Ayub 29 - Eipomek

Ayub min talak telebuk ulamuk ning ap, ikin ning doprobuk ning ap, nirya ati yupu sirya, Allah dam ati, nyabuk yupu

¹ Ayub birye nyalamuk yupu, tonap dukdongobuka nyabuk.

² Se, ‘Min talak na kam ulamse touk, tonap aning atonun, teleb kibuka kam uptinyeʼ tenen, patapnile. Atalak ara, ‘Allah elce nati, melibuka kaliklamnukba, el amu tam ulamse atonun, tuba tonap winiptinye,’ tenenune.

³ Ara, nara tuba-tuba Allah elcuk melilamnuka ati, winipmanto ara, nyapnusine. Atalak Allah ara, weisa dirina atonun upnuka ati, na balamse bisik nirya ara, dirina upnuka deice arye, teleb bisikuk balamse. Ati, Allah el dirina deice aryuk, na ban talak ara, kuna noutam nirya ara, teleb kililamnukba, balamse.

⁴ Ulamse talak ara, asum-asum nirya, na wel ulamse talak atonun upnuka ati, tuba mikip ulamse. Diba, atalak na tenda arye domse aik, tia doltakan tenda aik noutam ulamsebuk, Allah ap, na ap, neika ulamnumu.

⁵ Atalak ara, Allah el aning-aning nirya talibuka, deice tam erebuka, mikip weik ulinye birye nati, tuba melilamnukba, na deiamse mapu nirya ara, na damuk ulamik.

⁶ Na talibuka weilamse sapi basam ap, kambing basam ap arye, moum yung ara, weik purubuka delilamse. Tonda, narye zaitun yo duk weik dakamsirye, keil pala deice arye, aning weik tonun purubuka delilamse. Winipsopura, zaitun mek ara, akeil pala deice arye, balamukba, kwebuka dilamse. Winipmanto ara, talye mek balamle touk, akeil pala noutam arye, banauk ulamnuk.

⁷ Atalak ara, na si weiknye ulamse ati, na mutuku nang arye, weik asik domikce, amutuku wekelban bisik bublan ati, kat ning el si ara besi, abublan el si ara, Pintu Gerbang, kintinip deibikak banmase talak ap, tonda na ap, amutuku nang ap, neika uruna ati, bunmupu talak ara, sik nirya ara, nati si erenmanik.

⁸ Ara, amutuku wisi-wisi nang nirya arye dilamnikak, na si erena ati, tekmeke. Tonda, sik tuba wel nang arye, na eipnopura, na si erena ati, tikmikce, kisik dakuka yukak binuka unmek. Sik wel nang ap, sik wisi nang ap arye, na eipnopura, nati adiparyuk si erelamnik.

⁹ Tonda, sik ninye deiyok nang nirya babye, dinmekce, ‘E, anye dam ara, talye yupu kum nyaptibyeʼ tenen, yupu kum nyalamik. Talye tunim abuka dinauk ulamnik.

¹⁰ Tonda, sik mambul weik deiyok nang babye, nati dilamnikak, ilil ubukba, yupu nyapmanto kum ulamik.

¹¹ ‘Yata nang do nirya, na nyalamse yupu nirya, moubuka kekepnopura, lilipnarye, moubuka tenilamik. Tonda, yata nang do nirya, na pil dolamse ning nirya akunum eipnopura, ‘E, anye bira, teleb piluk doluleʼ tenen, nati kibuka, si erelamnik.

¹² Ara talye ati kum bukni, deiyok ara, narye sik bona utotoa talina kum nang arye nati, “Melipsilyame,” nyabuka, moropnikopura, narye sikti, adiparyuk melilamsa atia. Tonda, yuk nang arye, kum melipmanto mapu ati, naryuk melilamsa atia.

¹³ Sik imun kanye uk bobuka, ikin ulamik nang arye, nati kibuka si erelamnikce, Allah arye, ‘Anye bira, teleb kilinamle!’ nyabuka, teleb yupu nyalamnik. Tonda, narye youwak kilapu, sik patan ning ati, melibuka arelamsiba, Sikda kanye lon mot ton nyalamikce, pin-pin kanye bobuka ulamik.

¹⁴ Tonda, Allah arye, “Wininamlume, aning ara, pia kum wininamlume,” nyapdeiamsuk touk, nara dipkoprob diksukum teleb ninguk winilamse. Malye ning ton kum winilamse. Tuba-tuba diksukum un ninguk talibuka ulamse ati, winipmanto ara, ninye arye cang baju, el si juba ap, tonda kaluna ati, sik kisok kitilamak ning teleb baju ap bobuka, sik nong deice ongolamak touk, nara telebuk ulamse.

¹⁵ Pia diksukumuk kibuka, amutuku nang weik tonun melilamse. Ati, winipmanto ara, sik asing kuamuk nang ati, nara sik anang asing dina atonunye ulamse. Tonda, yanuka malye kwaknamne nang ara, nara sik yan yanibuka bana atonun ulamse.

¹⁶ Tonda, sik talye bona utotoa talina kum nang ati, pia weik tonun melibuka arelamsa ati, nara sik ni koproba atonun ulamse. Tonda, sik ninye asik tikilyangan nang ati, nara wilibuka, sik tamnye atonun ulamsirye, na tam nang ati, “Ninye asik tikilyangan nang nirya ara, teleb kibuka melinamabe,” nyabuka, yupu nyalamse.

¹⁷ Bukni, sik mikip arye, ikin deibuka ulamik nang ati, narye sik mikip ara, amu kibuka delilamse. Tonda, sik obuka bataklamikba, ikin asa weik ulamik nang ara, narye sikti, melibuka lyelilamse.

¹⁸ Winibuka telebuk ulamse talak ara, narye utenelamse. Ara, ‘Kume, kam pia ulamnya ani, wisi danamne,’ tenyamse. Tonda, ‘Nara akunum wisi danyopura, teleb aryuk, na aik noutam daulamnya ani, kanye deibuka dipnamnarya,’ tenyamse.

¹⁹ Winipmanto ara, nara weik yo yating bisik ara, mek weklamlyeba, cang weik tonun tiklamle atonun ulamse. Tonda, yo tikamlyak arye, mok purye mek weklirye, ayo teleb ubuka, sukuplirye, palamle atonun ulamse.

²⁰ Atalak ara, na ulamse mutuku nang nirya arye, nati tuba kibuka si erelamnik. Tonda, na nong mikip babye, min kum wamnuke.

²¹ Tonda, mambul yupu nyan talak ara, na tenepse ning, akunum nyapnyopura, atalak ara, sik amot nirya ara, moubuka kekelamikce, yupu nyana kum, talye tunim abuka ulamik. Ara, ‘Anye yata mambul yupu ton dukdongobuka nyapnamsil do?’ tenen, sikda yupu ton nyana kum bukni, na nyalamse yupu nirya ara, sikce moubuka kekelamik.

²² Na yupu akunum nyapne talak ara, sik yuk nang arye ton, yupu tabakuka kum nyalamik. Na nyalamse yupu ara, sik deice ara, mok purye saklamle atonye ulamse. Sikda teleb kanye bobuka kekenauk ulamik.

²³ Na nyalamse yupu nirya ap, na pil dolamse ning nirya ara, ‘Se, aning ara, pia mambulʼ tenen, anang nirya arye, moubuka kekelamikce, moubuka dilamnik. Sikce kanye deibuka anyalamik yupu ara, kekebuka dololamik. Winipmanto ara, sik wa win nang arye, sik wa wibuka kouamikce ning, kita obuka duk mouplye talak ara, ‘Mok ceptue,’ tenebikceba, mok celyalyopura, kanye delilamaka atonun ulamik.

²⁴ Ikin ning, sik dam yangalamuk talak ara, sikce, ‘Se, aning ara, yata ning ati upsil do? Wini talak ara, yata wiriptibye do?’ tenen, talima dakalsaklamukba, winipmanto kum ulamik talak ara, narye anang eipnarye, siuk bataklasiba, sikda kanye delilamikce, tuba mikip kilamuk. Na asok deice mek butupnilirye, teleb upniliba, kanye deipnarye, sik anang ara, na eipnarye, ‘E, nun ni birye, kanye deipsileʼ tenen, tonap tabakuka pia kanye delilamik.

²⁵ Narye na mutuku ulamik nang ati, weik tonun melilamse. Winipmanto ara, ninye deiyok kibuka taleamsirye, “Aning nirya ara, winipnamlume, winipnamlume,” nyapnaba, winilamik. Narye sik dam ara, teleb kililamse ati, winipmanto ara, ninye deiyoknye Raja arye, el yin talin nang taliplirye, sik bona utotoa talina kum noutamuk ulamle touk, ubuka taleamsirye ulamse. Tonda, ninye dibikcopura, sik kwit capu arye, malye nyabuka engelamak talak ara, tonoknye birye, sik dam yanuka, melilan yupu nyaplyopura, sikti, kil-kil kililamak touk, narye sik amutuku nang ati winilamsirye, talilamse. Ayub birye, ayupu nirya nyabuk.