Ayub 33 - Eipomek

“Allah elce nun ninye dam ati, el yupu nyalisulul ara, aning-aning deice arye nyasulule,” nyabuk yupu

¹ Elihu birye Ayub biti, ayupu ton nyabuk. Talye-talye yupu kum nyaplopnusin bukni, wini talak narye Ayub anti, anyapnukin yupu nirya ara, kekepmince, bita moubuka biknulyame.

² Anda moubuka kekepnunilyame. Narye, ‘Ayub el dam yupu nyapnamane,’ tenepsirye, akunum kintinipse yupu, na si deice arye nyapnukine.

³ Na kanye talima noutam arye tenenun ning ara, pia diksukum ninguk nyapnukine. Na si deice arye nyapnukin yupu nirya ara, talye nyaltakan yupu kume. Dipkoprob na kel bikse ning ara, pia mambul yupu nyapnukine.

⁴ Nara, Allah el Lek Dip Kanye arye, akunum kintinip deipnuke. Tonda, winipnukba, weik arye erebuka, aning-aning nirya talibuka, mikip weik ulya deiyoknye Allah ara elcuk, el mikip weik isin arye, na nong noutam isin arepnuka deice arye, kam unune.

⁵ Aning ati ara, na nyapnukin yupu an kekepmince, bikminyopura, ‘E, aning ati yupu ton tamubuka nyaptinye,’ tenepminyopura, adiparyuk ayupu nyapnamnilyame. Tonda, na yupu nyapnyeba kekepmince, ‘Aning ara kume, dipkoprob ning ara ani, ani nyaptinye,’ tenepniminyopura, na nyapnukin yupu sekelana ati nyapnuniminye yupu ara, kintinipnulyame.

⁶ Dipkoprob Allah el kanye ara, an ap, na ap, nun yuk-yuk kume. Sikda neiktoto uka,’ tenesulule. Allah elcuk kira tuku dobuka, na kwepdeipnuk touk, an babye kira tuku dobuka kwepdeipkuke.

⁷ An ap, na ap, talye tukwak nanguk unyaba ati, ance nati, ‘Se, yata ikin yupu nyapnunil do?’ tenen, ilil una kume. Na nyapnukin yupu ara, an ikin kilina ati yupu kum nyapnukine ati, ilil una kume.

⁸ Bukni, arup talak ara, ance nyapmalum yupu nirya ara, na akunum kekepmakine. Tonda, ance tenibuka nyapmalam yupu nirya ara, na akunum moubuka kekepmanue.

⁹ Ance ayupu nyapmome. “Kume, nara Allah elce nyapdeipsuk yupu kum yaninune. Nara, diksukum telebuk unune,” nyabuka, laka nyanmalumak akunum kekenmase. “Anggunce dipdetuma babye, nara lekuka malye uwinin ning ton kum wininuna ati, malye winin ning ara, ton kum eipnalume. Nara telebuk unune,” nyabuka, laka nyapmaluma, akunum kekenmase.

¹⁰ Tonda, ance, “Nara pia diksukumuk unun bukni, Allah elce nati, yatato wiriptinye deice arye, anye Ayub elti, wenepnirye, malye kipdeiptinye do?’ tenenulule. Allah arye nati ara, ‘Elda, na yaniltakananye ulule,’ tenelirye, akunum biknuke,” nyapmome.

¹¹ Tonda, “Allah elce, ‘Ayub biti bilyakʼ tenen, kat yo dobuka, bisik botobuka, na yan ara aning pum tam akunum dongopnuke. Winipnuk arye, na yuk tam yanibuka binmantoak nirya ara, Anye malye winipnamal do, teleb winipnamal do?’ tenen, kaliknauk unulule,” nyapmome.

¹² Se, Ayub ance akanye tenebuka yupu nyalyam ning ara, walwal arye talye yupu nyalyame! Allah elda nun ninye atonunye kum ulule. Elda mikip weik ap, erebuka una apnye ulula ati, nun tukwak nang nirya ara, el amu tamuk unyabe.

¹³ Ati ara, yata deiyok ati ance Allah ati, ‘Na tenenun kanye ap, nyanun yupu ap nirya ara, Allah elce tamubuka, kum nyapnutueʼ tenen, Allah el nyalye yupu nirya ara, yaniltakna atonun nyalyam do?

¹⁴ Kume, na kel bikse ning ara, ani. Allah elce nun tukwak mutuku unyap nang dam yupu nyalisulul ara, el si deice aryuk kum nyalule. Tonda, elce pil dolul ning yala-yala nirya deice arye nyasulule. Winibuka nyasulul bukni, ninye tonok babye, Allah elce nyalisul yupu ara, ton ning ara kekena ap, dina ap unyap bukni, ‘Deiyok noutam ara, ani,’ tenebuka, kum moubuka weik bikinyabe.

¹⁵ Winipmanto ning nyapnukine. Nun ninye ara, lukunyan wi talipsilye ati, mabipye talak ara, Allah elce lengdar deice ap, lengdar mana deice arye, nun dam yanuka, yupu nyalisulule.

¹⁶ Ato talak ara, Allah elce, ‘Na nyapne yupu, sik ninye arye kekepnuniakʼ tenen, nun amul pakuka deipsilirye, “Wininmaluma ara, bataklulume! Kum batakmunyeura, narye obuka sirya danamsine,” nyabuka, nun dam wenen yupu nyaplyeba kekebikirye, sirya dakanyabe.

¹⁷ Allah elce ato yupu nyasulul deiyok ara, ani. Ara, ‘Ayupu nyapnyeba kekebikirye, sik malye unyak ning ara, bataktingʼ tenen, nyasulule. Tonda, ‘Sik talima erebuka maknya kinyak ning ara, bataktingce ila tamubuka telebuk uptingʼ tenen, lengdar deice arye, ato yupu nyasulule.

¹⁸ Tonda, Allah arye tenesulula ara ani. Ara, Allah elce, ‘Kume, amalye unyak nang ati, lake kiplopyeba, sikda malyeuk ulamikca ani, akunum dibikceura, tuku palibuka dongonamake. Aning atonun, malyeuk daulamikca ani, akunum dibikceura, weik balamle mek koubuka otam ara, akunum diamik nang unyakakuk, binuka unamake,’ tenesulule. Ati, Allah arye, ‘Malye unmacebuk, dibicakʼ tenen, Allah elce nun tukwak nang ati, lengdar arye yupu nyasilya deice, melibuka lyelosulule.

¹⁹ Tonda, Allah elce, ‘Sik anang malye unyaka deice arye dipnamakeʼ tenen, wenena ati ara, pia weik nakina talina deiyok ning areplyeba, sik nong noutam yalyeba dorobikirye, weik uk dilule. Sik nong pum tam ap, sik nong noutam yo ap, uk weik dilya deice arye, ‘Seʼ tenen, malye kanye bonyake.

²⁰ Weik uk dilulnye bira, din teleb ning babye ton, ‘Adin ning dobuka diptinyeʼ tenen, patan pia kum ati, aning pia kum dobuka dilule. Piato nyalamle din babye, anye bira adin ning eiplirye, adiparyuk dukmanto ulule.

²¹ Auk dinanye bira, el nong bol urasin ara min arye telebuk ulamuk bukni, uk dilye talak ara, pia bol ekuka, bol malye bolule. Winiplirye, nong dongona kum kiplirye, el nong yok nirya ara, auk kum taleamuk talak ara, el yok ara, kum eipmanto uamuk bukni, atalak ara laka ulule.

²² Winibicopura, anye bira dipmace nang weilbalamak sukum akunum binmanto ulule. Ninye dibikceura, weilbalamak nang, sik sambala binuka unyakak bana ati ara, akunum dam binmanto ulule.

²³ Winibuka ikin weik ulul bukni, Allah el im deice pil don nang malaikat ara, pia weik kum nukmanto bukni, seribu malaikat kan-kan noutam arye, tonoknye yaturye, anye biti meliptue. Amalaikat arye, anye el kam ulamuk talak pil dolamupu, “Elce meliamuk ning ara, telebuk ulule. Malye winin ning tonok babye, kum ulamuk,” nyabuka, anye deice nyaplyeura, uk dilinye bira, ila tamubuka telebuk upnamle.

²⁴ Amalaikat arye, el anye biti, bico uplyeba, elce nyapnamle, “Allah, ance anye bira, biklyame. El anye bira, ninye dibikirye, weilbanyaka dam binuka ulyame. El anye bira, ‘Sik diplamik nang dam kum bituʼ tenen, el kam una dekna ati arepmanto ning ara asukum,” nyabuka, nyapnamle. Aning areplirye, anye el yok ara punupnamle.

²⁵ Amalaikat arye, aning ton nyaptu. “Anye el nong bol ara tamubuka teleb uplirye, poto kipdeipliba, wel nang bol atonun upnamle,’ tenen, moropkine,” nyapnamle.

²⁶ Nyapnye ura, anye elcuk Allah ati, “Naio, melibuka lyepnilyame!” nyabuka, moroplyeura, Allah arye anye biti, bico teneplirye, ‘Telebe, anye bira, na dam yangana telebe,” akunum nyaplyeura, adiparyuk melilule. Nyaplyopura, el anye birye Allah el tibuk kanye deiplirye, Allah dam akunum yalyopura, Allah ati si erenamle. Winiplyeura, Allah arye anye el diksukumuk ulamuk ning ati, dekna areplirye, anye tamubuka teleb kipdeipliba, min arye teleb ulamuk touk, tamubuka telebuk unamle.

²⁷ Allah arye anye akunum ila tamubuka teleb kipdeiplyeura, anang nirya wekuka kekenmacak aryuk, el anye birye nyapnamle. “Narye teleb ning ara, malye kilamsirye, malye ning ara, ‘Aning telebe,’ nyabuka, talye yupu nyalamsirye, pia malye ulamse. Bukni, Allah elce nati kum wenebuka opnuke. Bico tenepnukce, na malye ulamse ning nirya ara, biknukce winipnuke,” nyabuka, laka nyanamle.

²⁸ Tonda, anye birye, “Nara walamnik nang unyakak binmanto uapsebuk, Allah elce nati, Anye bira akunum diplamik nang unyakak ara, bana kume,” nyabuka lyepropnuke. Winipnukba, wini talak nara kam tuba unamne. Tonda, dirina ara tuba dinauk unamne,” nyanamle.

²⁹ Ura, aning laka nyapmakina nirya ara, moubuka biknamlyame. Allah elcuk pia tonap tuba-tuba tamubuka, nun ninye dam ara akunum usulule.

³⁰ Winilula deiyok ara ani. Ara, Allah elce nun tukwak nang ati, apil dosilya deice arye, diamikce nang dam binmanto upmapnyebuk, aminyan talak lyelosulule. Winipsilirye, nun una ara, pia teleb kipdeipsilyeba, kanye deibuka telebuk unyabe. Kam tuba ubirye, dirina aulyeba, adirina ara dinamabe.

³¹ Ati ara, Ayubo, an amul ara bita pakuka deipmince, wini talak narye anti nyapnukin yupu ara, bita moubuka kekepnulyame.

³² Bukni, narye ayupu nirya akunum nyapkinyeba kekepminyopura, ance ton, ‘Tamubuka nyapnune,’ tenepneminyopura, nyapnulyame. Ance dipkoprob yupu nyapminye ura, narye an nyapminye yupu kekepkinirye, Ayupu ara dipkoprob nyaple tenen, biknirye, Allah el dam ara laka nyapnamakine.

³³ Bukni, ance, nyapmanto yupu ton kumopura, narye nyapnukin yupu tunim abuka kekepnunilyame. Na kel bikin ninguk an dam nyapkinyeba, kekebuka biknalame.” Elihu birye, Ayub biti ayupu nirya nyabuk.