Ayub 3 - Eipomek

Ayub el mambul kanye bobukce, el tenelamuk ning ati, nyabuk yupu

¹ Tek barye talak deice arye, Ayub ap, el kayapu nang ap arye, yupu kum nyalamik bukni, atalak akunum ubukba, Ayub elce tonok sum ton yupu nyabukce, “Se, na nin bira, yata deiyok ati deiamnuk do? Delina batakamnutue. Na min deipnuk sum ara, pia malye sum,” nyabuka, malye yupu nyanmokce, el deiamuk sum supdayuk.

² Nyabukce, Ayub ayupu ton dukdongobuka nyanmok.

³ “Se, na ni Allah, nara na nin mun pum mamse talak arye omnutumba, diamtinirya. Tonda, na nin akunum deipnuk sum lukunyan ara, kum danamturya. Tonda, na nin deipnukura, ninye arye, ‘Sal mi akunum deipmale,’ nyabik lukunyan ara, kum danamturya.

⁴ Adeipnik sum ara, kunukna uk danamtue. Winiptopura, an Allah arye, na deipnik sum ati, tenena kumce bataktumba, kum danamtue. Tonda, na deipnik sum ara, atanggal ara, aminyan talak babye dirina ton kum danamturya.

⁵ Winiptuba, keting dirina ap, wala dirina ap ara, dua bum arye kitipdongoptuba, na deipnik sum ara, kunukna uk danamturya.

⁶ Tonda, na deipnik talak ara, kum datuba, doyanamle talak ara, ninye arye keting tamun ap, wala ap, nukunamak talak nirya ara, na deipnik tanggal ara, nukna batakamtingca. Na deipnik sum ara inina uk danamturya.

⁷ Alukunyan ara, pia kunukuna uk wamtue. Winyamtuba, atanggal deice arye, doryanamle talak ara, mapu ton kum deilinamtinge. Atanggal deice, alukunyan noutamak ara, pin-pin kanye bobuka, yupu nyanyap ning ara, kum ulamtingca.

⁸ Winyamtuba, asing keten nang ap, tonda laut mekwen noutamak ulul weik mekwen pum bal, el si Lewiatan yukun nang ap, sikce na deipnik sum suamniting ca.

⁹ Adeice wanalu kurya yanuka, panabuka tiklye talak, dirina kilul ning ara, asum, asum tanggal deice arye kum wamtue. Tonda, keting sinarya babye, lak kina kum wamtue. Winyamtuba, kunukna uk danamturya. Winyamtuba, doryanamle talak unamak nang arye, atanggal deice, ‘Beren tam talak keting dirina yanganamle,’ tenepting bukni, kum yanamtua.

¹⁰ Na ni Allah, ance na nin mun pum bomnuka ani, deipnamnuk bisik bublan kum tirikdongamnulume. Tonda, kum dungnyamnuluma anya arye, adeice na akunum deiamnikba, na pia weik kanye imun unulule. Aning ati ara, na deipnik sum ap, tanggal ap ara, kum danamtue.”

¹¹ “Se, yata ati, na nin deipnuk talak arye kum diamse do? Atonun, na nin mun pum tam arye, deipkwetepnuk talak ara, yata ati kum diamse do? Akunum diamtinye.

¹² Tonda, yata ning ati dobuka iripnukce, moum dinyamnukba moum diamse do? Tonda, yata ning ati, na nin keil deice deibuka iripnukce, moum dinyamnukba, moum diamse do?”

¹³ “Adiparyuk, na nin deipnuk sum arye, diamtinye toura, tunim abuka damamtinye aka. Awinyamtinye toura, imun kanye na deice kum upnutue.

¹⁴ Tonda, minop talak ninye deiyok nang, ayala-yala nirya ap, Raja weik nang ap, talibuka ulamik talak, sik nirya arye teleb aik bita dobuka ulamik bukni, dibikce anyaik batakamikba, pun deibuka lyupsakamuk. Anang diplamek touk na babye diamtinye.

¹⁵ Na diamtinirye, ninye deiyok nang Raja weik nang, sik pia teleb ning emas ap, perak ap, weik arye bulubuka, sik aik deiamikce, kanye deibuka ulamika ani, batakuka diamik touk, na babye atonun winyamtinye.”

¹⁶ “Na nin mun pum tam arye, dadiamtiniba deipkwetamnutue. Winipnutuba, keting dirina el lina kum aniryuk, tuku lukamnitinge. Mun pum tam lyulamle mapu tuku lukikiba, keting dirina kum elilamak touk, winyamtinye.

¹⁷ Malye ulamice ninye dibikiba, weibicopura, tonap tamubuka kum malye unyake. Atonun, weik ikin pil bolamlinye dipliba, binuka weibice talak ara, apil tonap tamubuka kum donyake. Dikdik selbana uk unyake. Dibiceba weibicopura, ikin ning nirya, sik dam kum yatue. Na babye winyamtinye.”

¹⁸ “Tonda, mal olan talak olanmaca ani, mikip nang arye ton tam nang nirya obisibikirye, ton nang tomobuka, sik mutuku bobikiba, binuka ukirye, sik amu tam ikin pil dobuka ulamice nang babye, dibicopura, dikdik sena uk unyake. Akunum dibicopura, ikin pil dilamice nang, sik yupu tonap kum kekenyake.

¹⁹ Ninye akunum dibicopura, weik nang babye, bona utotoa talina kum nang babye, atonun wininyake. Tonda, talima erena kumce, pia amu tam unyak nang ara, sik deiyok nang damak batakikirye, telebuk unyake. Sik anang nirya ara, ikin kum unyaka ati, na babye winyamtinye. Atonun, ton nang ara, wenena aik noutamak dongobikiba, imun kanye bobuka bunyak ninye babye, tonda sik anang ati, ‘Bicak’ tenen, bublan dam kalikinyak nang babye, sik nirya dibicopura, tonok sukumuk unamake. Na babye winyamtinye.”

²⁰ “Yata deiyok ati, nun ni koproba Allah, ance namin kisimince, nun nirya imun kanye bopmabibuk, an dirina nun deice delisiminba, dirina kisulul do? Tonda, yata ati, imun kanye bobuka unyak nang ara, kam una deiyok ning areseminba, kam unyap do? Talye diptibye toura, teleb uka. Kanye imun weik unulula anya arye, kunuknak uk daulamtinye.

²¹ Kanye imun weik usilye talak ara, nun bona weik upsutu babye, ‘Aning mambule,’ pia kum tenenyabe. Aning tenena kum arye, ‘Dadiamtibye,’ tenenyabe. Ninye arye dekna weik ning ati, ‘Dan sukum ulul do?’ tenen, elamak touk, imun kanye bobuka unyap talak ara, ‘Minopce dadipteipye,’ tenenyabe. Ati, yata deiyok ati, dirina ap, kam una ap, tuba arisilyam do?

²² Kanye imun weik ulamsil nang dibibiyeba, weipsikcopura, kanye teleb aniryuk unyabe. Akunum dibipyopura, kanye deibuka unyabe. Aning ati ara, yata deiyok ati, imun kanye bobuka unyap talak ara, dirina ap, kam una ap, tuba arisilyam do? Teleb ning ara, dadiamtibye.”

²³ “Allah arye, ‘Ninye tonoknye ulyak ati, teleb ning el damak yanamle’ tenen, lelipdongopliba, el anye bira, weik kanye imun ning dolula anya arye, yata deiyok ati, kam una ning arepminba, kam tuba ulul do? Teleb ning ara, dadiamtue.

²⁴ Anyapmana ara, urdem ati kum nyapne. Deiyok ara, winipmanto ning teleb din ning do, yuk teleb un ning do, na dam ton pia kum yanganulule anya arye, kanye imun pia weik unulule. Ati, ‘Se, na kanye imun unulule,’ nyabuka ngalukunune. Tonda, makau arye mek kwebikiba, langdipmalibuk, dikiltaklamak tonun, kanye imun weik unilye ning ati, ngalukunirye, malye nyanune.

²⁵ ‘Aning ara, na dam yanilyak’ tenen, ilil ulamnuk ninguk, minopce na damak akunum yangalule. Tonda, ‘Se, ikin ning upnilyak’ tenen, ilil ulamnuk ninguk, na damak akunum pirinulule.”

²⁶ “Nara, aning unulula deice arye, teleb ubuka kum unune. Kanye imun ning ara, ton batakana kumce, pia tuba-tuba unulula ati, tunim abuka kum unune. Dikdik kum senun bukni, imun kanye bobuka unune,” Ayub birye nyabuk.