makau kwebuka, im deice tam deiamuk ning dobuka, diklopliba tamubuka, mok celye ning ara, bikiamuk do?

³⁸ Winipliba, mok ceplirye tuku sung-sunga panabuka, balamle ning ap, tuku kat ning ap deice saklirye, tuku teleb ubuka namin kilul ning ara, yatanye birye kintinibuka deiamuk do? Ayub an kel bikaminyopura, nyapnilyame.

³⁹ Ayub ance, bai tam ulamle kam ning, el urasin ara, kus atonun ning, yu weik ning, el si singa kus nyalamak ning ara, el dina ati, yuk mitik bai tam kam ulul ning optumce, bobuka, yu singa kus kil ning damak, el din ning areptum do? Tonda, ance singa kus yim babye, el dina patalamle talak ara, din ning weik areptumba, bouptu do?

⁴⁰ Ara, sik keil deiya pum bisik ulamtingce, kalikuka dinmatingak, sik din ning bobuka, binuka areptum do? Aning atouk, sik mutmuta ap, weik cang denak ap, noutamak ulamtingce, kalikmatengak, sik din bobuka binuka, areptum do?

⁴¹ Tonda, Gagak maka, sik mapu din patalamle talak ara, ‘Allah arye arepsutue’ tenen, yupu nyabuka morolamak talak ara, yatanye birye, dina arelul do? Tonda, sik mapu dina ati, ebuka banmace talak ara, yatanye birye dina arelul do? Aning atouk, Gagak maka sik mapu sikce din ati, moropkitingopura, ance yata wiribuka, sik dina melibuka areptum do? Ayub aning nirya, an kel bikaminyopura, nyapnilyame. Allah arye Ayub ati, nyabuka wenebuk.