Ayub 32 - Eipomek

Elihu birye Ayub biti, tamubuka nyabuk yupu

¹ Ayub el kwit capu winilye nang, sikce yupu tonap tamubuka, sik ka Ayub biti kum nyabik. Ara, Ayub el kanye talima noutam ara, ‘Kume, narye dipkoprob pia malye kum winilamse ati, diksukumuk unune, tenebuka ati, el kwit capu arye elti, yupu tonap kum nyabik.

² Bukni, Bus yalanye, el si Barahkeel, elce deiamuknye, el si ara Elihu birye, yupu ton nyabuk. Barahkeel bira, Ram yala nang arye deiamikba, deipdanin yangalamik nang arye, Barahkeel deiamik. Barahkeel birye deiamuknye bira, Elihu, elce yupu tonap dukdongobuka nyabuk. Elihu birye, yupu nyabuka deiyok ara, ani. Ayub birye, ‘Nara diksukumuk wininibuk, Allah arye deiyok kum uamukbuk, ikin ning na deice deipnuk,’ tenebukce, nyabuk. Nyabuka deice arye, Allah ati, si malye kipdeipmanto ubuka ati, el kwit Elihu yu ubukba, Ayub biti wabuk.

³ Tonda, Elihu biryuk, Ayub el kwit capu winilye nang ati, yu ubukba wabuk. Deiyok ara ani. Anggun ka Ayub biti, “Anda malyeuk winilamunyebuk, Allah arye wenepkuke,” nyabik bukni, Ayub birye malye winibuk ning ara, laka nyapmanto kum ubik. Ayub nyabuk yupu ara, moubuka kekena kumce, Ayub el deice malye kipdeipmanto ubika ati, nyabuk.

⁴ Sik anang kan-kan ara, Elihu elda welnye ulamuk. Sik yuk winilye nang ara, akunum wisi danamik nang arye, yupu nyanmika ati, Elihu bira, talye tunim abuka, sik nyanmek yupu kekenauk unmok. Bukni, sik awinilye nang nirya yupu akunum nyabikopura, el yupu ara, aminyan arye nyabuk.

⁵ Bukni, sik awinilye nang, sik yupu nirya akunum nyabikopura, Elihu kekebukce, ‘Kume, sikce nyanmak yupu ara, Ayub ikin weik unmala ara, ‘Deiyok ara aniʼ tenen, kum laka nyanmake tenebukce, sik anang ati yu ubuk.

⁶ Yu ubukba, Bus yalanye, el si ara Barakheel birye deiamuknye, el si ara, Elihu birye ayupu nyabuk. Na kwit capuo. Anggunda akunum kele. Nara welnye unun bukni, anggunda akunum nepnulumce, wisi nang ululuma ati, anggun kel weik bikna nang ululume. Ati ara, na tenenun ning ara, ani. ‘Sik awisi nang dam babye nyapnun do? Kum nyapnun do?’ tenina deice arye, narye tenipman ning ara, anggun dam kum nyapmane. Nara, ilil upnukba, alye dakdasa ati, yupu ton min kum nyapsise bukni, wini talak ara, narye tenepman yupu ton nyapnusine.

⁷ Na kanye noutam tenepse ara, ‘Kume, minop akunum bikinyake wisi nang, sikda kel weik bikna ning ara, weik akunum bikinyake. Ati, teleb ning ara, awisi nang arye, akunum bikamik ning bokuka, nun wel nang ati arepsitinge,’ tenepse.

⁸ Bukni, wini talak ara, akunum bikmane. Ninye tukwak nang ara, keting tamun weik ulamaka deice arye, kel weik nang kum unyake. Dipkoprob ning ara, nun tukwak mutuku nang nirya ati, kel bikna deiyok ning aresululnye bira, Allah el uka. Elda weik erebuka deice tam ulirye, aning-aning nirya talilirye, elda Mikip Weik Deiyoknye ulula ati, el Pia Teleb, Lek Dip Kanye, el pia mikip ulye deice aryuk, weik kel bikna deiyok ning arisulule.

⁹ Na kanye ara, ‘Kel bikin ning weik tonun kel bikinyak nang ara, minop nebuka wisi dananyak nang arye, kel bikinyaka kume. Tonda, pia moubuka kel bikinyak nang ara, sik minop nebuka wisi akunum danamik nang, sikuk kel bikinyake, kume,’ tenepne.

¹⁰ Ati ara, na yupu kekepnululume. ‘Na tenenun ning ara, anggun dam nyapsitinye,’ tenen, moropsine. Ara ani.

¹¹ Arup talak, narye, ‘Kume, sik anang arye yupu nyapnuyaka ara, nara moubuka kekepnirye, weik tonun biknirye, ton kekebuka biknamne ati, atalak ara, talye tunim abuka kekepnune,’ tenepmase. Tonda, anggunce, ‘Yata teleb yupu nyaptibye do, aning do, aning do?’ tenen, tenipmalumce, teleb yupu peterenmalum talak nirya ara, na tunim abuka kekenauk unmase.

¹² Na moubuka eipsinyak arye, akunum bikisunune. Anggunce Ayub el dam nyanmalum yupu ara, “An Ayub birye, malye winiplum ning ara ani, ani,” nyabuka, dipkoprob kum laka nyapmalume. Tonda, elce anggunti tamubuka nyapmok ning ara, anggunce tamubuka elti, teleb yupu nyabuka, kum laka nyapmalume. Ara, Ayub elce walwal yupu nyanmok ning ara, ton aupmatopura, anggunce, “Kume, ance malye yupu nyapmalam ara ani. Ati ara, dipkoprob ning ara, ani,” nyabuka, kum lipsisikdeiplume.

¹³ Anggunda moubuka biklulume! Yata deiyok ati, anggunce, “Nunda kel weik bikin ning ara, nun akunum kel bikupu,” nyaptuma deice arye, Ayub weneptum do? Ayupu nyaplum bukni, na kanye ara, Ayub el nyalul yupu ap, el winilul ning ati, nun tukwak mutuku unyap nang arye, kum weneptibye. Dipkoprob ning ara, Ayub nyalul yupu ap, elce winilul ning ap, tamubuka nyapmantonye bira, Allah eluk ulule.

¹⁴ Tonda, Ayub birye nyamok yupu nirya ara, nati yupu kum nyapmanue. Anggun damuk nyapmasue. Tonda, anggunce Ayub biti, akunum nyapmalum yupu ara, nati ton kum nyapnutume.

¹⁵ Na kanye ara, anggun winilye nang ara, akunum kanye teninauk ululume. Anggunda, ‘Se, yata yupu ton tabakuka nyaptibye do?’ tenen, kanye walwal abuka ululume. Anggunda windung-wandung apsukba, Ayub biti tamubuka tuba kum nyapmalume.

¹⁶ Anggunda talye tunim abuka, tikna dem upmaluma ati, na babye talye tikna dem upnaman do? Yupu ton kum nyaptinye do? Anggunce Ayub biti, anggun yupu ton tamubuka, teleb kum nyanmaluma ati, nara yupu nyana kumce, talye tunim abuka, tikna dem upnun do?

¹⁷ Kume, nara tunim abuka, tikna dem kum upnune. Wini talak ara, narye an nyalyam yupu ati, tamubuka nyapnukine. Na tenenun ning ara, Ayub an dam nyapnukine.

¹⁸ Ara, na tenenun ning ara, pia tunim abuka, tuba kum unamne. Narye an dam nyapnamakin yupu ara, weik aupmanila ati, ayupu nirya ara, darapdongobuka kum uptinye. Na kanye talima noutam ara, ‘Aning nirya ara, adiparyuk lakak nyapnulyame,’ nyanulula ati, wini talak nyapnukine.

¹⁹ Winipmanto ara, na talima noutam tenenun ning ara, kum nyapnirye, tunim anauk upnyopura, na talima noutam aryuk bokuka sakmanto unulule. Ara winipmanto, anggur winiryuk ning kwebuka, domba basam bola dobuka wibikirye, aning pum tam, anggur mek libikceba langdibuka, deipmacebuk, aminyan talak anggur mikip arye, abasam bol paplirye, anggur mek sakmanto ulamle touk wininulule. Ara, ‘Yupu weik tonun nyaptinye,’ tenenuna ati, na talima noutam tenen deice arye, akunum butukmanto upnile.

²⁰ Ati ara, na babye, na kanye pum tam arye teninun yupu nyapya deice arye, na kanye ara, tuba teleb kipnamnile. Ati, Ayub an yupu nyaplumba, na kekepsirye, teninun ning ara, an dam tamubuka nyapnukine.

²¹ Na yupu, an dam nyapnukin ning ara, ‘Anye tam kiapna, anye tam kiapna kinyak do? Minin yupu nyapnune,’ tenen yupu ara, pia kum nyapnune. Tonda, tonoknye ton, malye winilamuk bukni, narye anye biti, “Anda pia telebnye winilyame. Ance nyaplum yupu ara, teleb yupu nyaplume,” nyabuka, el kanye teleb kilina ati, talye yupu pia kum nyapnune.

²² Dipkoprob, narye ato talye nyaltakan yupu babye, kum kel bikse. Tonda, talye kanye delin yupu nyaplopnye babye, Allah ara, na kwepdeiamnuka deiyoknye ulula ati, elce nati, adiparyuk wenebuka opnutuba diptinye. Elihu birye, Ayub biti nyabuk.