Ayub 31 - Eipomek

Ayub birye tonap tamubuka, “Nara, malye ton kum winipse,” nyabuk yupu

¹ Nara, dipkoprob nyalin yupu akunum na bidamnye nyapdase. Ara, kam kilapu asing eipnirye, ‘Akil ara, na ap neika maptinimnye, tenena ara, pia tuba kum tenenamne,’ nyapdase.

² Anyapmana ara, urdem ati kum nyapne. Ara, Allah arye nun ninye malye wininyap ning ati, kum wenepnamsil do? Tonda, Allah mikip weiknye, aning-aning nirya deice tam ulirye, Weik Erenanye bira, elce, nun tukwak ninye winipye touk, dekna ning kum arenamsil do? Teleb ubibyopura, teleb ninguk arenamsile. Bukni, malye winibipyopura, malye ninguk arenamsile.

³ Ati ara, dipkoprob malye ninguk wininyak nang ara, Allah arye wenena ap, malye una deiyok ning ap arepliba, sik anang dam yanamle. Yalyopura, sik wininyak ning ayala-ayala nirya ara, malyeuk ulinamle. Ara, sik malye-malye ninguk wininyaka dekna ati wininamle.

⁴ Na kele, na wininun ning ap, tenenun ning ap, banunak ap nirya ara, dipkoprob Allah aryuk dinilirye, bikinulule.

^5-6 Winipmanto ara, ninye arye bona ati, ‘Ikin do, kanam do?’ tenen, kiklinatimbangan teleb ning deice deibikirye, dililamak touk, Allah arye, na wininye ning ati, dipkoprob moubuka kiklilenulule. Winipnilya deice arye, na malye kum wininun ning ara, bikinamnile. Elda kel kina deiyoknye ulule. Ati ara, dipkoprob na kum duknuptinye. Asum-asum nirya, ‘Naʼ tenen, arye, tilila yupu nyanye talak ara, Allah akunum kekenilirye, bikinulule. Tonda, na kayapu ati, ‘Sik ning doproptinye’ tenen, tilila yupu nyapnye talak ara, el akunum kekebuka bikinulule.

⁷ Tonda, narye diksukum bisik akunum bataknirye, kirikuka yuk malye bisik dobolbalamtinyopura, Allah arye wenepniliba, yuk nang arye, “Dipkoprop malye winilul arye,” nyapnitinge. Aning atonun, na asing eipnya deice arye, na kanye talima lipropniliba, malye bisik banyopura, Allah arye wenepniliba, yuk nang arye eipnicake. Tonda, na taruk arye malye winipnyopura, Allah arye wenepniliba, aning ara yuk nang arye eipnicake.

⁸ Malye ulamtinyopura, yuk nang arye, na yala dokamtinye ning ara, duk dakuka diptinge. Tonda, malye ulamtinyopura, na kouamtinye ning nirya ara, talye kwinibuka bataktinge.

⁹ Tonda malye kum winilamse bukni, winipmanto ning ara, narye yuk kam kilapu eipnirye, na kanye talima lipropniliba, ‘Neika maptinimnye,’ teneptinyopura, Allah arye wenepnutue. Tonda na kayapu yuk nang, sik domikce kilapu ati, kanye talima lipropniliba, sik aik bublan kukulin tam dungnubuka, tikilbinuka dololamtinyopura, Allah arye wenepnutue.

¹⁰ Ara, winilamtinyopura, Allah arye wenepnutuba, na dopse kil yuknye birye doproptuba, el gandum teikturye, roti deiyok ning tepung kentineiptue. Tonda, malye ulamtinyopura, Allah arye wenepnutuba, na dopse kil, yuk nang arye duknubuka, dobitinga babye, teleb uka.

¹¹ Arup arye nyapnin yanmanu yupu ara, malye un ning nirya ati, yuk kilapu ati, na kanye talima lipropnutuba, malye ulamtinyopura, dipkoprob alye dakdatinye. Tonda, adeice arye Allah ap, tukwak mutuku deiyok nang ap arye, wenebuka opnitingce, ikin ning na nong deice deipnitinge.

¹² Ayupu nyapmasina ara, talye ati kum nyapne. Ara, sal arye, ‘Se, yuk kilapu ap maptibye’ tenen, ‘Se,’ tenebuka patana ap, yuk kilapu ubula dolona ap ara, dipkoprob pia malye ning winilula ati, winipmanto ara, uku buk weik arye aning-aning diplirye, sirya daklamle touk, amalye kanye tenena deiyok ning arye, aning-aning nirya malye ulisulule. Aning wininyak nang ara, Allah arye wenepliba, uku delamle mutuku binuka unamake. Ati ara, amalye una dekna arye, ninye talibuka unyak ning ap, bonyak ning nirya ara, kum danalilule. Ara, uku weik arye dibuka, sirya daklamle ning atonun, ati nyapne.

¹³ Tonda, na amu tam pil melibuka don nang ap, na amu tam pil don kilapu ap, sik nirya arye nati, “Ance nun dam malye winipmasilame,” nyapniting bukni, aning kekebuka, kum lipsisiktinyopura, ara diba na malye uptinye.

¹⁴ Aning winyamtinyopura, Allah arye nati, yupu bokipnamnil talak ara, yata nyaptinye do? Tonda, Allah arye nati, “Anda an amu tam pil melin nang ati, malye winiplum ning ara, lipsisiklum do, kum do?” nyabuka, asipdenilyopura, yata yupu tamubuka nyaptinye do?

¹⁵ Kume, na pil dona ati melin ninye babye, na babye, nun ni Allah elcuk kwepdeipsuke. Tonda, na babye, sik babye, nun nin yapu mun pum tam arye kintinibuka deipsuknye bira, Allah el uka. Allah el kanye ara, ‘Tukwak ninye nirya ara, mambule,’ tenesulule anya arye, na amu tam pil dona ati melin ninye ati, telebuk wininamne.

¹⁶ Tonda, bona utotoa talina kum ninye, sik patalamuk ning ati, kum melilamtinyopura, dipkoprob malye winilamtinye. Atonun, youwak kilapu sik kanye imun ulamuk ning ati, bico tenebuka kum melilamtinyopura, aning babye malye winilamtinye. Winiptinyopura, Allah arye wenebuka opnutue.

¹⁷ Tonda, kwangnan mapu, sik din ning patalamuk talak babye, na din ning awamnutu bukni, eibuka bikamtiniryuk, batakamtinyopura, aning ati, Allah arye wenebuka opnutue.

¹⁸ Aning ara, kum winilamse. Aning kum bukni, amapu ara, sik mitik talak arye, sik ni yapu koprop deiamikce nang arye, kalikuka melilamaka atonun, na babye melibuka din arelamse. Aning atouk, na nin deiamnuk talak arye diprongobuka, na kam wel tuba ulamse talak noutamak nirya ara, youwak kilapu ati melilamse. Bukni, aning nirya kum winilamtinirye, kum melilamtinyopura, aning ati Allah arye, wenebuka opnutue.

¹⁹ Aning atonun, talye bona utotoa talina kum ninye, sik baju kum ati, nong banang ulamtingce, arukna ulamtuba dipmanto ulamtinga eibuka, kel kiptinirye, bataklamtinyopura, aning ati, Allah arye wenebuka opnutue. Tonda, baju pia kum dekmanto nang, bona utotoa talina kum nang eibuka bikamtiniryuk, bataklamtinyopura, aning ati, Allah arye wenebuka opnutue.

²⁰ Ara, sik nong banang ulamting ninye ati, na eiyamtiniryuk, bico kum upnutuba, na domba basam optinirye, el nong potong koproptinirye, buppu baju dobuka, aninye ati kum deiamtinyopura, sik aninye arye nati, weik kanye kum deipnamnitinge. Ato kili sal kum melilamtinyopura, aning ati, Allah arye wenebuka opnutue. Bukni, ato ninye nirya melilamse.

²¹ Ninye yupu bokolina talak ara, ‘Nara weiknye anya arye, na yupu dipkoprob kekepnamneyak’ tenen, kwangnan mapu malye kum kipdeiptinye bukni, ‘Na yupu nyapnun’ tenen, taruk pukdeiptinirye, tenepce, ‘Sik malye upmake,’ nyalamtinyopura, dipkoprob aning ati, Allah arye wenebuka opnutue.

²² Aning ati ara, aning winilamtinyopura, na taruk nakub dukuldongonak arye, seklopnute babye ara, teleb uka. Tonda, na taruk nakub yok cepnutua babye, teleb uka.

²³ Bukni, arup anyapman ning nirya ara, ‘Allah weik arye wenebuka opnilyak’ tenen, ilil ulamnukba, pia kum winilamse. Tonda, Allah ara pia teleb, Weik Erenanye ulula ati, amalye winin ning nirya kum winilamse. Tonda wini talak babye, malye pia kum wininune.

²⁴ Dekna weik ning emas ati, ‘Aning aryuk melinamnile,’ tenelamtinyopura, Allah arye wenepnutue. Tonda, dekna weik ning, emas pia urasin teleb ning ati, ‘Aning aryuk moubuka kalikinamnile,’ tenelamtinyopura, Allah arye wenebuka opnutue.

²⁵ Tonda na pil dobuka dopnin balamsa deice arye, dekuka talilamse ning ap, na dekna weik ning talilamse ning ap ati ara, ‘Nara weik bona talinanye’ tenen, kanye talima ereldalamtinyopura, Allah arye wenebuka opnutue.

²⁶ Aning atonun, narye keting ap, wala ap deiplirye, dirina weik ulirye balamle ning ap ati, eiptinirye, ‘Se, aning ara, weik mambule anya arye, aninguk si erelamtinirye, arin ning areptinye,’ tenelamtinye toura, Allah arye wenebuka opnutue.

²⁷ Tonda, na kanye noutam aniryuk, duknubuka teneptinirye wala ap, keting ap, si erena ati, ‘Arin ning areptinye’ tenen, weik arye patalamnutu toura, Allah arye wenebuka opnutue.

²⁸ Arup arye nyapnin yanman yupu, malye winin ning nirya winilamtinyopura, adeice Allah arye, wenebuka opnutue. Aning ara, urdem ati kum nyapne. Deiyok ara, amalye winin ning winilamtinyopura, yupu bokolinanye, Allah im deice ululnye birye, “Wininalyame,” nyapdeiamnuk yupu bataktinirye, kum winilamtinyopura, wenebuka opnutue. Ara, Allah ati, batakna atonun una ati, nyapne.

²⁹ Tonda, na mal olan nang, sik ikin ning doprobice talak ara, narye sikti, ‘Merekuka winipmake,’ tenelamtinyopura, Allah arye wenebuka opnutue. Tonda, sik dam ikin ning yatubuk, ara, ‘Merekuka winipmale’ tenen, kanye talima ereldalamtinyopura, Allah arye wenebuka opnutue.

³⁰ Tonda na oldan nang ati, ‘Allah arye aninye ati supdeipturye, optuba sikda diptinge’ tenen, Allah kum moropse. Ayupu atonun ning ton, nyalamsirye, malye kum winilamse.

³¹ Sik minop danirye melibuka, na aik pil dolamnik ninye ara, na aik delinun din ning ara, sik dobuka, talye dilamika anya arye, sik din ton, kum patalamuk. Bukni, na pil melin nang do, yuk asik nang do, din patalamuk talak ara, na din ning awamnutu bukni, eibuka bikmatiniryuk, bataklamtinyopura, aning ati Allah arye, wenebuka opnutue. Bukni, aning babye, kum winilamse.

³² Aning kum bukni, ninye asik nang, na dam yanopura, ‘Anggunda bai tamuk maplulume,’ kum nyalamse. Atalak-atalak nirya ara, na aik bublan kukipnaba, talye mangkau kibuka wekneura, na aik din dibuka manyake. Bukni, anyapman yupu ati, na pil dona melin nang arye, ‘Elda aning kum usulule,’ nyalamniting toura, Allah arye wenebuka opnutue.

³³ Ninye yuk nang ara, sik malye ubikirye, kanye talima noutamak duknulamak touk, ulamtinye toura, Allah arye wenebuka opnutue.

³⁴ Ninye malye ulamikirye, sik kanye talima noutamak duknulamaka deiyok ara, ani. Ara, ‘Yuk nang weik bulubikirye, nunti, “Sikda malye un nang,” nyapsicak’ tenen, wininyake. Aning atouk, na malye winilamse ning, na kanye talima pum tam kunusa dolamtinyopura, Allah arye wenepnutue. Tonda, ‘Ninye ayala-yala nirya arye, “Elda malye ululnye,” nyapnicak’ tenen, yupu nyana kumce, na aik noutamuk winilamtinirye, dungnulamtinyopura, Allah arye wenebuka opnutue.

³⁵ Se, na patapmanil ning ara, yuk telebnye birye, na nyanye yupu kekepnutopura, na kanye deiptinye. Bukni, na yupu kum kekepmantonye ulula ati ara, naryuk, na nyanun yupu, ‘Dib yupu nyapmale, tenepnamak’ tenen, urasin lak kilina ati, na si sekeipne. Aminyan talak ara, aning-aning nirya deice tam, mikip weik ululnye, Weik Erenanye Allah arye, yupu nyapdeipnamnuturya. Allah arye nati, ‘Elda malye ulule,’ tenepnutopura, aning nirya lak sekuka nyapdeipnutuba, eiptinye.

³⁶ Asurat sekuka arepnutopura, narye dobuka, taruk nakub deice deibuka, banmatinibuk, yuk nang nirya arye eipnamniyake. Aning kumopura, asurat dobuka, na kisok deice deipnirye, banmanibuk eipnamniyake. Ara, ninye deiyok nang, kisok deice konop topi, el si mahkota, nyalamak topi kalulamak atonun, asurat na kisok deice deipnirye, ilil una kum aryuk, banmanibuk, eipnamniyake.

³⁷ Dipkoprop na winilamse ning ap, wini talak wininye ning nirya ara, nati, ‘Elda malye ulule,’ nyanilinye, Allah ati ara, narye tamubuka na winilamse ning nirya moubuka nyapnamne. Dipkoprop na weik kanye deibuka, binuka nyaptinye. Ara, sisin nang, sik mapu kanye deibuka balamak touk, kibuaka el dam bitinirye, lak lepnamtinye.

³⁸ Tonda, na taleamse mutuku ap, tuku ap ati, teleb ubuka wa kum wilamse bukni, awa tuku ati, malye updeiamtinyeura, malye datuba, koulamak ning ayala-yala nirya teleb ubuka betekturye, kum paptuopura, Allah arye wenepnutue. Allah arye wenepnutuba, na wa winyak nirya, malye uptue.

³⁹ Ton ning ara, na wa win nang, sik aulamtingce, wa wiamting wa, sik ton arena kumce, aning nirya libuka dipromtinirye, sik anang pil domting ning dekna ati, kum arelamtinirye, batakamtinyopura, Allah arye wenepnutue. Aning atouk, na wa wena nang, sik anang dina pataptuba, ikin kanye bolamting bukni, narye kum meilyamtiniba, diptingopura, Allah arye nati wenepnuturye, ikin ning na deice deipnutue.

⁴⁰ Ara, gandum wa dam doklamak ning betekliba, yuk talye palamle tace ning arye, angnubuka koupdongopliba, malye upnamle. Tonda, koulamak ning el si, jelai wa win dam doklamak ning betekliba, yuk talye palamle ning arye angnubuka, koupdongopliba malye danamle. Bukni, amalye winin ning, dipkoprob kum winilamse ati, na Ayub birye, ayupu akunum nyabuka deipne.