Ayub 34 - Eipomek

Elihu elce, Ayub ap, el kwit capu bitinye nang ati, nyabuk yupu

^1-2 Elihu birye awinilye nang ati, nyabuk. Anggunda, kel weik bikina arye moubuka teneplumce, aning nirya aweik kunum kel bikamlum nang ululume. Tonda, anggunda aning-aning nirya, deiyok ning akunum bikluma ati, narye anggunti nyapnusin yupu nirya ara, moubuka kekepnululume.

³ Aning ara, talye ati kum nyapsine. Anggun kele, ninye arye din akunum dobuka dibikirye, ‘Adin ara, teleb dinʼ tenen, dipdekirye, kel bikinyake. Aning atonun, ninye kel weik bikin yupu deice arye nyabikcopura, moubuka kekebikirye, ‘E, aning nyapmaka ara, dipkoprob yupu nyapmake,’ tenenyabe.

⁴ Ati ara, nun neika arye lipsisikuka tenebibirye, ‘Malye ning ara, ani. Diksukum teleb ning ara, aniʼ tenen, kel biktibye.

⁵ Arup ara, nun ka Ayub birye nyapsue. Elce, “Nara malye winin ning ton, pia kum wininune. Bukni, Allah arye nati, diksukum kibuka, yupu kum bokolinulule. Na deice ara, diksukum teleb un ning ton kum arenulule,” nyapmoe.

⁶ Tonda, Ayub birye, “Nara malye winin ning ton pia kum winilamse,” nyabuka, laka nyapse bukni, sikce nati, “Kume, anye bira, malye winiliryuk, ‘Nara malye kum wininune,’ nyalula ati, elda tilila yupu nyananye ulule,’ tenenululume. Allah arye, “Aning ara, wininamlume. Aning ara, pia kum wininamlume,” nyapdeiamsuk yupu ara, pia kum yaninune. Bukni, Allah arye kanye imun weik ning, na nong deice wenepnuk ning ara, atalak na deice ara, weik suse dinilyeba, na kanye imun unulule,” nyabuk.

⁷ Ayub birye, ato yupu nyapsuke ati, elda tuba-tuba Allah el deice, malye yupu nyalulnye ulule. Winipmanto ara, yuk nang arye, din teleb mek kwebuka, talye lubakibuka dilamaka atonun, Ayub birye, Allah ati, minin yupu nyaplirye, nalilule. Ayub birye, ayupu nyalul ning ara, anggun ton bikilulum do? Elce mania kanye bobuka, malye yupu nyalul touk, yuk nang ton atonun kum nyanyake.

⁸ Tonda, Ayub bira, ‘Malye unyak nang ap neika bulubuka wektipnyeʼ tenen, pataplyeba ulule. Tonda, ‘Malye unyak nang ara, na ap neika uptinirye, sik wininyak ning ara, na babye wininamne,’ tenelule.

⁹ Aning ara talye kum nyapsine. Nun kele, Ayub elce ayupu ton nyapsukba, kekebupu. Elda, “Ninye arye pi dobuka, ‘Allah el tenelul touk winiptinye, tenelulnye bira, talye ati winiptinye,’ tenelula. Allah ati kanye deiptibye babye, aning ara nong kum upnamle ning uka,” nyapsuke. Nun kwit Ayub birye, ayupu akunum nyapsukba, kekebupu.

¹⁰ Ati, anggun kel weik biklum nang ara, na Elihu birye nyapnusin yupu ara, moubuka kekepnululume! Aning-aning nirya, deice tam erebuka, talilul Weik Mikip Deiyoknye Allah ara, malye ning ton winilul do? Kume, ara kum winiptue. Diba Allah arye malye winin ning, tonok ning babye, pia kum talibuka winilule.

¹¹ Aning kum bukni, Allah arye, ninye malye ubikcopura, amalye upmace touk dengna ara, anang ati wenelule. Atonun, ninye malye uplinye bira, amalye upmalye touk, Allah arye wenen ning babye areplyeba, amalye wininanye birye dololule.

¹² Pia dipkoprob yupu nyapsine. Aning-aning nirya deice tam erebuka, aning nirya talilula, Mikip Weik Deiyoknye Allah ara, malye ning ton pia kum ulule. Kume, ara kum winiptue. Diba Allah arye malye winin ning, tonok ning babye, pia kum talibuka winilula ati, nun malye un ning ati, ninye yupu nyalin talak babye, Allah arye talye yupu pia kum nyaltakalule. Diksukum ubuka, teleb yupu nyalisulule.

¹³ Allah el mikip weik ulirye, tukwak mutuku sirya, im sirya nirya, talilula deiyok ning ara, yatanye birye Allah ati arebuk do? Yatanye birye Allah ati, “Atukwak mutuku nirya ara, ance talipnulyame,” nyabuka, deiyok kibuk do? Kume, aning nirya ara, Allah arya!

^14-15 Allah elce nun ninye noutam dongopsukba, kam usulul kanye ap, isin dongopsukba, isin eresulul ning ap, tamubuka doropsutopura, nun kam unyap ning yala-yala nirya ara, adiparyuk diptibye. Nunda elce kwepdeipsuka ati, tamubuka tuku atonun danamsile.

¹⁶ Ati Ayubo, ance, ‘Nara weik kelnye unune,’ tenepdaluma ati, na nyapnukin yupu moubuka kekepnunilyame. Tonda, an amul pakeipmince, moubuka kekepnulyame.

¹⁷ Allah elda aning-aning deice tam erebuka ulirye, aning yala-yala nirya talibuka, Mikip Weik Deiyoknye ulula ati, pia diksukum kibuka ulirye, telebuk ulule. Ati anye birye, diksukum kibuka yupu kum bokolinamsil do? Diksukum teleb winin ning ati, ‘Na like,’ teneptu ura, tukwak mutuku nang nirya talibuka deiyoknye uptu do? Kume, aning ara, kum winipmanto. Ayub ance Allah ati, “Elda malye ulule,” nyabuka, yu unamlam do?

¹⁸ Allah elcuk ninye deiyok kibuka unyak nang, sik Raja-Raja nang ap, sik amu tam bukni, yuk ninye deiyok nang nirya ap, sik malye kibikcopura, Allah arye sikti, “Tukwak arye, anggun malye wininmalum ning ara ani. Anggunce teleb wininmalum ning ara ani,” nyabuka, lipsisikuka weneplirye, yupu bokolilule.

¹⁹ Allah elce, “Se, ara Rajanye, tonda anye ara, bona weik talinanye biti, sik tam kipnirye, talye bona utotoa talina kum nang malye unyak ninguk, lipsisikuka yupu bokeipnamne,’ pia kum tenesulule. Allah elcuk nun nirya kwepdeisuka ati, nun nirya ara, el amu tamuk unyabe.

²⁰ Aning ton kum tenepmalum do? Yata nang do nirya, sik kan-kan noutam ara, ton tam nang ara, sik mapmaca lukunyan talak noutam ara, talye karin aryuk dibinyake. Allah el mikip weik ululnye bira, ninye deiyok kibuka talinyak nang babye, wenebuka oplyeura, sik babye dibinauk unyake. Talye ninye arye, kum onyake. Aning ara, Allah el arye!

²¹ Winibuka ninye ati wenebuka olula ara, talye ati kume. Allah elce nun ninye ubirye, dan tam banyak bisik nirya ara, ‘Teleb unyak do? Malyeuk unyak do?’ tenen, disilirye, moubuka kalikisulule. Nun ninye winilamepye touk, wenebuka dengna arepnamsile.

²² Nun malye unyap nang ara, kuna noutam binuka duknuptibye babye, Allah elce ebuka bikisulule.

²³ Allah arye nun ninye ati, yanuka wenepnamsil talak ara, asum noutamuk yanirye, wenebuka yupu bokeipsinirye, wenepnamsine kum nyalisulule. El teneplye talakuk, talye karin yanuka, wenepsirye opsilyake.

²⁴ Allah arye ninye deiyok kibuka talilulnye, el mikip weik deice arye, el mutuku nirya talilul bukni, Allah arye anye, el ulul ning moubuka dipdelirye, kel bikilule. Bukni, ninye arye, “Se, anye bira, malye winilamuk do, kum do?’ tenen, dipdebirye, yupu bokeipnamabe,” nyalamak touk, Allah arye aning kum winilule. Allah arye teneplye talak aryuk, anang deiyoknye bira, bataklirye, yuk nang punubuka ninye deiyok kililule.

²⁵ Ara, sik anang winilamice ning nirya ara, Allah el kele. Ati ara, elce teneplye talak, lukunyan noutam aryuk, kum talibuka ulamlinye birye, yanuka obukaplirye, winiryuknye punuplirye, erelilule.

²⁶ Sik anang ara, malye wininyaka ati, Allah elce sikda adiparyuk obuka wenelule. Ninye nirya dinmacak aryuk, Allah arye, sik malye unyak nang ati, wenebuka olule.

²⁷ Winilula deiyok ara, ani. Ara, sik adeiyok-deiyok nang ara, Allah elce, “Aning wininamlume, aning ara pia kum wininamlume. Teleb un ning ara, ani,” nyapdeiamsuk ning nirya ara, anang arye akunum yaniltaklamik ati, olule. Diba, Allah arye nyalul yupu, moubuka kum talikirye, ‘Aning ara, talye yupu uka, dauplye,’ tenenyak ninye ara, Allah arye wenebuka olule.

²⁸ Sik anang arye, ninye deiyok kibuka talinyaka mikip deice arye, Allah nyasulul yupu yaninyaka ati, sik amu tam talye bona utotoa talina kum nang ati, ikin weik, sik nong deice deibikceba, ‘Se, aning-aning winiptibyeʼ tenen, ikin kanye bobikirye, engenyak ning ara, Allah akunum kekelula ati, sik deiyok nang ati wenelule. Imun kanye bobuka engenyak nang ara, Allah kekeplirye, sik dam yanuka, lobuka lyelolule.

²⁹ Allah arye, ‘Nara tunim abuka diltaknauk unirye, malye wininyak nang, min kum wenepnamane,’ tenebuka utopu ura, yata nang arye sik adeiyok nang ati wenepting do? Tonda, Allah arye, ‘Ninye ara, na wininye ning kum eipnikcakʼ tenen, el urasin duknuptu ura, yata tonye birye, el urasin eiptu do? Tonda, tonok weik mutuku noutam unyak nang arye, Allah eipting do? Akumopura, tonoknye biryuk, Allah el urasin eiptu do? Kume, ara kum winipmanto.

³⁰ Allah arye, pia malye unyak nang, elti, ‘Nun like,’ tenenyak nang dobuka, ninye deiyok bikinanye, akunum wibuka deiptingopura, yata nang arye yupu sektingba, aning kum uptu do? Kume, tukwak nang nirya ara, mikip kum uptinge. Allah arye sikti, kum meliplyopura, malye unanye birye, sik deice ikin deibuka, mikip arye sikti, taliptu ura, sikcuk kum lyepdanmanto uptinge.

³¹ Ayubo, an malye winilyam ning ara, Allah dam ati, “Na malye winipse ning ara, akunum wenepnuluma ati, nara tonap malye kum wininamne,” nyabuka, nyalin yupu deice arye akunum nyaplum do?

³² Tonda, ance Allah ati, “Na malye unun ning auplyopura, Allah ance, “An malye uplum ning ara, ani,” nyabuka laka nyapniminyeba, biknirye, narye tonap pia kum winipnamne,” nyabuka, Allah el deice nyalin yupu akunum nyaplumce moroplum do?

³³ Tonda, Allah arye an deice pil dokulul ning ara, ance, ‘Kume aning ara, teleb ubuka kum kinululʼ tenen, tenepmince, elti, nyapminyopura, yata ati Allah arye, an tenibuka nyapminye ning ara, adiparyuk kekepnamkil do? An kanye aryuk tenelyam ning ara, Allah arye adiparyuk winipnamle do? Kume, aning ara kum winipnamle. Ati ara, na Elihu birye anti, “Aning winanlyame,” nyabuka kum nyapkitinye. Aning kum bukni, ancuk, ‘Aning nyapnune,’ tenepminye ninguk, wibuka laka nyanamlyame. Ancuk, ‘Aning ara, ani,’ tenepminye ning ara, adiparyuk laka nyapnulyame!

³⁴ Winibuka nyaptum bukni, na kanye ara, anggun kanye pum tam arye tenibuka, kel weik bikinyak nang ap, tonda kel weik bikina deice arye, nong noutam moubuka tenebikirye, kel bikinyak nang nirya ap, narye anti nyapnukin yupu ara, kekebicak arye, bikinyake. Kel bikikcopura, sikce nyapnamake.

³⁵ “Se, Ayub el nyalul yupu ara, moubuka tenina kumce, talye-talye yupu nyalule. Ayupu nyanmala ara, elce minop, ‘Aning nong ara, ani, ani,’ teneplirye, moubuka kum bikliryuk, talye yupu nyaltakalule.

³⁶ Ati ara, sik yupu nyalina deiyok nang arye, Ayub el nyalul yupu moubuka kekena ap, el lina ap, winibikce nang ara, sikce, ‘Kume, malye nang arye talye nyalamak yupu atonun, yupu nyalule,’ ‘Sik tenebikirye nyanamake,’ tenepmabe.

³⁷ Ayub bira, walwal yupu nyalule. Aninguk kum bukni, tonda Allah nyasilye yupu yaninauk ulule. Awinilya deice arye, malye kilalule. Tonda, nun nirya kekenmapak arye, Ayub bira Allah ati, malye-malye yupu weik tonun nyabuka nalilule.” Sik weik kel nang arye, an Ayub biti utenenmakirye, yupu nyanamake, nyapne. Elihud elce Ayub biti, ayupu nirya nyabuk.