Ayub 36 - Eipomek

Elihu birye, sirya dakna ati, nyabuk yupu

¹ Elihu birye, ayupu ton dukdongobuka nyabuk.

² Narye yupu tonap tabakuka nyapnusina ati, anggun ton moubuka kekepnululume. Weik tonun ton kum nyapnusine. Ara, Allah el ulye ning ati, yupu mitik tonun ton, laka nyapnukina ati, ance ayupu moubuka kekepmince, moubuka tenipnamlame.

³ Narye nyapnusin yupu ara, nara kel weik bikna deiyok ning ara, pera arye bobuka yana nyapnusine. Allah arye nati, kwepdeipnuka deiyoknye bira, malye winina pia kumce, pia diksukum kibuka ulirye, telebuk winilule.

⁴ Nara, an dam tikuka, yupu nyapkinanye bira, talye yupu kum nyakunune. Nara, kel weik bikna deiyok ning ara, ‘Nong deiyok ning ara, aniʼ tenen, weik tonun akunum kel biksa ati, tilila yupu pia kum nyapnukine. Kel weik kina deiyok ning, kunum kel bikuknye ara, anggun dam akunum yanuka tekmale. Ara na ca!

⁵ Dipkoprob nun nirya kele. Allah elda, Mikip Pia Weiknye Ulule. Elce tukwak mutuku, im sirya, mutuku sirya nirya, ululum nang nirya ara, anggunti bico tenesulule. Allah ara, el mikip weik ulye ning ap, pia weik tonun kel bikamukce, nong nirya akunum tenilul ning ap ara, weik ulule. Ati ara, ninye tukwak nang nirya ara, talye lukparabuka kum batakasulule.

⁶ Tonda, sik malye winin ninguk pia talibikirye, malye unyak nang ara, ‘Pia kam tuba unamakʼ tenen, kum melibuka kalikilule. ‘Sikda dadiptingeʼ tenen, batakliba, adiparyuk dibinyake. Bukni, sik diksukum kibuka, telebuk wininyak nang nirya ara, yuk nang arye ikin bobuka, sik deice deibikcopura, elce teleb yupu bokeiplirye, anang ati melilule. Sikda dopropmating ning nirya ara, arelule.

⁷ Diba, Allah arye, “Aning ara, wininamlume. Aning ara, pia kum wininamlume,” nyapdeipsuk yupu, talibikirye, diksukum telebuk unyak nang ara, pia kum batakalule. Anang nirya ati, moubuka dilirye, kalikilule. Amutuku-amutuku noutam nirya ara, ninye deiyok nang, sik Raja nang nirya bunyakak, el si ara takhta, Allah arye, sik diksukum wininyak nang dobuka, ‘Anang ara, Raja nang dam deipnyopura, pia unamake,’ teneplirye, deiplyopura, yuk nang eibikirye, anang ati pia si erenamake.

⁸ Bukni, yuk nang ara, malye ubikceba, deiyok nang arye, sik malyeuk wininyak nang tomobikirye, rantai tapu arye tapu koubuka, wenena aik pum dongolbanyak ning ara, sikce malye winilamik dengna ati dongobikiba, imun kanye bobuka unamake.

⁹ Winipnamak talak ara, Allah arye, sik anang ati, nyabuka laka nyalule. “Anggunce, malyeuk wininamlum ning deice arye, anggun wenena ati anyaik dongopsik bukni, dipkoprob ara, anggunce malye winilulum ning ara, ani-ani,” nyalule. Tonda, “Anggunce, na yupu yanilamlum ning ara, ani-ani,” nyabuka, laka nyanamle. Tonda, “Anggunda, mandipna kanye bopmunce, maknya kintinibuka kwalina deice arye, malye winiluluma ati, anggun dengna ati, anyaik akunum dongopsike. Ati aning moubuka tenipnamlume!” nyabuka wenenamle.

¹⁰ Tonda, Allah arye, ‘Amalnye wininyak nang ara, na yupu moubuka kekenamakʼ tenen, sik amul pakeiplirye, sikti, ayupu ton nyalule. Ara, Allah arye sikti, “Teleb winin ning ara ani. Malye winin ning ara ani,” laka nyalule. Ati, anggun malye winilulum ning nirya ara, bataklumce, tuba tamubuka teleb winin bisikuk banamlume,” nyabuka laka nyalule.

¹¹ Allah arye nyaplyeba, anang arye el nyalul yupu moubuka kekebicopura, sik malye ning batakikirye, Allah el amu tam ubikirye, elti, melibuka pil donyake. Winibuka teleb winibikcopura, anang ara, aminyan talak, sik tuba kam unamak talak nirya ara, talye kanye bobuka unamake. Tonda, sikce pil donamak ning nirya ara, nong weik upliba, telebuk unamake. Sikda teleb kanye bobuka unamake.

¹² Bukni, anang ara, Allah arye nyalul yupu batakikirye, moubuka kum kekebikcopura, Allah arye lo areplyeba, yu nang arye yanuka, yu weik parang ya arye, anang obikiba, adiparyuk dipnamake. Atalak aryuk dibikcopura, sikda bicoe. Ara, sik arye, kel weik bikna kumce, tupa wal-waluk unmakca ani, dipnamaka atia.

¹³ Yata nang do nirya, sik kanye talima pum tam arye, ‘Allah ara, nun lik, elce nyasilye yupu, pia kum bolonamabe,’ tenebikirye, yu kanye teninamak nanguk patalyeba unyake. Sik wenena ap, kel bikna ap ati, Allah arye lo areplyeba, deiyok nang arye, anang tomobuka tapu kounyak bukni, atalak ara, sik anang pia moubuka kum bikinyake. Sik kanye talima pum tam ara, yu tenina ap, malye winin ning ap ati, kanye delinyake. Ati ara, yu nang arye anang tomobuka, tapu kounyak talak ara, sikce Allah ati, ‘Nun ni Allah arye, melibuka lyepnamsileʼ tenen, Allah ati pia kum moronyake.

¹⁴ Wininyaka ati, sik malye winin ninguk talibuka wininyak nang ara, wel tuba unyak nang atonun unamak talak noutamak ara, minopce dibinyake. Ara, alye weik dakdakirye, adiparyuk dibinyake.

¹⁵ Bukni, Allah el kanye ara, ‘Kume, sik malye ninguk talibuka wininyak nang ara, sik kanye talima teleb kilina ati, ikin ning dobuka, sik nong deice deipnamne. Winipyopura, imun kanye bobuka unamak talak ara, ‘E, nun malye wininyap ning ara, ani. Teleb winin ning ara, ani, tenebikirye, kel bikinamake,’ tenelule. Ikin ning arelya deice arye, sik amul pakalilule. Tonda sik arye, na yupu kekenamniake.

¹⁶ Ati, an malye winilamlumce, imun kanye bobuka, ikin weik ulamlum bukni, Allah arye kanye lon yupu nyapkuk deice arye, ila tamubuka teleb sukum deipkuke. Winipmanto ara, pia teleb mutuku, pala weik ululba, ikin kumak ulamle touk, teleb sukum deipkukce, din ning yala-yala nirya areamkukba, an din ning delinak ara, weik tonun langdilamukba, aning nirya talibuka dilamlume.

¹⁷ Bukni, na kanye ara, Allah arye winibuka anti teleb kililamkuk bukni, anda pia mandipna weik ulamluma ati, Allah arye sik malye wininyak nang ati, yupu bokeiplirye, ikin weik wenena ning, sik nong deice dolkwetelula atonun, wini talak an deiceuk akunum yanuka unamkile. Ance dipkoprob malye winilamlum ning ati, ‘Wini talak ara, Allah arye merekuka wenekulule,’ tenepne.

¹⁸ Ikin weik unamkil bukni, moubuka bikinamlyame. Ara, anda, ‘Ikin weik unmanilba, Allah ati, yu weik upmanile,’ tenepmence, aminyan talak Allah ati nalibuka akutunauk umince, ‘El ti malye yupu nyapminyakʼ tenen, moubuka tenepmence, kalikilanauk unamlame. Tonda, ‘Se, yo bok weik dopropmince, bona weik talinanye uptinye’ tenen, yo bok patana weik upkilyopura, aminyan talak ara, malyeuk upminyakʼ tenen, anda pia kalikilanauk unamlame. Aning atouk, ‘Se, namin kilongon yo bok weik tonun duknubuka arepnitingba, bona weik talinanye kiptinyopura, Allah bataknamne,’ tenena deice arye, ‘Malye winin bisikuk binuka upminyakʼ tenen, anda moubuka bikinamlyame. Ati anda, ‘Malye winin ning nirya ara, talepnirye, malye upnyakʼ tenen, moubuka tenepmence, kalikilanamlyame.

¹⁹ Ato malye winin ning winipminya deice arye, ikin weik ton tapakuka upkilyopura, weik yupu arye ngalukmince, engebuka, ‘Se na nio melipneo,’ nyabuka moroptuma babye, Allah arye kum melipnamkile. Tonda, aning atonun, an babye nong mikip deice ap, ance taleamlum bona weik ning ap, bona talina ap, deice aryuk, ance anti, kum melibuka lyepdatume.

²⁰ Tonda, ance, ‘Se, lukunyan minop yangalul touk, dibina minop yatopura, akunum dipnyopura. Allah arye ton ap ikin ning dobuka, na nong deice tuba kum deipnutueʼ tenen, dibina ati patanauk kum unamlame. Aning atonun, ‘Se, Allah arye, ton ap kum wenepnutueʼ tenen, lukunyan noutam ara, ninye weik tonun dibilamak touk, na babye adiparyuk diptinyopura, Allah arye kum eipnutue,’ tenena pia kume. Dipkoprob ning ara, tonok lukunyan noutam arye, ton talak ara, tonok yala nang nirya babye, adiparyuk dibikiba, kum dacake. Anda, ‘Ikin unulula ati, lukunyan noutam ara, adiparyuk dadiptini,’ tenena, pia kume nyapkine.

²¹ Anda, moubuka biknulyame! Ara, ‘Ikin weik unulula ati, teleb winin ning ara, bataknyopura, adiparyuk malye winin ninguk talibuka unamne,’ tenena pia kume. Deiyok ara, an akunum bikmatume. Allah arye ikin ning dobuka, an nong deice arepkukba, ikin weik unmakil deice arye, an kanye tenen ning nirya ara, pirilenmakile. Tonda, ikin weik unamkil talak ara, malye winin ning ton, talibuka kum unmalame. Ati, ance, ‘Malye winipniba, ikin weik unulul ning ara, kum kipnutue,’ tenena pia kume. Anda, moubuka tenepmence, kalikilanamlyame, nyapkine.

²² Malye winin kum bukni, anda moubuka biknulyame. Allah elda, dipkoprob mambul mikip weik ulula deice arye, pia erebuka deice tam ulule. Allah arye pia teleb kibuka peteresilye touk, yuknye birye ton, pia kum winiptue.

²³ Yate tonye birye, Allah ati, “Anda winibuka-winibuka unamlame. Teleb ning ara, ani. Abisikuk banamlame,” nyabuka, Allah ati petereptu do? Aning atouk, yatanye birye, Allah ati, “Ance malye winiplum ning ara ani,” nyabuka, weneptu do? Kume, ninye arye kum winiptinge.

²⁴ Kume, Allah arye pia teleb pil dolul ning ati, ninye arye kanye lon mot nyanyake. Ati ara, an babye, Allah arye pia teleb ninye winipman kum pil dolul ning ara, luba kina kume. Aning ati, ila tamubuka tonap tenepmence, yuk nang ati, tuba-tuba laka nyana uk unamlame.

²⁵ Allah arye weik mambul pil dolul ning ara, ninye mutuku sirya im sirya nirya arye elinyake. Wininyak bukni, tukwak mutuku noutam unyak nang nirya ara, eibuka bikinyak bukni, ‘Awinilul ning ara, deiyok atiaʼ tenen, moubuka kum biktinge. Pera sukumuk unyaba ati, tukwak mutuku nirya noutam unyak nang arye, Allah el pil dolul ning ara, pera aryuk elinyabe. El dam kum bitibye.

²⁶ Nun ni koproba Allah ara, el dipkoprob mikip pia weik ap, weik mambul ap ulule. El kam ulamuk keting tamun nirya ara, nun tukwak mutuku unyap nang arye, pia kum nukmanto ati, kum biktibye. Diba, Allah el winilye ning nirya ara, nun tukwak nang arye, pia kum bikmanto unyabe.

²⁷ Allah arye pia mambul pil dolul ning ara, kum nukmanto bukni, winipmanto ara, tukwak mutuku noutam arye, mek doproplirye, dua kan-kan deiplyopura, el tenelye talak akunum yalyopura, yupu nyapliba, mok celule.

²⁸ Mok celul talak ara, im noutam arye sakalule. Allah arye tenelye touk, tukwak mutuku sirya, im sirya nirya, noutam unyak nang ati, mok areliba, mok weik tonun celule.

²⁹ Dua ara, yatato mikip deice arye, im noutam pia bana dem ulul do? Tonda, Allah ulul sukum, im deice tam ara, bebeya laklamle ning lakliba, adiparyuk mikip liman lelim ton kekenyabe. Bukni, yata tonye birye, aning nirya bikturye, lake nyapsutu do? Kume, kum winiptinge.

³⁰ Anggun nirya ara, moubuka dipdebuka biknamlulume! Allah arye, el dana-dana tam nirya bebeya laklamle ning areliba, mutuku sirya, im sirya nirya unyak nang arye elinyake. Tonda, weik laut mek kwen pum tam, karu weik bukni, pia amu tam wamlye ning ara, Allah elcuk dilule. ‘Ninye tukwak nang arye kum eipnamakʼ tenen, aning nirya, pia kunuknak ulula ati, adeice arye duknulule.

³¹ Allah arye weik mambul pil dolya deice arye, tukwak mutuku noutam unyak nang yala-yala nirya ati, kam una deiyok ning arisiliba, kam unyabe. Tonda, elce kwepdeiamuk kam ning nirya ati, yuk-yuk bukni, sik din ning weik tonun arelula deice arye, kam tuba unyake.

³² Allah arye bebeya lakne ning ara, el mining taruk arye talilule. Aning talilulce, ‘Asukumuk saknamle’ tenelye touk, dopkwetepliba, el akunum tenebuk touk, dipkoprob atuku sukum sakalule.

³³ Mok cenmalye talak ara, mambul liman lelim kekeplyopura, adeice arye, ‘E, wini talak ara, mikip mok ap, mungna ap, bebeya laklamle ning ap, yanamlarya,’ tenenyabe. Aning atonun, ninye arye weilamak kam ning, sapi basam do, kambing basam do, basam sirika do, sika ton liman lelim kekebicopura, sik babye, ‘Weik mok piriripna ap, mok ap, bebeya laklamle ning ap yanamle’ tenen, bikinyake.