Ayub 35 - Eipomek

Ninye tukwak nang ikin unyak talak ara, Allah arye elilula ati, nyabuk yupu

^1-2 Elihu birye Ayub biti, ayupu ton dukdongobuka nyabuk. Ayubo, ance, “Nara Allah el dinmalak arye, na malye kum ulamse touk, tuba malye kum unune,” nyapmasilam ara, pia dipkoprob yupu arye nyapmalam do? Pong-pong ana deice arye talye yupu nyapmalam do?

³ Tonda, ance asibuka nyapmasilama ara, ani. “Se, na malye una kum bukni, Allah arye nati wenepnukce, ikin ning weik, na nong deice akunum delinulule. Ati, nara Allah el dam malye akunum upmatinyopura, dipkoprob wenepnamnila ati, wini talak ara, narye malye kum winipmatinye babye, malye akunum winipmatinye babye, yata teleb ning doropnamtinya ati do? Kume, akunum wenenilyama ati, aning ara atonun,” nyabuka nyapnamsilame. Bukni, ance ayupu nyaminye ning ara, an kanye walwal ukilya deice arye nyapmalame.

⁴ Ayub ance ayupu akunum nyaminya ati, yupu nong nirya ara, narye tamubuka an dam laka nyapnukine. Tonda narye an kwit capu, anggun winilye nang dam ton, ayupu laka nyapnusine.

⁵ Ayubo anda moubuka tenipdelyame! Ance im deice ulye ning nirya ara, an urasin erebuka dipdenulyame. Im noutam ara, dua nirya deice tam, pia im noutamak tikilule. Bukni, anda amu tam tukwak mutuku ulyame.''

⁶ Anda, dipkoprob malye winiptuma babye, Allah elti, ikin deiptum do? Aning atonun, ance malye winin ning weik tonun tonap tabakuka malye-malye winiptuma babye, awiniminya deice arye, Allah el nong deice ikin deiptumba, imun kanye bobuka unamle do? Kume aning ara, kum winipmanto.

⁷ Tonda, ance pia teleb diksukum piluk doptuma deice arye, Allah elti, kum meliptume. Teleb winin ninguk winiptuma babye, adeice arye anda yata ning dobuka Allah ati areptum do? An teleb un deice arye, Allah ati yata ning areptumba, kanye deiptu do? Dipkoprob, winiptuma babye, Allah elce, ‘Se, anye bira, pia diksukum unmalya deice arye, teleb ning arepnukce, akunum melipnuke,’ tenepnamkil do? Kume, aning babye, kum winipmanto.

⁸ Aning kum bukni, dipkoprob ning ara, an malye ulyama deice arye, yuk tukwak mutuku unyak nang ati, malye kililyame. An atonun nang bukni, yuk nang sik dam nirya ara, malye kipdeiptume. Aning atonun ton, ance, pia diksukum kibuka, teleb ning winiptuma deice arye, an atonun nang bukni, yuk tukwak nang sik dam nirya ara, malye kipdeiptume. Ance winilyam ning arye, Allah ati malye kum kiptume. Tonda Allah ati, teleb kum kiptume.

⁹ Tukwak mutuku unyak nang ara, yuk yu nang arye, ikin weik sik deice delinyakba, dolonyak nang ara, sik nirya arye, ‘Seʼ tenen, malye nyabuka ngalukuka, ‘Melipsilyame,’ nyabuka, sik kwit capu ati moronyake. Ara, yuk yu nang ara, sik mikip weik deice arye, yuk talye bona utotoa talina kum daunyak nang ati, ikin dobuka, sik deice deibikiba, malye kanye bobikcopura, sik kwit capu ati, ‘Se, anggunda nun dam yanuka melipsululume,’ nyabuka moronyake.

¹⁰ Bukni, tukwak mutuku im sirya, mutuku sirya nirya, unyak nang ara, imun kanye bobuka unyak talak ara, sikce, “Se, nun ni Allah, nun nong kwelina deiyoknye ulyame. Lukunyan talak noutam ara, ikin usilyeba, ancuk nun dam yanuka melisilyama ati, wini talak babye, yanuka melipsilyame!” nyabuka, kum moronyake.

¹¹ Sikce ton, “Se, Allah anda, tukwak mutuku noutam talye kam unyak ning yala-yala nirya ap, im noutam lakuka banyak maka ap, kanye bona kum ninguk arelyam bukni, nun ninye ara, kel weik bikna deiyok ning akunum aresilyame. Nunda, ikin unmaba ati, ancuk yanuka melipsilyame!” nyabuka, Allah ati kum moronyake.

¹² Tukwak mutuku noutam ara, ikin kanye bobuka unyak nang, sikce Allah ati, “Melipsilyame,” nyabikirye ngalukuka, Allah ati moroptinga babye, Allah arye sik moronyak ning ara, pia kum kekelule. Tunim abuka diltakanauk ulule. Winilya deiyok ara, ani. Ara, sik anang ara, kanye erena ap, maknya kintinibuka kwalina ap, tonda malye winina ap wininyaka deice arye, sik moronyak ning ara, Allah arye talye tunim abuka kekeltaknauk ulule.

¹³ Sik anang ara, yupu mikip arye ngalukuka, Allah ati moronyaka babye, talye ati moronyake. Deiyok ara ani. Ara, Allah pia deice tam erebuka, aning-aning nirya talibuka, mikip weik deiyoknye birye, sikti, eibuka batakalule. Tonda kekebuka batakalule. Ara, sikce pia malye winin ning talibuka unyak atia.

¹⁴ Ati ara, Ayub ance mania kanye bobuka, pia talye-talye yupu nyaminya deice arye, “Allah ara kum elinune. Na dam yanuka kum melinulule. Tonda, nara ikin weik ununa ati, ‘Allah arye, dan talak aning nirya eibuka, na melibuka lyana ati, na dam yanuka melipnamnil do?’ tenen, tuba-tuba dinauk unune. Tonda, dan talak, Allah arye na dam yanuka, diksukum ubuka, yupu bokeipnilirye, tonap teleb kilinamnil do?” nyabuka, malye nyalyame. Ati moubuka tenipnulyame. Sik talima erepdakirye, maknya kintinibuka wininyak nang arye, Allah ati morotinga babye, sik malye un ning ati kum kekelule. Sikda mitikto malye wininyake. Bukni, ance pia malye yupu nyalyama ati, anda malye weik winilyame.'’ Ati, ance Allah ati pia talye-talye yupu ara, tuba-tuba nyalyam bukni, dipkoprob Allah arye, pia kum kekenamkile.

¹⁵ Aninguk kum bukni, na kwit Ayubo, ance atalye-talye yupu ton nyalyame. Ara, ance, “Kume, ninye tukwak nang arye, malye un ninguk talibuka, malyeuk wininyak talak ara, Allah arye aning nirya moubuka, kum elilula ati, anang ati, kum wenelule. Allah arye, anang malye unyaka ati, bataknauk ulula ati, sik malye winin ning ati, kum weneplirye, anang ati kum olule,” nyalyame. Nyapminya deice arye, Allah ara dipkoprob ulye ning ara, moubuka kum biklumce, yaninauk ulyame.

¹⁶ Winilyama ati ara, an Ayub biti nyapkine. Anda tuba-tuba talye yupu nyalyame. Dipkoprob ning ara, Ayub ance yupu weik tonun nyalyam ning nirya ara, moubuka kum tenepmincuk, talye yupu nyalyame. Ayupu nirya ara, Elihu birye Ayub biti, nyabuk.