Ayub 37 - Eipomek

Elihu birye Ayub biti, yupu ton dukdongobuka nyabuk

¹ Arup nyapmasin ning ara, weik kumanya doplyeba, lelim weik nyaplyopura, aning ati, tuba biknyopura, na ilil weik upnilirye, na talima dakalsakanulule.

² Se, anggun nirya ara, Allah arye nyalul yupu ara, anggun ton moubuka kekeplulume! Allah arye weik yupu deice nyapsilye talak ara, winipmanto ning ara, weik liman lelim weik nyalamle touk ulule. Alelim ara, Allah el si pum bisik arye, kutuka yangalula ati, elce nyalul yupu moubuka kekeplulume.

³ Im tam nirya ara, eitamuk ulul bukni, aning ara amu tam, tukwak mutuku im sirya, mutuku sirya nirya ara, Allah elce bebeya laklamle ning ara, dopdeiplyeba, lelim weik kekenyabe. Allah elce liman nyan ning babye, bebeya lakne ning babye dopdeiplyeba, alelim ap, abebeya lakne ning ap ara, mutuku sirya im sirya ara, dabalule.

⁴ Allah elce bebeya lakne ning ara, dopdeiplyeba, el weik lelim nyalul yupu deice arye nyaplyopura, weik lelim nyaplyeba, nun nirya kekenyabe. Ara, Allah arye, el yupu nyalye talak ara, liman nyaplyeba, lelim weik nyalul ning atonun lelim ara, kekenyabe. Atalak ara, ‘Bebeya laklamle ning ara, mitik tonun arepnamne,’ pia kum tenelule. Weik tonun arelule.

⁵ Allah el weik yupu deice arye nyaplyopura, nun ninye arye, pia kum winipmanto ning ton winilule. Tonda, nun ninye arye, pia kum bikmanto ning ap, ‘Nong noutam ara aniʼ tenen, kum tenepmanto ning ap, pil dolule.

⁶ Allah elce, ‘Atalak ara, winipnamne,’ teneplye touk, el yupu deice aryuk, “Mok purye ap, es mok, el si ara salju ap ara, tukwak mutuku noutam saklyame!” nyaplyeba, aning adiparyuk sakalule. Aning atonun, Allah elcuk, “Weik mok cepnulame,” nyaplyopura, adiparyuk, weik mok celule.

⁷ Allah arye mok purye ap, es mek, el si ara salju ap, ton weik celamle mok ap areplyeura, nun ninye aryuk, tenebuka pil donyap ning ara, batakanyabe. Allah elce aning aresulula deice arye, nun pil dopmanto lo ara, kum kipdeiplyeba, nunda talye tunim abuka bunyabe. Winipsilyeura, nun tukwak nang arye, ‘Se, dipkoprob nun dam ara, Allah elce mambul pil tuba dosulule,’ tenenyabe. Allah arye, ‘Winiplyopura, sikce, nati moubuka biknamakʼ tenen, winisulule.

⁸ Tonda, Allah arye ato ning aresilye talak ara, sik bai tam kam unyak ning yala-yala nirya ara, tuku pum bisik do, keil deiya pum do, sikce aik donyak sukum wekuka malbanyake.

⁹ Iknapye mutuku tam arye, weik kumanya kutuka tikilyangalule. Tonda, outam dabu tam mutuku arye, pia moul un kumanya doplyeba, yangalule.

¹⁰ Allah el isin arye, weik mekwen deibukak ap, balamle mek ap, amek nirya ara, pia moul weik uplyeba, kat esuk danalule. Mek bukni, kataplirye, darabuka, pia kat kilule.

¹¹ Allah elce dua noutam ara, mok kitibuka delilule. Tonda, dua kan-kan noutam arye, bebeya lakuka balule.

¹² Allah elce nyaplyeba, dua bum ap, mok ap, el ap, kumanya ap, bebeya lakne ning ap ara, mutuku sirya, im sirya nirya tobuka balule. Ara, tukwak mutuku noutam nirya, ninye tukwak nang unyak mutuku noutam nirya ara, Allah arye arelul ning nirya, tobuka banauk ulule.

¹³ Ton talak ara, tuku namin una ati, Allah arye mok arelule. Ton talak ara, malye unyak nang, sik wenena ati weik mok areplyeba celule. Ton talak ara, Allah elce tukwak mutuku unyak nang, sik bikina ati, aning aresulule. Ara, ‘Narye tukwak nang ati, pia weik tonun bico tenenuna ati, nyalin yupu deice arye, ‘Winibuka pia teleb kilinamsine,’ nyapdeipsise ning ara, tonap tenebikirye, biknamakʼ tenen, aning nirya, nun dam winiplyeba, elinyabe.

¹⁴ Wini talak ara, na kwit Ayub, anda tunim apnulyame. Diba, Ayubo, anda na nyakunun yupu ara, moubuka kekepnunilyame. Ninye arye kum winipmanto ning ara, Allah elce pil dolul ning ara, tuba tonap moubuka tenipmince, nong ara bita biknamlame.

¹⁵ Ayub an akunum biklum do, kum do? Allah arye, “Winipnamlume,” nyaplyeba, im deice weik dua arye, mok kitibuka deibuk ning ap, tonda dua noutam arye bebeya lakan ning laklyeba, dirina weik ulye ning ap, an akunum bikilyam do?

¹⁶ Allah el kel weik deice arye, ninye kum winipmanto ning ap, dopmanto kum pil dolul ning ap, tonda, ‘Weik dua ara, winibuka banamleʼ tenen, kwelilul ning ap, dua bum banmalya ani, kum ulye ning ara, an ton biklum do? Kume, Allah elce weik kel bikna deiyok ning nirya ara, pia teleb kibuka kel bikamuka ati, tonok ning babye, walwal kum ulule. Aning nirya ara, an Ayub bira, dipkoprob moubuka kum biklume.

¹⁷ Kume, anda talye tukwak mutukunye ulyama ati, iknapye tam arye yalye kumanya arye, weik keting tin tukwak mutuku boyalyeba, tin weik uplyopura, ance, ‘Se, keting tin weik upnil,’ nyabuka, ngalukumince, nong mek weik bongopkilyeba, malye nyalyame.

¹⁸ Tonda, Allah elce dua ara, tabakuka deipdanin biyukce, welebuka, im deice ap, im alip tam ap, urasin kat atonun kipdeipliba, elinyap ning ara, ance ton, atonun kibuka deiptum do? Winipmanto ara, im alip tam ulye dua nirya ara, pia kat ning, el si ara logam ap, tonda ninye urasin dina ati, el si ara kaca muka ap, aning atonun kipdeipliba, elinyap ning ara, ance ton atonun kipdeiptum do? Kume, aning nirya ara, an walwal ati, kum winiptume.

¹⁹ Allah arye nunti wenebuka, yupu bokeipnamsil talak ara, el dam nyan yupu ara, ance nunti, “Ayupu tamubuka nyapminyopura, kekepnululume,” nyabuka, peterepsutum do? Nunce, ‘Atalak ara, yata yupu nyaptibyeba, kekepsutu do?’ tenen, pia kum bikupu. Aning nirya ara, nunce kum biktibye ati, aning kum laka nyaptibye. Na kanye ara, an babye, aning nirya pia kum teniptume.

²⁰ Narye Allah el dam binuka mania kanye boptinirye, elti, “Naio wini talak ara, naryuk yupu nyapnukina ati, kekepnilyame!” nyabuka, bin moroptinye do? Kume. Tonda, yata tonye birye, Allah ati, “Naio, ance adiparyuk, nati obukapnimince, sice buklopnilyame!” nyabuka, moroptu do? Aning babye pia kume. Nun ninye tukwak nang nirya arye, ‘Aning nyaptinyeʼ tenen, pia kum patalamsuke. Aning babye kum winipmanto ning nyapkine.

²¹ Ura, aning ton teneipdenulyame. Im deice dua deipmalya buk, kumanya yalirye, mok purye nirya ara, depkwetebuka bobilyopura, im deice pia dirina ulule. Winiplye talak ara, im dirina weik uplyopura, na asing aryuk tuba keting tuba dilamnak, akupmiting-akupmiting apnilyeba, tuba-tuba eiptinye do, kum do?

²² Dirina urasin pia teleb ning ara, dabu tam arye panubuka yalyeba, dengna weik ning emas urasin pia porolul touk uplyeba, ‘Se, aning ara, urasin pia teleb ulule,’ tenebuka nyanyabe. Tonda, Allah el dam dana-dana tam nirya ara, el dirina weik ap, el mikip weik ulye ning ap, el pia teleb ulye ning ap, nun bikuka kum laka nyaptibye. Kanye lopsilya ati, nunce, ‘Seʼ tenenauk unyabe.

²³ Dipkoprob nun ni Allah elda, pia deice tam erebuka, aning-aning nirya talibuka, mikip weiknye ulule. Nun tukwak mutuku nang arye, ‘Se, Allah el weiknye ululak binuka eiptinyeʼ tenen, pia eptibya babye, Allah el dam ara, nunce binmanto kum usulule. Allah elda pia diksukum telebuk ulule. Elda mikip weiknye ulirye, ninye tukwak nang ati, yupu bokosulul bukni, talye yupu nyaltakana kum bukni, pia diksukum kibuka yupu nyasulule. Allah elce nun tukwak mutuku unyap nang ati, deiyok kum upmalye ning ati, ton ikin ning ara, nun deice ton pia kum delisulule. Diksukum un ning ara, pia kum batakalule.

²⁴ Ati ara, yata nang do nirya ara, ‘Se, Allah ara, pia mambul weiknye ululeʼ tenen, ilil upsilyeba, Allah elti, si erenamabe. Bukni, yatanye do nirya, el talima erepdalirye, mania kanye bobuka, elce, ‘Nara, kel weiknye ununeʼ tenen, el kanye arye, tenelalulnye bira, Allah elce anye biti, ‘Kume, anye bira, dipkoprob kel weiknye kume,’ teneplirye, batakalule. Anye elti, tuba kum tenelule. Ayupu nirya ara, Elihu birye Ayub biti, nyabuk.